The Watchtower (Livru Haklaken) 15 Setembru 1950 esplika katak ilas mak ema ka akontesimentu, ka sasán ruma neʼebé atu reprezenta buat ruma iha futuru. No realidade mak buat neʼebé sai loos ona husi ninia ilas.

Tinan hirak liubá, ita-nia livru sira hatete katak feto no mane iha tempu antigu hanesan Débora, Eliú, Jefte, Job, Rahab, Rebeka no sira seluk tan, mak hanesan ilas ba ema kose-mina sira ka ba “ema-lubun boot”. (Apokalipse 7:9) Porezemplu, uluk ita hanoin katak Jefte, Job, ho Rebeka mak reprezenta ema kose-mina, no Débora ho Rahab reprezenta “ema-lubun boot”. Maibé iha tinan hirak foin daudauk neʼe, ita ladún halo ona komparasaun hanesan neʼe, tanbasá?

Eskritura balu hatudu duni katak ema balu neʼebé temi iha Bíblia laran sai duni ilas ba buat ruma iha futuru. Hanesan iha Galásia 4:21-31, apóstolu Paulo esplika katak Agar, Abraão nia atan-feto, reprezenta nasaun Izraél neʼebé iha relasaun ho Jeová liuhusi Moisés nia Ukun-Fuan. No Sara, “feto neʼebé livre” reprezenta Maromak nia organizasaun parte lalehan nian neʼebé Jeová bolu nuʼudar ninia feen. No bainhira Paulo hakerek ba ema ebreu, nia hatete katak liurai no amlulik Melkizedek mak ilas ba Jesus, tanba sira rua nia knaar, barak mak hanesan. (Ebreu 6:20; 7:1-3) Paulo mós kompara Isaías no ninia oan sira hanesan ho Jesus no ema kose-mina sira. (Ebreu 2:13, 14) Ita bele simu buat neʼebé Paulo esplika tanba espíritu santu mak leno nia hodi hakerek buat sira-neʼe.

Maibé, maski Bíblia esplika katak ema ida mak sai ilas ba fali ema seluk, ita la bele halo rezumu kedas katak buat hotu kona-ba ema neʼe ka akontesimentu iha ema neʼe nia moris mós sai ilas ba ema neʼe. Porezemplu, maski Paulo hatete katak  Melkizedek mak sai ilas ba Jesus, maibé nia la koʼalia kona-ba Melkizedek fó paun no tua ba Abraão bainhira Abraão funu manán liurai haat. Tan neʼe, ita la presiza atu buka-hatene akontesimentu neʼe atu reprezenta saida.—Gênesis (Kejadian) 14:1, 18.

Uluk, hakerek-naʼin barak mós iha toman neʼe, sira sempre buka tuir ilas mak ida neʼebé. Porezemplu, kona-ba buat neʼebé Origen, Ambrose, no Jerome hanorin, livru The International Standard Bible Encyclopaedia esplika hanesan neʼe: “Sira sempre buka tuir ilas ba Eskritura kona-ba saida. Akontesimentu ida atu kiʼik ka boot, importante ka la importante, sira hakarak hatene akontesimentu neʼe reprezenta saida. Maski buat kiʼik ida la importante iha eskritura ida nia laran mós sira hanoin neʼe subar hela lia-loos importante ida . . . , hanesan ho ikan 153 neʼebé dixípulu sira kaer iha kalan Jesus mosu ba sira, sira mós koko atu siʼik katak 153 reprezenta buat ruma!”

Augustine husi rai-Hipo mós esplika katak Jesus fó han ema naʼin-5.000 ho paun lima neʼebé halo husi sevada no ikan rua mós atu reprezenta buat ruma. Nia hatete katak paun lima neʼebé halo ho sevada mak reprezenta livru lima primeiru neʼebé Moisés hakerek. No tanba trigu mak diʼak liu fali sevada, entaun sevada reprezenta “Testamentu Tuan” neʼebé ema hanoin ladún iha folin ona se kompara ho “Testamentu Foun”. No ikan rua reprezenta knaar nuʼudar liurai no amlulik. Matenek-naʼin ida seluk mós hatete katak Jacob sosa Esaú nia direitu nuʼudar oan-mane boot ho koto-been mean manko ida, neʼe reprezenta Jesus sosa ema ho ninia raan atu ema bele bá lalehan.

Ita bele komprende tansá mak buat neʼebé sira esplika susar uitoan atu bele simu. Tanba ita ema la bele hatene ka siʼik istória ida neʼebé husi Bíblia mak atu reprezenta buat ida ka ida neʼebé mak atu la reprezenta buat ida. Tan neʼe mak ita ema la bele esplika rasik katak ema ida, ka akontesimentu ida, ka sasán ida neʼebé temi iha Bíblia laran atu reprezenta buat ida iha futuru, tanba Eskritura rasik deʼit mós la esplika hanesan neʼe. Se Eskritura mak esplika duni katak ida-neʼe reprezenta ida neʼebá, entaun ita bele simu, tanba neʼe mai husi Eskritura.

Se nuneʼe, oinsá mak ita bele aprende husi akontesimentu ka istória sira husi Bíblia? Iha Roma 15:4 apóstolu Paulo hatete hanesan neʼe: “Buat hotu neʼebé hakerek ona horiuluk kedas, hakerek hodi hanorin ita no fó ita esperansa, basá Eskritura sira-neʼe ajuda ita atu tahan no fó kmaan mai ita.” Paulo nia liafuan sira-neʼe, nia hakerek hodi fó ba ema kose-mina iha apóstolu sira-nia tempu atu sira bele aprende buat ruma husi Bíblia nia istória sira. Maibé, ba Maromak nia povu, atu ita moris iha tempu saida ka, ema kose-mina ka, ema husi “bibi seluk” mós bele aprende lisaun importante husi akontesimentu ka istória hotu neʼebé Eskritura sira temi.—João 10:16; 2 Timóteo 3:1.

Tan neʼe, ita la bele hanoin katak istória sira husi Bíblia aplika deʼit ba ema kose-mina ka ema-lubun boot ka ba tempu espesífiku deʼit. Ita hotu bele aprende buat ruma husi Bíblia nia istória sira. Porezemplu, istória kona-ba Job laʼós deʼit reprezenta saida mak akontese ba ema kose-mina sira iha tempu Funu Mundiál Primeiru nian. Tanba Maromak nia atan barak, atu nia ema kose-mina ida ka laʼós, hasoru ona susar ruma hanesan Job nian, no sira mós haree rezultadu ikus neʼebé Jeová fó, katak Jeová laran-diʼak tebes ho domin no laran-sadiʼa.—Tiago 5:11.

Kuandu ita haree fali ba ita-nia kongregasaun ohin loron, ita mós iha irmán ho idade boot ona maibé sei laran-metin nafatin hanesan Débora loos ka lae? Iha mós katuas kongregasaun barak neʼebé idade sei joven hela maibé iha matenek hanesan Eliú, pioneiru brani no badinas hanesan Jefte, ka irmaun-irmán barak pasiénsia hanesan Job, loos ka lae? Ita agradese tebes ba Jeová tanba nia rai hela “buat hotu neʼebé hakerek ona horiuluk kedas” iha Bíblia laran hodi “Eskritura sira-neʼe ajuda ita atu tahan no fó kmaan mai ita”!

Tan razaun sira-neʼe mak ita-nia livru sira agora koʼalia liu kona-ba lisaun saida deʼit mak ita bele aprende husi Bíblia nia istória duké atu buka-hatene ilas ida reprezenta saida ka oinsá mak ilas neʼe atu sai realidade iha futuru.