Testemuña ba Jeová gosta koʼalia ba ema husi relijiaun hotu kona-ba sira-nia fiar, maibé ami la halaʼo ami-nia adorasaun hamutuk ho ema neʼebé fiar la hanesan. Bíblia fó sai katak ema kristaun neʼebé loos, sira-nia “isin-lolon tomak tutan hamutuk ho didiʼak,” no buat ida neʼebé ajuda sira tutan hamutuk mak iha fiar ida deʼit. (Éfeso 4:​16; 1 Korinto 1:​10; Filipe 2:2) Se ita dehan katak ita hafolin hahalok hanesan domin, hanoin-malu, no fó-perdua, neʼe la toʼo hodi ita bele dehan katak ita iha fiar ida deʼit. Ami-nia fiar bazeia ba lia-loos husi Bíblia, no se livru neʼe la iha, ami-nia fiar sei saugati deʼit.​—Roma 10:​2, 3.

 Bíblia fó-hatene ita atu la kesi ita-nia an hamutuk ho ema neʼebé iha fiar la hanesan ho ita, tanba neʼe sei lori perigu ba ema kristaun nia fiar. (2 Korinto 6:​14-​17) Tan neʼe Jesus la fó lisensa ba ninia dixípulu sira atu halaʼo adorasaun hamutuk ho ema neʼebé fiar la hanesan. (Mateus 12:30; João 14:6) Hanesan neʼe mós, Maromak nia Ukun-Fuan neʼebé fó liuhusi Moisés ba ema Izraél iha tempu antigu, bandu sira atu labele adora Maromak hamutuk ho ema husi rai seluk neʼebé besik sira. (Êxodo 34:11-​14) Depois Moisés nia tempu, ema Izraél neʼebé hatudu fiar metin, sira la simu ajuda husi nasaun seluk, tanba sira lakohi atu halo aliansa relijiaun nian hamutuk ho ema neʼebé iha fiar la hanesan ho sira.​—Esdras 4:​1-3.

 Sin. Hanesan apóstolu Paulo, kuandu ami haklaken ami mós hakarak atu komprende “ema barak liu” ka ema maioria nia hanoin no oinsá sira halaʼo sira-nia fiar. (1 Korinto 9:​19-​22) Bainhira ami koʼalia ho ema, ami hakaʼas an aplika Bíblia nia konsellu atu hatudu “respeitu” ba ema seluk.​—1 Pedro 3:​15.