ISTÓRIA-NAʼIN ida husi rai-Grésia, naran Heródoto, neʼebé moris maizumenus tinan 2.500 liubá, nia konta istória kona-ba ema Egiptu iha ninia tempu. Nia hakerek katak iha ema riku sira-nia festa, depois han tiha, ema ida lori kaixaun ho estátua neʼebé halo husi ai. Estátua neʼe pinta no bahat atu haree hanesan ema mate duni. Nia lori ba hatudu ema ida-idak iha festa neʼe no hatete: “Hemu no haksolok bá, tanba kuandu ita mate, ita sei sai hanesan neʼe.”

La’ós ema Egiptu deʼit mak iha hanoin hanesan neʼe kona-ba moris no mate. Ohin loron mós, ema barak hatete: “Han, hemu no haksolok bá”, no neʼe sai ona hanesan buat neʼebé baibain. Sira hanoin: “Se ita hotu sei mate, diʼak liu goza deʼit ita-nia moris agora. Tansá tenke hakaʼas an atu halo buat neʼebé loos?” Apóstolu Paulo mós esplika ema nia hanoin neʼebé la fiar ba moris-hiʼas hodi hatete: “Mate sira la moris hiʼas karik; ‘Ita han no hemu bá, basá aban ita sei mate’.”—1 Korinto 15:32.

Apóstolu Paulo fiar duni katak ema mate sei moris fali, no sira iha esperansa atu la mate tan. Oinsá mak nia bele iha fiar-metin hanesan neʼe? Neʼe tanba akontesimentu ida neʼebé importante tebes, neʼe mak Jesus Kristu nia moris-hiʼas. a Paulo tau fiar duni ba ida-neʼe, no neʼe mak buat neʼebé hametin ema kristaun sira-nia fiar.

Maibé Jesus nia moris-hiʼas kona ita oinsá? Oinsá mak ita bele hatene katak ida-neʼe akontese duni? Mai ita haree oinsá mak apóstolu Paulo esplika kona-ba neʼe kuandu nia hakerek ninia karta ba ema kristaun iha sidade Korinto.

Iha tempu antigu, ema kristaun balun iha sidade Korinto konfuzaun kona-ba moris-hiʼas, no seluk fali la fiar ida-neʼe. Iha apóstolu Paulo nia karta primeiru ba ema kristaun iha neʼebá, nia temi kona-ba rezultadu balun neʼebé sei mosu se esperansa kona-ba moris-hiʼas la iha. Nia hakerek: “Ema mate la moris hiʼas karik, neʼe duni Kristu mós la moris hiʼas. No Kristu la moris hiʼas karik, neʼe duni lia neʼebé ami haklaken mós folin-laek; imi-nia fiar mós folin-laek. Neʼe duni, ami sai sasin bosok ba Maromak . . . imi-nia fiar leet deʼit; imi sei hela iha imi-nia sala. No sira neʼebé toba tiha iha Kristu lakon tiha hotu.”—1 Korinto 15:13-18.

“Nia mosu ba maun-alin naʼin-atus lima resin ida tempu ida deʼit . . . Tuirmai, nia mosu ba Tiago, hafoin ba apóstolu sira hotu. Ikusmai, . . . nia mosu mai haʼu.”—1 Korinto 15:6-8

Paulo komesa koʼalia hodi dehan buat ruma neʼebé ita la bele nega: Se ema mate la bele moris hiʼas, neʼe katak Kristu neʼebé mate mós la bele hetan moris-hiʼas. No se Kristu la moris hiʼas karik, neʼe katak haklaken liafuan diʼak sei sai saugati deʼit. Tuir loloos, Jesus nia moris-hiʼas mak importante tebes ba ema kristaun nia fiar, tanba neʼe iha ligasaun ho hanorin sira seluk husi Bíblia, hanesan hanorin kona-ba Maromak nia direitu atu ukun, ninia naran, ninia governu iha lalehan, no ita-nia salvasaun. Maibé se Jesus la moris hiʼas, neʼe katak mensajen neʼebé Paulo no apóstolu sira seluk haklaken, neʼe la iha folin.

Se karik Kristu la moris hiʼas husi mate, ema kristaun nia fiar tomak sei sai saugati deʼit tanba sira-nia fiar bazeia ba buat neʼebé bosok. Liután neʼe, Paulo no sira seluk koʼalia bosok, laʼós deʼit kona-ba Jesus nia moris-hiʼas maibé mós kona-ba Maromak Jeová neʼebé fó moris-hiʼas ba Jesus. No mós, se Jesus la moris hiʼas karik, ita la bele dehan katak “Kristu mate tan ita-nia sala”, tanba se Maromak la salva Jesus husi mate, Jesus mós la bele salva ema seluk. (1 Korinto 15:3) Se nuneʼe, ema kristaun sira neʼebé mate tiha ona, inklui mós sira neʼebé mate tan sira-nia fiar, saugati deʼit ba sira atu tau fiar ba esperansa kona-ba moris-hiʼas.

Paulo hatete: “Ita fiar iha Kristu ba moris ida-neʼe deʼit karik, ita mak povu kasian liu ema hotu-hotu.” (1 Korinto 15:19) Hanesan ema kristaun sira seluk, Paulo mós hasoru susar oioin no ema fó-terus ba nia tanba nia fiar ba moris-hiʼas. Maibé se moris-hiʼas neʼe mak bosok deʼit, saugati deʼit ba Paulo atu hasoru susar hirak-neʼe.

