Bibi-atan hitu no ulun-naʼin ualu—katak sá mai ita?
“Ita tenke foti bibi-atan hitu, sin, ulun-naʼin ualu husi ema atu hasoru sira.”—MIQUÉIAS (MIKHA) 5:5.
1. Tanbasá mak liurai Israel no liurai Síria nia planu lakon?
ENTRE tinan 762-759 molok Kristu, liurai Israel nian no liurai Síria nian halo funu hasoru nasaun Judá. Sira hakarak atu tama Jerusalém, hasai Acaz nuʼudar liurai no foti ema seluk atu sai liurai, karik ema ida neʼebé laʼós Liurai David nia bei-oan ida. (Isaías [Yesaya] 7:5, 6) Maibé sira-nia planu neʼe lakon, tanba uluk Jeová promete ona katak sei iha nafatin David nia bei-oan ida neʼebé sei ukun nuʼudar liurai. No buat neʼebé Jeová hatete sempre sai loos.—Josué (Yosua) 23:14; 2 Samuel 7:16.
2-4. Oinsá mak Isaías (Yesaya) 7:14, 16 sai loos (a) iha Isaías nia tempu? (b) iha Jesus nia tempu?
2 Foufoun, funu neʼe haree hanesan Síria no Israel sei manán tanba sira oho liurai Acaz nia soldadu naʼin-120.000! No sira oho mós Liurai Acaz nia oan, Maasias. (2 Crônicas [Tawarikh] 28:6, 7) Maibé Jeová haree daudaun no nia la haluha ninia promete ba David. Nia haruka ninia profeta Isaías atu hatoʼo mensajen neʼebé fó laran-manas.
3 Isaías fó sai nanis: “Haree! Feto-raan ida sei koʼus no tuur ahi oan-mane ida neʼebé ema sei hanaran ‘Emanuel’.” Nia hatutan tan: “Antes labarik-mane neʼe hatene oinsá atu la simu buat neʼebé aat no hili buat neʼebé diʼak, liurai rua neʼe neʼebé halo Ita taʼuk, sira-nia rai sei sai mamuk.” (Isaías [Yesaya] 7:14, 16) Parte primeiru husi liafuan sira-neʼe sai loos kuandu Mesias moris mai. (Mateus 1:23) Maibé iha Jesus nia tempu, liurai Síria nian no Israel nian la ataka nasaun Judá. Neʼe hatudu katak liafuan profesia neʼe mós sai loos iha Isaías nia tempu.
4 Lakleur depois Isaías fó sai liafuan sira-neʼe, ninia feen sai isin-rua. Sira hanaran sira-nia oan-mane Maer-Salal-Hás-Baz. Karik labarik-mane neʼe mak “Emanuel” neʼebé Isaías koʼalia. a (Haree nota iha kraik.) Iha tempu Bíblia nian, dala ruma labarik simu naran ida kuandu nia foin moris hodi komemora buat ruma maibé ninia inan-aman no família sira sei uza ninia naran bolu. (2 Samuel 12:24, 25) Maibé la iha buat ida neʼebé hatudu katak Jesus mós iha naran Emanuel.—Lee Isaías (Yesaya) 7:14; b 8:3, 4. c
5. Liurai Acaz foti desizaun beik saida?
5 Nuʼudar Israel no Síria hakarak hela atu halo funu hasoru Judá, nasaun Asíria mós planu atu manán Judá. Nasaun Asíria mak nasaun neʼebé forte no siʼak tebetebes. Tuir Isaías (Yesaya) 8:3, 4, ulukliu Asíria sei manán duni Síria no Israel, depois mak sira sei ataka Judá. Liurai Judá nian naran Acaz, tenke tau fiar ba Maromak nia liafuan neʼebé Isaías hatoʼo. Maibé nia la halo nuneʼe. Nia halo promete ho ema Asíria. Ikusmai, ema Asíria ukun Judá no hanehan povu. (2 Reis [Raja-Raja] 16:7-10) Acaz mak Judá nia bibi-atan no ukun-naʼin, tan neʼe nia mak iha responsabilidade atu proteje ninia povu. Maibé nia la kumpre ninia knaar neʼe. Diʼak ba ita atu husu ba ita-nia an: “Kuandu haʼu iha desizaun importante atu halo, haʼu tau haʼu-nia fiar ba Maromak ka ba ema?”—Provérbios (Amsal) 3:5, 6.
