1, 2. Iha kalan antes Jesus mate, saida mak nia hanorin ba ninia apóstolu sira?

IHA kalan antes Jesus mate, nia tuur hamutuk ho ninia apóstolu sira iha sala andár-leten iha uma ida iha Jerusalém. Durante tempu han, Jesus hamriik, hasai ninia unuk, no foti hena hodi kesi fali iha ninia knotak. Tuirmai, nia tau bee iha basia, komesa fase ninia dixípulu sira-nia ain, no depois hamaran ho hena. Fase hotu tiha, nia tau filafali ninia unuk. Tanbasá mak Jesus halo serbisu hanesan neʼe, neʼebé baibain atan halo?—Joao 13:3-5.

² Jesus rasik esplika: “Imi komprende haʼu halo sá loos ba imi? . . . Haʼu, Naʼi no Mestre, fase karik imi-nia ain, imi mós sei fase ain ba malu. Basá haʼu fó ezemplu ba imi, atu, nuʼudar haʼu foin halo ba imi, imi mós banati-tuir.” (Joao 13:12-15) Hodi halo serbisu neʼebé baibain atan mak halo, Jesus hanorin lisaun importante ida neʼebé ninia apóstolu sira la bele haluha, neʼebé fó laran-manas ba sira atu hatudu haraik-an ba malu.

3. (a) Iha situasaun rua saida mak Jesus hanorin ninia dixípulu sira katak importante atu hatudu haraik-an? (b) Iha lisaun neʼe, ita sei koʼalia kona-ba saida deʼit?

³ Maibé, ida-neʼe laʼós dala primeiru neʼebé Jesus hanorin apóstolu sira katak importante atu hatudu haraik-an. Antes neʼe, kuandu apóstolu balu haksesuk malu kona-ba sé mak boot liu, Jesus bolu labarik ida iha ninia sorin no hanorin sira atu haraik an hodi hatete: “Ema neʼebé simu labarik neʼe iha haʼu-nia naran, simu haʼu; no ema neʼebé simu haʼu, nia simu Ida neʼebé haruka haʼu mai. Basá ida neʼebé kiʼik liu iha imi-nia leet, nia mak boot liu.” (Lc 9:46-48) Iha tempu seluk, kuandu Jesus haree ema fariseu sira neʼebé buka oin, nia hatete: “Ema neʼebé foti-an, Naʼi sei hatún nia; no  ema neʼebé haraik an, Naʼi sei foti nia.” (Lc 14:11) Klaru katak Jesus hakarak ninia dixípulu sira atu hatudu haraik-an no sees husi hahalok foti-an no loko-an. Tan neʼe, atu banati-tuir Jesus, mai ita haree oinsá mak nia fó ezemplu mai ita kona-ba haraik-an. Ita mós sei koʼalia kona-ba oinsá mak hatudu haraik-an bele lori bensaun ba ita rasik no mós ba ema seluk.

4. Antes Jesus mai toʼo mundu, oinsá mak nia hatudu haraik-an?

⁴ Husi tempu ulukliu kedas, Maromak nia Oan hatudu haraik-an. Antes Jesus mai toʼo mundu, nia hamutuk ho ninia Aman durante tinan rihun ba rihun. Kona-ba relasaun besik entre Oan no Aman, livru Isaías hatete: “Naʼi Jeová, Ukun-Naʼin Boot Liu Hotu, nia rasik fó haʼu nanál hanesan ema matenek nian, hodi haʼu bele hatene oinsá atu hatoʼo liafuan ba ema neʼebé kole. Dadeer-dadeer nia fanu haʼu; nia fanu haʼu-nia tilun atu haʼu bele rona hanesan ema matenek. Naʼi Jeová, Ukun-Naʼin Boot Liu Hotu, nia rasik loke haʼu-nia tilun, no kona-ba haʼu, haʼu la kontra hasoru nia, no haʼu la fila haʼu-nia oin ba kotuk.” (Isa 50:4, 5) Jesus hatudu haraik-an hodi hakarak tebes atu aprende husi Maromak no rona didiʼak ba buat neʼebé Jeová hanorin nia. Ita bele fiar katak Jesus haree Jeová nia ezemplu kona-ba haraik-an no oinsá Nia hatudu laran-sadiʼa ba ema sala-naʼin!

