“Buat saida deʼit neʼebé ó hakarak, hatete deʼit, haʼu prontu atu halo ba ó.” Liafuan hirak-neʼe, baibain Ita-Boot sei la koʼalia ba ema neʼebé Ita-Boot la koñese ka kolega neʼebé ladún besik. Maibé liafuan hirak-neʼe, Ita-Boot sei koʼalia ba belun diʼak. Neʼe tanba belun diʼak sira kontente atu fó laran ba malu.

Bíblia dehan, Maromak Jeová halo buat barak hodi fó ksolok ba ema neʼebé adora nia. Porezemplu, Liurai David, ema neʼebé sai Maromak nia belun dehan: “Oh, Jeová, haʼu-nia Maromak, Ita rasik halo ona buat barak, Ita-nia serbisu neʼebé furak no Ita-nia hanoin ba ami. . . . Sira sai barak liu fali buat neʼebé haʼu bele konta.” (Salmo [Mazmur] 40:5) Liután neʼe, maski ema neʼebé seidauk hatene Maromak Jeová, maibé Maromak mós hatudu laran-diʼak ba sira ‘hodi fó sira ai-han barak no halo nakonu sira-nia laran ho ksolok.’—Apóstolu 14:17.

Tanba Maromak Jeová gosta fó ksolok ba ema, ema neʼebé hakarak sai Maromak nia belun mós tenke hatudu hahalok diʼak neʼebé halo ninia “laran kontente”. (Provérbios [Amsal] 27:11) Entaun Ita-Boot presiza halo saida deʼit? Bíblia fó resposta: “Keta haluha atu halo diʼak no fahe buat neʼebé  imi iha ba ema seluk, tanba buat sira-neʼe hanesan sakrifísiu neʼebé monu loos ba Maromak nia laran.” (Ebreu 13:16) Neʼe katak atubele monu loos ba Maromak nia laran, ita presiza halo buat diʼak no fahe buat neʼebé ita iha ba ema seluk. Maibé neʼe toʼo ona ka lae?

Bíblia dehan: “Se fiar la iha, ita la bele halo Maromak nia laran kontente.” (Ebreu 11:6) Abraão bele sai “Jeová nia belun” tanba “Abraão tau fiar ba Jeová”. (Tiago 2:23) Jesus Kristu mós hatete beibeik katak se hakarak simu bensaun husi Maromak, tenke “hatudu fiar ba Maromak”. (João 14:1) Maibé, oinsá mak Ita-Boot bele iha fiar neʼebé monu loos ba Maromak nia laran? Ita-Boot presiza estuda beibeik Maromak nia Liafuan, Bíblia. Hodi halo nuneʼe Ita-Boot sei ‘hatene didiʼak Maromak nia hakarak’ no aprende oinsá mak bele “halo kontente nia iha dalan neʼebé kompletu”. Neʼe duni, bainhira Ita-Boot kontinua hatene barak liután lia-loos kona-ba Maromak Jeová no halo tuir ninia ukun-fuan sira neʼebé loos, Ita-Boot nia fiar sei sai boot no metin liután. Rezultadu mak Maromak sei hakbesik liután ba Ita-Boot nuʼudar belun.—Koloso 1:9, 10.