LIURAI FOUN HATUDU HAHALOK DIʼAK
6. Oinsá mak Ezequias la hanesan ho Acaz?
6 Iha tinan 746 molok Kristu, Acaz mate no ninia oan Ezequias mak sai fali liurai. Iha tempu neʼe, povu sira iha Judá mak ema kiak no sira para ona atu adora Jeová. Buat primeiru saida mak Ezequias sei halo nuʼudar liurai? Nia sei koko atu halo ninia nasaun sai riku ka lae? Lae. Ezequias hadomi Jeová no nia mak liurai neʼebé sai hanesan bibi-atan diʼak ba Maromak nia povu hodi dirije sira. Buat primeiru neʼebé nia halo mak ajuda povu atu adora fali Jeová. Kuandu nia komprende buat neʼebé Maromak hakarak nia atu halo, nia halo tuir kedas. Nia hatudu ezemplu diʼak tebes mai ita!—2 Crônicas (Tawarikh) 29:1-19.
7. Tanbasá mak ema levita sira presiza liurai atu apoia sira?
7 Ema levita sira iha responsabilidade neʼebé todan atu ajuda povu hodi adora Jeová. Tan neʼe, Ezequias hasoru ho sira no promete katak nia sei apoia sira. Ema levita sira-neʼe neʼebé laran-metin, karik sira kontente tebes kuandu sira rona liurai hatete: “Imi mak sira neʼebé Jeová hili atu hamriik iha ninia oin hodi serbí nia.” (2 Crônicas [Tawarikh] 29:11) Sin, ema levita sira simu ukun-fuan neʼebé klaru hodi ajuda povu atu adora Maromak neʼebé loos.
8. Saida tan mak Ezequias halo atu ajuda povu adora fali Jeová? Saida mak rezultadu?
8 Ezequias konvida ema hotu iha Judá no Israel atu selebra Páskua. Depois neʼe, sira halaʼo Selebrasaun Paun Fermentu-Laek nian ba loron hitu. Sira hotu haksolok tebes iha selebrasaun neʼe no hanaruk ba loron hitu tan. Bíblia hatete: “Ema haksolok tebes iha Jerusalém, tanba husi tempu Salomão nian, liurai Israel David nia oan, la iha selebrasaun hanesan neʼe iha Jerusalém.” (2 Crônicas [Tawarikh] 30:25, 26) Ita bele fiar katak selebrasaun neʼe fó laran-manas ba povu. Tanbasá? Tanba 2 Crônicas (Tawarikh) 31:1 hatete katak “sira komesa atu harahun fatuk-riin lulik sira no hatohar ai-riin lulik sira, no sobu sira-nia fatin aas adorasaun falsu nian no sira-nia altár sira”. Ho buat hirak-neʼe, nasaun Judá fila fali ba Jeová no ida-neʼe ajuda sira atu prepara an ba susar neʼebé atu mai.
LIURAI TAU FIAR BA JEOVÁ
9. (a) Tanbasá mak nasaun Israel la bele ona halaʼo sira-nia planu? (b) Foufoun, Senaquerib konsege halo saida ba sidade sira iha Judá?
9 Hanesan Isaías fó-hatene nanis, nasaun Asíria manán nasaun Israel no lori povu husi sira-nia rai nuʼudar dadur. Agora Israel la bele ona halaʼo sira-nia planu hodi foti liurai neʼebé laʼós David nia bei-oan ida. Maibé saida mak Asíria hakarak atu halo? Sira hakarak manán Judá. Bíblia hatete: “No iha tinan 14 husi Liurai Ezequias nia ukun, Senaquerib, liurai Asíria nian, hasoru sidade sira neʼebé forte husi Judá no nia konsege hadau sira.” Senaquerib manán sidade Judá nian 46 ona. Ita sei sente oinsá se Ita mós hela iha Jerusalém iha tempu neʼebá? Hanoin toʼok, tropa Asíria nian manán lalais Judá nia sidade barak ona, no agora sira sai besik daudaun ba Ita-nia hela-fatin!—2 Reis (Raja-Raja) 18:13.
10. Tanbasá mak Miquéias nia liafuan fó laran-manas ba Ezequias?
10 Ezequias hatene buat neʼebé Senaquerib hakarak, maibé duké sai taʼuk no husu ajuda husi nasaun seluk hanesan ninia aman Acaz mak halo, Ezequias tau fiar ba Jeová. (2 Crônicas [Tawarikh] 28:20, 21) Karik nia hatene profeta Miquéias nia liafuan neʼebé koʼalia kona-ba inimigu “ema Asíria”, hodi hatete: “Ita tenke foti bibi-atan hitu, sin, ulun-naʼin ualu husi ema atu hasoru sira. No sira sei hasoru rai Asíria ho surik.” (Miquéias [Mikha] 5:5, 6) Ita bele fiar katak liafuan sira-neʼe fó laran-manas ba Ezequias. Neʼe hatudu katak Jeová sei uza tropa ida neʼebé la hanesan baibain atu manán hasoru ema Asíria.
