“Buat neʼebé espíritu lori mai” fó glória ba Maromak
“Buat neʼebé espíritu lori mai” fó glória ba Maromak
“Iha neʼe mak haʼu Aman hetan glória: katak imi fó fuan barak.”—JOAO 15:8.
1, 2. (a) Oportunidade saida deʼit mak ita iha atu fó laran-manas ba ema seluk? (b) Maromak Jeová fó prezente saida ba ita atu bele ajuda ita serbí nia?
HANOIN toʼok kona-ba situasaun rua tuirmai neʼe: Irmán ida haree katak irmán klosan ida hanoin barak kona-ba buat ruma. Tan neʼe, nia halo planu atu haklaken hamutuk ho irmán klosan neʼe. Nuʼudar sira laʼo hamutuk, irmán klosan neʼe fakar sai buat neʼebé nia sente. Iha loron neʼe nia rohan, feto-klosan neʼe halo orasaun hodi hatoʼo obrigadu ba Maromak Jeová tanba domin neʼebé ninia maluk kristaun hatudu ba nia; no neʼe mak buat neʼebé nia presiza duni. Iha situasaun seluk, kaben-naʼin ida neʼebé serbí iha rai seluk foin fila ba sira rasik nia rai. No kuandu sira halibur hamutuk ho maluk kristaun, sira ho laran-manas konta sira-nia esperiénsia kona-ba haklaken, no irmaun klosan ida rona didiʼak ba ida-neʼe. Tinan balu depois neʼe, nuʼudar irmaun neʼe prepara an daudauk atu muda ba rai seluk, nia hanoin fali kona-ba kaben-naʼin neʼe no mós kona-ba istória neʼebé sira konta, istória neʼebé book nia atu hakarak serbí nuʼudar misionáriu.
2 Karik situasaun sira-neʼe halo Ita hanoin fali kona-ba ema ida neʼebé book Ita atu laʼo ba oin iha lia-loos ka oinsá Ita rasik ajuda ema ida halo mudansa iha ninia moris. Baibain ita la bele ajuda ema seluk atu halo mudansa boot iha nia moris hodi koʼalia ba nia dala ida deʼit, maibé loroloron, ita iha oportunidade atu fó laran-manas no hametin ema seluk. Hanoin toʼok ita hetan buat ruma neʼebé bele ajuda ita atu aumenta ita-nia matenek ka atu haburas hahalok diʼak, hodi nuneʼe ita bele serbí Maromak no mós ajuda ita-nia maluk kristaun iha dalan neʼebé diʼak liután. Ita sei kontente tebes ho ida-neʼe, loos ka lae? Tuir loloos, Maromak Jeová fó ona mai ita prezente ida hanesan neʼe. Neʼe mak espíritu santu. (Lc 11:13) Nuʼudar ita husik Maromak nia espíritu ajuda ita, ita sei haburas liután hahalok diʼak sira neʼebé bele ajuda ita atu halaʼo ita-nia serbisu oioin ba Maromak. Prezente neʼe mak buat neʼebé furak tebes, loos ka lae?—Lee Galasia 5:22, 23.
3. (a) Oinsá mak haburas hahalok sira neʼebé “espíritu lori mai” fó glória ba Maromak? (b) Ita sei koʼalia kona-ba pergunta saida deʼit?
3 Hahalok sira neʼebé espíritu lori mai haleno hahalok husi Ida neʼebé haraik espíritu neʼe, Maromak Jeová. (Kol 3:9, 10) Jesus fó sai tansá importante atu ema kristaun hakaʼas an atu banati-tuir Maromak, nia dehan: “Iha neʼe mak haʼu Aman hetan glória: katak imi fó fuan barak.” * (Joao 15:8) Kuandu ita haburas hahalok sira neʼebé “espíritu lori mai”, ema seluk bele haree ida-neʼe liuhusi ita-nia koʼalia no ita-nia hahalok; no buat sira-neʼe sei lori hahiʼi ba ita-nia Maromak. (Mt 5:16) Iha dalan saida deʼit mak hahalok sira neʼebé espíritu lori mai la hanesan ho hahalok sira iha Satanás nia mundu neʼe? Oinsá mak ita bele haburas hahalok neʼebé espíritu lori mai? Tanbasá mak dala ruma susar atu halo ida-neʼe? Ita sei koʼalia kona-ba pergunta sira-neʼe nuʼudar ita estuda kona-ba hahalok tolu primeiru neʼebé espíritu lori mai, neʼe mak domin, ksolok, no dame.