5. Nuʼudar arkanju Miguel, oinsá mak Jesus hatudu ezemplu kona-ba haraik-an?

⁵ Maibé laʼós anju hotu mak hatudu haraik-an hanesan Jesus. Anju ida neʼebé ikusmai sai Diabu Satanás, nia lakohi aprende husi Jeová. Nia haburas hahalok foti-an, no ikusmai kontra hasoru Jeová. Maibé, Jesus kontente nafatin ho pozisaun iha lalehan neʼebé nia simu husi Jeová, no nia nunka hanoin atu uza sala ninia kbiit. Porezemplu, kuandu Jesus nuʼudar arkanju Miguel haksesuk malu ho Diabu kona-ba Moisés nia mate-isin, nia la hanoin atu halo buat neʼebé nia la iha direitu. Duké halo nuneʼe, ho haraik-an, Jesus husik Jeová rezolve problema neʼe iha dalan neʼebé tuir Ninia hakarak iha tempu neʼebé loos tanba Nia mak Tesi-Lia Naʼin Boot Liu Hotu.—Lee Judas 9.

6. Oinsá mak Jesus hatudu haraik-an hodi simu knaar nuʼudar Mesias?

⁶ Klaru katak antes Jesus mai toʼo mundu, nia hatene profesia hotu neʼebé fó-hatene nanis kona-ba ninia moris iha rai nuʼudar Mesias. Tan neʼe, ita bele fiar katak nia hatene ona nia sei hetan susar oioin iha mundu. Maski nuneʼe, Jesus simu knaar atu tun mai mundu no mate nuʼudar Mesias neʼebé promete nanis ona. Tanbasá? Kona-ba hahalok haraik-an neʼebé Maromak nia Oan hatudu, apóstolu Paulo hatete katak maski Jesus iha pozisaun aas nuʼudar anju neʼebé iha kbiit boot, maibé nia la hanoin atu sai hanesan Maromak. Nia haraik-an, no tan neʼe mak nia mai toʼo mundu nuʼudar ema.—Flp 2:6, 7, MF.

7, 8. Iha dalan saida deʼit mak Jesus hatudu haraik-an kuandu nia sei labarik no kuandu nia halaʼo serbisu haklaken?

⁷ Kona-ba Jesus nia moris nuʼudar ema iha rai, apóstolu Paulo dehan katak nia sempre “haraik-an hodi halo tuir toʼo mate”. (Flp 2:8) Husi tempu neʼebé Jesus sei labarik, nia hatudu haraik-an no fó ezemplu diʼak mai ita. Maski ninia aman José no ninia inan Maria ema sala-naʼin, maibé Jesus nafatin “halo tuir sira-nia hakarak”. (Lc 2:51) Jesus nia ezemplu neʼe diʼak tebes ba labarik no joven sira ohin loron, no Jeová sei haraik bensaun ba sira neʼebé halo tuir sira-nia inan-aman.

⁸ Kuandu Jesus sai boot, nia mós hatudu  haraik-an hodi tau uluk Jeová nia hakarak iha ninia moris duké buka ninia hakarak rasik. (Joao 4:34) Durante serbisu haklaken, Jesus Kristu uza Jeová nia naran hodi ajuda ema seluk atu hatene didiʼak kona-ba Jeová nia hahalok sira no ninia hakarak ba ema. Jesus mós moris tuir buat neʼebé nia hanorin ba ema seluk kona-ba Jeová. Porezemplu, kuandu Jesus hanorin kona-ba oinsá atu halo orasaun, nia komesa orasaun neʼe hodi dehan: “Ami Aman iha lalehan, halo Ita naran sai santu.” (Mt 6:9) Sin, Jesus hanorin ninia dixípulu sira atu hanoin uluk kona-ba halo Jeová nia naran sai santu, no nia rasik moris tuir hanorin neʼe. Tan neʼe, kuandu nia besik atu ramata ninia moris iha rai, nia hatete ba Jeová: “Haʼu fó-hatene tiha ba sira Ita-nia naran, no haʼu sei fó-hatene liután.” (Joao 17:26) No mós, Jesus hatete beibeik katak nia bele halo buat hotu tanba hetan ajuda husi ninia Aman.—Joao 5:19.

9. Saida mak Zacarias fó-hatene nanis kona-ba Mesias? Oinsá mak liafuan neʼe sai loos?

⁹ Profeta Zacarias fó-hatene nanis kona-ba Mesias, hodi dehan: “Sai haksolok bá, oh, Sião nia oan-feto. Hakilar lian manán nian, oh, Jerusalém nia oan-feto. Haree! Ó-nia liurai rasik laʼo ba ó. Nia ema loos, sin, Maromak salva ona nia; nia haraik-an, no saʼe kuda-burru ida.” (Zac 9:9) Liafuan neʼe sai loos kuandu Jesus tama iha Jerusalém antes loron Páskua iha tinan 33. Iha tempu neʼebá, ema-lubun nahe sira-nia hatais no tesi ai-sanak sira hodi tau iha dalan, no ema iha sidade tomak sai rame. Maski ema hahiʼi Jesus nuʼudar sira-nia Liurai, Jesus nafatin hatudu haraik-an.—Mt 21:4-11.

