Tuir Ita-nia hanoin, mundu nia situasaun sei sai diʼak iha futuru ka lae? Ema barak koko atu hanoin pozitivu kona-ba futuru maski hasoru hela problema oioin. Maibé iha ka lae evidénsia neʼebé hatudu katak buat hotu sei sai diʼak liu iha futuru? Sin! Bíblia fó duni esperansa kapás mai ita.

•  Bíblia fó esperansa saida mai ita?

•  Bíblia nia esperansa neʼe tebes ka lae?

•  Oinsá mak esperansa neʼe sei sai loos?

•  Bainhira mak esperansa neʼe sei sai realidade?

•  Oinsá mak Bíblia nia esperansa neʼe bele ajuda Ita ohin loron?

 Bíblia konkorda katak ita ema hasoru problema oioin neʼebé susar atu rezolve. Maibé, Bíblia mós fó sai katak problema sira-neʼe laʼós ba nafatin. Hanoin toʼok kona-ba ezemplu balu tuirmai.

•   Problema: Ema la iha uma

   Bíblia hatete: “Sira sei harii uma no hela iha laran.”—Isaias 65:21.

   Neʼe katak sá ba futuru: Ema hotu sei iha sira-nia uma rasik.

•   Problema: Kiak no la iha serbisu

   Bíblia hatete: “Sira neʼebé haʼu hili ona sei haksolok duni ho serbisu neʼebé sira halo ho sira-nia liman.”—Isaias 65:22.

   Neʼe katak sá ba futuru: Ema hotu sei haksolok no kontente ho sira-nia serbisu.

•   Problema: Justisa la iha

   Bíblia hatete: “Ulun-naʼin sira sei ukun ho justisa.”—Isaias 32:1.

   Neʼe katak sá ba futuru: La iha tan ema neʼebé trata aat ema seluk tanba sira-nia rasa, pozisaun sosiál, ka situasaun ekonomia. Ema hotu sei trata malu iha dalan neʼebé justu no la todan ba sorin.

•   Problema: Malnutrisaun no hamlaha

   Bíblia hatete: “Sei iha ai-han barak iha rai; foho-tutun sira sei nakonu ho ai-han.”—Salmo 72:16.

   Neʼe katak sá ba futuru: Ema hotu sei iha ai-han barak atu han. La iha ema ida mak sei hamlaha ka iha problema saúde tanba malnutrisaun.

•   Problema: Krime no violénsia

   Bíblia hatete: “Sira ida-idak sei tuur iha sira-nia uvas-hun okos no iha sira-nia ai-figeira hun okos, no sei la iha ema ida mak halo sira taʼuk.”—Miqueias 4:4.

   Neʼe katak sá ba futuru: Ema hotu sei sente seguru tanba ema aat sei la iha tan. No “ema laran-loos sira sei simu rai nuʼudar sira-nian”.—Salmo 37:10, 29.

•   Problema: Funu

   Bíblia hatete: “Nasaun sei la foti tan surik hasoru nasaun seluk, no sira mós sei la aprende tan funu.”—Isaias 2:4.

   Neʼe katak sá ba futuru: Mundu sei nakonu ho dame. (Salmo 72:7) La iha ema ida mak sei laran-triste tanba família mate iha funu. Ema sei la presiza tan sai refujiadu hodi halai-sees husi funu.

•   Problema: Moras

   Bíblia hatete: “La iha ema ida iha rai mak sei dehan: ‘Haʼu moras.’”—Isaias 33:24.

   Neʼe katak sá ba futuru: Ema sei la moras tan, no la iha ema ida mak sai aleijadu. (Isaias 35:5, 6) Bíblia mós promete katak “mate sei la iha tan”.—Apokalipse 21:4.

•   Problema: Mundu nia ambiente sai aat

   Bíblia hatete: “Rai-fuik no rai neʼebé maran-dekor sei haksolok, no rai-tetuk maran sei haksolok no sai nakonu ho ai-funan asafraun.”—Isaias 35:1.

