Funu remata iha tinan 1945, maibé ami-nia moris susar nafatin. Tanba ami mak ema Alemaun, governu Xekoslovákia haruka ami bá Alemaña. Sidade sira iha Alemaña rahun no ema barak kiak tebes. Dala ruma haʼu-nia tia sira forma kalan tomak atu simu ai-han uitoan deʼit. Tempu seluk, ami bá ai-laran kuʼu ai-fuan no buka kulat, no ami troka buat sira-neʼe ho paun. Tanba hahán mak limitadu tebes, ema naʼok ema seluk nia animál hakiak atu han. Dala barak ami toba ho hamlaha.

 Haʼu-nia avó sira mak Katólika, maibé ami la iha Bíblia. Padre lakohi faʼan Bíblia ba haʼu-nia avó-mane, no dehan katak povu baibain presiza rona deʼit misa. Entaun, haʼu-nia avó-mane labele hetan resposta ba ninia pergunta barak kona-ba Maromak.

 Bainhira haʼu tinan hitu, Testemuña ba Jeová naʼin-rua vizita ami-nia uma. Sira uza Bíblia atu fó resposta ba haʼu-nia avó-mane nia pergunta kona-ba doutrina Trindade, infernu, no ema mate nia kondisaun. Haʼu-nia avó-mane hetan Bíblia nia resposta neʼebé klaru, no nia fiar katak nia hetan ona lia-loos. Depois, ami-nia família tomak komesa estuda Bíblia ho feen-laʼen Testemuña.

 Maski haʼu sei kiʼik, haʼu komesa hadomi tebes Jeová. Haʼu gosta lee kona-ba misionáriu sira neʼebé serbí Jeová iha rai dook. Haʼu hanoin: ‘Sira-nia moris oinsá? Kuandu haklaken ba ema neʼebé nunka rona Jeová nia naran, ema sira-neʼe sente oinsá?’

 Bainhira haʼu tinan 12, haʼu foti desizaun atu sai misionária, no komesa buka dalan atu kumpre haʼu-nia planu. Ulukliu, haʼu hakaʼas an atu haklaken liafuan diʼak ho badinas. Depois, iha 12 Dezembru 1954, haʼu hetan batizmu, no tuirmai haʼu sai pioneiru. Haʼu-nia planu besik sai loos!

 Haʼu komprende katak haʼu presiza hatene Inglés atu tuir Eskola Gilead ba misionáriu sira, tan neʼe haʼu hakaʼas an atu aprende Inglés. Haʼu hanoin haʼu bele pratika ho soldadu Amérika neʼebé iha Alemaña. Loron ida haʼu hakbesik soldadu ida no hatete: “Haʼu mak Kristu.” Nia hateke ba haʼu no dehan: “Karik alin hakarak hatete: ‘Haʼu mak ema Kristaun.’” Haʼu-nia Inglés seidauk moos!

 Kuandu haʼu maizumenus tinan 20, haʼu muda ba Inglaterra, no halo serbisu iha dadeer-saan atu tau matan ba família Testemuña ida nia bebé. Iha lokraik, haʼu bá haklaken uma ba uma, no neʼe fó oportunidade mai haʼu atu pratika Inglés. Liutiha tinan ida, haʼu-nia Inglés sai diʼak liután.

 Haʼu fila ba Alemaña, no iha Outubru 1966, haʼu simu konvite atu serbí nuʼudar pioneiru espesiál iha Mechernich. Maibé ema iha fatin neʼe malirin kona-ba lia-loos no la interese, hanesan ho klima iha neʼebá. Sira nunka konvida ami atu tama uma maski iha tempu malirin tebes. Dala barak haʼu halo orasaun ba Jeová no husu: “Se loron ida Ita husik haʼu serbí nuʼudar misionária, favór ida, haruka haʼu ba rai neʼebé manas.”

