Voron-drano bey o ngovò sady mahatratse 190 kilometatse isan-dera ty falaky ty lia’e naho fa mitsoriake agnate riake agne. Mafe bey ty fipai’e amy i ranoy satria va’e hihoatse 20 amy ty hery misintogne amo o taneo. Akore ty atao’e mba tsy hahafate aze naho hahafaha’e magnerenkeregne mitsoriake hoe izay?

 Dineho zao: Naho fa hipaike amy i ranoy o ngovò, le velare’e afara’e ao i ela’ey, le manjare mitovy amo o filesio ty pozi’e. Mamoake raha karaza’e hafa miaro i maso’ey ka reke sady mampibokinake taova amy i tenda’ey eo naho amy i tratra’ey eo mba tsy ho mafe loatse ty fipai’e amy i ranoy.

 Manjare hoe raha maragnidragnitse i vava’ey naho i loha’ey vaho i tenda’ey, amy ireke mipaike amy i ranoy eo. Miparitake amy ze ozatse amy i tenda’ey iaby amy izay ty hery i rano mipaike ama’ey. Ova’e malaky ka ty fomba fagnente i maso’ey, le afake mahatrea agnate rano agne reke.

 Hatrake amy ty fire metatse agne ty iziliha o ngovò naho fa mitsoriake agnate rano agne? Hatrake amy ty 11 metatse latsake, faie mbe afake mizilike amy ty fara’e laleke agne reke naho fa mampiasa i ela’ey naho i tombo’ey. Fa nisy nahatrea ngovo nizilike hatrake amy ty 25 metatse mahery agne aza. Mitsikafogne ambone rano ey avao reke naho fa boake nandehandeha tagnate rano ao, sady vognogne hitiligne indraike.

 Henteo ty ngovo mitsoriake agnate rano agne retoa

 Namboatse robot mitovitovy amo o ngovò, o mpikarokeo mba hahafahagne mikaroke naho mamonje ndaty naho fa misy loza. Tea iareo naho afake mitiligne, mitsoriake agnate rano agne, le naho fa avy eo le avy le mitiligne i robot-oy. Faie simba avao i robot-oy naho fa nanao fagnandramagne iareo satria nipaike mafe bey tamy i ranoy. Nieke areke iareo tie tsy mahay mitsoriake agnate rano agne i robot nanoagne fagnandramagney, naho oharegne amo o ngovò.

 Akore ty heve’o? Niavy hoaze avao vao ty fahaia o ngovò mitsoriake agnate rano agne, sa nisy namorogne?