Maibé, Paulo la fiar katak buat neʼebé ema kristaun sira hanorin mak bosok deʼit. Nia hatene katak Kristu hetan moris-hiʼas duni no nia esplika ba ema Korinto sira katak: “Kristu mate tan ita-nia sala sira tuir eskritura; katak ema hakoi nia; katak liu tiha loron tolu, nia moris hiʼas tuir eskritura; katak nia mosu ba Cefas, tuirmai ba sira sanulu-resin-rua.” b Depois Paulo hatutan tan: “Neʼe hotu tiha, nia mosu ba maun-alin naʼin-atus lima resin ida tempu ida deʼit, no sira-neʼe barak sei moris daudaun, maski balun toba tiha. Tuirmai, nia mosu ba Tiago, hafoin ba apóstolu sira hotu. Ikusmai, . . . nia mosu mai haʼu.”—1 Korinto 15:3-8.

Paulo komesa koʼalia ho fiar-metin katak Kristu mate tan ita-nia sala, katak ema hakoi nia no katak nia moris hiʼas husi mate. Tanbasá mak  Paulo fiar duni ida-neʼe? Razaun ida mak tanba iha ema barak neʼebé sai sasin hodi haree ho sira-nia matan rasik. Depois Jesus moris hiʼas tiha, nia mosu ba ema barak. Dala ruma nia mosu ba ema ida deʼit, hanesan ba Paulo, no nia mós mosu ba grupu kiʼik balu. Dala ida nia mosu ba ema naʼin-500, no ema barak husi neʼe karik uluk la fiar kuandu sira rona katak Jesus moris hiʼas tiha. (Lucas 24:1-11) Husi sasin sira-neʼe, barak sei moris hela iha Paulo nia tempu no sira bele konta buat neʼebé sira rasik haree. (1 Korinto 15:6) Se ema ida ka rua deʼit mak haree Jesus moris hiʼas, karik susar ba ita atu fiar katak Jesus moris hiʼas duni. Maibé ita la bele nega buat neʼebé ema naʼin-500 mak haree.

Paulo mós dehan ba dala rua katak Jesus nia mate no mós ninia moris-hiʼas mak “tuir eskritura”. Buat sira-neʼe hatudu katak profesia sira kona-ba Mesias iha Eskritura Lia-Ebraiku mak sai loos ona, no katak Jesus mak Mesias duni.

Maski ema barak mak sai sasin ba Jesus nia moris-hiʼas, no maski eskritura mós hatudu kona-ba ida-neʼe, maibé iha tempu neʼebá no mós ohin loron, iha ema neʼebé la fiar nafatin katak Jesus moris hiʼas. Ema balu dehan katak ninia dixípulu sira mak naʼok ninia mate-isin no depois hatete katak sira haree Jesus moris hiʼas. Maibé ida-neʼe la bele, tanba Jesus nia dixípulu sira la iha kbiit no direitu atu hasoru guarda Roma nian neʼebé hein iha Jesus nia rate. Ema seluk fali dehan katak ema loloos la haree Jesus neʼebé moris hiʼas tiha ona, maibé sira imajina deʼit. Maibé ida-neʼe mós la bele, tanba ema barak haree Jesus iha fatin no situasaun oioin. No mós, Bíblia dehan katak depois Jesus moris hiʼas tiha, nia tunu ikan iha Galileia, maibé oinsá mak nia bele halo ida-neʼe se nia mak buat neʼebé ema imajina deʼit? (Joao 21:9-14) Liután neʼe, kuandu Jesus moris hiʼas, nia husu ema atu kaer koko nia isin, maibé klaru katak Jesus la bele halo ida-neʼe se nia mak buat neʼebé ema imajina deʼit, loos ka lae?—Lucas 24:36-39.

 Ema seluk fali fiar katak Jesus nia moris-hiʼas, ninia dixípulu sira mak inventa deʼit. Maibé hanoin toʼok, Jesus nia dixípulu sira hetan susar barak tanba sira haklaken kona-ba Jesus nia moris-hiʼas. Sira terus no sira balu mós mate. Maibé tanbasá mak sira halo ida-neʼe se sira mak inventa deʼit istória kona-ba Jesus nia moris-hiʼas? Klaru katak sira sei la halo ida-neʼe, loos ka lae? Liután neʼe, sira fó sasin kona-ba neʼe iha Jerusalém, iha sira-nia inimigu sira-nia oin, neʼebé hakarak buka razaun naran deʼit atu fó kastigu ba sira.

Tuir loloos, Jesus nia moris-hiʼas mak buat neʼebé fó aten-brani ba ninia dixípulu sira atu fó sasin kona-ba Jesus maski sira hasoru susar barak. Jesus nia moris-hiʼas sai nuʼudar hanorin importante tebes iha ema kristaun nia fiar. Ema kristaun sira iha tempu uluk la tau sira-nia moris iha perigu laran tan deʼit atu fó sasin kona-ba mestre matenek ida neʼebé ema oho. Sira haklaken kona-ba Jesus nia moris-hiʼas tanba ida-neʼe hatudu katak Jesus mak Kristu, Maromak nia Oan, ida neʼebé iha forsa boot neʼebé bele ajuda sira no dirije sira. Tanba Jesus moris hiʼas, neʼe katak ninia dixípulu sira mós sei moris hiʼas husi mate. Tuir loloos, se Jesus la moris hiʼas karik, fiar kristaun nian mós la iha. No se Jesus la moris hiʼas, karik ita sei nunka hatene kona-ba nia.

Maibé oinsá mak Jesus nia moris-hiʼas kona ita ohin loron?