   Neʼe katak sá ba futuru: Mundu tomak sei sai paraízu no ema hotu sei hela iha fatin furak hodi tuir Maromak nia hakarak horiuluk kedas.—Génesis 2:15; Isaias 45:18.

 Karik ita hanoin neʼe mak mehi deʼit. Maibé, ami hakarak anima Ita atu buka-hatene liután kona-ba Bíblia nia promesa ba futuru. Tanbasá? Promesa sira neʼebé Bíblia fó sai, la hanesan ho ema nia promesa sira. Bíblia nia promesa hotu mai husi Maromak. Maromak nia promesa la hanesan ho ema nian tanba razaun sira tuirmai:

•   Ita bele tau fiar ba Maromak. Bíblia dehan katak Maromak “nunka bosok”. (Tito 1:2) No mós só Maromak mesak deʼit mak iha kapasidade atu hatene kona-ba futuru. (Isaias 46:10) Buat neʼebé Maromak fó sai nanis sempre sai loos. Bíblia fó sai ezemplu barak neʼebé fó prova kona-ba neʼe. Atu hetan informasaun liután kona-ba neʼe, haree toʼok vídeo Tansá bele fiar katak Bíblia laʼós inventa deʼit?

•   Maromak iha forsa atu hadiʼa ita-nia problema sira. Bíblia dehan katak Maromak iha forsa atu kumpre “buat hotu neʼebé nia hakarak atu halo”. (Salmo 135:5, 6) Neʼe katak la iha buat ida mak bele hapara Maromak hodi kumpre ninia promesa sira. Liután neʼe, Maromak hakarak ajuda ita tanba nia hadomi ita.—João 3:16.

 Karik ita hanoin: ‘Se Maromak hakarak ajuda ita, no nia iha duni forsa atu halo nuneʼe, tansá mak ita hasoru nafatin problema sira?’ Atu hetan resposta ba pergunta neʼe, haree toʼok vídeo Tanbasá mak Maromak husik terus akontese?

 Maromak sei uza ninia Ukun, katak governu ida neʼebé iha lalehan, atu kumpre ninia promesa sira. Maromak hili Jesus Kristu nuʼudar Ukun-Naʼin ba governu neʼe, no fó nia knaar atu tau matan ba mundu no ba ema hotu. Durante Jesus moris iha mundu, nia kura ema moras, fó ai-han ba ema neʼebé hamlaha, kontrola klima, no mós fó moris-hiʼas ba ema mate. (Marcos 4:39; 6:41-44; Lucas 4:40; João 11:43, 44) Hodi halo buat hotu neʼe, nia hatudu sai buat neʼebé nia sei halo iha futuru nuʼudar Liurai ba Maromak nia Ukun.

 Atu aprende liután kona-ba benefísiu sira neʼebé Maromak nia Ukun sei lori ba ita, haree toʼok vídeo Saida mak Maromak nia Ukun?

 Lakleur tan! Oinsá mak ita bele hatene? Bíblia fó sai nanis kona-ba sinál sira neʼebé hatudu katak Maromak nia Ukun besik ona atu toʼo mai mundu neʼe. (Lucas 21:10, 11) Buat neʼebé Bíblia fó-hatene nanis kumpre daudaun ohin loron.

 Atu aprende liután kona-ba neʼe, lee toʼok informasaun “Bainhira mak Maromak nia Reinu sei ukun mundu neʼe?”

 Bíblia nia hakerek-naʼin ida kompara Bíblia nia esperansa neʼe ho “ankor neʼebé loos no metin ba ita-nia moris”. (Ebreu 6:19) Ankor ida bele halo ró metin durante anin-boot. Iha dalan neʼebé hanesan, Bíblia nia esperansa mós bele ajuda ita atu tahan problema sira neʼebé ita hasoru ohin loron. Ita-nia esperansa bele ajuda ita atu sente kalma no kontente, atu iha hanoin neʼebé loos, no mós atu iha saúde neʼebé diʼak.—1 Tesalónika 5:8.