10. Hodi halo tuir Aman nia hakarak toʼo mate, saida deʼit mak Jesus hatudu?

¹⁰ Jesus Kristu haraik an duni no halo tuir ninia Aman nia hakarak toʼo nia mate iha ai-riin terus nian. Hodi halo nuneʼe, Jesus hatudu ho klaru katak ema bele laran-metin ba Jeová maski hasoru susar boot naran deʼit. Jesus mós hatudu katak Satanás bosok hodi dehan ema serbí Jeová tan deʼit hakarak  hetan buat ruma. (Jó 1:9-11; 2:4) Tanba Jesus halo tuir ninia Aman iha dalan neʼebé kompletu, nia mós hatudu katak nia apoia Jeová nia direitu atu ukun iha lalehan no rai. Ita bele fiar katak Jesus nia hahalok haraik-an no laran-metin halo ninia Aman Jeová laran-kontente tebes.—Lee Provérbios 27:11. *

11. Jesus nia mate loke dalan ba ema neʼebé fiar nia atu hetan saida deʼit?

¹¹ Tanba Jesus haraik an toʼo mate, ida-neʼe mós fó oportunidade ba ema hotu atu hetan salvasaun husi sala no mate. (Mt 20:28) Liuhusi Jesus nia sakrifísiu neʼe, Jeová bele fó perdua ba ema nia sala hodi tuir ninia justisa, no loke dalan ba ema atu moris ba nafatin. Apóstolu Paulo hatete: “Nuʼudar husi sala ida lia todan monu ba ema hotu, nuneʼe mós husi hahalok diʼak ida perdaun no moris mosu ba ema hotu.” (Rom 5:18) Jesus nia mate loke dalan ba ema kristaun neʼebé hetan kose-mina ho espíritu santu atu hetan moris rohan-laek iha lalehan, no ba “bibi seluk” atu moris ba nafatin iha rai.—Joao 10:16; Rom 8:16, 17.

12. Oinsá mak Jesus hatudu laran-maus no haraik-an ba ema sala-naʼin?

¹² Jesus konvida ema hotu neʼebé “kole no terus” atu hakbesik ba nia, hodi dehan: “Simu haʼu-nia ukun bá hodi banati-tuir haʼu, tan haʼu laran-kmaus no haraik-an; no imi sei hetan hakmatek ba imi-nia klamar.” (Mt 11:28, 29) Tanba Jesus mak haraik-an no laran-maus, nia hatudu laran-diʼak ba ema hotu hodi la todan ba sorin. Nia mós la husu ninia dixípulu sira atu halo buat neʼebé sira la bele halo, maibé nia prontu atu gaba sira no fó laran-manas ba sira. Jesus la halo sira sente katak sira la iha matenek ka la iha folin, no Jesus mós la domina sira. Jesus hatete: “Haʼu-nia ukun mamar, haʼu-nia naha kmaan.” Jesus nia liafuan neʼe hatudu katak la susar ba ninia dixípulu sira atu halo tuir ninia hanorin, no katak se sira halo tuir nia, sira bele hetan kmaan. Tan neʼe, ema hotu, feto ho mane no husi labarik toʼo ema boot, sira sente kontente kuandu sira hamutuk ho Jesus.—Mt 11:30.

13. Oinsá mak Jesus hatudu laran-diʼak ba ema neʼebé moris susar?

¹³ Jesus hanoin ema baibain neʼebé moris susar iha Israel hodi ajuda sira tuir sira-nia presiza. Porezemplu, besik sidade Jerikó, Jesus hasoru ema matan-delek naʼin-rua, ida naran Bartimeu no ninia maluk, neʼebé husu ezmola. Sira husu beibeik Jesus nia ajuda, maibé ema-lubun boot neʼebé besik sira haruka sira atu nonook. Maski fasil ba Jesus atu kontinua laʼo ba oin deʼit hodi husik ema matan-delek sira, maibé nia la halo nuneʼe. Tanba Jesus hanoin  sira, nia bolu sira mai no halo sira haree fali. Sin, Jesus halo tuir ninia Aman Jeová nia ezemplu hodi hatudu haraik-an no laran-sadiʼa ba ema sala-naʼin.—Mt 20:29-34; Mc 10:46-52.