 Haʼu serbí nuʼudar pioneiru espesiál ba fulan balu deʼit, tuirmai Jeová halo haʼu-nia hakarak sai loos. Haʼu simu konvite atu tuir Eskola Gilead klase 44 ba misionáriu sira, no gradua iha 10 Setembru 1967. Haʼu simu knaar atu bá neʼebé? Bá rai-Nikarágua iha Amérika Sentrál, neʼebé furak no manas! Misionáriu sira iha neʼebá simu haʼu no kolega naʼin-tolu ho liman rua. Haʼu sente hanesan apóstolu Paulo neʼebé “fó agradese ba Maromak no sai aten-brani” bainhira maluk fiar-naʼin sira simu nia.—Apóstolu 28:15.

 Haʼu simu knaar atu serbí iha sidade kiʼik León no haʼu hakaʼas an atu aprende lalais lian Españól. Haʼu estuda Españól oras 11 loroloron ba fulan rua, maibé susar ba haʼu atu aprende!

 Loron ida, uma-naʼin oferese fresco ba haʼu, neʼe mak liafuan neʼebé ema Nikarágua uza ba sumu. Haʼu hatete ba nia katak haʼu bele hemu deʼit “bee neʼebé tais ona”. Maibé feto neʼe oin bilán. Liutiha loron balu, haʼu rekoñese katak haʼu koʼalia sala, haʼu dehan fali haʼu bele hemu deʼit “bee santu”! Maibé neineik-neineik haʼu-nia Españól sai diʼak.

 Dala barak, haʼu estuda Bíblia ho família tomak. Haʼu sente seguru iha sidade León, entaun haʼu gosta halaʼo estuda iha kalan, dala ruma toʼo tuku 10 kalan. Haʼu hatene ema barak nia naran iha sidade kiʼik neʼe. Kuandu haʼu fila uma, haʼu hasé no koʼalia halimar ho viziñu sira neʼebé tuur hela iha sira-nia uma oin atu hola anin fresku.

 Haʼu ajuda ema balu aprende lia-loos iha sidade León. Ida mak Nubia, neʼebé iha oan-mane naʼin-ualu neʼebé sei kiʼik. Haʼu kontinua estuda ho nia toʼo tinan 1976 kuandu haʼu simu knaar foun no muda ba Managua. Haʼu lakon kontaktu ho Nubia no ninia oan sira ba tinan 18 toʼo tempu neʼebé haʼu fila ba León atu tuir reuniaun boot. Durante tempu deskansa iha reuniaun boot, grupu mane-klosan haleʼu haʼu. Sira mak Nubia nia oan! Haʼu kontente tebes hodi hatene katak Nubia konsege haboot ninia oan sira iha lia-loos.

 Maizumenus besik tinan 1980, rai-Nikarágua komesa iha problema sosiál no polítiku barak. Ami kontinua haklaken hodi tuir situasaun. Haʼu-nia haklaken-fatin mak sidade Masaya, neʼebé iha parte súl husi sidade kapitál. Dala barak ema halo protesta no baku malu iha fatin neʼe. Kalan ida, durante reuniaun, ami presiza latan iha rai iha reuniaun-fatin, tanba Sandinista no governu nia guarda sira tiru malu. a

 Loron seluk, kuandu haʼu haklaken, haʼu haree Sandinista ida taka oin metin no tiru hela guarda. Haʼu koko halai, maibé sira seluk neʼebé taka oin metin mosu tan. Haʼu halai no tama dalan seluk maibé labele halai sees husi sira. Tuirmai elikópteru governu nian komesa tiru rajada ba sira. Derrepente, mane ida loke ninia odamatan no dada haʼu ba laran. Haʼu sente katak Jeová salva haʼu!

 Haʼu serbí iha Masaya toʼo 20 Marsu 1982, neʼe mak loron neʼebé haʼu sei nunka haluha. Iha loron neʼe, kuandu haʼu no misionáriu naʼin-lima seluk atu matabixu hamutuk, ami haree soldadu Sandinista barak neʼebé kaer kilat tama husi uma kotuk. Sira tama mai laran, no soldadu ida ho hirus hatete: “Imi iha oras ida atu haloot sasán iha mala ida, no tuir ho ami.”