11. Bainhira mak liafuan kona-ba bibi-atan hitu no ulun-naʼin ualu sei sai loos iha dalan kompletu?
11 Liafuan sira-neʼe kona-ba ‘bibi-atan hitu no ulun-naʼin ualu’ sei sai loos iha dalan kompletu depois Jesus moris mai, ida neʼebé “ninia hun husi tempu uluk kedas, husi tempu neʼebé la bele sura”. (Lee Miquéias [Mikha] 5:1, 2. d) Tuir loloos, ida-neʼe sei akontese iha ita-nia futuru, kuandu “ema Asíria”, ka inimigu ida sei ataka Jeová nia povu. Jeová sei uza tropa ida ho Jesus nuʼudar sira-nia ulun atu manán inimigu neʼe. Tropa saida mak neʼe? Ita sei hetan resposta iha lisaun neʼe, maibé antes neʼe, mai ita haree saida mak ita bele aprende husi buat neʼebé Ezequias halo kuandu ema Asíria ataka.
EZEQUIAS HATUDU MATENEK
12. Atu proteje Maromak nia povu, Ezequias no sira seluk halo saida?
12 Kuandu ita sente katak ita la bele rezolve problema ida, Jeová sempre prontu atu ajuda. Maibé nia hakarak ita atu halo buat neʼebé ita bele halo atu hadiʼa ita-nia problema. Liurai Ezequias halo ida-neʼe. Bíblia dehan katak nia buka konsellu husi “ninia ema-boot sira no ninia asu-waʼin sira” no deside atu “taka bee-posu sira neʼebé iha sidade nia liʼur”. Ezequias mós “sai aten-brani hodi hadiʼa fali moru neʼebé naksobu, no nia harii uma aas iha moru nia leten, no nia mós harii moru seluk neʼebé iha liʼur”. Liután neʼe, nia “halo armas barak no eskudu sira”. (2 Crônicas [Tawarikh] 32:3-5) Durante tempu neʼe, Jeová uza Ezequias, ninia ema-boot ho profeta sira atu dirije no proteje Ninia povu iha dalan hanesan bibi-atan mak halo.
13. Buat importante liu saida mak Ezequias halo hodi prepara povu atu hasoru ema Asíria? Oinsá mak Ezequias nia liafuan ajuda povu?
13 Tuirmai, Ezequias halo buat ida tan neʼebé importante liu fali proteje sidade nia bee ka hametin moru sira. Tanba Liurai Ezequias nia hahalok hanesan bibi-atan ida neʼebé diʼak, nia halibur povu no fó laran-manas ba sira hodi dehan: “Keta taʼuk ka nakdedar tanba Asíria nia liurai no ema-lubun hotu neʼebé hamutuk ho nia, tanba sira neʼebé hamutuk ho ita barak liu fali sira neʼebé hamutuk ho nia. Ho nia, iha liman ema nian deʼit, maibé ho ita, ita iha Jeová, ita-nia Maromak, atu ajuda ita no halo funu ba ita.” Ezequias fó-hanoin ba povu katak Jeová sei halo funu ba sira. Ida-neʼe ajuda sira atu hametin sira-nia fiar ba Maromak no atu sai aten-brani. Ezequias no ninia ema-boot sira no asu-waʼin sira, no mós profeta Miquéias no Isaías, sira hatudu katak sira hanesan bibi-atan neʼebé diʼak, hanesan Jeová promete ona liuhusi ninia profeta.—2 Crônicas (Tawarikh) 32:7, 8; lee Miquéias (Mikha) 5:5, 6. e
Ezequias nia liafuan ajuda povu atu sai aten-brani (Haree parágrafu 12, 13)
