IHA tinan 49, apóstolu Pedro, Tiago no João fó knaar ida ba apóstolu Paulo no Barnabé. Knaar neʼe mak atu tau matan ba ema kristaun kiak sira nuʼudar sira halaʼo serbisu haklaken ba ema jentiu ka ema husi nasaun seluk. (Gal 2:9, 10) Sira kumpre knaar neʼe hodi halo saida?

Paulo nia karta sira hatudu ho klaru katak nia halaʼo duni ninia knaar neʼe. Porezemplu, iha ninia karta ba ema kristaun iha sidade Korinto, nia hakerek: “[Kona-ba] kolekta ba santu sira, imi sei halo mós hanesan haʼu haruka ba kreda sira iha Galásia. Iha loron uluk semana nian, imi ida-ida sei rai-hela no tau ketak buat neʼebé imi bele, atu wainhira haʼu toʼo neʼebá imi la halo tan kolekta. Wainhira haʼu toʼo, haʼu sei haruka sira neʼebé imi tau laran ho surat atu lori imi-nia prezente diʼak loos ba Jerusalém.”—1 Kor 16:1-3.

Iha Paulo nia karta segundu ba ema kristaun iha sidade Korinto, nia hatete fali tansá presiza halibur osan nuʼudar kontribuisaun. Nia dehan: “Buat neʼebé resin ba imi ohin neʼe tenke tulun sira-nia kuran.”—2 Kor 8:12-15.

Maizumenus iha tinan 56, kuandu Paulo hakerek karta ba ema kristaun iha sidade Roma, nia besik ona atu ramata ninia knaar atu halibur osan. Nia hatete: “Haʼu sei bá Jerusalém atu serbí santu sira iha neʼebá. Basá Masedónia no Akaia halibur osan atu fó ba santu sira neʼebé kiak iha Jerusalém.” (Rom 15:25, 26) Paulo kumpre duni ninia knaar neʼe tanba kuandu nia fila fali ba Jerusalém no ema kaer tiha nia, nia hatete ba governadór Roma, naran Félix: “Haʼu mai atu lori ezmola ba haʼu-nia nasaun no haʼu-nia buat-karan.”—Apos 24:17.

Paulo nia liafuan kona-ba ema kristaun iha Masedónia hatudu katak ema kristaun iha tempu neʼebá iha duni laran-luak. Nia dehan katak sira ‘husu makaʼas’ atu bele ajuda sira-nia maluk kristaun. Nuneʼe, nia fó laran-manas ba ema kristaun iha Korinto atu halo tuir ezemplu diʼak neʼe, hodi dehan: “Ida-ida sei halo nuʼudar nia deside ona, la hodi laran-susar ka obriga an, basá Maromak hadomi ema neʼebé fó ho laran-haksolok.” Saida mak book kongregasaun sira atu hatudu laran-luak? Sira hakarak hatudu laran-luak laʼós deʼit tanba sira hanoin “kona-ba buat neʼebé ema santu sira presiza” maibé mós tanba sira “agradese Maromak”. (2 Kor 8:4; 9:7, 12) Ohin loron, ita mós hakarak halo hanesan neʼe. Hodi halo nuneʼe, ita bele fiar katak Maromak Jeová sei haraik bensaun mai ita, no ida-neʼe mak halo ita sai riku.—Prov 10:22.

Hanesan iha apóstolu Paulo nia tempu, ema barak ohin loron “rai-hela no tau ketak” osan uitoan atu bele tau kaixa kontribuisaun ho marka “Serbisu iha Mundu Tomak”. (1 Kor 16:2) Fulan-fulan, kongregasaun sira haruka osan sira-neʼe ba sukursál husi Testemuña ba Jeová neʼebé tau matan ba serbisu iha sira ida-idak nia rai. Ita rasik mós bele haruka kedas kontribuisaun ba sukursál husi Testemuña ba Jeová neʼebé tau matan ba Ita-nia rai. Atu hatene ho loloos organizasaun nia naran neʼebé Testemuña ba Jeová uza, favór ida, kontaktu sukursál neʼebé tau matan ba Ita-nia rai. Ita bele hetan informasaun kona-ba sukursál liuhusi internét, www.isa4310.com. Informasaun tuirmai mak kona-ba dalan balu neʼebé Ita bele fó kontribuisaun:

KONTRIBUISAUN NEʼEBÉ FÓ DEʼIT

• Osan, kadeli, korrente, ka buat seluk tan neʼebé iha folin.

• Inklui karta hodi hatete katak osan ka sasán sira-neʼe mak kontribuisaun neʼebé Ita fó deʼit ho hakarak rasik.

ARRANJU KONA-BA HUSIK ORGANIZASAUN UZA ITA-NIA OSAN

• Ita bele halo arranju ho Testemuña ba Jeová hodi sira bele uza Ita-nia osan, maibé kuandu Ita presiza osan neʼe, Ita bele hetan fali.

• Hakerek karta neʼebé hatete katak Ita husik Testemuña ba Jeová atu uza Ita-nia osan maibé kuandu Ita presiza, Ita sei husu fali osan neʼe.

PLANU KONA-BA FÓ KONTRIBUISAUN

Maski Ita bele fó osan ka sasán neʼebé folin nuʼudar kontribuisaun, maibé iha mós dalan seluk tan atu Ita bele fó kontribuisaun ba serbisu iha mundu tomak. Dalan sira-neʼe mak hakerek tuirmai neʼe. Antes atu fó kontribuisaun hanesan neʼe, kontaktu uluk lai ho sukursál neʼebé tau matan ba Ita-nia rai.

Konta banku nian: Kona-ba konta banku nian, ka konta banku nian ba pensaun, Ita bele entrega kbiit ba Testemuña ba Jeová atu uza, ka Ita bele fó buat sira-neʼe ba Testemuña ba Jeová bainhira Ita mate, hodi tuir kritériu banku nian.

Uma ka rai: Ita mós bele fó uma ka rai neʼebé bele faʼan nuʼudar prezente ba Testemuña ba Jeová. Se Ita hakarak hela iha uma neʼe, Ita bele halo arranju atubele kontinua hela nafatin toʼo Ita mate.

Osan tinan-tinan: Arranju neʼe mak atu fó osan ba Testemuña ba Jeová. Tuirmai, tinan-tinan Ita ka ema neʼebé Ita hili sei simu fali osan ho valór neʼebé Ita konkorda ona toʼo Ita ka ema neʼe mate.

Testamentu: Liuhusi surat legál neʼebé Ita asina, Ita bele fó sai Ita-nia hakarak atu fó rai, uma ka osan ba Testemuña ba Jeová bainhira Ita mate. No mós, se Ita fó lisensa ba Testemuña ba Jeová atu uza Ita-nia osan ka sasán ba serbisu iha mundu tomak, Ita bele halo testamentu atu fó sai katak bainhira Ita mate buat sira-neʼe mak Testemuña ba Jeová nian ona.

Osan fulan-fulan: Bíblia hatete: “Hahiʼi Jeová ho ó-nia sasán neʼebé folin no ho fuan primeiru husi ó-nia toʼos.” (Prov 3:9) Ema neʼebé serbisu ka fila liman, sira mós bele halo planu atu rai osan uitoan fulan-fulan hodi bele tau iha kaixa kontribuisaun ba “Serbisu iha Mundu Tomak”.

Atu hetan informasaun liután, Ita bele kontaktu Testemuña ba Jeová iha Timor-Leste, liuhusi telefone ka hodi hakerek karta ba diresaun iha kraik. Ita mós bele kontaktu sukursál neʼebé tau matan ba Ita-nia rai.