Lee-naʼin nia pergunta . . .

Maromak mak halo Diabu ka lae?

▪ Bíblia dehan katak Maromak “hakiak buat hotu-hotu”, tan neʼe ema balu hanoin katak Maromak mak halo Diabu. (Efeso 3:9; Apokalipse 4:11) Maibé Bíblia hatudu ho klaru katak neʼe la loos!

Maromak Jeová kria duni anju ida neʼebé ikusmai halo ninia an sai Diabu Satanás. Tan neʼe, ita presiza haree didiʼak saida mak Bíblia hatudu kona-ba Maromak Jeová nuʼudar Kriadór, atu komprende oinsá mak anju neʼe sai Diabu neʼebé kontra hasoru Maromak. Kona-ba Maromak, Bíblia hatete: “Buat neʼebé nia halo mak perfeitu, tanba ninia dalan hotu mak justisa. Maromak laran-metin, neʼebé sempre iha justisa; nia loos no laran-moos.” (Deuteronômio [Ulangan] 32:3-5) Husi liafuan neʼe, ita bele hatene katak kuandu Maromak kria anju neʼebé ikusmai sai Diabu Satanás, nia mak anju neʼebé perfeitu no laran loos nuʼudar Maromak nia oan ida. Iha Joao 8:44, Jesus hatete katak Diabu “la hela iha lia-loos”, neʼe katak uluk Satanás mak anju neʼebé laran loos no moos.

Maibé hanesan ho Maromak Jeová nia kriatura seluk hotu, anju neʼebé ikusmai sai Satanás mós iha liberdade atu hili kona-ba buat neʼebé loos ka sala. Maski nuneʼe anju ida-neʼe uza liberdade neʼe atu kontra hasoru Maromak no halo Adão no Eva atu la halo tuir Maromak. Nuneʼe, nia halo nia an sai Satanás, katak “Ida neʼebé Kontra Hasoru”.—Gênesis (Kejadian) 3:1-5.

Anju aat neʼe mós halo nia an sai Diabu, katak “Bosok-Teen”. Satanás mak lohidór neʼebé ita ema la bele haree. Nia uza samea atu bosok Eva atu kontra Maromak nia ukun-fuan. Tan neʼe Jesus bolu Satanás nuʼudar “lia-bosok nia aman”.—Joao 8:44.

Maibé anju ida neʼebé perfeitu no la iha mós buat ida neʼebé book nia atu halo sala, oinsá mak nia bele sai fali anju aat? Klaru katak nia komesa atu kaan adorasaun neʼebé laʼós ninian maibé Maromak nian, no nia hanoin katak nia mak bele ukun ema diʼak liu duké Maromak Jeová. Nia la halakon kedas hanoin aat neʼe, maibé nia husik nafatin hanoin neʼe sai buras iha ninia laran, toʼo ikusmai ida-neʼe book nia atu halo buat ruma. Livru Tiago esplika oinsá mak hahalok aat bele mosu: “Ema hetan tentasaun wainhira nia hakarak aat rasik mak koko nia. Hakarak aat neʼe fó fuan, no lori ba sala.”—Tiago 1:14, 15; 1 Timoteo 3:6.

Hanoin toʼok ezemplu ida-neʼe: Ema ida serbisu hodi toma konta ba osan iha negósiu ida. Loron ida nia haree katak nia iha oportunidade atu naʼok patraun nia osan. Se nia hakarak, nia bele halakon kedas hanoin aat neʼe husi nia laran. Maibé se nia husik hanoin aat neʼe sai buras iha ninia laran, ikusmai nia halo tuir ninia hakarak neʼebé sala. Se nia naʼok osan, neʼe katak nia halo nia an sai naʼok-teen. Se nia koʼalia bosok atu subar nia sala, nia mós sai bosok-teen. Hanesan neʼe mós, hodi haburas hanoin aat no halo tuir hanoin neʼe, anju neʼebé uluk diʼak uza liberdade atu hili atu kontra hasoru ninia Aman. Tan neʼe nia rasik mak halo nia an sai Diabu Satanás.

Bíblia hatudu katak lakleur tan iha tempu neʼebé loos Maromak sei halakon Diabu Satanás. (Roma 16:20) Maibé antes neʼe, ema neʼebé adora Maromak Jeová bele hatene husi ninia Liafuan kona-ba oinsá mak Diabu lohi ema no sira hetan protesaun husi nia lasu sira. (2 Korinto 2:11; Efeso 6:11) Entaun, hakaʼas an bá hodi “halo funu hasoru Diabu no nia sei halai husi imi”.—Tiago 4:7.

[Liafuan ne’ebé foti husi pájina 19]

Anju ida neʼebé uluk diʼak hili atu kontra hasoru Maromak no halo nia an sai Satanás