Domin neʼebé haleno Maromak nia domin
4. Domin oin saida mak Jesus hanorin ninia dixípulu sira atu hatudu?
4 Domin neʼebé espíritu santu lori mai la hanesan ho domin neʼebé ema hatudu ba malu iha mundu neʼe. Tanbasá? Tanba domin neʼebé espíritu santu lori mai mak domin neʼebé haleno Maromak nia domin. Iha Jesus nia diskursu iha foho, nia esplika kona-ba oinsá domin neʼe la hanesan ho mundu nian. (Lee Mateus 5:43-48.) Jesus esplika katak ema aat mós hatudu domin ba ema seluk se ema seluk hatudu uluk domin ba sira. “Domin” hanesan neʼe hatudu katak sira la prontu atu buka ema seluk nia diʼak, maibé sira hatudu domin neʼe tanba deʼit ema seluk hatudu ona domin ba sira. Maibé, se ita hakarak hatudu katak ita mak ‘Aman iha lalehan nia oan sira’, ita tenke la hanesan ho mundu neʼe. Duké halo ba ema seluk tuir deʼit buat neʼebé sira halo ba ita, ita presiza hatudu hahalok diʼak ba ema seluk no haree sira tuir Maromak Jeová nia haree. Maibé, oinsá mak ita bele hadomi ita-nia funu-balun hanesan Jesus hatete?
5. Oinsá mak ita bele hatudu domin ba sira neʼebé halo aat ba ita?
5 Hanoin toʼok kona-ba ezemplu ida husi Bíblia. Kuandu haklaken iha sidade Filipe, ema kaer Paulo no Silas, no baku sira toʼo tasak, no hatama sira iha dadur laran, iha neʼebá sira-nia ain hotu kesi metin. Guarda dadur nian mós karik halo aat ba sira. Maibé, kuandu derrepente deʼit rai nakdoko no sira sai livre, sira buka atu selu aat fali ba guarda dadur nian ka lae? Lae! Sira hanoin kona-ba ema neʼe nia diʼak, no sira-nia domin neʼe book sira atu ajuda guarda neʼe, no ida-neʼe loke dalan ba guarda neʼe no nia família hotu atu sai ema fiar-naʼin. (Apos 16:19-34) Ohin loron mós ita-nia irmaun-irmán barak halo buat diʼak “ba sira neʼebé halo aat” ba sira.—Rom 12:14.
6. Iha dalan saida deʼit mak ita bele hatudu domin ba ita-nia maluk? (Haree kaixa iha pájina 21.)
6 Ba ita-nia maluk fiar-naʼin, ita tenke hatudu domin iha dalan neʼebé boot liután. Bíblia hatete: “Ita mós sei saran ita-nia moris tanba ita-nia maluk sira.” (Lee 1 Joao 3:16-18.) Klaru katak baibain ita hatudu domin ba ita-nia maluk iha dalan neʼebé kiʼik. Porezemplu, se ita koʼalia ka halo buat ruma neʼebé hakanek ita-nia irmaun ka irmán sira-nia laran, ita bele hatudu domin hodi buka uluk atu hadame malu ho sira. (Mt 5:23, 24) Maibé oinsá se ema ida mak hakanek ita-nia laran? Ita “prontu atu fó perdua” ka ita rai odi? (Sal 86:5) Domin neʼebé loos, neʼebé espíritu lori mai, bele ajuda ita atu haluha tiha sala kiʼik neʼebé ema halo ba ita no prontu atu fó perdua ba sira hanesan “Naʼi [Jeová] fó perdua ona ba” ita.—Kol 3:13, 14; 1 Ped 4:8.
7, 8. (a) Oinsá mak domin ba Maromak kona ita-nia domin ba ema? (b) Oinsá mak ita bele halo kleʼan liután ita-nia domin ba Maromak Jeová? (Haree toʼok ezemplu iha kraik.)
