Resposta ba pergunta haat kona-ba buat hotu nia rohan

JESUS KRISTU hatete nanis katak iha futuru “buat hotu nia rohan” sei toʼo mai. Hodi koʼalia kona-ba tempu neʼebá, nia hatete: “Iha loron neʼe, terus sei sai boot tebetebes: hori mundu hahú toʼo ohin seidauk mosu terus hanesan neʼe; aban-bainrua mós sei la hetan.”—Mateus 24:14, 21.

Jesus nia liafuan kona-ba buat hotu nia rohan, no mós eskritura seluk iha Bíblia kona-ba neʼe, halo ita hanoin kona-ba pergunta importante balu tuirmai neʼe. Atu hetan resposta ba pergunta sira-neʼe, diʼak atu loke Ita-nia Bíblia no lee.

1 Saida mak sei hotu?

Bíblia la hanorin katak mundu sei lakon. Ema ida neʼebé hakerek salmu hatete: “[Maromak] halo tiha rai iha fatin neʼebé metin; neʼebé sei la nakdoko toʼo tempu neʼebé la bele sura, ka ba nafatin.” (Salmo 104:5) Bíblia mós la hanorin katak buat hotu neʼebé moris iha rai sei mate tanba ahi boot han mundu tomak. (Isaías 45:18) Jesus rasik hatudu katak bainhira buat hotu nia rohan sei toʼo mai sei iha ema balu neʼebé sei moris. (Mateus 24:21, 22) Se nuneʼe, tuir Bíblia saida mak sei hotu?

Ema nia governu neʼebé la hetan susesu sei lakon. Liuhusi ninia espíritu santu, Maromak book profeta Daniel atu hakerek: “Maromak lalehan nian sei harii ukun ida neʼebé sei nunka lakon. Ukun neʼe rasik sei la entrega ba ema seluk. Ukun neʼe sei harahun no halakon ukun [ka governu] sira-neʼe hotu, no ukun neʼe rasik sei hamriik ba tempu neʼebé la bele sura.”—Daniel 2:44.

Funu no poluisaun sei la iha ona. Hodi hatudu saida mak Maromak sei halo, Salmo 46:9 hatete: “Nia sei hapara funu toʼo rai nia rohan. Nia halo tohar rama no tesi rahun diman; nia sunu iha ahi kuda-karreta sira.” Bíblia mós hanorin katak Maromak sei “halo aat sira hotu neʼebé halo aat raiklaran neʼe”.—Apokalipse 11:18.

Krime no buat neʼebé la loos sei la iha ona. Maromak nia Liafuan promete: “Ema neʼebé laran loos mak sira neʼebé sei hela iha rai, no ema neʼebé la halo aat mak sira neʼebé sei hela iha neʼebá. Kona-ba ema aat, sira sei halakon tiha husi rai, no kona-ba traidór sira, sei fokit sai tiha husi neʼebá.”—Provérbios 2:21, 22.

2 Bainhira mak buat hotu nia rohan sei toʼo mai?

Maromak Jeová mak “hatene wainhira tempu neʼe sei toʼo mai” atu halakon buat aat hotu no atu harii ninia Ukun, ka reinu. (Marcos 13:33) Bíblia hatudu ho klaru katak ita la bele hatene iha sá loron mak buat hotu nia rohan sei toʼo mai. Jesus hatete: “Kona-ba loron no oras neʼe, ema ida la hatene: anju sira iha lalehan mós la hatene, Oan mós lae; Aman deʼit mak hatene.” (Mateus 24:36) Maibé, Jesus no nia dixípulu sira fó-hatene nanis kona-ba situasaun iha mundu neʼe sei sai oinsá loos kuandu Maromak besik ona atu lori buat hotu nia rohan. Bainhira buat hotu neʼebé tuirmai akontese iha tempu hanesan iha mundu tomak mak buat hotu nia rohan sei toʼo mai.

Tanba mudansa boot iha buat polítiku, ambiente, no ema nia hahalok iha mundu tomak mak agora ema hasoru susar neʼebé aat liu fali iha tempu uluk. Hodi hatán ba dixípulu  sira-nia pergunta kona-ba buat hotu nia rohan, Jesus hatete: “Nasaun sei bá hasoru nasaun seluk, no reinu hasoru reinu seluk. Iha fatin balun, rai sei nakdoko; iha fatin seluk tan sei hamlaha boot, maibé terus oioin sei hahú deʼit ho ida-neʼe.” (Marcos 13:8) Apóstolu Paulo mós hatete: “Iha loron ikus sira, susar barak sei mosu mai. Ema sei hanoin deʼit sira an hodi buka osan; loko-an, no foti-an; abuzadór; sira sei refila sira-nia aman inan sira, la hatene fó-agradese, la hatene Maromak; la hatene sadiʼa maluk no laran-nakali, konta ema nia vida, la tuir ukun-fuan, fuik no buat diʼak hotu nia funu-balun, traidór, bulak tan loko-an, hodi hakarak deʼit buka sira rasik nia ksolok liu fali hadomi Maromak.”—2 Timoteo 3:1-5.

Agora iha mundu tomak halaʼo daudaun kampaña haklaken ho língua oioin. Jesus hatete: “Lia-foun reinu nian neʼe, ema sei haklaken iha mundu tomak hodi fó sasin ba povu hotu. Iha oras neʼebá, buat hotu nia rohan sei toʼo mai.”—Mateus 24:14.

