Moris tuir espíritu hodi hetan moris no dame
Moris tuir espíritu hodi hetan moris no dame
“Moris, laʼós tan tuir isin, maibé tuir espíritu.”—ROM 8:4.
1, 2. (a) Saida mak bele akontese ba ema neʼebé husik buat ruma dada sira-nia atensaun kuandu lori karreta? (b) Se ita husik buat ruma dada ita-nia atensaun husi ita-nia moris nuʼudar ema kristaun, ida-neʼe bele lori perigu saida?
OHIN loron, problema neʼebé aumenta ba beibeik mak ema barak husik buat ruma dada sira-nia atensaun kuandu sira kaer karreta. Ida-neʼe lori perigu ba sira no ema seluk. Buat ida neʼebé dada ema nia atensaun kuandu sira lori karreta mak telemovel. Tuir relatóriu ida, husi ema naʼin-tolu, ida dehan katak karreta xoke sira, ka besik atu xoke sira, tanba ema neʼebé kaer volante koʼalia hela ho telemovel. Maski ema balu sente katak sira bele halo buat oioin bainhira sira lori karreta, maibé atu husik buat ruma dada sira-nia atensaun, neʼe perigu tebes.
2 Nuneʼe mós ho ita-nia relasaun ho Maromak Jeová. Se ema neʼebé lori karreta husik buat ruma dada sira-nia atensaun, karik sira la haree perigu neʼebé mosu. Hanesan neʼe mós, ema kristaun neʼebé la tau atensaun ba sira-nia relasaun ho Jeová bele hetan dezastre. Se ita husik buat ruma dada ita-nia atensaun husi ita-nia moris nuʼudar ema kristaun, neineik-neineik ida-neʼe bele halo rahun ita-nia fiar. (1 Tim 1:18, 19) Apóstolu Paulo fó avizu kona-ba perigu neʼe ba ninia maluk kristaun iha Roma, hodi dehan: “Isin nia hanoin mak mate, maibé espíritu nia hanoin mak moris no dame.” (Rom 8:6) Paulo nia liafuan neʼe katak sá? Oinsá mak ita bele luta hasoru “isin nia hanoin” no haburas “espíritu nia hanoin”?
Sira “la iha lia kastigu nian”
3, 4. (a) Paulo koʼalia kona-ba funu saida? (b) Tanbasá mak ita hakarak hatene kona-ba Paulo nia situasaun?
3 Iha karta ba ema kristaun iha Roma, Paulo hatete katak ninia isin, neʼebé hakarak halo buat aat, funu hasoru ninia laran, neʼebé hakarak halo buat loos. (Lee Roma 7:21-23.) Paulo mak ema kristaun kose-mina neʼebé iha esperiénsia barak, no nia halaʼo ninia knaar nuʼudar “apóstolu ba jentiu sira”. (Rom 1:1; 11:13) Entaun, ita bele fiar katak Paulo la koʼalia kona-ba funu neʼe atu fó razaun oioin ba ninia sala. Nia mós la sente laran-tun demais kona-ba ninia sala. Paulo hatene katak nia bele halo buat neʼebé loos. Se nuneʼe, tansá mak Paulo hakerek kona-ba ninia funu?
4 Tanba nia hakarak fó sai ho laran-moos katak nia la bele halo tuir Maromak iha dalan neʼebé kompletu hanesan nia hakarak. Nia hakerek: “Ema hotu-hotu halo tiha sala no lakon ona Maromak nia glória.” (Rom 3:23) Nuʼudar Adão nia bei-oan, Paulo mós sala-naʼin neʼebé iha hakarak aat isin nian. Ita komprende Paulo nia situasaun tanba ita hotu tenkesér luta hasoru ita-nia hakarak aat isin nian. Liután neʼe, buat barak bele dada ita-nia atensaun no halo ita hasees an husi ‘dalan kloot neʼebé lori ita ba moris’. (Mt 7:14) Maibé, situasaun aat neʼe la halo Paulo lakon esperansa, nuneʼe mós ho ita.