7 Oinsá mak ita bele haburas domin neʼebé loos ba ita-nia maluk fiar-naʼin? Ita bele halo ida-neʼe hodi halo kleʼan liután ita-nia domin ba Maromak. (Ef 5:1, 2; 1 Joao 4:9-11, 20, 21) Tempu neʼebé ita uza atu hakbesik ba Maromak Jeová liuhusi lee Bíblia, hanoin kleʼan, no halo orasaun bele haburas domin ba ita-nia Aman iha lalehan. Atu halo nuneʼe, ita presiza hakaʼas an atu uza tempu atu hakbesik ba Maromak.
8 Porezemplu, hanoin toʼok katak situasaun aat mosu no loron-loron iha tempu neʼebé hanesan, ita iha oras ida deʼit atu lee no hanoin kleʼan kona-ba Maromak nia Liafuan, no halo orasaun. Ita sei hakaʼas an atu la husik buat naran deʼit atu hapara ita atu uza tempu neʼe atu hamutuk ho Maromak Jeová, loos ka lae? Klaru katak la iha ema ida neʼebé bele hanetik ita atu hakbesik ba Maromak liuhusi orasaun, no ita barak bele lee Bíblia iha tempu naran deʼit neʼebé ita hakarak. Maski nuneʼe, importante atu la husik buat neʼebé ita presiza halo loroloron hanetik ita atu uza tempu neʼebé ita deside ona atu hamutuk ho Maromak. Entaun, ita hakaʼas an loroloron atu uza tempu atu hakbesik ba Maromak Jeová ka lae?
‘Ksolok husi espíritu santu’
9. Espíritu santu bele ajuda ita atu haksolok iha situasaun naran deʼit. Esplika toʼok.
9 Ksolok mak hahalok furak ida tan neʼebé espíritu lori mai, no ita bele hatudu hahalok neʼe nafatin maski ita hasoru susar naran deʼit. Ksolok mak hanesan ai-hun neʼebé bele sai buras maski moris iha rai neʼebé la diʼak. Iha mundu tomak, Maromak nia atan barak “simu lia-menon neʼe [katak lia-foun diʼak] ho ksolok . . . husi espíritu santu” maski “hetan terus barak”. (1 Tes 1:6) Maromak nia atan balu moris iha susar nia laran. Maibé, Maromak Jeová fó sira kbiit liuhusi ninia espíritu atu sira nafatin “metin toʼo rohan iha ksolok”. (Kol 1:11) Saida mak ksolok neʼe nia hun?
10. Saida mak halo ita kontente?
10 Maski rikusoin iha Satanás nia mundu bele lakon, maibé rikusoin neʼebé ita simu husi Maromak Jeová iha folin boot nafatin. (1 Tim 6:17; Mt 6:19, 20) Maromak promete katak iha futuru nia sei fó moris kontente neʼebé la iha rohan ba ita. Agora, ita haksolok atu sai parte husi família kristaun ida iha mundu tomak. No liután neʼe, buat neʼebé halo ita kontente loos mak ita iha relasaun diʼak ho Maromak. Ita sente hanesan David, neʼebé hahiʼi Maromak Jeová hodi kanta: “Tanba Ita-nia laran-diʼak neʼebé nakonu ho domin mak diʼak liu fali moris, haʼu-nia ibun sei gaba Ita. Nuneʼe haʼu sei hahiʼi Ita durante haʼu-nia moris.” (Sal 63:3, 4) Sin, maski David tenke halai beibeik atu subar an, maibé nia nafatin haksolok atu serbí Maromak. Nuneʼe, ita mós bele haksolok nafatin atu hahiʼi Maromak maski ita hasoru susar naran deʼit iha ita-nia moris.