14. Rabsaqué hatete saida ba povu iha Jerusalém, no sira halo saida?
14 Liurai Asíria ho ninia tropa harii tenda sira iha Laquis, iha parte oeste husi Jerusalém. Husi neʼebá, nia haruka manu-ain naʼin-tolu bá Jerusalém atu dehan ba povu atu rende an. Manu-ain ida, naran Rabsaqué koʼalia ba povu iha Jerusalém hodi uza sira-nia língua rasik. Uluk, nia dehan ba sira katak sira lalika rona ba Ezequias, no nia fó-hatene sira atu halo tuir ema Asíria. Depois, nia bosok sira, hodi dehan katak nia sei lori sira ba rai ida atubele moris diʼak. (2 Reis [Raja-Raja] 18:31, 32) Rabsaqué mós dehan katak nasaun seluk nia maromak sira la bele kuidadu sira-nia povu, no katak Jeová mós sei la bele proteje ema judeu sira. Maibé sira taka tilun ba lia-bosok sira-neʼe. Ohin loron, Jeová nia atan sira mós halo tuir sira-nia ezemplu.—Lee 2 Reis (Raja-Raja) 18:35, 36. f
15. Povu sira iha Jerusalém presiza halo saida? Oinsá mak Jeová salva sira?
15 Ezequias sente laran-tun tanba Rabsaqué nia liafuan neʼe. Maibé duké husu ajuda husi nasaun seluk, nia buka Jeová nia ajuda liuhusi profeta Isaías. Isaías dehan ba Ezequias: “Ida-neʼe mak buat neʼebé Jeová dehan kona-ba Asíria nia liurai: ‘Nia sei la tama sidade neʼe, no nia sei la hana rama-oan ida iha neʼebá.’” (2 Reis [Raja-Raja] 19:32) Povu sei presiza halo saida? Sira presiza deʼit atu hatudu aten-brani no la rende an tanba Jeová sei halo funu ba sira. No Jeová halo ida-neʼe duni! “No iha kalan neʼe, Jeová nia anju bá no oho ema naʼin-185.000 iha tropa Asíria nia kampu.” (2 Reis [Raja-Raja] 19:35) Povu iha Jerusalém hetan salvasaun, laʼós tanba buat neʼebé Ezequias halo atu proteje sidade, maibé tanba Maromak Jeová nia kbiit.
OHIN LORON SAIDA MAK ITA BELE APRENDE?
16. Ohin loron sé mak reprezenta (a) Jerusalém nia povu? (b) “ema Asíria”? (c) bibi-atan hitu no ulun-naʼin ualu?
16 Liafuan neʼebé hatete nanis iha Bíblia kona-ba ‘bibi-atan hitu no ulun-naʼin ualu’ sai loos iha dalan kompletu iha ita-nia tempu. Iha tempu antigu, ema Asíria ataka povu iha Jerusalém. Maibé lakleur tan, “ema Asíria”, katak Jeová nia inimigu, sei ataka Jeová nia povu, no koko atu halakon ita. Bíblia koʼalia kona-ba tempu neʼe, no mós koʼalia kona-ba ataka husi “Gog husi rai-Magog”, “liurai husi norte” no mós “liurai sira hotu raiklaran nian”. (Ezequiel [Yehezkiel] 38:2, 10-13; Daniel 11:40, 44, 45; Apokalipse 17:14; 19:19) Ataka hotu sira-neʼe sei akontese dala ida deʼit ka lae? Ita la hatene loos. Karik Bíblia uza liafuan oioin atu koʼalia kona-ba ataka ida deʼit. Miquéias nia profesia dehan katak Jeová sei uza tropa saida atu hasoru inimigu neʼebé bolu nuʼudar “ema Asíria”? Nia sei uza ida neʼebé la hanesan baibain. Bíblia hatete katak tropa neʼe mak ‘bibi-atan hitu no ulun-naʼin ualu’. (Miquéias [Mikha] 5:5) Neʼe mak sé? Sira mak katuas kongregasaun sira. (1 Pedro 5:2) Ohin loron, Jeová uza katuas sira atu sai hanesan bibi-atan hodi dirije no hametin ninia povu atu sira bele hasoru ataka husi “ema Asíria”. g (Haree nota iha kraik.) Miquéias nia liafuan hatete katak sira sei “hasoru rai Asíria ho surik”. (Miquéias [Mikha] 5:6) Buat ida neʼebé sira uza atu hasoru inimigu neʼe mak “surik neʼebé espíritu fó”, neʼe mak Maromak nia Liafuan.—Efeso 6:17, MF; 2 Korinto 10:4.