 Soldadu sira lori ami ba toʼos, no halo ami hein ba oras balu. Tuirmai sira tau haʼu no misionáriu naʼin-tolu seluk iha bís no lori ami ba fronteira Kostarrika no duni sai ami husi Nikarágua. Ikusmai sira duni sai misionáriu naʼin-21.

 Irmaun-irmán sira iha Kostarrika simu ami, no loron tuirmai ami bá sukursál iha São José. Maibé ami la hela iha neʼebá kleur. Liutiha loron 10 ami naʼin-ualu simu knaar foun atu serbí nuʼudar misionáriu iha rai-Onduras.

 Iha Onduras, haʼu simu knaar atu serbí iha sidade Tegucigalpa. Haʼu serbí iha neʼebá ba tinan 33, no haree oinsá husi kongregasaun ida aumenta ba kongregasaun ualu. Maibé triste katak krime no violénsia aumenta barak iha sidade Tegucigalpa. Iha naʼok-teen barak, no dala balu sira hadau haʼu-nia sasán. Iha neʼebá mós iha gang neʼebé toman husu osan ba haʼu, hodi hatete katak osan neʼe mak “impostu funu nian”. Haʼu dehan ba sira: “Haʼu iha buat ruma neʼebé folin boot liu fali osan”, no fó broxura ka livru ba sira. Sira sempre husik haʼu bá deʼit!

 Ema barak iha sidade Tegucigalpa gosta dame no laran-diʼak, no haʼu ajuda ema balu aprende lia-loos. Porezemplu, mana Betty estuda Bíblia ho haʼu no haree hanesan nia laʼo ba oin, maibé loron ida nia fó-hatene haʼu katak nia sei tuir igreja Evanjélika. Neʼe halo haʼu triste, maibé tinan rua liu tiha, Betty husik igreja neʼe no komesa estuda fali ho haʼu. Tanbasá nia hakarak estuda fali? Betty hanoin fali domin neʼebé Testemuña sira hatudu ba nia. (João 13:34, 35) Nia hatete: “Imi simu ema hotu ho domin iha reuniaun sira maski sira kiak ka riku. Imi la hanesan ema seluk.” Ikusmai, Betty hetan batizmu.

 Iha tinan 2014, uma misionáriu iha Tegucigalpa taka, no haʼu simu knaar foun iha rai-Panamá. Agora haʼu hela iha uma misionáriu hamutuk ho misionáriu naʼin-haat seluk neʼebé mós serbí tempu kleur ona.

 Haʼu serbí nuʼudar misionária ba tinan 55 ona. Maibé agora haʼu labele halo barak tanba iha problema saúde. Jeová ajuda haʼu kontinua serbí nia no hanorin ema kona-ba nia.

 Oinsá se haʼu uza haʼu-nia moris ba planu seluk? Se haʼu tuir planu seluk, haʼu sei lakon bensaun barak! Haʼu iha belun barak no oan-mane no oan-feto espirituál naʼin-50 neʼebé haʼu ajuda atu aprende lia-loos. Laʼós “família boot” neʼe deʼit, haʼu mós simu domin no apoiu husi haʼu-nia tia Steffi, neʼebé hela iha Alemaña.

 Maski haʼu la kaben, haʼu nunka sente mesamesak. Jeová sempre hamutuk ho haʼu. Haʼu hetan belun barak, hanesan Marguerite Foster neʼebé serbí hamutuk ho haʼu nuʼudar misionária ba tinan 17. Ami iha esperiénsia barak hamutuk, no belun nafatin toʼo agora.—Provérbios 18:24.

 Buat neʼebé halo haʼu kontente liu mak tanba haʼu uza haʼu-nia moris iha dalan neʼebé diʼak liu no serbí Jeová ho laran tomak. Haʼu-nia mehi kona-ba misionária sai realidade duni, no haʼu hetan esperiénsia barak neʼebé kapás! Haʼu sente kontente, no hakarak atu serbí Jeová ba nafatin.