Ami-nia fiar sempre bazeia deʼit ba Bíblia, entaun dala ruma ami-nia hanorin no fiar troka uitoan kuandu ami komprende Bíblia ho klaru liután. a

 Bíblia mós hatete ona iha Provérbios 4:​18: “Ema laran-loos sira-nia dalan mak hanesan naroman dadeer nian neʼebé sai naroman liután toʼo loron fahe ba rua.” Iha dadeer-saan bainhira sei nakukun, loro-matan saʼe neineik-neineik no naroman liután toʼo ikusmai ita bele haree buat hotu ho momoos. Hanesan neʼe mós, Maromak sei ajuda ita ema atu komprende lia-loos husi Bíblia neineik-neineik hodi tuir ninia tempu. (1 Pedro 1:​10-​12) Bíblia mós fó-hatene nanis ona katak iha “tempu nia rohan” Maromak sei halo koñesimentu neʼebé loos sai barak liután.​—Daniel 12:4.

 Bainhira iha mudansa ruma kona-ba dalan neʼebé ami komprende Bíblia, Ita la presiza hakfodak ka laran-susar kona-ba mudansa neʼe. Ema neʼebé adora Maromak iha tempu antigu mós dala ruma iha hanoin neʼebé ladún loos, no sira presiza hadiʼa ida-neʼe.

•   Moisés hakarak salva nasaun Izraél, maibé tinan 40 liutiha mak Maromak foin hili nia atu salva sira.​—Apóstolu 7:​23-​25, 30, 35.

•   Jesus nia apóstolu sira la komprende profesia kona-ba Mesias neʼebé sei mate no depois moris hiʼas.​—Isaías 53:​8-​12; Mateus 16:21-​23.

•   Ema kristaun balu iha tempu antigu hanoin sala kona-ba “Jeová nia loron”.​—2 Tesalónika 2:​1, 2.

 Ikusmai, Maromak ajuda sira atu komprende ho loloos, no liuhusi orasaun, ami husu katak Maromak sei kontinua halo hanesan neʼe ba ami.​—Tiago 1:5.