14. Tanba Jesus halaʼo ninia moris ho haraik-an, ida-neʼe lori bensaun saida deʼit?

¹⁴ Tanba Jesus Kristu halaʼo ninia moris ho haraik-an, ida-neʼe lori haksolok no bensaun. Porezemplu, kuandu Jeová haree ninia Oan doben halo tuir ninia hakarak, ida-neʼe halo nia haksolok. Tanba Jesus hatudu laran-maus no haraik-an, ida-neʼe mós fó kmaan ba ninia apóstolu no dixípulu sira. Liuhusi ninia ezemplu, hanorin, no ninia liafuan atu gaba sira, neʼe ajuda sira atu serbí Maromak iha dalan neʼebé diʼak liután. Ema baibain mós hetan bensaun husi Jesus nia hahalok haraik-an tanba Jesus prontu atu ajuda sira, hanorin sira, no fó laran-manas ba sira. Tuir loloos, ema hotu neʼebé fiar Jesus sei hetan bensaun ba nafatin liuhusi ninia sakrifísiu.

15. Oinsá mak hahalok haraik-an lori bensaun ba Jesus rasik?

¹⁵ Maibé, oinsá ho Jesus rasik? Ninia hahalok haraik-an lori bensaun ba nia ka lae? Sin, tanba Jesus hatete: “Ema neʼebé haraik an, Naʼi sei foti nia.” (Lc 14:11) Apóstolu Paulo esplika katak ida-neʼe mak akontese ba Jesus rasik, hodi dehan: “Maromak foti nia hodi fó ba nia naran ida neʼebé boot liu naran sira hotu, atu nuneʼe, ba Jesus nia naran, ain-tuur sira hotu hakneʼak, iha lalehan, iha rai, iha mate sira leet, no nanál tomak haklaken katak Kristu Jesus mak Naʼi, ba Aman Maromak nia glória.” Sin, tanba Jesus hatudu haraik-an no laran-metin iha ninia moris iha mundu, Maromak Jeová “foti nia” hodi fó kbiit ba nia atu ukun kriatura hotu iha lalehan no rai.—Flp 2:9-11.

16. Oinsá mak Maromak nia Oan sei nafatin hatudu haraik-an?

¹⁶ Iha futuru mós Maromak nia Oan sei nafatin hatudu haraik-an. Ema neʼebé hakerek salmu ida fó-hatene nanis kona-ba buat neʼebé Jesus nuʼudar Liurai iha lalehan sei halo ba Maromak nia inimigu sira, hodi dehan: “Ho Ita-nia glória, bá oin toʼo hetan susesu bá; saʼe kuda hodi defende lia-loos no haraik-an no justisa.” (Sal 45:4) Iha Armagedon, Jesus Kristu sei halo funu atu defende ema neʼebé haraik-an, hadomi lia-loos no halo buat neʼebé loos. No bainhira Jesus nia Ukun ba Tinan Rihun Ida sei toʼo rohan no nia “harahun tiha ukun-naʼin sira no kbiit-waʼin sira”, saida mak sei akontese? Jesus sei nafatin hatudu haraik-an ka lae? Sin, Jesus ho haraik-an sei entrega fali ukun neʼe ba ninia Aman Maromak.—Lee 1 Korinto 15:24-28.

17, 18. (a) Tanbasá mak importante ba Jeová nia atan sira atu halo tuir Jesus nia ezemplu kona-ba haraik-an? (b) Iha lisaun tuirmai, ita sei koʼalia kona-ba saida?

¹⁷ Oinsá ho ita? Ita mós hatudu haraik-an hodi halo tuir Jesus nia ezemplu ka lae? Iha Armagedon, Liurai Jesus Kristu sei salva deʼit ema neʼebé haraik-an no halo buat neʼebé loos. Tan neʼe, importante tebes atu ita haburas hahalok haraik-an hodi bele hetan salvasaun. Liután neʼe, hanesan Jesus nia hahalok haraik-an lori rezultadu diʼak ba ninia an rasik no ba ema seluk, ita-nia hahalok haraik-an mós sei lori buat diʼak ba ita no ba ema seluk.

¹⁸ Entaun, saida deʼit mak ajuda ita atu halo tuir Jesus nia ezemplu kona-ba haraik-an? Saida deʼit mak ita bele halo atu nafatin hatudu haraik-an maski dala ruma la fasil atu halo nuneʼe? Iha lisaun tuirmai, ita sei koʼalia kona-ba pergunta sira-neʼe.