17. Buat haat saida mak katuas kongregasaun sira bele aprende?
17 Katuas kongregasaun sira, imi bele aprende buat barak husi buat neʼebé ita foin koʼalia: (1) Hodi prepara ba “ema Asíria”, ka Maromak nia inimigu nia ataka, buat neʼebé ulukliu mak hametin Ita-nia fiar no ajuda Ita-nia irmaun-irmán sira atu mós halo hanesan neʼe. (2) Kuandu “ema Asíria” ataka, Ita presiza fiar duni katak Jeová sei proteje ita. (3) Iha tempu neʼe, karik Ita sente matadalan neʼebé Ita simu husi Jeová nia organizasaun mak la hanesan baibain. Maibé ita hotu presiza prontu atu halo tuir matadalan neʼe, maski ita konkorda ka lae, tanba halo tuir matadalan neʼe bele salva ita-nia moris. (4) Se ema tau sira-nia fiar ba edukasaun iha mundu neʼe, ba ema nia organizasaun ka ba sira-nia sasán, sira presiza troka dalan neʼebé sira hanoin agora kedas. Ita presiza sai prontu atu ajuda ema neʼebé la tau sira-nia fiar tomak ba Jeová.
18. Oinsá mak istória kona-ba Ezequias bele ajuda ita iha futuru?
18 Lakleur tan, tempu sei toʼo mai kuandu ita sei sente katak la iha ema ida neʼebé proteje ita hanesan povu iha Jerusalém sente iha Ezequias nia tempu. Kuandu ida-neʼe akontese, Ezequias nia liafuan bele ajuda ita atu hametin ita-nia fiar. Mai ita nunka haluha katak, ho ita-nia inimigu sira mak “liman ema nian deʼit, maibé ho ita, ita iha Jeová, ita-nia Maromak, atu ajuda ita no halo funu ba ita”.—2 Crônicas (Tawarikh) 32:8.
a Liafuan iha lia-ebraiku neʼebé tradús nuʼudar “feto-raan” iha Isaías (Yesaya) 7:14, bele iha arti kona-ba feto neʼebé kaben ka seidauk kaben. Tan neʼe, liafuan neʼe bele uza ba Isaías nia feen no mós ba feto judeu Maria neʼebé sei virjen.
b Isaías 7:14: “Tanba neʼe, Jeová rasik sei fó sinál ida ba imi: Haree! Feto neʼe sei sai isin rua, no nia sei tuur ahi oan-mane ida, no feto neʼe sei hanaran nia Emanuel.”
c Isaías 8:3, 4: “3 Depois, haʼu hamutuk ho profeta feto no nia sai isin-rua no lakleur nia tuur-ahi oan-mane ida. Jeová hatete mai haʼu: ‘Hanaran nia Maer-Salal-Hás-Baz, 4 tanba antes labarik-mane neʼe hatene koʼalia, “Haʼu-nia aman!” no “Haʼu-nia inan!” iha ida neʼebé sei lori sai Damasko nia rikusoin no Samaria nia rikusoin ba liurai Asíria nia oin.’”
d Miquéias 5:1, 2: “1 . . . Ho ai-tonka, sira sei baku Israel nia juis nia hasan. 2 No ó, oh, Belém Efrata, ida neʼebé kiʼikoan liu atu hela iha Judá nia rihun ba rihun nia leet, husi ó sei sai mai haʼu ema ida neʼebé sei sai ukun-naʼin iha Israel, neʼebé ninia hun husi tempu uluk kedas, husi tempu neʼebé la bele sura.”
e Miquéias 5:5, 6: “5 No nia sei sai ida neʼebé dame nian. Kona-ba ema Asíria, kuandu nia tama iha ita-nia rai no nia sama ita-nia uma boot sira, ita tenke foti bibi-atan hitu, sin, ulun-naʼin ualu husi ema atu hasoru sira. 6 No sira sei hasoru rai Asíria ho surik, no Nimrod nia rai no portaun sira. No nia sei lori salvasaun husi ema Asíria, kuandu nia tama ita-nia rai no sama ita-nia fatin.”
f 2 Reis 18:35, 36: “35 Husi maromak sira hotu, ida-neʼebé mak salva sira-nia rai husi haʼu-nia liman, hodi Jeová salva Jerusalém husi haʼu-nia liman? 36 Maibé povu nonook deʼit, no sira la koʼalia liafuan ida ba nia, tanba liurai haruka sira hodi dehan: ‘Imi la bele hatán ba nia.’”
g Iha Bíblia, númeru hitu baibain uza atu reprezenta buat neʼebé kompletu. Tanba ualu mak aumenta ida tan, neʼe katak Jeová fó buat neʼebé barak liu.