5. Saida mak ajuda ema kose-mina sira atu manán iha funu isin nian?
5 Paulo hakerek: “Sé mak sei hasai haʼu husi haʼu-nia isin neʼebé sei mate neʼe? Obrigadu ba Maromak, husi Jesus Kristu, ita Naʼi.” (Rom 7:24, 25) Depois, nia koʼalia kona-ba “sira neʼebé iha Kristu Jesus”, katak ema kristaun kose-mina. (Lee Roma 8:1, 2.) Liuhusi espíritu santu, Jeová simu sira nuʼudar ninia oan, no bolu sira atu sai “liman-rohan naʼin hamutuk ho Kristu”. (Rom 8:14-17) Maromak nia espíritu no sira-nia fiar ba Kristu nia sakrifísiu ajuda sira atu manán iha sira-nia funu isin nian, nuneʼe, Maromak la fó “lia kastigu nian” ba sira. Sin, sira sai livre husi “ukun-fuan sala no mate nian”.
6. Tanbasá mak Maromak nia atan hotu presiza komprende Paulo nia liafuan?
6 Maski Paulo koʼalia ba ema kristaun kose-mina, buat neʼebé nia hatete kona-ba Maromak nia espíritu no Kristu nia sakrifísiu bele ajuda ita hotu. Tanba Maromak mak leno Paulo atu hakerek konsellu neʼe, importante tebes ba Maromak nia atan hotu atu komprende ninia liafuan no hakaʼas an atu halo tuir konsellu neʼe.
“Tesi lia todan ba sala iha isin”
7, 8. (a) Tanbasá mak Ukun-Fuan “kuran kbiit tan isin”? (b) Saida mak Maromak halo liuhusi ninia espíritu no Jesus nia sakrifísiu?
7 Iha Roma kapítulu 7, Paulo esplika katak sala iha ema nia isin iha kbiit makaʼas. Iha kapítulu 8, nia koʼalia kona-ba Maromak nia espíritu santu nia kbiit no oinsá mak espíritu neʼe bele ajuda ema kristaun atu luta hasoru sala hodi bele moris tuir Jeová nia hakarak no monu loos ba ninia laran. Paulo esplika katak liuhusi Maromak nia espíritu no ninia Oan nia sakrifísiu, Maromak halo buat neʼebé Moisés nia Ukun-Fuan la bele halo.
8 Moisés nia Ukun-Fuan, neʼebé inklui lei barak, halo ema rekoñese katak sira ema sala-naʼin. Liután neʼe, Israel nia amlulik boot sira neʼebé serbí iha Ukun-Fuan nia okos mós ema sala-naʼin no sira la bele hasaʼe sakrifísiu hodi halakon ema nia sala. Nuneʼe, Ukun-Fuan neʼe “kuran kbiit tan isin”. Maibé Maromak “tesi lia todan ba sala iha isin” hodi “haruka nia Oan-Mane iha isin nuʼudar ilas ema maksalak nian” atu fó ninia moris nuʼudar sakrifísiu. Nuneʼe, Maromak halo “buat neʼebé ukun-fuan la bele halo”. Rezultadu mak tanba ema kristaun kose-mina tau fiar ba Jesus nia sakrifísiu, sira bele sai ema neʼebé loos iha Maromak nia oin. Tan neʼe, Paulo fó konsellu ba ema kose-mina atu “moris, laʼós tan tuir isin, maibé tuir espíritu”. (Lee Roma 8:3, 4.) Sin, sira tenkesér kontinua moris tuir espíritu toʼo mate atubele simu “koroa moris nian”.—Apok 2:10.
9. Liafuan “ukun-fuan” neʼebé temi iha Roma 8:2 katak sá?
9 Apóstolu Paulo mós koʼalia kona-ba “ukun-fuan espíritu moris nian” no “ukun-fuan sala no mate nian”. (Rom 8:2) Saida mak ukun-fuan sira-neʼe? Liafuan “ukun-fuan” neʼebé temi iha versíkulu neʼe la koʼalia kona-ba lei ruma, hanesan lei sira iha Moisés nia Ukun-Fuan. Tuir livru ida, liafuan gregu neʼebé tradús nuʼudar “ukun-fuan” iha versíkulu neʼe katak ema nia hahalok diʼak ka aat neʼebé kontrola sira hanesan ukun-fuan. Liafuan neʼe mós iha arti katak matadalan sira neʼebé ema hili atu moris tuir.
