Simu Maromak nia espíritu, laʼós mundu nian
Simu Maromak nia espíritu, laʼós mundu nian
“Ita la simu mundu nia espíritu maibé espíritu neʼebé mai husi Maromak, atu ita bele hatene loloos prezente neʼebé ita simu husi Maromak.”—1 KOR 2:12.
1, 2. (a) Tanbasá mak ita bele dehan katak ema kristaun loos halo funu daudauk? (b) Ita sei estuda kona-ba pergunta saida deʼit?
OHIN loron, ita ema kristaun loos hola parte iha funu ida! Inimigu neʼebé ita kontra iha forsa neʼebé boot, iha matenek no iha esperiénsia kona-ba funu. Inimigu neʼe uza kilat neʼebé diʼak, no ho ida-neʼe nia domina ona ema barak iha mundu neʼe. Maibé, ita lalika lakon esperansa ka sente katak ita la iha kbiit. (Isa 41:10) Tuir loloos, iha buat ida neʼebé bele proteje ita, no ida-neʼe iha forsa neʼebé boot tebes no ho ninia ajuda inimigu neʼe sei la manán ita.
2 Funu neʼebé ita halo laʼós isin nian tanba ita-nia inimigu mak Diabu Satanás, no kilat neʼebé nia uza mak “mundu nia espíritu”. (1 Kor 2:12) Buat neʼebé bele proteje ita iha funu neʼe mak Maromak nia espíritu. Tan neʼe, ita presiza husu Maromak atu haraik ninia espíritu santu mai ita, no ita mós presiza hatudu hahalok neʼebé espíritu neʼe lori mai, hodi nuneʼe ita labele lakon iha funu neʼe, no atu ita nafatin iha relasaun neʼebé besik ho Maromak. (Gal 5:22, 23) Maibé, saida mak mundu nia espíritu, no oinsá mak espíritu neʼe iha forsa atu book ema hotu? Oinsá mak ita bele hatene se mundu nia espíritu kona ona ita? Saida mak ita bele aprende husi Jesus nia ezemplu hodi ita mós bele simu Maromak nia espíritu no tahan hasoru mundu nia espíritu?
Mundu nia espíritu iha fatin hotu
3. Saida mak mundu nia espíritu?
3 Mundu nia espíritu mai husi Satanás, “ukun-naʼin mundu neʼe nian”, no espíritu neʼe kontra Maromak nia espíritu santu. (Joao 12:31; 14:30; 1 Joao 5:19) Mundu nia espíritu mak hakarak no hanoin iha mundu neʼe neʼebé book ema atu halo buat ruma. Forsa neʼe book ema hotu atu la halo tuir Maromak nia hakarak.
4, 5. Oinsá mak mundu sai nakonu ho espíritu neʼebé mai husi Satanás?
4 Oinsá mak mundu sai nakonu ho espíritu neʼebé mai husi Satanás? Primeiru, Satanás lohi Eva iha jardín Eden. Satanás halo Eva fiar katak hodi haketak an husi Maromak, nia sei iha moris neʼebé diʼak liu. (Gên 3:13) Maibé, rezultadu hatudu katak Satanás mak bosok-teen duni! (Joao 8:44) Tuirmai, liuhusi feto neʼe, Satanás halo Adão sai la laran-metin tan ba Maromak Jeová. Tanba buat neʼebé Adão halo, ema hotu sai atan ba sala, no tan neʼe fasil ba ema hotu atu halo tuir deʼit Satanás nia hahalok hodi la halo tuir Maromak.—Lee Efeso 2:1-3.
5 Satanás mós book anju barak atu kontra Maromak. (Apok 12:3, 4) Anju aat sira-neʼe kontra Maromak antes Rai-Nabeen iha Noé nia tempu. Anju sira-neʼe fiar katak sira sei kontente liu se sira husik sira-nia fatin iha lalehan hodi moris iha rai no halo tuir deʼit sira-nia hakarak aat. (Jud 6) Agora anju aat sira-neʼe la uza tan isin hanesan ema, no sira ajuda Satanás atu “bosok raiklaran tomak”. (Apok 12:9) Maibé triste tanba ema barak liu la hatene katak Satanás no anju aat sira-neʼe mak domina mundu neʼe.—2 Kor 4:4.
