SE KOMPARA ho ai-sedru aas husi Líbanu, ai-oliveira neʼebé tuan no namkurut ona haree jeitu laiha liu. Maibé, ai-oliveira bele tahan manas ka malirin, udan ka bailoro. Balu neʼebé moris hela, ema kalkula katak ai sira-neʼe moris ba tinan 1.000 ona. Maski ai nia hun mak tesi tiha ona mós, ninia abut neʼebé naruk tebes sei moris hela. Se ninia abut mak moris hela, ai neʼe bele moris fila fali.

Job hatete katak maski nia bele mate mós, nia fiar katak nia sei bele moris fali. (Jó [Ayub] 14:13-15) Nia uza ai ida, karik ai-oliveira, hodi kompara ninia fiar ba Maromak nia forsa atu halo moris fali nia. Nia hatete: “Ai ida mós iha esperansa. Se ai neʼe mak tesi kotu tiha mós bele moris fali.” Iha tempu rai maran tebes mak derrepente udan tun, ai-oliveira nia abut sira halo dikin foun moris sai fali husi ninia fukun neʼebé maran tiha ona, ‘sanak oan sira mosu fali hanesan ai-oan foun ida’.—Jó (Ayub) 14:7-9.

Hanesan ho ai nia naʼin neʼebé hein namanas atu haree ai-oliveira nia abut halo ai neʼe moris fali, Maromak Jeová mós hein namanas atu fó fali moris ba ninia atan sira ka ema seluk neʼebé mate tiha ona. (Mateus 22:31, 32; João 5:28, 29; Apóstolu 24:15) Hanoin toʼok kona-ba solok neʼebé ita hotu sei sente bainhira ita simu fali ema neʼebé uluk mate ona hodi haree sira goza fali moris neʼebé nakonu ho solok!