Ulukliu, mai ita hanoin kona-ba Maromak nia Liafuan Bíblia neʼebé fó sai lia-loos furak ida katak Maromak haree duni ema nia terus hotu no nia hakarak ajuda sira. (Salmo [Mazmur] 72:13, 14) Bíblia promete katak ‘sira neʼebé agora hetan terus, Maromak sei halo sira livre’. Bainhira loos mak Maromak halo sira livre? Bíblia dehan: “Iha tempu neʼebé Naʼi Jesus mosu mai husi lalehan hamutuk ho ninia anju sira, . . . nia sei selu aat ba sira neʼebé la hatene Maromak no ba sira neʼebé la halo tuir liafuan diʼak kona-ba ita Naʼi Jesus.” (2 Tesalónika 1:7, 8) Loos, iha aban-bainrua Jesus sei toʼo mai atu halo funu “iha Maromak Kbiit Boot Liu Hotu nia loron boot”, katak funu Armajedón.—Apokalipse 16:14, 16.

Iha funu Armajedón, Maromak sei la haruka ema atu halo funu, maibé nia haruka ninia Oan-Mane Jesus Kristu ho anju sira atu funu hasoru ema aat hotu. Maromak nia tropa lalehan nian sei halakon terus hotu iha rai.—Isaías (Yesaya) 11:4; Apokalipse 19:11-16.

Horiuluk kedas toʼo ohin loron, Maromak la troka ninia hanoin. Ba Maromak, halo funu atu salva ema husi terus laran no halakon ema aat mak buat neʼebé loos. Maibé Maromak deʼit mak iha direitu atu deside sé mak bele halo funu no bainhira mak bele halo funu. Hanesan temi tiha ona, Maromak  deside ona katak ninia Oan-Mane Jesus Kristu mak sei halo funu atu halakon terus hotu no selu fali ema aat sira-nia hahalok. Tan neʼe, ohin loron Maromak la apoia ema sé deʼit neʼebé halo funu maski karik sira halo funu tanba hakarak hasai sira-nia maluk husi terus laran.

Hanoin toʼok kona-ba ai-knanoik ida-neʼe: Iha maun-alin naʼin-rua neʼebé haksesuk malu no baku malu. Sira telefone sira-nia aman neʼebé bá hela fatin ruma. Maun hahú kesar dehan, nia alin mak buka uluk problema ho nia, maibé alin neʼe kesar fali dehan, nia maun mak baku uluk nia. Sira ida-idak hakarak sira-nia aman apoia sira. Bainhira sira koʼalia hotu tiha, aman neʼe haruka sira labele baku malu tan no hein toʼo nia fila ba uma mak foin rezolve sira naʼin-rua nia problema neʼe. Sira hein, maibé lakleur deʼit sira komesa baku malu fali. Bainhira aman neʼe toʼo iha uma, nia sai hirus no fó kastigu ba sira tanba sira la rona ba nia.

Ohin loron, nasaun sira neʼebé halo funu, sira sempre harohan ba Maromak tanba sira ida-idak hakarak Maromak atu apoia sira. Maibé hanesan aman ida, Maromak la todan ba sorin no la apoia ema neʼebé halo funu, tanba ninia Liafuan Bíblia dehan: “Keta selu aat ho aat ba ema.” (Roma 12:17, 19) Liután neʼe, Maromak hakarak ema hotu hein ba nia ho pasiénsia, tanba Maromak deʼit mak bele rezolve ema nia problema hotu liuhusi ninia funu Armajedón. (Salmo [Mazmur] 37:7) Se ema halo funu ho sira-nia kbiit rasik, Maromak la simu ida-neʼe tanba sira kontra ninia liafuan. Iha funu Armajedón, Maromak sei fakar sai ninia hirus, nia sei rezolve nasaun hotu nia problema no “sei hapara funu toʼo rai nia rohan”. (Salmo [Mazmur] 46:9; Isaías [Yesaya] 34:2) Neʼe duni, funu Armajedón mak funu ikus, liutiha neʼe funu sei la iha tan.

Liutiha funu Armajedón, Maromak nia Reinu, ka Ukun sei lori bensaun barak ba ema iha rai. Jesus harohan kona-ba neʼe, hodi dehan: “Halo Ita-nia reinu toʼo mai ami; halo tuir Ita-nia hakarak ba iha rai nuʼudar iha lalehan.” (Mateus 6:10, Liafuan diak ba imi, segunda edisaun) Loos, Maromak nia Ukun sei halakon funu husi ninia abut kedas, neʼe mak hodi halakon ema aat hotu. * (Salmo [Mazmur] 37:9, 10, 14, 15) Tan neʼe ema hotu neʼebé halo tuir Kristu hein ba Maromak nia Ukun neʼebé sei haraik bensaun barak ba ema.—2 Pedro 3:13.

Toʼo bainhira loos mak ita tenke hein ba Maromak nia Ukun atu halakon terus, susar, no ema aat hotu? Bíblia hatete katak tempu agora mak “loron ikus sira” ba mundu aat neʼe, tanba buat neʼebé Bíblia fó-hatene nanis sai loos daudaun. (2 Timóteo 3:1-5) * Lakleur tan, Maromak nia Ukun sei halo loron ikus sira-neʼe remata ho ninia funu Armajedón.

Hanesan temi tiha ona, iha funu Armajedón ema “sira neʼebé la halo tuir liafuan diʼak kona-ba ita Naʼi Jesus” mak sei mate. (2 Tesalónika 1:8) Maibé ita mós hatene katak Maromak “lakohi ema ida lakon” ka mate, inklui mós ema aat. (Ezequiel [Yehezkiel] 33:11; 2 Pedro 3:8, 9) Tan neʼe agora, Maromak hakarak liafuan diʼak kona-ba ita-nia Naʼi Jesus tenke habelar ‘iha mundu tomak nuʼudar sasin ba nasaun hotu’ antes mundu nia rohan toʼo mai. (Mateus 24:14; 1 Timóteo 2:3, 4) Ho ida-neʼe mak ami Testemuña ba Jeová hakaʼas an haklaken ba ema hotu iha mundu tomak atu sira bele hatene liután kona-ba Maromak no halo tuir liafuan diʼak kona-ba Jesus, hodi nuneʼe sira bele moris ba nafatin no haree ho matan rasik tempu neʼebé funu la iha tan ona.