11. Tanbasá mak importante atu serbí Maromak Jeová ho ksolok?
11 Apóstolu Paulo fó laran-manas ba ninia maluk kristaun, hodi dehan: “Haksolok iha Naʼi nafatin, dala ida tan haʼu dehan: haksolok bá!” (Flp 4:4) Tanbasá mak importante ba ema kristaun sira atu halaʼo sira-nia serbisu ba Maromak Jeová ho ksolok? Tanba Satanás hasaʼe lia kona-ba Maromak nia ukun. Satanás hatete katak la iha ema ida neʼebé serbí Maromak ho laran. (Jó 1:9-11) Tuir loloos, se ita serbí Maromak Jeová la ho laran, neʼe katak ita-nia serbisu ba Maromak la kompletu. Tan neʼe, ita hakarak atu halo tuir liafuan neʼebé hakerek iha livru Salmos, neʼebé dehan: “Serbí Maromak Jeová ho laran-haksolok. Mai iha nia oin ho lian haksolok nian.” (Sal 100:2) Kuandu ita serbí ho laran-ksolok, ida-neʼe fó glória ba Maromak.
12, 13. Ita bele halo saida kuandu sente laran-tun?
12 Maibé, klaru katak maski ema ida mak fiar-metin ba Maromak Jeová, nia mós dala ruma bele sente laran-tun no sente triste. (Flp 2:25-30) Saida mak bele ajuda ita iha tempu hanesan neʼe? Efeso 5:18, 19 dehan: “Hakonu imi an ho espíritu. Koʼalia ba malu ho liafuan salmu nian, ho knananuk no dadolin santu nian, hodi hananu knananuk no salmu ba Naʼi [Jeová], hodi hahiʼi Nia iha imi-nia laran.” Oinsá mak ita bele halo tuir konsellu neʼe?
13 Kuandu ita sente laran-tun, ita bele halo orasaun ba Maromak Jeová atu husu ninia ajuda, no hakaʼas an atu hanoin kleʼan kona-ba buat neʼebé diʼak no loos. (Lee Filipe 4:6-9.) Ema kristaun balu sente katak hodi kanta ho lian neineik nuʼudar rona ba ita-nia knananuk sira, ida-neʼe ajuda sira atu sai kontente fali no atu hanoin iha dalan neʼebé loos. Irmaun ida neʼebé tahan hasoru problema ida neʼebé halo nia sente laran-tun no estrese, nia hatete: “Haʼu halo orasaun beibeik ho laran, no liután neʼe haʼu dekór ita-nia knananuk balu. Haʼu kanta no hahiʼi Maromak Jeová ho knananuk furak sira-neʼe ho lian makaʼas ka lian neineik, no ida-neʼe halo haʼu sente hakmatek iha laran. No mós, iha tempu neʼebá ita foin simu livru ho títulu Mendekatlah kepada Yehuwa. Iha tinan ida nia laran haʼu lee livru neʼe dala rua. Ida-neʼe hanesan buat morin ba haʼu-nia laran. Haʼu hatene katak Maromak Jeová haraik bensaun ba haʼu-nia hakaʼas-an.”
Dame lori unidade
14. Dame neʼebé espíritu santu fó, lori buat diʼak saida mai ita?
14 Ema husi rai oioin no husi situasaun oioin sente ksolok hodi halibur hamutuk ho sira-nia maluk kristaun kuandu sira tuir reuniaun boot internasionál nian. Ida-neʼe hatudu katak dame neʼebé Maromak nia povu sira iha, lori mai unidade neʼebé furak. Ema balu hakfodak kuandu haree ema husi nasaun ka rasa neʼebé baibain odi malu sai fali “laran ida deʼit iha espíritu” hodi halibur hamutuk ho dame. (Ef 4:3) Unidade neʼe mak buat neʼebé kapás loos, tanba atubele iha unidade neʼe sira barak presiza troka buat oioin iha sira-nia moris.
15, 16. (a) Nuʼudar ema Israel, Pedro fiar saida? Tanbasá mak nia presiza atu troka ninia hanoin? (b) Oinsá mak Maromak Jeová ajuda Pedro atu hanoin iha dalan neʼebé loos?