Mundu nia espíritu book ita ka lae?
6. Oinsá mak mundu nia espíritu bele book ita?
6 Maski ema barak la hatene katak Satanás mak loloos domina mundu neʼe, maibé ema kristaun loos aprende ona husi Bíblia kona-ba oinsá nia halo ida-neʼe. (2 Kor 2:11) Tuir loloos, mundu nia espíritu la bele book ita se ita la husik nia atu halo ida-neʼe. Mai ita koʼalia kona-ba pergunta haat neʼebé ajuda ita atu hatene se Maromak nia espíritu mak book ita ka mundu nia espíritu mak book ita.
7. Dalan saida mak Satanás uza atu haketak ita husi Maromak Jeová?
7 Atividade halimar nian neʼebé haʼu halo hatudu saida kona-ba haʼu? (Lee Tiago 3:14-18.) Satanás koko atu haketak ita husi Maromak hodi book ita atu hadomi violénsia. Diabu hatene katak Maromak Jeová odi ema neʼebé hadomi violénsia. (Sal 11:5) Tan neʼe, Satanás tenta ita atu tuir deʼit ita-nia hakarak isin nian. Nia halo ida-neʼe hodi uza livru, filme, múzika, no video game neʼebé dala ruma iha hahalok foʼer no violénsia. Maski ita-nia laran hadomi nafatin buat neʼebé loos, maibé Satanás sei kontente se ita mós hadomi buat aat neʼebé nia habelar.—Sal 97:10.
8, 9. Pergunta saida deʼit mak ita presiza husu ba ita-nia an kona-ba atividade halimar nian?
8 Maibé, Maromak nia espíritu book ema atu hatudu hahalok neʼebé moos, hadame malu no hatudu laran-sadiʼa. Tan neʼe, diʼak atu husu ita-nia an: ‘Atividade halimar nian neʼebé haʼu hili book haʼu atu hatudu hahalok diʼak ka lae?’ Ema neʼebé husik Maromak nia espíritu atu book sira, la hatudu hahalok laran-makerek, tanba ida-neʼe laʼós matenek husi lalehan. Sira laʼós deʼit hanorin dame no hanorin kona-ba hahalok neʼebé moos ba ema seluk, maibé kuandu sira mesak iha uma laran, sira mós hasees an hodi la haree filme neʼebé hatudu hahalok neʼebé foʼer ka violénsia.
9 Maromak Jeová hakarak ema atu adora nia mesak deʼit. Maibé, Satanás kontente se ita adora fali nia maski ba dala ida deʼit, hanesan nia koko atu halo ba Jesus. (Lc 4:7, 8) Tan neʼe, ita bele husu ita-nia an: ‘Atividade halimar nian neʼebé haʼu hili halo susar ba haʼu atu fó adorasaun ba Maromak mesak deʼit ka lae? Haʼu-nia atividade halimar nian halo susar ka halo fasil liu ba haʼu atu tahan hasoru mundu nia espíritu? Haʼu presiza troka haʼu-nia atividade halimar nian ka lae?’
10, 11. (a) Mundu nia espíritu book ema atu iha hanoin saida kona-ba rikusoin? (b) Maromak nia Liafuan ajuda ita atu iha hanoin oinsá kona-ba rikusoin?
10 Saida mak haʼu-nia hanoin kona-ba rikusoin? (Lee Lucas 18:24-30.) Mundu nia espíritu haburas “hakarak aat matan nian” liuhusi hahalok kaan-teen no hadomi rikusoin. (1 Joao 2:16) Espíritu neʼe book ema barak atu iha hakarak atu sai riku. (1 Tim 6:9, 10) Espíritu neʼe hakarak lohi ita atu fiar katak hodi halibur rikusoin barak, ida-neʼe sei proteje ita. (Prov 18:11) Maibé, se ita husik domin ba osan sai boot liu fali ita-nia domin ba Maromak, neʼe katak Satanás mak manán. Ita presiza husu ba ita-nia an: ‘Haʼu uza haʼu-nia moris atu buka deʼit rikusoin no ksolok ka lae?’
