“HAʼU la bele duni haklaken husi uma ba uma!” Ema barak neʼebé foin estuda Bíblia sente hanesan neʼe kuandu hanoin kona-ba haklaken ba ema neʼebé sira la koñese! Maibé, liafuan neʼe hatoʼo husi ema neʼebé iha esperiénsia kona-ba hatoʼo diskursu no hanorin Bíblia, neʼebé uluk bolu nuʼudar peregrinu.

Ema barak neʼebé lee livru Zionʼs Watch Tower no sai ona husi sira-nia igreja, sira hakarak tebes atu halibur hamutuk ho ema seluk neʼebé hamrook ba lia-loos husi Bíblia. Livru neʼe fó laran-manas ba lee-naʼin sira atu buka ema neʼebé iha fiar hanesan hodi halibur hamutuk beibeik atu estuda Bíblia. Husi tinan 1894, Watch Tower Society fó knaar ba irmaun balu, neʼebé ikusmai bolu nuʼudar peregrinu, atu bá hasoru grupu sira neʼebé husu atu vizita. Atu fó knaar neʼe, organizasaun hili irmaun sira neʼebé hatudu hahalok haraik-an, hatene didiʼak Bíblia, matenek atu hanorin, no laran-metin ba Jesus nia sakrifísiu. Vizita neʼe baibain halaʼo ba loron ida ka rua deʼit. Estudante Bíblia barak hola parte atu haklaken ba dala primeiru kuandu sira fahe konvite kona-ba diskursu públiku neʼebé peregrinu sira hatoʼo. Depois hatoʼo tiha diskursu lokraik nian iha eskola ida, irmaun Hugo Riemer neʼebé ikusmai serbí iha Grupu Administradór hatán pergunta barak kona-ba Bíblia toʼo kalan-boot. Maski nia kole, maibé nia kontente no dehan katak reuniaun neʼe “kapás tebes”.

Livru The Watch Tower hatete katak peregrinu sira bá vizita grupu sira hodi halaʼo reuniaun iha fiar-naʼin sira-nia uma atu hametin sira-nia fiar. Estudante Bíblia sira neʼebé hela besik área neʼe mai atu rona diskursu no husu pergunta. Depois neʼe, sira han hamutuk. Kuandu irmán Moude Abbott sei kiʼik hela, nia tuir reuniaun hodi rona ba diskursu dadeer nian, depois, ema hotu tuur haleʼu meza boot ida iha jardín. Nia hatete: “Iha meza neʼe nakonu ho ai-han neʼebé diʼak, hanesan naʼan, manu sona, paun oioin, no dose! Ema hotu han toʼo bosu, no maizumenus iha tuku rua lokraik, ami halibur fali hodi rona diskursu ida tan.” Nia mós dehan: “Iha tempu neʼe, ema hotu matan-dukur loos.” Irmaun Benjamin Barton neʼebé serbí nuʼudar peregrinu ba tempu kleur hatete: ‘Se haʼu han hotu ai-han diʼak neʼebé ema fó mai haʼu, karik haʼu mate kleur ona.’ Ikusmai, sede-jerál iha Brooklyn haruka karta ida ba irmán sira neʼebé hatudu laran-diʼak katak diʼak liu atu fó “hahán baibain deʼit” ba peregrinu sira no “fó tempu ba sira atu deskansa”.

Peregrinu sira iha matenek atu hanorin no uza buat naran deʼit neʼebé sira iha atu halo diskursu sai moris liu. Irmaun R. H. Barber nia diskursu sempre furak loos. Irmaun W. J. Thorn koʼalia hanesan aman ida ba nia oan sira. Loron ida, kuandu irmaun Shield Toutjian halo viajen ho karreta, derrepente deʼit nia hakilar: “Para!” Depois neʼe, nia tun husi karreta, kuʼu ai-funan fuik, no hanorin lisaun kona-ba Jeová nia kriasaun ba sira neʼebé halo viajen ho nia.

