Bíblia troka ema nia moris

OINSÁ mak feto ida neʼebé serbisu iha bar, gosta tolok, hemu lanu, no uza droga, konsege troka ninia moris? Tansá mak polítiku-naʼin ida neʼebé uluk la gosta relijiaun sai fali ema neʼebé haklaken kona-ba Maromak? Oinsá mak mane iha rai-Rúsia neʼebé hanorin baku malu iha polísia sai fali Testemuña ba Jeová? Haree toʼok saida mak ema sira-neʼe hatete.

“Agora haʼu-nia relasaun ho haʼu-nia inan diʼak malu fali.”—NATALIE HAM

TINAN MORIS: 1965

HUSI RAI: AUSTRÁLIA

MORIS ULUK NIAN: TOMAN HO DROGA

HAʼU-NIA MORIS ULUK: Haʼu boot iha aldeia kiʼik besik tasi, naran Robe, iha parte súl iha rai-Austrália. Iha aldeia kiʼik hanesan neʼe, baibain inan-aman barak tuur halimar iha bar. Tan neʼe sira-nia oan mós sai toman ho hemu, tolok no fuma.

Kuandu haʼu tinan 12, haʼu sai toman ho fuma, tolok, no istori malu beibeik ho haʼu-nia inan. Kuandu haʼu tinan 15, haʼu-nia inan-aman haketak malu, no liutiha fulan 18, haʼu deside atu sai husi uma. Haʼu hemu toʼo lanu, uza droga, no haʼu-nia moris la tuir morál neʼebé diʼak. Haʼu sente konfuzaun kona-ba haʼu-nia moris, tan neʼe haʼu sempre hirus. Maibé, haʼu la taʼuk atu moris mesak, tanba haʼu tuir ona kursu kona-ba arte marsiál ba tinan lima no tuir mós kursu ba feto sira atu defende an. Maski nuneʼe, kuandu haʼu tuur hakmatek no hanoin filafali kona-ba haʼu-nia moris, haʼu sente triste tebes no halo orasaun ba Maromak. Haʼu husu ninia ajuda, maibé haʼu mós hatete: “Keta haruka haʼu bá igreja.”

Liutiha tempu balu, haʼu-nia kolega mane ida neʼebé uza droga hanesan haʼu-nia kolega sira seluk, fó Bíblia mai haʼu. Maski nia la bá igreja, maibé nia dehan katak nia fiar ba Maromak. Nia fó laran-manas mai haʼu katak haʼu tenkesér hetan batizmu. Depois nia lori haʼu ba bee-lihun besik haʼu-nia uma, no nia fó batizmu haʼu. Husi tempu neʼebá, haʼu sente katak haʼu iha relasaun besik ho Maromak. Maski nuneʼe, haʼu la iha tempu atu lee Bíblia.

OINSÁ BÍBLIA TROKA HAʼU-NIA MORIS: Iha tinan 1988, Testemuña naʼin-rua vizita haʼu-nia uma. Sira ida husu haʼu: “Ita hatene Maromak nia naran ka lae?” Testemuña neʼe lee Salmo (Mazmur) 83:18 husi ninia Bíblia, neʼebé hakerek: “Atu sira hatene katak Ita, neʼebé naran Jeová, Ita mesak deʼit mak Maromak Aas Liu Hotu iha mundu tomak.” Haʼu hakfodak tebes! Depois sira sai tiha, haʼu hodi kedas karreta atu bá loja livru relijiaun nian, neʼebé dook kilómetru 56. Haʼu buka Maromak nia naran iha Bíblia balu ho tradusaun seluk, depois haʼu mós buka  Maromak nia naran iha disionáriu ida. Ida-neʼe halo haʼu fiar duni katak Maromak nia naran mak Jeová. Neʼe mós halo haʼu hanoin: ‘Saida tan mak haʼu seidauk hatene kona-ba Maromak?’

Maibé haʼu hanoin-hetan haʼu-nia inan hatete katak Testemuña ba Jeová laʼós ema neʼebé normál, no haʼu rasik ladún hatene kona-ba sira. Haʼu hanoin katak Testemuña sira-nia hahalok hanesan ema antigu no sira la hatene halimar. Tan neʼe, haʼu sei halo finje katak haʼu la iha kuandu Testemuña sira vizita fali haʼu. Maibé, kuandu sira mai duni, haʼu troka haʼu-nia hanoin. Haʼu husu sira atu tama haʼu-nia uma, no komesa kedas estuda Bíblia ho sira.

