Iha 25 Jullu 2019, muzeu foun Bíblia nian loke iha Testemuña ba Jeová nia sukursál Fransa, iha sidade kiʼik Lourviers, neʼebé maizumenus dook kilómetru 100 husi París. Muzeu nia tema mak “Maromak nia naran no Bíblia iha lian Fransés”.

Muzeu neʼe iha Bíblia antigu barak iha lian Fransés neʼebé valór boot tanba susar atu hetan. Ida neʼebé importante tebes mak Bíblia Olivétan neʼebé fó sai iha tinan 1535, neʼebé mós iha naran “La Bible de Serrières”. Bíblia Olivétan mak Bíblia kompletu primeiru iha lian Fransés neʼebé Protestante mak prodús. Livru neʼe mós sai nu’udar Bíblia primeiru neʼebé tradús ba lian Fransés husi língua orijinál. Bíblia Olivétan fó impaktu boot ba dalan neʼebé ema tradús Bíblia seluk, neʼe inklui Matthew’s Bible iha lian Inglés iha tinan 1537, Bíblia Geneva iha lian Inglés no Bíblia Geneva iha lian Fransés. Bíblia úniku seluk neʼebé ita bele haree iha muzeu neʼe inklui Bíblia Lian Fransés husi Jacques Lefèvre d’Étaples edisaun terseiru neʼebé fó sai iha tinan 1541, Pentateuku Latín neʼebé fó sai iha tinan 1541, Bíblia Latín tinan 1545 neʼebé Robert Estienne mak prodús iha París no Bíblia Lian Fransés tinan 1557 neʼebé Jean de Tournes mak prodús iha sidade Lyon.

Bíblia Olivétan, Pentateuku Latín no Bíblia Latín neʼebé Estienne mak halo, no mós Jean de Tournes nia Bíblia, sira hotu uza Maromak nia naran Jeová. Ema fó Bíblia sira-neʼe ba Departamentu Muzeu iha Testemuña ba Jeová nia sede-jerál iha Warwick, Novaiorke. Bíblia sira-neʼe aumenta kolesaun Bíblia nian neʼebé sukursál Fransa halibur ona.

Enrique Ford husi Departamentu Muzeu hatete: “Muzeu Bíblia foun iha sukursál Fransa fó sai istória kona-ba Bíblia iha lian Fransés. Neʼe mós dada ema nia atensaun ba evidénsia neʼebé hatudu katak Maromak nia naran Jeová iha duni iha Bíblia laran. Ami kontinua buka Bíblia antigu sira neʼebé úniku hodi bele hatudu sai ami-nia kolesaun iha ami-nia muzeu sira iha rai oioin.