LIA-DADOLIN neʼe, ema barak iha rai-Ázia mak temi beibeik, no ema barak iha rai seluk mós konkorda duni ho liafuan neʼe. Kona-ba husu debe iha kolega, família, loja, ka iha banku, Ita-Boot mós hanoin hanesan neʼe ka lae? Dala ruma ita sente katak ita presiza duni debe, maibé neʼe diʼak ka lae? Se ita debe karik, neʼe bele lori rezultadu saida deʼit?

Lia-dadolin ida seluk mós dehan: “Fó debe no husu debe halo ema oin-suar ba malu.” Loos, debe osan ba malu bele halo ita hirus malu ho belun ka família. Maski ema ida promete ona no hakarak atu fó fali debe, maibé karik neʼe la sai hanesan buat neʼebé nia hakarak. Porezemplu, bainhira tempu neʼebé promete atu fó fali debe neʼe liu tiha, maibé ema neʼebé debe osan mós la mai fó fali, neʼe halo ema neʼebé fó debe hanoin barak toʼo rai hirus iha laran. Ikusmai sira naʼin-rua haree malu la diʼak ona, aat liután mak ida neʼebé fó debe nia família ho ida neʼebé simu debe nia família mós haree malu la diʼak ona. Neʼe duni, tanba debe osan bele lori rezultadu aat hanesan neʼe, ita presiza hanoin didiʼak uluk lai antes atu debe.

Debe osan mós bele estraga ita-nia relasaun diʼak ho Maromak. Oinsá? Primeiru, Bíblia hatete katak ema ida neʼebé debe no lakohi selu fali ninia tusan, nia mak ema aat. (Salmo [Mazmur] 37:21) Segundu, Bíblia mós dehan: “Ema neʼebé empresta sai atan ba ema neʼebé fó-empresta.” (Provérbios [Amsal] 22:7) Sin, ema neʼebé debe sai atan, tanba nia la bele livre husi ema neʼebé fó debe ba nia toʼo nia selu hotu debe neʼe. Lia-dadolin ida tan dehan: “Tane liman mai ho oin-midar, kumu liman fila ho laran-triste.” Liafuan neʼe katak durante ema ida iha tusan boot, neʼe halo nia hanoin barak no la livre atu halo buat neʼebé nia rasik hakarak.

Tan neʼe, se ema ida debe ona osan, diʼak liu mak tenke fó fali lalais. Se lae, problema oioin bele mosu. Debe osan mak tusan neʼebé halo ema laran-susar iha loron no toba la dukur iha kalan. Debe mós halo ema tenke serbisu makaʼas atu selu fali, halo feen-laʼen haksesuk malu tanba osan, toʼo família naksobu. Ema balu, tanba debe osan, tenke rezolve iha tribunál, no balu tan tenke tama komarka tanba la bele fó fali ninia debe. Bíblia dehan: “Keta iha tusan ho ema ida, maibé imi-nia tusan mak hadomi malu.”—Roma 13:8.

Tan neʼe, bainhira ita hanoin atu debe osan, ita tenke kuidadu hodi husu didiʼak ba ita-nia an: ‘Haʼu presiza debe duni ka lae? Haʼu debe osan tanba haʼu hakarak “buka moris” hodi tau matan ba haʼu-nia família ka lae? Ka, haʼu debe tan deʼit haʼu kaan osan no buka moris diʼak neʼebé tuir loloos haʼu-nia kbiit la toʼo?’ Baibain, diʼak liu atu moris simples deʼit no laiha tusan duké halaʼo moris neʼebé nakonu ho tusan.

Maibé dala ruma ita presiza duni debe osan, porezemplu kuandu buat ruma mosu derrepente no ita-nia situasaun mak obriga ita atu debe. Maibé se ita tenkesér debe duni, ita presiza nafatin hatudu laran-moos no laran-loos. Oinsá?

