Durante tinan balu foin lalais neʼe, problema ekonomia no krize oioin akontese iha Venezuela. Testemuña ida naran Edgar dehan: “Iha tinan balu nia laran deʼit, situasaun ekonomia iha Venezuela sai aat tebetebes toʼo ami sente katak ami hela iha nasaun seluk!”

 Saida mak ajuda Edgar atu adapta an ba situasaun? Nia dehan: “Haʼu-nia feen Carmen no haʼu hanoin kona-ba ezemplu husi misionáriu sira neʼebé muda ba rai neʼebé kiak no aprende oinsá halaʼo moris simples maski la iha buat neʼebé báziku. Neʼe motiva ami atu halo ami-nia moris simples liután no koko buat foun, hanesan kuda modo hodi ami bele han.”

 Maibé, Edgar no Carmen mós halo buat seluk tan. Sira ajuda hodi fó kmaan ba maluk fiar-naʼin sira, inklui sira neʼebé sente depresaun. (1 Tesalónika 5:11) Edgar dehan: “Ami laʼós fó kmaan deʼit, maibé koko atu anima sira hodi sira mós ajuda ema seluk no sente haksolok.”—Apóstolu 20:35.

 Kuandu pandemia COVID-19 hahú, irmaun Argenis deside atu haklaken ba ninia família. Família balu komesa estuda Bíblia liuhusi telefone.

 Argenis mós hakarak ninia família neʼebé labele asesu internét atu simu benefísiu husi reuniaun boot ba loron tolu neʼebé halaʼo iha tinan 2020. Testemuña ida neʼebé hela besik sira-nia sidade fó sira gravasaun kona-ba reuniaun boot neʼe. Tuirmai, Argenis nia família empresta televizaun boot ho koluna. Argenis telefone sira hodi hatoʼo orasaun antes programa hahú. Tanba Argenis hakaʼas an hanesan neʼe, ninia família naʼin-haat no mós ema seluk naʼin-15 tuir reuniaun boot neʼe.

 Iha kongregasaun ida, feen-laʼen ida naran Jairo no Johana deʼit mak iha karreta. Entaun, sira ho laran-luak uza sira-nia karreta atu ajuda ema seluk. Susar ida neʼebé sira hasoru mak atu hetan gazolina. Jairo dehan: “Ami hein oras barak atu enxe mina, dala ruma hein ba kalan tomak.”

 Jairo sente katak sira-nia hakaʼas an neʼe iha folin duni. Nia dehan: “Bainhira ami lori sasán ba irmaun-irmán sira, ami sente haksolok hodi haree katak sira agradese tebes ba Jeová, tanba Jeová mak fó buat hotu neʼebé ninia povu presiza.”—2 Korinto 9:11, 14.

 Maski irmán ida naran Norianni besik tinan 30 ona, nia sente katak ninia idade seidauk toʼo atu ajuda ema seluk ho didiʼak. Maibé nia lee 1 Timóteo 4:12 neʼebé dehan: “Keta husik ema ida la respeitu ó tan deʼit ó sei joven. Maibé sai nuʼudar ezemplu ba ema laran-metin sira.”

 Eskritura neʼe book Norianni atu ajuda irmaun-irmán neʼebé idade iha ninia kongregasaun hodi ajuda sira atu haklaken ho karta no mós konvida sira atu akompaña nia kuandu estuda Bíblia ho ema. Nia mós telefone sira no haruka mensajen neʼebé anima sira. Norianni dehan: “Jeová hatudu mai haʼu katak haʼu bele halo buat barak.”

 Ita-nia irmaun-irmán sira iha Venezuela hasoru problema oioin durante tempu susar neʼe. Maski nuneʼe, sira kontinua laran-manas atu haklaken no sai “ajuda-naʼin neʼebé fó kmaan duni” ba ema seluk.—Koloso 4:11; 2 Timóteo 4:2.