Semana-semana depois haʼu estuda Bíblia, haʼu koʼalia kedas kona-ba buat neʼebé haʼu aprende ba haʼu-nia namora neʼebé haʼu hela hamutuk ona, naran Craig. Haʼu koʼalia beibeik toʼo halo nia sai baruk, no ikusmai nia sai hirus no hadau livru husi haʼu, hodi nia bele lee rasik. Semana tolu liu tiha, nia hatene ona katak nia hetan lia-loos kona-ba Maromak. Lakleur, Craig no haʼu husik ami-nia toman uza droga no hemu lanu, no haʼu mós para serbisu iha bar. Ami mós deside atu kaben hodi moris tuir Bíblia nia matadalan.

BUAT DIʼAK NEʼEBÉ HAʼU HETAN: Foufoun ami estuda Bíblia ho Testemuña ba Jeová, Craig ho haʼu besik atu husik malu. Maibé agora Craig sai laʼen neʼebé diʼak tebes, no ami iha oan naʼin-rua neʼebé bonitu. Ami mós kontente ho ami-nia kolega sira neʼebé iha fiar hanesan.

Kuandu haʼu-nia inan hatene katak haʼu ransu malu ho Testemuña ba Jeová, nia hirus tanba nia hanoin sala kona-ba Testemuña sira. Agora haʼu-nia relasaun ho haʼu-nia inan diʼak malu fali. Haʼu la sente mamuk ona iha laran. Duké sente hanesan neʼe, haʼu sente katak haʼu-nia moris iha folin duni, no kontente katak haʼu iha relasaun diʼak ho Maromak.—Mateus 5:3.

“Buat barak neʼebé haʼu aprende husi Bíblia halo haʼu hakfodak.”—ISAKALA PAENIU

TINAN MORIS: 1939

HUSI RAI: TUVALU

MORIS ULUK NIAN: POLÍTIKU-NAʼIN

HAʼU-NIA MORIS ULUK: Haʼu moris iha illa (rai neʼebé ketak husi rai sira seluk no tasi mak haleʼu tomak) ida neʼebé furak iha Oseanu Pasífiku, naran Nukulaelae, agora iha rai-Tuvalu. Iha ami-nia fatin iha tempu neʼebá, pastór sira neʼebé estuda iha semináriu iha rai-Samoa mak domina ami-nia moris. Ema rai-naʼin tenke fó hela-fatin ba pastór no nia família, fó hahán ba sira loroloron, no tenkesér fó buat neʼebé diʼak liu ba sira. Maski hahán la toʼo atu fó ba ami rasik nia família, ami iha obrigasaun atu fó hahán ba pastór sira.

Pastór iha ami-nia aldeia halaʼo eskola, no nia hanorin relijiaun, matemátika, no jeografia. Haʼu hanoin-hetan pastór neʼe baku alunu sira toʼo raan suli makaʼas. Maski nuneʼe, la iha ema ida neʼebé brani atu koʼalia hasoru nia, inklui alunu sira-neʼe nia inan-aman. Ema taʼuk pastór hanesan Maromak.

Kuandu haʼu tinan sanulu, haʼu husik uma  hodi bá illa seluk atu tama eskola estadu nian. Bainhira haʼu ramata eskola, haʼu komesa serbisu nuʼudar funsionáriu públiku ida. Iha tempu neʼebá, rai-Inglaterra mak ukun ami-nia rai, no sira bolu ami-nia área neʼe Illas Gilbert no Ellice. Haʼu serbisu iha departamentu oioin no ikusmai serbisu nuʼudar editór ba jornál estadu nian neʼebé fó sai semana-semana. Haʼu kontente ho serbisu diʼak neʼe, maibé problema ida mosu. Loron ida, haʼu fó sai karta husi lee-naʼin neʼebé kritika katak estadu gasta osan barak demais atu simu liurai-oan husi rai-Inglaterra, Prince of Wales. Ema neʼebé hakerek karta neʼe uza naran falsu, no haʼu-nia xefe hakaʼas haʼu atu fó-hatene ninia naran neʼebé loos. Haʼu lakohi, no ema barak hatene kona-ba problema entre haʼu no xefe.