Peregrinu sira-nia serbisu iha susar barak, liuliu ba sira neʼebé idade ona. Maibé, ba sira balu, susar neʼebé boot liu mak kuandu knaar neʼebé sira halaʼo troka uitoan. Agora sira presiza dirije no hatudu ezemplu diʼak atu haklaken husi uma ba uma. Livru Watch Tower, 15 Marsu 1924, hatete katak “knaar importante  ida” husi ema kristaun loos “mak haklaken kona-ba Maromak nia Ukun. Peregrinu sira-nia knaar mak atu halo ida-neʼe.”

Peregrinu balu lakohi simu knaar neʼe no husik sira-nia serbisu atu vizita grupu sira, no sira balu harii sira-nia grupu rasik. Irmaun Robie D. Adkins hanoin-hetan kona-ba peregrinu ida neʼebé matenek atu hatoʼo diskursu hatete: “Buat neʼebé haʼu hatene mak haklaken deʼit iha plataforma. Haʼu la bele duni haklaken husi uma ba uma!” Kona-ba peregrinu neʼe, irmaun Adkins hatete: “Tuirmai, haʼu haree nia iha reuniaun boot iha Columbus, Ohio, iha tinan 1924. Ema neʼe haree hanesan la iha esperansa no hamriik mesak iha ai-mahon ida, dook husi irmaun sira neʼebé haksolok tebes. Haʼu la haree tan nia depois neʼe. Lakleur, nia husik organizasaun.” Iha parte seluk, “irmaun-irmán barak ho haksolok laʼo liu ema neʼe nia oin hodi lori livru sira ba sira-nia karreta”, tanba sira hakarak tebes atu haklaken husi uma ba uma.—Apos 20:20, 21.

Maibé peregrinu barak fó sira-nia laran tomak ba serbisu haklaken maski sira mós taʼuk hanesan ho ema sira neʼebé sira treinu. Kona-ba serbisu haklaken husi uma ba uma, peregrinu ida naran irmaun Maxwell G. Friend neʼebé koʼalia lia-alemaun dehan: “Serbisu neʼe aumenta liután bensaun ba peregrinu sira-nia viajen.” Irmaun John A. Bohnet neʼebé mós serbí nuʼudar peregrinu fó relatóriu katak irmaun-irmán barak ho laran tomak apoia katak importante atu haklaken kona-ba Maromak nia Ukun. Tuir ninia haree, irmaun-irmán barak laran-manas tebes atu sai uluk hodi bá haklaken.

Durante tinan barak, irmaun sira neʼebé ho laran-metin halo serbisu atu vizita grupu sira book duni irmaun-irmán sira atu halo hahalok diʼak. Irmaun Norman Larson neʼebé kleur ona serbí Jeová hatete: “Peregrinu sira-nia serbisu iha folin-boot no lori buat diʼak duni, haʼu bele haree ida-neʼe maski uluk haʼu sei kiʼik. Sira halo buat barak atu ajuda haʼu hodi laʼo iha dalan loos.” Sin, toʼo ohin loron, irmaun sira neʼebé la hanoin deʼit sira-nia an no halaʼo serbisu ho laran-metin atu vizita kongregasaun sira ajuda sira-nia maluk atu dehan: “Ita bele haklaken duni husi uma ba uma!”

[Liafuan neʼebé foti husi pájina 32]

Kuandu peregrinu vizita, neʼe mak loron neʼebé haksolok!

[Dezeñu iha pájina 31]

Irmaun Benjamin Barton nia programa iha tinan 1905 mak atu vizita maizumenus fatin 170

[Dezeñu iha pájina 32]

Walter J. Thorn serbí nuʼudar peregrinu, ema bolu nia “pai” tanba nia koʼalia hanesan aman ida ba oan sira

[Dezeñu iha pájina 32]

J. A. Browne bá rai-Jamaika nuʼudar peregrinu atu hametin no fó laran-manas ba grupu kiʼik 14 maizumenus iha tinan 1902

[Dezeñu iha pájina 32]

Peregrinu sira hametin ema nia fiar, hametin ema kristaun nia unidade, no ajuda sira atu hakbesik ba organizasaun