10. Oinsá mak ita iha “ukun-fuan sala no mate nian” nia okos?
10 Apóstolu Paulo hakerek: “Husi ema ida deʼit mak sala tama iha mundu, no tan sala, mate; nuneʼe mate toʼo ba ema hotu, basá ema hotu sala.” (Rom 5:12) Nuʼudar Adão nia bei-oan, ita hotu iha “ukun-fuan sala no mate nian” nia okos. Tan neʼe, ita-nia hakarak isin nian neʼebé sala sempre book ita atu halo hahalok neʼebé Maromak la simu, no ida-neʼe lori ita ba mate. Iha Paulo nia karta ba ema kristaun iha Galásia, nia bolu hahalok neʼe nuʼudar “hahalok isin nian”, no nia mós hatete: “Sira neʼebé moris hanesan neʼe sei la simu Maromak nia ukun nuʼudar liman-rohan.” (Gal 5:19-21, MF) Ema hanesan neʼe moris tuir isin. (Rom 8:4) Sira husik hakarak isin nian mak book sira-nia hahalok. Entaun, ba ema neʼebé halo sala-foʼer, adora lulik, ka envolve iha matan-dook nia atividade ka sala boot seluk, sira deʼit mak ema neʼebé moris tuir isin ka lae? Lae, tanba “hahalok isin nian” inklui mós hahalok neʼebé ema balu karik hanoin katak baibain deʼit, hanesan hirus malu no istori malu, laran-moras ba malu, no laran-aat ba malu. Nuneʼe, ita hotu iha “ukun-fuan sala no mate nian” nia okos.
11, 12. Saida mak Jeová halo atu ajuda ita sai livre husi ukun-fuan sala no mate nian? Ita presiza halo saida atu iha relasaun diʼak ho Maromak?
11 Maibé, ita kontente tebes tanba Jeová loke dalan atu ita sai livre husi ukun-fuan sala no mate nian! Jesus hatete: “Maromak hadomi tebes mundu toʼo fó Nia Oan-Mane mesak, atu ema hotu neʼebé fiar iha nia la bele lakon, maibé hetan moris rohan-laek.” Hodi simu Maromak nia domin no tau fiar ba Jesus Kristu nia sakrifísiu, ita bele sai livre husi rezultadu aat neʼebé ita hetan tanba sala. (Joao 3:16-18) Tan neʼe, mai ita haksolok hanesan Paulo hodi dehan: “Obrigadu ba Maromak, husi Jesus Kristu, ita Naʼi.”
12 Ita-nia situasaun mak hanesan ita tuir tratamentu atu kura moras todan. Se ita hakarak sai isin-diʼak fali, ita tenke halo tuir nafatin buat neʼebé doutór haruka. Nuneʼe mós ho ita-nia saúde espirituál, ka atu ita bele iha relasaun diʼak ho Maromak. Maski tau fiar ba Jesus nia sakrifísiu bele halo ita sai livre husi ukun-fuan sala no mate nian, maibé nuʼudar ema sala-naʼin, ita halo sala beibeik. Tan neʼe, atu hetan saúde espirituál neʼebé diʼak, ita mós presiza halo buat seluk tan. Paulo esplika katak ita tenke moris tuir espíritu.
Oinsá mak ita moris tuir espíritu?
13. “Moris tuir espíritu” katak sá?
13 “Moris tuir espíritu” la dehan katak ita nunka halo sala, maibé ita kontinua hakbesik liután ba Maromak. (1 Tim 4:15) Loron-loron, ita tenke hakaʼas an atu halaʼo ita-nia moris hodi husik espíritu santu hatudu dalan mai ita. Se ita husik “espíritu mak lori” ita, ita bele fiar katak Maromak simu ita.—Gal 5:16.
14. “Ema neʼebé moris tuir isin” hatudu hahalok hanesan saida?
14 Iha Paulo nia karta ba ema kristaun iha Roma, nia mós hakerek kona-ba ema neʼebé hanoin buat neʼebé isin nian no ema neʼebé hanoin buat neʼebé espíritu nian. (Lee Roma 8:5.) Iha eskritura neʼe, liafuan “isin” laʼós kona-ba ita-nia isin-lolon ho liman ain. Dala ruma Bíblia uza liafuan “isin” atu koʼalia kona-ba ita-nia kondisaun nuʼudar sala-naʼin. Tanba ita ema sala-naʼin, ita-nia isin funu hasoru ita-nia laran, hanesan Paulo hatete. Maibé la hanesan ho Paulo, “ema neʼebé moris tuir isin”, sira la hakaʼas an atu halo funu neʼe. Duké hanoin kona-ba halo tuir Maromak nia hakarak no simu ninia ajuda, sira “hanoin deʼit buat neʼebé isin nian”, hanesan buka atu goza sira-nia moris deʼit. Maibé ema neʼebé “moris tuir espíritu” buka atu moris tuir Maromak nia matadalan.