3 Saida mak sei mosu depois buat hotu nia rohan?

Bíblia la hanorin katak Maromak sei foti ema diʼak hotu bá lalehan. Maibé, Jesus hanorin katak Maromak sei kumpre ninia hakarak husi uluk kedas. Jesus hatete: “Ksolok ba sira neʼebé laran-kmaus, basá sira sei simu rai nuʼudar liman-rohan.” (Mateus 5:5; 6:9, 10) Ba ema sira neʼebé mate antes buat hotu nia rohan toʼo mai, Bíblia hanorin katak iha esperansa ba sira atu moris hiʼas fali. (Jó 14:14, 15; Joao 5:28, 29) Saida tan mak sei mosu tuir buat hotu nia rohan?

Nuʼudar Liurai ba Maromak nia Ukun iha lalehan, Jesus sei ukun mundu. Profeta Daniel hatete: “Haʼu haree nafatin iha haʼu-nia vizaun iha kalan neʼebá, no, haree iha neʼebá! ema ida hanesan oan-mane [Jesus neʼebé moris hiʼas fali] mai iha kalohan husi lalehan; no nia hetan lisensa atu hasoru Ida neʼebé Idade Boot Liu [Maromak Jeová], no lori bá iha nia oin. No ba nia [Jesus] entrega tiha kbiit no hahiʼi no ukun, atu ema husi nasaun oioin, grupu, língua sei serbí nia. Ninia ukun sei metin ba tempu neʼebé la bele sura, neʼebé sei la liu, no ninia ukun mak ukun neʼebé sei la lakon.”—Daniel 7:13, 14; Lucas 1:31, 32; Joao 3:13-16.   

Ema sira neʼebé hakruʼuk ba Maromak nia Ukun sei haksolok ho saúde diʼak, sente seguru, no moris ba nafatin iha rai. Profeta Isaías hatete: “Sira sei harii duni uma no hela, sira sei kuda toʼos-uvas no han nia fuan. Sira sei la harii uma no ema seluk mak hela, sira sei la kuda no ema seluk mak han.” (Isaías 65:21-23) Kona-ba tempu neʼebá, apóstolu João hatete: “Ó haree sidade neʼe? Neʼe mak Maromak nia horik-fatin iha ema sira leet. Nia sei halo nia uma iha sira leet; sira sei sai nia povu no Nia sei hela ho sira no sai sira-nia Maromak. Nia sei hamaran sira-nia matabeen husi sira-nia matan; mate la iha ona, no ema sei la tanis tan eh laran-susar, basá sasán raiklaran uluk nian liu tiha ona.”—Apokalipse 21:3, 4.

4 Ita tenke halo saida atu hetan salvasaun bainhira buat hotu nia rohan sei toʼo mai?

Apóstolu Pedro hatene katak ema balu neʼebé moris iha loron ikus sira sei la fiar katak Maromak sei halakon buat aat neʼebé akontese iha mundu neʼe. (2 Pedro 3:3, 4) Maski nuneʼe, Pedro hatete ba ema neʼebé moris iha ita-nia tempu agora atu halo buat neʼebé tuirmai.

Aprende husi ema nia istória. Pedro hatete katak Maromak “la hanoin karik ema uluk sira-nian, maibé soi [ka, salva] deʼit Noé, justisa nia manu-ain, hamutuk ho ema naʼin-hitu, wainhira Nia halo rai-nabeen ba ema sira neʼebé la fiar Maromak”. (2 Pedro 2:5) Kona-ba ema sira neʼebé la fiar, Pedro hatete: “Maibé sira-neʼe hakarak haluha, katak hodi Maromak  nia liafuan, kleur ona mak lalehan sira mosu, no rai sai husi bee; no tan bee ida-neʼe, mundu iha tempu neʼebá lakon mout. Hodi Maromak nia liafuan neʼe, lalehan no rai * ohin neʼe nian marka tiha ba ahi, toʼo loron justisa nian no tempu neʼebé Naʼi sei halo lakon ema aat sira.”—2 Pedro 3:5-7.

Moris tuir Maromak nia matadalan kona-ba morál. Kona-ba ema neʼebé hakarak atu hetan salvasaun bainhira buat hotu nia rohan sei toʼo mai, Pedro hatete: “Imi-nia moris no imi-nia hamtaʼuk Maromak sei sai oinsá loos?” (2 Pedro 3:11) Ida-neʼe katak ema presiza hatudu iha sira-nia moris hahalok neʼebé Maromak simu, no la toʼo atu hatete deʼit katak ita hamtaʼuk ka fiar Maromak. No mós, la toʼo atu hadiʼa ita-nia hahalok sira neʼebé ladún diʼak, tanba deʼit buat hotu nia rohan besik ona mai.

Hahalok saida deʼit mak Maromak hakarak ita atu halo? Karik diʼak atu kompara buat neʼebé Ita hatene ona kona-ba neʼe ho buat neʼebé Bíblia hanorin kona-ba neʼe. Testemuña ba Jeová sei kontente atu ajuda Ita atu hetan resposta husi Ita-nia Bíblia rasik. Hodi halo ida-neʼe, maski ohin loron iha buat barak neʼebé halo Ita taʼuk, maibé Ita bele hasoru buat hotu nia rohan ho aten-brani.

[Nota–rodapé]

[Liafuan neʼebé foti husi pájina 31]

Mundu sei la lakon, maibé ema neʼebé halo aat rai mak sei lakon