DALA ruma ó mós ulun-toos no lakohi atu halo tuir ka lae?— * Karik dala ruma ó nonton programa iha televizaun neʼebé ó-nia amá-apá dehan katak labele. Karik depois ó nonton tiha, ó sente ladún diʼak tanba ó la halo tuir sira. Naaman mak ema ida neʼebé foufoun la halo tuir. Mai ita haree oinsá nia hetan ajuda atu la sai ulun-toos tan.

Naaman mak ema-boot ida neʼebé moris maizumenus tinan 3.000 liubá. Nia mak xefe ba tropa Síria. Nia iha toman atu manda ninia soldadu sira, no sira sempre halo tuir nia. Maibé Naaman hetan moras aat ida naran moras-lepra. Ida-neʼe halo nia isin sai dodok no karik nia isin mós sente moras tebes.

Naaman nia feen iha atan-feto labarik ida husi Israel. Loron ida, labarik neʼe fó-hatene ba Naaman nia feen kona-ba ema ida husi Israel naran Eliseu. Nia hatete katak mane neʼe bele kura Naaman. Kuandu Naaman rona kona-ba neʼe, nia hakarak bá kedas atu hasoru Eliseu. Nia no ninia soldadu sira bá Israel no lori prezente barak. Nia bá hasoru Israel nia liurai atu fó-hatene tanbasá mak nia mai.

Kuandu Eliseu rona kona-ba neʼe nia haruka mensajen ba liurai atu haruka Naaman bá hasoru nia. Kuandu Naaman toʼo tiha Eliseu nia uma, Eliseu la sai, maibé nia haruka ema ida atu fó-hatene ba Naaman atu hariis iha Mota Jordaun ba dala hitu. Eliseu hatete katak hodi halo nuneʼe, Naaman sei sai diʼak fali. Tuir ó-nia hanoin, oinsá mak Naaman sente kona-ba neʼe?—

 Naaman sai hirus. Nia sai ulun-toos no nia lakohi atu halo tuir Maromak nia profeta. Nia dehan ba ninia soldadu sira: ‘Iha ita-nia rain iha mota sira neʼebé diʼak liu fali mota ida-neʼe.’ Naaman komesa atu fila. Tuir ó-nia hanoin, saida mak soldadu sira hatete ba nia?— Sira dehan: ‘Se Eliseu haruka Ita-Boot atu halo buat neʼebé susar, Ita-Boot sei halo nuneʼe, loos ka lae? Agora, nia haruka Ita atu halo buat neʼebé simples deʼit, tanbasá mak Ita-Boot la bele halo tuir?’

Naaman rona ba buat neʼebé nia soldadu sira hatete. Dala neen nia tama-sai iha mota, no kuandu nia tama-sai ba dala hitu, nia hakfodak atu haree katak ninia moras lakon ona. Nia sai isin-diʼak fali. Nuneʼe, Naaman bá kedas Eliseu nia uma neʼebé dook maizumenus kilómetru 48 atu fó-agradese ba nia. Naaman hakarak atu fó prezente folin-boot ba Eliseu, maibé Eliseu lakohi simu buat ida.

Entaun Naaman husu buat ruma husi Eliseu. Ó hatene saida mak nia husu?— Nia hatete: ‘Fó mai haʼu rai-metan uitoan hodi haʼu-nia kuda-burru rua lori ba haʼu-nia rain.’ Ó hatene tanbasá mak nia hakarak ida-neʼe?— Naaman hatete katak maski nia hela iha ninia rain rasik, nia hakarak hasaʼe sakrifísiu ba Maromak iha rai-metan neʼe nia leten. Nia hakarak halo nuneʼe tanba rai neʼe mai husi Maromak nia povu Israel. Depois neʼe, Naaman promete atu la adora tan maromak seluk, maibé adora deʼit Maromak Jeová. Nia la ulun-toos tan, no nia hakarak atu halo tuir Maromak neʼebé loos.

Ó hatene oinsá ó bele sai hanesan Naaman?— Se dala ruma ó ulun-toos hanesan nia, ó mós bele troka ó-nia hahalok. Ó bele simu ajuda hodi la sai ulun-toos tan.