15, 16. (a) Oinsá mak hanoin beibeik kona-ba buat ruma bele book ita? (b) Ema barak ohin loron hanoin beibeik kona-ba saida deʼit?
15 Lee Roma 8:6. Antes ema halo buat neʼebé diʼak ka ladiʼak, sira hanoin uluk kona-ba buat neʼebé sira atu halo. Ema neʼebé hanoin beibeik kona-ba buat neʼebé isin nian, ikusmai sira hakarak halo hahalok isin nian. Dala barak, ema hanesan neʼe hanoin no hakarak buat neʼebé sala.
16 Ohin loron, ema barak hanoin beibeik kona-ba saida? Apóstolu João hatete: “Buat hotu neʼebé mundu neʼe nian—hakarak aat isin nian, hakarak aat matan nian, no loko-an moris nian—buat sira-neʼe la mai husi Aman, maibé mai husi mundu neʼe.” (1 Joao 2:16) Hakarak aat sira-neʼe inklui hahalok seksuál neʼebé foʼer, buka naran-boot, no buka rikusoin. Ohin loron, ema barak hanoin no hakarak buat sira-neʼe. Tan neʼe, livru, filme, internét no programa sira iha televizaun nakonu ho buat hirak-neʼe. Maibé Paulo hatete katak “isin nia hanoin mak mate”. Sin, ita bele lakon ita-nia relasaun ho Maromak no lakon ita-nia moris iha futuru. Tanbasá? “Basá isin nia hanoin mak atu funu malu ho Maromak; nia lakohi halo tuir Maromak nia ukun-fuan; nia la bele duni; no sira neʼebé horik iha isin la bele monu loos ba Maromak nia laran.”—Rom 8:7, 8.
17, 18. Oinsá mak ita bele hakaʼas an tau atensaun ba buat neʼebé espíritu nian? Ida-neʼe sei lori rezultadu saida?
17 Maibé, “espíritu nia hanoin mak moris no dame”. Neʼe katak ita bele iha dame ho Maromak no sente dame iha laran, no iha futuru ita bele hetan moris rohan-laek. Oinsá mak ita bele haburas “espíritu nia hanoin”? Hodi hanoin beibeik kona-ba buat sira neʼebé ajuda ita atu hametin ita-nia relasaun ho Maromak no husik buat sira-neʼe mak book ita-nia hahalok. Ita hakarak ita-nia hanoin atu “halo tuir Maromak nia ukun-fuan”. Se ita halo nuneʼe, kuandu ita hasoru tentasaun ruma, ita hatene saida mak ita tenke halo no foti desizaun neʼebé tuir espíritu.
18 Tan neʼe, importante tebes atu tau atensaun ba buat neʼebé espíritu nian. Ita halo nuneʼe hodi “fó laran” atu halaʼo ita-nia moris hodi halo atividade sira neʼebé hametin ita-nia relasaun ho Maromak, hanesan halo orasaun, lee no estuda Bíblia, tuir reuniaun sira, no hola parte iha serbisu haklaken. (1 Ped 1:13) Duké husik hakarak isin nian mak dada ita-nia atensaun, mai ita hotu tau ita-nia atensaun ba buat neʼebé espíritu nian. Ida-neʼe sei lori bensaun barak mai ita, tanba espíritu nia hanoin mak moris no dame.—Gal 6:7, 8.
Ita bele hatán?
• Saida mak “buat neʼebé ukun-fuan la bele halo”? Oinsá mak Maromak loke dalan atu salva ita?
• Saida mak “ukun-fuan sala no mate nian”? Oinsá mak ita bele sai livre husi neʼe?
• Ita presiza halo saida deʼit atu haburas “espíritu nia hanoin”?
[Pergunta estudu nian]
[Dezeñu iha pájina 12, 13]
Ita moris tuir isin, ka moris tuir espíritu?