11 Maibé, la hanesan ho mundu nia espíritu, Maromak nia Liafuan, neʼebé nia leno liuhusi ninia espíritu, ajuda ita atu iha hanoin neʼebé loos kona-ba osan no mós atu serbisu makaʼas atu tau matan ba ita-nia an no ita-nia família nia presiza. (1 Tim 5:8) Maromak nia espíritu ajuda ema neʼebé simu espíritu neʼe atu haleno Maromak Jeová nia hahalok laran-luak. Sira buka atu fó buat ruma duké hein atu simu deʼit. Sira hafolin liu ema duké sasán no kontente atu fahe buat neʼebé sira iha kuandu sira iha kbiit atu halo nuneʼe. (Prov 3:27, 28) Sira nunka husik hakarak atu buka osan atu sai importante liu fali serbí Maromak.
12, 13. La hanesan ho mundu nia espíritu, oinsá mak Maromak nia espíritu bele ajuda ita?
12 Haʼu-nia hahalok haleno espíritu ida-neʼebé? (Lee Koloso 3:8-10, 13.) Mundu nia espíritu haburas hahalok isin nian. (Gal 5:19-21) Entaun, oinsá mak ita bele hatene espíritu ida-neʼebé mak book ita? Dalan ida mak liuhusi hahalok neʼebé ita hatudu kuandu hasoru problema ruma, hanesan kuandu ita-nia irmaun ka irmán ida hakanek ita, ka halo sala hasoru ita. Liután neʼe, buat neʼebé ita halo kuandu mesak iha ita-nia uma bele hatudu sai espíritu ida-neʼebé mak domina ita. Tan neʼe, diʼak atu hanoin kona-ba ita-nia hahalok. Husu ita-nia an: ‘Iha fulan neen nia laran, haʼu-nia hahalok no koʼalia sai diʼak hanesan Kristu nian, ka haʼu fila fali ba kotuk hodi hatudu fali toman balu neʼebé la diʼak?’
13 Maromak nia espíritu bele ajuda ita atu ‘hasai tiha ema tuan ho nia hahalok aat sira no tau fali ema foun’. Ida-neʼe sei ajuda ita atu haburas hahalok domin no laran-diʼak. Maski karik ita iha razaun loos atu sai hirus, maibé espíritu neʼe ajuda ita atu prontu atu fó perdua ba malu ho laran, la sai “laran-hirus, laran-nakali” ka hatete “lia aat”. Duké halo nuneʼe, ita sei hakaʼas an atu hatudu “laran-diʼak ba malu”.—Ef 4:31, 32.
14. Ema barak iha mundu neʼe sente oinsá kona-ba Maromak nia Liafuan?
14 Haʼu respeitu no hadomi Bíblia nia matadalan kona-ba buat morál ka lae? (Lee Provérbios 3:5, 6. *) Mundu nia espíritu haleno hahalok neʼebé kontra Maromak nia Liafuan. Espíritu neʼe book ema balu atu la simu Bíblia nia matadalan neʼebé sira la gosta no halo tuir deʼit ema nia lisan ka matenek ema nian. (2 Tim 4:3, 4) Ema seluk fali la fiar Maromak nia Liafuan. Sira la fiar katak Bíblia mai husi Maromak no katak diʼak ba sira-nia moris. Sira la hafolin Bíblia nia matadalan kona-ba halo sala-foʼer ho ema neʼebé laʼós sira-nia kaben, halo sala-foʼer mane ho mane ka feto ho feto, no kona-ba soe malu. Sira hanorin katak “buat neʼebé diʼak mak aat no buat neʼebé aat mak diʼak”. (Isa 5:20) Mundu nia espíritu neʼe kona ita ka lae? Kuandu ita hasoru problema ruma, ita sadere deʼit ba matenek ema nian, inklui ita rasik nia matenek ka lae? Ka ita hakaʼas an atu halo tuir Bíblia nia konsellu?