Lakleur, haʼu husik serbisu nuʼudar funsionáriu, no komesa envolve an ho polítika. Haʼu manán eleisaun iha Nukulaelae no sai Ministru Komérsiu no Rekursu Naturál nian. Liutiha tempu balu, ema iha Kiribati (uluk Gilbert) no Tuvalu (uluk Ellice) hakarak ukun an husi rai-Inglaterra. Governadór Inglaterra hatete mai haʼu katak haʼu bele sai administradór ba rai-Tuvalu. Maibé haʼu la simu tanba haʼu lakohi ema haree katak haʼu apoia rai-Inglaterra. Depois haʼu kandidata an iha eleisaun atu hetan kadeira iha governu. Maibé haʼu lakon. Tan neʼe, haʼu ho haʼu-nia feen fila fali ba haʼu-nia rai, no deside atu moris simples deʼit.

OINSÁ BÍBLIA TROKA HAʼU-NIA MORIS: Iha ami-nia rai, ema hotu hanoin katak loron-domingu mak loron santu, hodi tuir Bíblia nia ukun-fuan kona-ba loron-Sábadu. Haʼu deʼit mak la hanoin hanesan neʼe. Ba haʼu, loron-domingu mak loron neʼebé haʼu saʼe ró no kail ikan. Haʼu lakohi ema atu haree haʼu hanesan ema neʼebé kaer metin ba fiar igreja nian. Haʼu-nia aman hatete mai haʼu katak nia no mós ema barak la kontente ho haʼu-nia hahalok neʼe. Maibé haʼu deside tiha ona katak haʼu sei la husik igreja atu domina haʼu-nia moris.

Loron ida, kuandu haʼu bá illa Funafuti, kapitál husi rai-Tuvalu, haʼu-nia alin-mane neʼebé hela iha neʼebá konvida haʼu atu bá tuir reuniaun husi Testemuña ba Jeová. Depois, misionáriu Testemuña ida fó Livru Haklaken no Sedarlah! barak mai haʼu. Nia mós fó livru ida neʼebé esplika kona-ba hanorin falsu husi igreja sira no oinsá mak hanorin falsu sira-neʼe komesa. Haʼu lee beibeik livru neʼe. Buat barak neʼebé haʼu aprende husi Bíblia halo haʼu hakfodak, inklui mós Bíblia nia hanorin katak ema kristaun lalika halo tuir ukun-fuan kona-ba loron-Sábadu. Haʼu koʼalia fali buat sira-neʼe ba haʼu-nia feen, no nia para kedas bá igreja.

Maibé haʼu promete ona ba haʼu-nia an katak haʼu sei la envolve an ho relijiaun saida deʼit, tan neʼe haʼu la halo buat ida. Maski nuneʼe, haʼu la bele haluha buat neʼebé haʼu aprende ona. Liutiha tinan rua, haʼu hakerek surat ba misionáriu iha Funafuti neʼebé fó livru mai haʼu hodi fó-hatene nia katak haʼu prontu ona atu troka haʼu-nia moris. Kuandu nia simu surat neʼe, nia saʼe kedas ró atu vizita haʼu no ajuda haʼu atu aprende liután kona-ba Bíblia. Kuandu haʼu-nia aman hatene katak haʼu atu sai Testemuña ba Jeová, nia hirus tebes. Maibé haʼu hatete ba nia katak haʼu aprende ona buat barak tebes kona-ba Bíblia husi Testemuña sira, no haʼu-nia desizaun la bele troka.

BUAT DIʼAK NEʼEBÉ HAʼU HETAN: Iha tinan 1986, haʼu hetan batizmu nuʼudar Testemuña ba Jeová, no haʼu-nia feen mós hetan batizmu iha tinan tuirmai. Ami-nia oan-feto naʼin-rua mós aprende buat neʼebé Bíblia hanorin no deside atu sai Testemuña ba Jeová.

Agora haʼu kontente tebes hola parte iha relijiaun ida neʼebé halo tuir ema kristaun antigu nia ezemplu, neʼebé la iha ema ida boot liu ida seluk. (Mateus 23:8-12) Sira mós halo tuir Jesus nia ezemplu ho haraik-an hodi haklaken Maromak nia Ukun. (Mateus 4:17) Haʼu fó-agradese ba Maromak Jeová tanba nia husik haʼu atu hatene didiʼak kona-ba nia no ninia povu!

