Hanorin Ita-nia oan

Nia simu domin husi Maromak no nia belun sira

LA IHA ema ida ohin loron neʼebé hatene nia naran. Ita hatene deʼit ninia aman nia naran, Jefté. Mai ita loke Bíblia no buka-hatene kona-ba sira naʼin-rua. Ita bele hatene katak Jefté nia oan-feto simu domin husi Maromak Jeová no mós husi nia belun sira.

Ita bele lee istória kona-ba Jefté no ninia oan-feto iha Bíblia iha livru Juízes (Hakim-Hakim) kapítulu 11. Tanba Jefté mak ema neʼebé laran-metin ba Maromak, ita bele fiar katak nia hanorin beibeik ninia oan-feto kona-ba Eskritura sira.

Jefté moris iha tempu neʼebé Maromak nia povu Israel seidauk husu Maromak atu foti liurai ida atu ukun sira. Jefté mak ema neʼebé forte no matenek atu halo funu. Tan neʼe ema Israel sira husu nia atu sai tropa nia ulun hodi funu hasoru ema Amon. Ema Amon mak nasaun ida neʼebé besik Israel no kleur ona sai funu-balun ho Israel.

Jefté hakarak Maromak nia ajuda atu manán ema Amon, tan neʼe nia halo promete ba Maromak. Jefté hatete ba Maromak Jeová: ‘Se Ita ajuda haʼu manán funu, haʼu sei fó ba Ita ema primeiru neʼebé sai husi haʼu-nia uma atu hasoru haʼu kuandu haʼu fila.’ Neʼe katak ema neʼe tenke serbí iha Maromak nia tabernákulu iha ninia moris tomak. Tabernákulu mak fatin adorasaun iha tempu neʼebá. Tuir ó-nia hanoin, sé mak sai uluk husi uma hodi hasoru Jefté?— *

 Loos, Jefté nia oan-feto mak sai uluk! Jefté sente triste tebes. Feto neʼe Jefté nia oan mesak deʼit. Maibé nia halo promete tiha ona ba Maromak Jeová no tenke halo tuir. Kuandu Jefté nia oan-feto hatene kona-ba neʼe, feto neʼe hatete kedas: “Haʼu-nia aman, se Ita loke ona Ita-nia ibun ba Jeová, halo tuir bá buat neʼebé sai ona husi Ita-nia ibun.” Tuirmai, oan-feto neʼe husu nia aman atu nia bele bá foho ba fulan rua hodi tanis hamutuk ho nia belun sira. Tansá nia triste? Tanba kuandu nia halo tuir ninia aman nia juramentu, nia labele kaben no iha oan. Maski nuneʼe, nia la buka ninia hakarak uluk. Nia hakarak halo tuir ninia aman no laran-metin ba Maromak Jeová. Tuir ó-nia hanoin, nia halo Maromak Jeová no ninia aman kontente ka lae?—

Entaun, Jefté hatán nia oan-feto atu bá hamutuk ho nia belun sira toʼo fulan rua. Bainhira nia oan-feto fila fali, Jefté halo tuir nia promete no haruka oan neʼe ba Maromak nia tabernákulu iha Silo hodi serbí iha neʼebá durante nia moris tomak. Tinan-tinan, feto joven sira husi Israel bá Silo hodi fó laran-manas ba Jefté nia oan-feto.

Ó hatene joven sira neʼebé halo tuir sira-nia inan-aman no hadomi Maromak Jeová?— Diʼak atu hakbesik ba joven sira-neʼe no habelun ho sira. Se ó halo tuir Jefté nia oan-feto nia ezemplu hodi sempre halo tuir no hatudu laran-metin, ó sei hetan belun sira neʼebé diʼak. Ó mós bele halo ó-nia inan-aman kontente, no Maromak Jeová mós sei hadomi ó.

Lee husi ó-nia bíblia

Deuteronômio (Ulangan) 6:4-6

Juízes (Hakim-Hakim) 11:30-40

1 Korinto 7:37, 38

[Nota–rodapé]