BÍBLIA hatete: “Oan sira mak liman-rohan husi Jeová; oan neʼebé moris mai husi oan-fatin mak prezente ida.” (Sal 127:3) Tan neʼe, ita sei haksolok tebes bainhira ita-nia oan moris.

Maski nuneʼe, ida-neʼe mós lori responsabilidade boot ba ita. Atu haboot ita-nia oan ho isin-diʼak, ita fó beibeik ai-han neʼebé diʼak. Maibé ita mós presiza fó ai-han espirituál ba ita-nia oan hodi nia bele iha relasaun diʼak ho Jeová no halo tuir Ninia matadalan. (Prov 1:8) Entaun, bainhira mak tempu neʼebé diʼak atu komesa hanorin ita-nia oan? No ita tenke hanorin ita-nia oan saida deʼit?

Iha tempu Israel antigu, iha mane ida husi suku Dan, neʼebé hela iha sidade Zorá, naran Manoá. Manoá nia feen la iha oan, maibé loron ida, Jeová nia anju fó-hatene nia katak nia sei iha oan-mane ida. (Juíz 13:2, 3) Maski lia-menon neʼe halo Manoá ho ninia feen sai kontente tebes, maibé sira mós hanoin barak. Tan neʼe, Manoá halo orasaun: “Favór ida, haruka Maromak loos nia ema . . . atu mai fali ba ami no hanorin ami kona-ba buat neʼebé ami tenke halo ba oan neʼebé atu moris.” (Juíz 13:8) Manoá ho ninia feen hanorin Maromak nia ukun-fuan ba sira-nia oan Sansão, no ida-neʼe lori rezultadu diʼak. Ikusmai Jeová nia espíritu mak book Sansão atu halo buat barak nuʼudar ema Israel nia juis ida.—Juíz 13:25; 14:5, 6; 15:14, 15.

Bainhira loos mak tempu neʼebé diʼak atu komesa hanorin oan? Timóteo aprende “sagrada eskritura” husi ninia inan Eunice no avó-feto Luisa “hori kiʼik kedas”. (2 Tim 1:5; 3:15) Sin, sira komesa hanorin Bíblia ba Timóteo bainhira nia sei labarik kiʼik.

Inan-aman neʼebé matenek halo orasaun hodi husu Jeová nia ajuda no halo planu nanis atu bele komesa hanorin sira-nia oan “hori kiʼik kedas”. Provérbios 21:5 hatete: “Ema badinas nia planu sira sei hetan rezultadu neʼebé diʼak”. Tan neʼe, antes inan-aman atu iha bebé, sira prepara didiʼak atu tau matan ba bebé neʼe. Karik sira halo lista kona-ba sasán sira neʼebé bebé sei presiza. Se nuneʼe, importante mós atu halo planu hodi hanorin bebé kona-ba Jeová. No sira sei komesa kedas hanorin sira-nia oan kuandu nia moris mai.

Tuir livru ida, fulan balu depois bebé moris mak tempu neʼebé importante tebes ba ninia kakutak. Durante tempu neʼe, bebé nia kakutak halo ligasaun barak hodi nia bele aprende buat oioin. Tan neʼe, inan-aman presiza aproveita tempu badak neʼe hodi hanorin sira-nia oan kona-ba Jeová no Ninia matadalan!

Inan ida neʼebé serbí nuʼudar pioneiru regulár hatete kona-ba ninia oan-feto neʼebé sei kiʼik: “Husi fulan ida depois nia moris, haʼu sempre lori nia ba haklaken. Maski nia seidauk komprende, maibé haʼu fiar katak ida-neʼe ajuda duni nia. Bainhira nia halo tinan rua, nia la moe atu fahe tratu ba ema neʼebé ami hasoru iha haklaken.”

Loos duni, kuandu hanorin oan sira husi kiʼik kedas, ida-neʼe sei lori rezultadu diʼak. Maibé, inan-aman sira mós hasoru susar oioin nuʼudar sira hakaʼas an atu hanorin sira-nia oan.

