Kuandu Ita lakon serbisu, neʼe bele fó susar ba Ita laʼós deʼit kona-ba ekonomia, maibé mós bele halo Ita estrese no hanoin barak. Bíblia nia prinsípiu sira neʼebé ajuda ona ema barak husi tempu antigu, bele mós ajuda Ita. Haree toʼok sujestaun tuirmai.

•   Fó sai Ita-nia sentimentu ba ema seluk.

   Bíblia dehan: “Belun neʼebé loos hatudu domin iha tempu hotu.”—Provérbios 17:17.

   Bainhira lakon serbisu, karik Ita sente triste, hirus, konfuzaun, ka bele mós sente katak Ita-nia moris la susesu. Kuandu Ita fó sai Ita-nia sentimentu ba família ka belun sira, sira bele ajuda Ita atu sente kmaan. Karik sira mós fó sujestaun neʼebé ajuda Ita atu hetan serbisu foun.

•   Labele hanoin barak demais.

   Bíblia dehan: “Keta hanoin resin kona-ba loron aban, tanba loron aban iha ninia susar rasik.”—Mateus 6:34.

   Bíblia anima ita atu halo planu ba futuru. (Provérbios 21:5) Maibé, Bíblia mós dehan katak ita labele hanoin demais kona-ba futuru. Dala ruma, ita hanoin barak kona-ba buat neʼebé sei nunka akontese. Diʼak liu tau fokus ba buat neʼebé Ita presiza halo iha loron ida-idak.

   Bíblia fó sujestaun seluk tan neʼebé ajuda Ita oinsá atu tahan hasoru estrese. Atu hatene liután, lee informasaun “Saida mak Ita bele halo kuandu estrese”.

•   Hadiʼa dalan neʼebé Ita uza osan

   Bíblia dehan: “Haʼu aprende ona segredu kona-ba oinsá moris kontente maski . . . iha sasán barak ka la iha sasán.”—Filipe 4:12.

   Halo mudansa tuir Ita-nia situasaun agora. Neʼe inklui halo mudansa ba Ita-nia toman atu uza osan hodi la gasta barak liu fali osan neʼebé Ita iha. Kuidadu atu la debe osan se la presiza.—Provérbios 22:7.

   Atu haree sujestaun kona-ba oinsá mak Ita bele adapta an ba situasaun foun kona-ba ekonomia, haree informasaun “Oinsá atu moris ho osan uitoan deʼit?”

•   Uza Ita-nia tempu ho matenek

   Bíblia dehan: “Kontinua halaʼo moris ho matenek . . . hodi uza didiʼak imi-nia tempu.”—Koloso 4:5.

   Maski Ita la iha ona oráriu serbisu nian, maibé diʼak atu deside oinsá atu halaʼo Ita-nia moris no halo tuir oráriu neʼe. Neʼe sei ajuda Ita atu halaʼo didiʼak Ita-nia moris no sei halo Ita sente kontente ho Ita-nia an.

•   Adapta tuir situasaun.

   Bíblia dehan: “Serbisu makaʼas hotu sei lori buat diʼak.”—Provérbios 14:23.

   Sai prontu atu halo serbisu neʼebé la hanesan ho Ita-nia serbisu uluk nian. Karik Ita presiza halo serbisu neʼebé Ita ladún gosta ka serbisu ho saláriu uitoan deʼit.

•   Labele rende an.

   Bíblia dehan: “Kari ó-nia fini iha dadeer no keta husik ó-nia liman deskansa toʼo kalan, tanba ó la hatene ida-neʼebé mak sei moris.”—Eclesiastes 11:6.

   Kontinua buka serbisu. Fó-hatene ba ema seluk katak Ita buka daudauk serbisu. Koʼalia ho família, kolega, maluk serbisu uluk nian, no viziñu sira. Buka informasaun husi kompañia neʼebé oferese serbisu oioin, notísias kona-ba vaga iha fatin oioin no iha internét. Prepara an atu tuir entrevista barak husi kompañia oioin no hatama CV barak toʼo hetan serbisu.