“Testemuña sira la fó-hatene deʼit sira-nia fiar.”—ALEXANDER SOSKOV

TINAN MORIS: 1971

HUSI RAI: RÚSIA

MORIS ULUK NIAN: MESTRE FUNU

HAʼU-NIA MORIS ULUK: Haʼu moris iha Moskovu, neʼebé uluk kapitál iha Uniaun Soviétika. Haʼu-nia família hela iha apartamentu kiʼik ida iha uma-andár boot, no ema barak iha neʼebá serbisu hamutuk iha fábrika ida. Haʼu hanoin-hetan ami-nia viziñu barak sempre hatete katak haʼu labarik nakar-teen, no haʼu sei mate lalais, ka se lae, haʼu tama komarka. Sira koʼalia loos, tanba bainhira haʼu tinan sanulu deʼit, polísia hatene ona haʼu.

Kuandu haʼu tinan 18, haʼu tama militár hodi tuir estadu nia lei, no haʼu-nia knaar mak hein fronteira. Liutiha tinan rua, haʼu fila fali ba uma no serbisu iha fábrika, maibé serbisu neʼe halo haʼu sente baruk tebes. Tan neʼe, haʼu tama polísia espesiál neʼebé iha knaar atu hasoru ema-lubun neʼebé halo demo. Haʼu sai nuʼudar treinadór neʼebé hanorin atu ataka ema no defende an. Haʼu mós ajuda kaer kriminozu sira iha Moskovu no dala ruma haʼu laʼo dook ba fatin oioin neʼebé iha situasaun manas. Iha tempu neʼebá, haʼu sente haʼu-nia raan nakali nafatin iha laran no haʼu taʼuk katak haʼu la bele kontrola an. Kuandu haʼu fila fali husi situasaun neʼebé iha violénsia makaʼas, dala ruma haʼu tenke toba ketak husi haʼu-nia feen, tanba haʼu taʼuk karik haʼu mehi aat no bele hakanek nia.

OINSÁ BÍBLIA TROKA HAʼU-NIA MORIS: Kuandu haʼu hahú estuda Bíblia ho Testemuña ba Jeová, haʼu aprende katak haʼu-nia moris neʼebé gosta violénsia la tuir Bíblia nia matadalan. Haʼu mós haree katak haʼu presiza para fuma no kontrola haʼu-nia an atu la hemu tua demais. Maibé haʼu hanoin haʼu la bele troka haʼu-nia serbisu, tanba haʼu la iha matenek atu halo serbisu seluk atubele tau matan ba haʼu-nia família nia presiza. Haʼu mós sente haʼu la bele haklaken Maromak nia Liafuan hanesan Testemuña sira halo.

Maski nuneʼe, neineik-neineik haʼu fiar katak buat neʼebé hakerek iha Bíblia mak loos. Haʼu mós sente kmaan hodi lee iha Ezequiel (Yehezkiel) 18:21, 22, neʼebé dehan: “Kona-ba ema ida neʼebé aat, se nia fila fali husi ninia sala hotu neʼebé nia halo uluk . . . , ninia sala hotu neʼebé nia halo ona, Maromak sei la hanoin tan.”

Haʼu gosta katak Testemuña sira la fó-hatene deʼit sira-nia fiar maibé ajuda haʼu atu hanoin didiʼak kona-ba buat neʼebé haʼu aprende. Dala ida, haʼu foti livru barak maizumenus 40, no lee hotu iha semana tolu nia laran. Buat neʼebé haʼu aprende husi livru sira-neʼe halo haʼu fiar katak haʼu hetan duni relijiaun neʼebé loos.

BUAT DIʼAK NEʼEBÉ HAʼU HETAN: Antes estuda Bíblia, haʼu besik atu soe malu ho haʼu-nia feen. Maibé agora ami-nia moris kaben nian diʼak liu. Haʼu-nia feen mós komesa estuda Bíblia iha tempu hanesan ho haʼu, no ami foti desizaun atu serbí Maromak Jeová hamutuk. Agora, ami-nia moris família nian kontente liu. Haʼu mós konsege hetan serbisu neʼebé la kontra Bíblia nia matadalan.

Foufoun komesa haklaken uma ba uma, kuandu haʼu hasoru ema haʼu sente raan nakali hanesan atu kaer kriminozu. Agora haʼu fiar an katak haʼu bele kalma nafatin maski hasoru ema neʼebé provoka haʼu. Neineik-neineik haʼu aprende atu hatudu pasiénsia ba ema. Maski haʼu triste katak uluk haʼu soe tempu barak ba buat neʼebé la iha folin, maibé haʼu kontente tanba agora haʼu sente haʼu-nia moris iha folin duni. Haʼu mós kontente hodi uza haʼu-nia kbiit no forsa atu serbí Maromak Jeová no ajuda ema seluk.