Tanba baibain labarik sira la bele tuur hakmatek ba tempu kleur, ida-neʼe halo susar ba inan-aman barak atu hanorin oan. Labarik sira-nia atensaun halai bá-mai deʼit tanba sira hakarak hatene kona-ba buat hotu neʼebé haleʼu sira. Entaun, hodi ajuda oan sira atu rona ba buat neʼebé ita hanorin, saida deʼit mak ita bele halo?

Mai ita hanoin kona-ba Moisés nia liafuan iha Deuteronômio 6:6, 7, neʼebé dehan: “Liafuan sira-neʼe neʼebé haʼu fó ba imi ohin, tenkesér rai iha imi-nia laran; no imi tenkesér hanorin beibeik liafuan sira-neʼe ba imi-nia oan sira no koʼalia ba sira kuandu imi tuur iha imi-nia uma no kuandu imi laʼo iha dalan no kuandu imi atu toba no kuandu imi hadeer.” Liafuan “hanorin beibeik” katak repete filafali hodi hanorin kona-ba buat ida. Labarik kiʼik mak hanesan ai-horis nurak neʼebé presiza rega beibeik. Se ema boot mós presiza rona beibeik atu aprende buat neʼebé importante, oinsá tan ho labarik kiʼik sira!

Atu hanorin lia-loos ba ita-nia oan sira, ita presiza tempu atu hamutuk ho sira. Karik susar atu halo ida-neʼe tanba mundu neʼe halo ita okupadu tebes. Maibé, apóstolu Paulo hatete ba ema kristaun atu uza tempu ho didiʼak. (Ef 5:15, 16) Oinsá mak ita bele halo nuneʼe? Porezemplu, irmaun katuas kristaun ida ho ninia feen neʼebé serbí nuʼudar pioneiru regulár, sira presiza tetu didiʼak sira-nia tempu atu hanorin sira-nia oan-feto, halaʼo  sira-nia responsabilidade iha kongregasaun, no serbisu atu manán osan. Oinsá mak sira bele iha tempu atu hanorin sira-nia oan? Irmaun neʼe hatete: “Dadeer-dadeer, antes haʼu atu bá serbisu, ami lee ba ami-nia oan Livru Istória husi Bíblia ka Eskritura Loron-Loron. Iha kalan, ami mós lee ba ami-nia oan antes nia atu toba, no bainhira ami bá haklaken, ami sempre lori nia. Ami lakohi lakon oportunidade diʼak atu hanorin nia bainhira nia sei kiʼik.”

Ita hotu hakarak ita-nia oan atu sai ema neʼebé hatene atu tau matan ba ninia an. Maibé importante liu mak hanorin sira atu hadomi Maromak ho laran.—Mc 12:28-30.

Salmo 127:4 hatete: “Hanesan rama-oan iha ema forte nia liman, nuneʼe mós ho oan sira.” Sin, oan sira mak hanesan rama-oan. Se ita hakarak rama-oan atu kona iha fatin neʼebé loos, ita presiza kaer ho didiʼak tanba kuandu ita hana ona, ita la bele halo buat ida. Nuneʼe mós ho inan-aman, sira iha tempu uitoan deʼit atu hanorin oan. Tan neʼe, sira presiza uza tempu neʼe ho didiʼak hodi kuda Maromak nia matadalan iha oan sira-nia neon no laran.

Kona-ba ninia oan espirituál, apóstolu João hatete: “Mai haʼu, la iha ksolok boot liu ida-neʼe katak haʼu rona kona-ba haʼu-nia oan sira neʼebé laʼo tuir lia-loos.” (3 Joao 4) Inan-aman kristaun mós bele hatete hanesan neʼe ho laran-haksolok bainhira sira-nia oan “laʼo tuir lia-loos”.