Mundu neʼe bele iha justisa ka lae?
Mundu neʼe haree hanesan nakonu ho buat neʼebé la iha justisa. Haree toʼok ezemplu rua kona-ba ema neʼebé sai vítima ba kazu neʼebé la iha justisa:
Iha fulan-Janeiru 2018, juís ida iha Estadus Unidus fó orden atu hasai mane ida husi komarka. Mane neʼe tama komarka besik tinan 38, maibé ikusmai teste DNA hatudu katak nia la halo sala.
Iha fulan-Setembru 1994, mane joven naʼin-tolu iha nasaun ida iha Áfrika tama komarka tanba sira-nia konxiénsia la husik sira serbí iha militár. Toʼo fulan-Setembru 2020, sira tama komarka ba tinan 26 ona maibé seidauk hetan julgamentu iha tribunál.
Se Ita mós hasoru situasaun neʼebé la justisa, karik Ita sente hanesan mane ida iha Bíblia nia tempu naran Job, neʼebé dehan: “Haʼu kontinua halerik hodi husu ajuda, maibé justisa la iha.” (Job 19:7) Karik Ita sente mundu neʼebé nakonu ho justisa mak hanesan mehi deʼit, maibé tuir loloos Bíblia promete kona-ba tempu neʼebé sei la iha tan ema ida mak halerik hodi husu justisa. Bíblia mós fó sai matadalan neʼebé bele ajuda Ita atu tahan situasaun la justisa ohin loron.
Tanbasá la iha justisa?
Situasaun la justisa mosu tanba ema lakohi halo tuir Maromak nia matadalan. Bíblia hatudu katak justisa neʼebé loos mai husi Maromak. (Isaias 51:4) Iha Bíblia, liafuan neʼebé tradús nuʼudar “justisa” iha ligasaun metin ho “hahalok loos”. (Salmo 33:5) Hahalok neʼebé loos tuir Maromak nia hakarak sei lori justisa. Maibé hahalok sala, neʼebé la tuir Maromak nia matadalan, sei hamosu situasaun la justisa. Hanoin toʼok ezemplu tuirmai:
Hanoin an. Hahalok hanoin an iha ligasaun metin ho sala. (Tiago 1:14, 15) Ema barak trata ema seluk iha dalan neʼebé la justisa hodi bele hetan buat neʼebé sira hakarak. Maibé tuir loloos, Maromak hakarak ita atu buka uluk ema seluk nia diʼak.—1 Korinto 10:24.
La iha koñesimentu. Ema balu la ho neon trata ema seluk la ho justisa. Maibé hahalok neʼe nafatin sala tuir Maromak nia haree. (Roma 10:3) Tuir loloos, ema neʼebé la iha koñesimentu mak hamosu situasaun aat liu neʼebé la tuir justisa bainhira sira fó kastigu-mate ba Jesus Kristu.—Apóstolu 3:15, 17.
Ema nia organizasaun. Organizasaun polítiku, negósiu, no relijiaun iha mundu hatete katak sira promove justisa. Maibé realidade, dala barak organizasaun sira-neʼe mak hun ba komprende sala, korrupsaun, diskriminasaun, kaan-teen, la iha igualdade kona-ba ekonomia no la hatudu toleránsia. Buat hotu neʼe bele hamosu situasaun la justisa. Klaru katak ema balu apoia organizasaun sira-neʼe ho objetivu neʼebé diʼak. Maibé ikusmai ema nia hakaʼas an sira-neʼe labele hetan susesu se sira la simu matadalan husi Maromak.—Eclesiastes 8:9; Jeremias 10:23.
Maromak hanoin kona-ba situasaun la justisa ka lae?
Sin, nia odi situasaun neʼebé la justisa no mós ema nia hahalok neʼebé kria situasaun neʼe. (Provérbios 6:16-18) Nia haruka profeta Isaias atu hakerek: “Haʼu, Jeová, a hadomi justisa; haʼu odi naʼok no hahalok la loos.”—Isaias 61:8.