15. Duké fiar ba ita-nia matenek rasik, ita presiza halo saida?
15 Maromak nia espíritu book ita atu respeitu Bíblia. Ita hakarak haree Maromak nia liafuan nuʼudar ahi-oan ba ita-nia ain, no naroman ba ita-nia dalan. (Sal 119:105) Duké fiar ba ita-nia matenek rasik, ita tau fiar ba Maromak nia Liafuan hodi ajuda ita atu hatene buat neʼebé loos husi buat neʼebé sala. Sin, espíritu book ita laʼós deʼit atu respeitu Bíblia, maibé mós atu hadomi Maromak nia ukun-fuan.—Sal 119:97.
Aprende husi Jesus nia ezemplu
16. Saida deʼit mak ita presiza halo atu iha “Kristu nia hanoin”?
16 Atu simu Maromak nia espíritu, ita presiza atu iha “Kristu nia hanoin”. (1 Kor 2:16) Atu “iha hanoin hanesan Kristu Jesus”, ita presiza hatene dalan neʼebé nia hanoin no buat neʼebé nia halo, no banati-tuir nia. (Rom 15:5, MF; 1 Ped 2:21) Mai ita haree dalan balu neʼebé ita bele halo tuir Jesus.
17, 18. (a) Saida mak ita aprende husi Jesus kona-ba orasaun? (b) Tanbasá mak ita presiza atu “husu” beibeik?
17 Halo orasaun hodi husu Maromak nia espíritu. Antes Jesus hasoru susar sira, nia halo orasaun atu husu Maromak nia espíritu santu atu ajuda nia. (Lc 22:40, 41) Ita mós presiza husu Maromak atu haraik ninia espíritu santu ba ita. Maromak Jeová ho laran-luak fó ninia espíritu ba ema hotu neʼebé husu ho fiar. (Lc 11:13) Jesus hatete: “Husu bá, imi sei simu; buka bá, imi sei hetan; tuku odamatan bá, odamatan sei nakloke ba imi. Basá ema neʼebé husu sei simu; ema neʼebé buka sei hetan; no ba ema neʼebé baku odamatan, odamatan sei nakloke ba nia.”—Mt 7:7, 8.
18 Importante atu la para atu husu Maromak Jeová nia ajuda no ninia espíritu. Karik ita presiza atu halo orasaun beibeik no la ho ansi. Dala ruma Maromak Jeová la fó resposta kedas ba ninia atan sira-nia orasaun, maibé nia fó tempu ba sira atu hatudu sai loloos sira-nia hakarak, hanoin, no mós sira-nia fiar. *
19. Jesus sempre halo saida? Tanbasá mak ita tenke banati-tuir Jesus?
19 Halo tuir Maromak Jeová iha buat hotu. Jesus sempre halo buat neʼebé halo kontente ninia Aman. Bíblia konta kona-ba tempu ida neʼebé Jesus nia hanoin atu hasoru situasaun la hanesan ho ninia Aman nia hakarak. Maski nuneʼe, ho laran-metin nia hatete ba nia Aman: “Halo tuir laʼós haʼu-nia hakarak, maibé Ita-nian bá.” (Lc 22:42) Husu ita-nia an: ‘Maski susar, haʼu sempre halo tuir Maromak ka lae?’ Tuir loloos, importante atu halo tuir Maromak hodi ita bele moris. Nia merese atu ita halo tuir nia, tanba nia mak kria ita no nia mak hun ba ita-nia moris, no mós nia deʼit mak bele halo ita kontinua atu moris. (Sal 95:6, 7) Atu monu loos ba Maromak nia laran, ita tenke halo tuir nia. La iha dalan seluk atu serbí nia.
20. Jesus uza ninia moris atu halo saida? Oinsá mak ita bele banati-tuir nia?
20 Hatene didiʼak Bíblia. Kuandu Satanás koko Jesus nia fiar, Jesus hatán hodi temi fali eskritura sira. (Lc 4:1-13) Kuandu Jesus hatán ba ulun-naʼin relijiaun sira neʼebé kontra nia, Jesus uza Maromak nia Liafuan nuʼudar hun ba ninia hanorin. (Mt 15:3-6) Jesus uza ninia moris tomak hodi hatene didiʼak no kumpre Maromak nia ukun-fuan. (Mt 5:17) Ita mós hakarak atu halo nakonu ita-nia neon ho buat neʼebé hametin ita-nia fiar neʼebé mai husi Maromak nia Liafuan. (Flp 4:8, 9) Dala ruma, ita balu sente susar atu buka tempu atu estuda mesak no atu estuda nuʼudar família. Se nuneʼe, karik ita presiza husik atividade balu neʼebé ita gosta hodi bele iha tempu atu halo buat sira-neʼe.—Ef 5:15-17.
