Tanbasá mak Testemuña ba Jeová la selebra Natál?

LOKE

Ema barak hanoin sala kona-ba ami, porezemplu:

Ema nia hanoin sala: Testemuña ba Jeová la selebra Natál tanba sira la fiar Jesus.

Realidade: Ami Testemuña ba Jeová mak ema Kristaun. Ami fiar katak liuhusi Jesus Kristu deʼit mak ita ema bele hetan salvasaun.—Apóstolu 4:12.

Ema nia hanoin sala: Testemuña ba Jeová haketak família tanba sira hanorin ema atu labele selebra Natál.

Realidade: Ami hanoin no hafolin tebes moris família, no ami uza Bíblia atu ajuda moris família nian sai metin liután.

Ema nia hanoin sala: Testemuña sira lakohi hatudu hahalok diʼak sira neʼebé ema barak hatudu durante tempu Natál, hanesan buka dame iha mundu tomak, hatudu laran-luak no laran-diʼak ba ema seluk.

Realidade: Ami hakaʼas an atu hatudu laran-luak no buka dame loroloron. (Provérbios 11:25; Roma 12:18) Porezemplu, ami halaʼo reuniaun no haklaken hodi halo tuir Jesus nia liafuan neʼebé dehan: “Imi simu hodi la selu, tan neʼe fó mós hodi la hein atu ema selu imi.” (Mateus 10:8) Ami mós fahe esperansa furak ba ema seluk katak Maromak nia Ukun deʼit mak sei lori dame ba mundu tomak.—Mateus 10:7.

Tanbasá mak Testemuña ba Jeová la selebra Natál?

Jesus haruka ema atu komemora ninia mate, laʼós ninia loron-moris.—Lucas 22:19, 20.
Jesus nia apóstolu no ninia dixípulu sira la selebra Natál. Tuir New Catholic Encyclopedia, “ema foin hahú selebra Jesus nia loron-moris tempu balu depois tinan 243 EC”, neʼe katak liutiha tinan atus ida resin depois apóstolu ida ikus mate.
Ema ida labele prova katak Jesus moris duni iha loron 25 Dezembru. Bíblia la fó sai kona-ba data neʼebé Jesus moris iha rai.
Ami fiar katak Maromak la kontente ho Natál, tanba Natál nia hun mak husi ema jentiu sira-nia kostume no selebrasaun.—2 Korinto 6:17.

Selebra deʼit Natál, neʼe la buat ida, loos ka lae?

Ema barak nafatin selebra Natál maski sira hatene ona katak Bíblia la fó-hatene ho loloos sá loron mak Jesus moris, no Natál nia hun mak husi ema jentiu nia selebrasaun. Karik sira hanoin: ‘Tanbasá haʼu tenke hanoin barak atu selebra ka la selebra Natál? Selebra Natál hodi halo kontente ema seluk, neʼe la buat ida, loos ka lae?’

Bíblia anima ita atu uza ita ida-idak nia “kbiit atu hanoin”. (Roma 12:1, 2) Bíblia mós hanorin ita atu hafolin lia-loos. (João 4:23, 24) Tan neʼe, maski ami hanoin ema seluk nia sentimentu kona-ba ami, maibé ami nafatin hakarak halo tuir Bíblia nia matadalan sira.

Maski ami la selebra Natál, maibé ami respeitu ema seluk nia direitu atu halo buat neʼebé sira hakarak, no ami la hanetik ema seluk neʼebé hakarak selebra Natál.