Ukun-Fuan neʼebé Maromak fó ba ema Izraél antigu hatudu katak nia hakarak ema atu halaʼo justisa. Nia bandu juís sira atu labele simu prezente atu bobar lia-loos no labele halo buat oioin neʼebé bele kria situasaun la justisa. (Deuteronómio 16:18-20) Nia fó avizu makaʼas ba ema Izraél sira neʼebé haterus ema kiak no ema kiʼik sira, toʼo ikusmai nia la simu tan sira tanba sira la halo tuir ninia matadalan.—Isaias 10:1-3.
Maromak sei halakon situasaun la justisa ka lae?
Sin. Liuhusi Jesus Kristu, Maromak sei halakon sala neʼebé hamosu situasaun la justisa, no Maromak mós sei halo ema sai perfeitu hodi tuir Ninia hakarak. (João 1:29; Roma 6:23) Nia mós harii ona governu ida neʼebé sei halo mundu neʼe nakonu ho hahalok loos no lori justisa ba ema hotu. (Isaias 32:1; 2 Pedro 3:13) Atu aprende liután kona-ba Maromak nia governu iha lalehan, haree vídeo Saida mak Maromak nia Ukun?
Iha mundu foun, ema nia moris sei sai oinsá?
Bainhira mundu neʼe sai nakonu ho justisa, rezultadu mak ema hotu sei moris ho dame no seguru. (Isaias 32:16-18) Maromak hafolin ema hotu, tan neʼe justisa sei iha ba ema hotu. Ema sei la triste tan, ka tanis, ka neon-susar tanba situasaun la justisa, no memória aat pasadu nian mós neineik-neineik sei lakon. (Isaias 65:17; Apokalipse 21:3, 4) Atu hatene liután, haree informasaun “Saida mak Maromak nia Reinu sei halo?”
Ita bele fiar duni ba Maromak nia promesa kona-ba mundu neʼebé nakonu ho justisa ka lae?
Sin. Ita bele tau fiar ba Bíblia nia promesa sira tanba ninia profesia barak sai loos ona, no Bíblia mós fó sai informasaun neʼebé loos kona-ba istória no siénsia, no informasaun iha parte ida ho parte seluk la kontra malu. Informasaun tuirmai sei ajuda Ita:
Oinsá kona-ba luta hasoru situasaun la justisa agora?
Ema diʼak balu iha Bíblia nia tempu buka dalan atu rezolve situasaun neʼebé la iha justisa. Porezemplu, apóstolu Paulo hetan ameasa husi ema neʼebé hakarak oho nia iha julgamentu neʼebé la iha justisa. Maibé Paulo uza dalan legál atu lori kazu neʼe ba César duké simu deʼit situasaun la justisa.—Apóstolu 25:8-12.
Maibé, ema nia hakaʼas an atu hadiʼa hotu situasaun la justisa sei la hetan susesu. (Eclesiastes 1:15) Maski nuneʼe, ema barak hetan ona ajuda atu sente dame iha laran maski sira hasoru situasaun la justisa, tanba sira tau fiar ba Maromak nia promesa kona-ba mundu foun.
a Jeová mak Maromak nia naran.—Salmo 83:18.
Karik Ita sei gosta
TÓPIKU SELUK TAN
Loron ida, governu nia korrupsaun sei lakon ba nafatin ka lae?
Haree razaun tolu neʼebé halo ita fiar metin ba governu úniku ida neʼebé nunka halo korrupsaun.
TÓPIKU SELUK TAN
Loron ida terrorizmu sei lakon ba nafatin ka lae?
Nuʼudar ita hein ba tempu neʼebé la iha tan violénsia, ita bele aplika sujestaun rua husi Bíblia neʼebé bele ajuda ita atu tahan kuandu hetan ameasa ka trauma husi terrorizmu.