21. Arranju saida mak ajuda ita atu hatene diʼak liután no atu halo tuir Maromak nia Liafuan?
21 Adorasaun Família nian mak arranju neʼebé ‘atan laran-metin no matenek’ halo atu ajuda ita hodi ita bele iha tempu semana-semana atu estuda mesak ka estuda nuʼudar família. (Mt 24:45) Ita halo tuir didiʼak arranju neʼe ka lae? Atu ajuda ita hodi iha Kristu nia hanoin, karik ita bele halo lista kona-ba informasaun neʼebé ita hakarak hatene, no estuda hodi haree saida mak Jesus hanorin kona-ba ida-neʼe. Ita bele uza Índise Livru Haklaken nian atu buka no hetan informasaun kona-ba buat neʼebé ita estuda. Porezemplu, hahú husi tinan 2008 toʼo 2010, Livru Haklaken ba públiku iha lisaun hamutuk 12 neʼebé esplika kona-ba “Buat neʼebé ita aprende husi Jesus”. Karik ita bele uza informasaun sira-neʼe atu estuda kuandu halaʼo Adorasaun Família nian. No mós, komesa husi tinan 2006, Sedarlah! iha informasaun ho tema “Apa Jawabannya?” Informasaun neʼe bele ajuda ita atu halo kleʼan liután ita-nia matenek kona-ba Maromak nia Liafuan. Karik ita mós bele uza informasaun neʼe kuandu halaʼo ita-nia Adorasaun Família nian.
Ita bele manán mundu
22, 23. Saida mak ita tenke halo atu manán mundu neʼe?
22 Se ita hakarak atu husik Maromak nia espíritu lori ita, importante atu ita tahan hasoru mundu nia espíritu. Maibé, klaru katak ida-neʼe la fasil atu halo. Ita tenke hakaʼas an hodi halo funu. (Jud 3) Maski nuneʼe, ita bele manán! Jesus dehan ba nia dixípulu sira: “Iha mundu imi sei hetan susar barak; maibé aten-barani bá, basá haʼu manán tiha mundu.”—Joao 16:33.
23 Ita mós bele manán mundu neʼe se ita tahan hasoru ninia espíritu no hakaʼas an atu simu Maromak nia espíritu. Bíblia hatete: “Maromak hamutuk ho ita karik, sé mak bele hasoru ita?” (Rom 8:31) Sin, hodi simu Maromak nia espíritu no hodi halo tuir matadalan iha Bíblia neʼebé espíritu neʼe mak leno, ita sei sai kontente, hetan dame, sente ksolok no iha esperansa atu moris ba nafatin iha mundu foun neʼebé besik ona atu mai.
[Nota–rodapé]
^ par. 14 Provérbios 3:5: “Fiar ba Maromak Jeová ho laran tomak no labele sadere ba ó-nia matenek rasik. 6 Iha ó-nia dalan hotu fó atensaun ba nia, no nia rasik sei halo ó-nia dalan sai loos.”
^ par. 18 Atu hetan informasaun liután, haree livru Tuir Loloos, Saida mak Bíblia Hanorin? pájina 170-173.
Ita hanoin-hetan?
• Tanbasá mak mundu nia espíritu iha fatin hotu?
• Pergunta haat saida mak ita presiza husu ita-nia an?
• Buat tolu saida mak ita aprende husi Jesus kona-ba simu Maromak nia espíritu?
[Pergunta estudu nian]
[Dezeñu iha pájina 8]
Oinsá mak anju balu sai fali anju aat?
[Dezeñu iha pájina 10]
Satanás uza mundu nia espíritu atu kontrola ema, maibé ita bele sai livre husi espíritu neʼe