15 Tuir loloos, la fasil ba ema husi situasaun oioin atu hela hamutuk ho unidade. Atu komprende liután kona-ba saida mak ema presiza troka atubele moris hamutuk ho unidade, mai ita hanoin kona-ba ezemplu husi apóstolu Pedro. Husi Pedro nia liafuan tuirmai neʼe, ita bele haree oinsá ninia hanoin kona-ba ema jentiu sira. Nia hatete: “Imi hatene katak bandu ba ema judeu ida halibur an hamutuk ka bá haree ema jentiu ida iha nia uma, maibé Maromak hatudu ona mai haʼu katak haʼu labele bolu ema bandu ka foʼer.” (Apos 10:24-29; 11:1-3) Hodi tuir hanoin husi ema barak iha tempu neʼebá, Pedro fiar katak Ukun-Fuan Moisés nian haruka nia atu hatudu deʼit domin ba ninia maluk judeu sira. Karik nia sente la sala atu haree ema jentiu, ka ema husi nasaun seluk, nuʼudar inimigu neʼebé nia tenke odi. *
16 Hanoin toʼok oinsá Pedro sente iha laran nuʼudar nia tama ba Cornélio nia uma. Ema neʼebé uluk haree la diʼak ba ema husi rai seluk bele sai fali “laran ida deʼit” ho sira ka lae? (Ef 4:3, 16) Bele! Tanba loron balu antes neʼe Maromak nia espíritu loke Pedro nia laran, hodi ajuda nia atu troka ninia hanoin neʼebé la loos kona-ba ema husi nasaun seluk. Liuhusi vizaun ida, Maromak Jeová ajuda Pedro atu hatene katak Maromak haree ema hanesan deʼit, maski rasa no nasaun la hanesan. (Apos 10:10-15) Tan neʼe, Pedro bele hatete ba Cornélio: “Tebes duni, haʼu haree katak Maromak la fihir ema. Maibé, iha nasaun hotu, Maromak simu hotu ema sira neʼebé taʼuk Nia no halo hahalok neʼebé loos.” (Apos 10:34, 35) Sin, Pedro troka ninia hanoin, no nia sai laran ida deʼit ho ninia maluk kristaun “nuʼudar maun-alin”.—1 Ped 2:17.
17. Buat furak saida mak akontese ba Maromak nia povu agora?
17 Pedro nia ezemplu ajuda ita atu hafolin buat neʼebé akontese ba Maromak nia povu ohin loron. (Lee Isaías 2:3, 4. *) Ema rihun ba rihun “husi nasaun, rasa, umakain no lia hotu-hotu” troka tiha ona sira-nia hanoin hodi tuir “buat neʼebé Maromak hakarak, buat neʼebé diʼak, bele simu no loos”. (Apok 7:9; Rom 12:2) Uluk, sira barak haleno hahalok husi Satanás nia mundu, hanesan odi malu, no haketak malu. Maibé, hodi estuda Maromak nia Liafuan, no ho ajuda husi espíritu santu, sira aprende atu “buka buat neʼebé lori ba dame”. (Rom 14:19) No unidade neʼe fó hahiʼi ba Maromak.
18, 19. (a) Oinsá mak ita ida-idak bele apoia dame no unidade iha kongregasaun laran? (b) Lisaun tuirmai sei koʼalia kona-ba saida?
18 Saida mak ita ida-idak bele halo atu hola parte no apoia dame no unidade neʼebé Maromak nia povu iha? Kongregasaun barak iha ema neʼebé mai husi rai oioin. Sira balu karik iha kostume neʼebé la hanesan, ka karik sira ladún hatene ita-nia língua. Ita hakaʼas an atu koñese sira ka lae? Maromak nia Liafuan fó konsellu mai ita atu halo ida-neʼe. Paulo hakerek ba kongregasaun iha Roma, neʼebé iha ema judeu no mós ema jentiu, hodi dehan: “Simu malu nuʼudar Kristu simu imi, ba Maromak nia glória.” (Rom 15:7) Iha ema ida iha ita-nia kongregasaun neʼebé ita bele koñese diʼak liután ka lae?
19 Saida tan mak ita bele halo atu husik espíritu santu hatudu dalan ba ita? Lisaun tuirmai sei hatán pergunta neʼe hodi koʼalia kona-ba hahalok seluk tan neʼebé espíritu lori mai.