Primeiru, ita labele aproveita ema ida nia laran-diʼak tan deʼit ita hanoin nia mak ema neʼebé riku liu. Ita labele mehi katak ema neʼebé iha osan barak mak tenkesér ajuda ita. Ita mós labele sente katak ita la presiza fó fali ita-nia debe ba ema hanesan neʼe. Keta laran-moras ba ema neʼebé haree hanesan moris diʼak.—Provérbios (Amsal) 28:22.

Segundu, ita tenkesér fó fali osan neʼebé ita debe, no keta demora. Se ema neʼebé fó debe ba ita la dehan bainhira loos mak nia hakarak ita atu fó fali, ita mak tenkesér koʼalia kona-ba neʼe, no ita presiza halo tuir ita-nia liafuan. Diʼak mós atu hakerek surat promete ida kona-ba neʼe hodi nuneʼe labele komprende sala ba malu no hamosu problema. (Jeremias [Yeremia] 32:9, 10) Bainhira atu fó fali debe, se bele, diʼak liu ita rasik mak bá fó fali no hatoʼo obrigadu. Se ita hatudu laran-moos no hahalok diʼak, neʼe halo ema fiar ita no haree malu diʼak nafatin. Jesus hatete: “Se imi dehan ‘sin’, tenkesér sin, no ‘lae’, tenkesér lae.” (Mateus 5:37) Liután neʼe, keta haluha Jesus dehan: “Buat hotu neʼebé imi hakarak ema halo ba imi, imi mós tenke halo ba sira.”—Mateus 7:12.

Bainhira ita hanoin atu debe osan, hanoin didiʼak lai buat neʼebé Bíblia dehan: “Se ita kontente ho buat neʼebé ita iha ona, ita bele duni manán buat diʼak barak liuhusi ita-nia adorasaun ba Maromak.” (1 Timóteo 6:6) Neʼe katak se ita kontente ho buat neʼebé ita iha ona, ita la presiza debe osan tan hodi hatodan ita-nia moris. Maibé, tanba mundu neʼe nakonu ho ema neʼebé hakarak haksolok hodi hetan moris diʼak kedas deʼit, tan neʼe la fasil duni ba ema atu moris simples ho kontente. Nuneʼe, oinsá mak “ita-nia adorasaun ba Maromak” bele proteje ita?

Porezemplu, feen-laʼen kristaun ida iha rai-Ázia, uluk sira hakarak tebes atu moris hanesan ema riku neʼebé hela iha uma diʼak. Tan neʼe, sira hola uma ida hodi uza osan hotu neʼebé sira iha, no debe tan osan barak husi banku no família sira. Maibé lakleur deʼit, sira sente todan tebes atu fó fali debe neʼe fulan-fulan. Sira tenke serbisu oras naruk, neʼe halo sira la iha tempu atu hamutuk ho oan sira. Laʼen neʼe dehan: “Haʼu hanoin barak, laran-susar, toba la dukur. Buat hirak-neʼe halo haʼu sente hanesan haʼu tutur fatuk boot ida no halo haʼu dada iis ladiʼak.”

Ikusmai, sira hanoin filafali eskritura ida iha 1 Timóteo 6:6 no foti desizaun katak dalan ida deʼit atubele hadiʼa sira-nia situasaun mak faʼan tiha sira-nia uma. No liutiha tinan rua mak sira foin selu hotu sira-nia debe. Husi esperiénsia neʼe, sira aprende saida? Sira hatete: “Bainhira ita hanoin kona-ba sasán ka osan, hanoin tuir Maromak nia matadalan proteje duni ita husi rezultadu aat.”

Ema barak hatene lia-dadolin neʼebé temi iha leten, maski nuneʼe sira sei nafatin debe osan. Maibé hanesan Maromak nia Liafuan hanorin mai ita, diʼak liu ita ida-idak hanoin didiʼak pergunta neʼe: ‘Haʼu tenke debe osan ka lae?’