[Nota–rodapé]
^ par. 3 Jesus temi kona-ba “fó fuan barak”, neʼe inklui hahalok diʼak “neʼebé espíritu lori mai” no mós “liafuan sira husi ibun” neʼebé ema kristaun hasaʼe ba Maromak hodi halo serbisu haklaken.—Ebr 13:15.
^ par. 15 Levítico 19:18 dehan: “Ó labele selu aat ho aat, ka rai odi hasoru ó-nia povu nia oan sira; no ó tenke hadomi ó-nia maluk hanesan ó-nia an rasik. Haʼu mak Jeová.” Ulun-naʼin relijiaun judeu nian hanorin katak liafuan “ó-nia povu nia oan sira” no “ó-nia maluk” koʼalia deʼit kona-ba ema judeu. Maski Ukun-Fuan Moisés nian haruka ema Israel atu haketak an husi nasaun seluk, maibé Ukun-Fuan Moisés nian la apoia hanorin husi ulun-naʼin relijiaun judeu nian iha Jesus nia tempu. Sira hanorin katak ema hotu neʼebé laʼós ema judeu mak inimigu neʼebé sira tenke odi.
^ par. 17 Isaías 2:3: “No povu barak sei bá duni no dehan: ‘Mai, imi hotu, no mai ita saʼe ba Jeová nia foho, . . . no nia sei hanorin ita kona-ba nia dalan sira, no ita sei laʼo iha ninia dalan sira.’ 4 . . . No sira sei tuku sira-nia surik sai ai-suak no sira-nia diman sai kateri ai-sanak nian. Nasaun sei la hiʼit surik hasoru nasaun, sira mós sei la aprende tan funu.”
Oinsá ita hatán?
• Oinsá mak ita bele hatudu domin neʼebé loos ba maluk kristaun sira?
• Tanbasá mak importante atu halaʼo ita-nia serbisu ba Maromak ho ksolok?
• Oinsá mak ita bele apoia dame no unidade iha kongregasaun laran?
[Pergunta estudu nian]
[Kaixa iha pájina 21]
“Sira mak ema kristaun loos”
Livru Between Resistance and Martyrdom—Jehovahʼs Witnesses in the Third Reich koʼalia kona-ba mane joven judeu ida neʼebé hasoru Testemuña ba Jeová ba dala primeiru kuandu nia toʼo iha komarka boot ida naran Neuengamme. Mane neʼe hatete:
“Kuandu ami ema judeu husi Dachau tama ba komarka neʼe, ema judeu neʼebé iha ona komarka laran komesa subar buat hotu neʼebé sira iha, hodi nuneʼe sira lalika fahe ho ami. . . . Iha liʼur [husi komarka neʼe], ami sempre ajuda malu. Maibé iha laran, iha situasaun susar neʼe, ema ida-idak hanoin deʼit kona-ba oinsá salva ninia an rasik, no haluha tiha kona-ba ema seluk. Maibé, haʼu hanoin kona-ba saida mak Estudante Bíblia sira halo. Iha tempu neʼebá, sira serbisu makaʼas atu hadiʼa kanu-bee nian. Tempu neʼebá mak tempu malirin, no sira hamriik ba loron tomak iha bee neʼebé malirin hanesan jelu-fatuk. Ema bilán kona-ba oinsá sira bele tahan buat sira-neʼe. Sira hatete katak Maromak Jeová mak fó sira forsa. Hanesan ami, Estudante Bíblia sira mós hamlaha no presiza duni paun atu han. Maibé, saida mak sira halo? Sira halibur paun hotu neʼebé sira iha no depois neʼe sira haketak ba parte rua, parte ida ba sira atu han, no parte ida seluk atu fó ba sira-nia maluk fiar-naʼin neʼebé foin mai husi Dachau. Sira mós simu sira-nia maluk ho laran no reʼi sira. Antes sira han, sira halo orasaun hamutuk. Depois han tiha, sira hotu kontente. Sira hatete katak sira la sente hamlaha tan. Ida-neʼe mak halo haʼu hanoin: ‘Sira mak ema kristaun loos.’”
[Dezeñu iha pájina 19]
Loron-loron Ita hakaʼas an atu uza tempu atu hakbesik ba Maromak Jeová ka lae?
