Ita-nia hakaʼas-an sei lori rezultadu diʼak!

ESTUDA Bíblia hamutuk nuʼudar família mak importante tebes atubele haboot oan sira iha “dixiplina no Naʼi [Jeová] nia doutrina loloos”. (Ef 6:4) Maibé, se Ita mak inan ka aman, Ita hatene katak baibain labarik sira sai baruk lalais. Entaun, oinsá mak Ita bele ajuda sira atu la sente hanesan neʼe? Mai ita haree toʼok saida mak inan-aman balu halo ona.

Irmaun ida naran George, husi rai-Kalifórnia, iha Estadus Unidus, dehan: “Haʼu no haʼu-nia feen koko atu uza dalan oioin no tópiku oioin iha ami-nia estudu família nian. Kuandu ami lee istória balu husi Livru Istória husi Bíblia, dala ruma ami hatais roupa neʼebé hanesan ho ema iha istória neʼe no halo drama kona-ba neʼe. Ami mós halo no uza sasán ruma hanesan surik, ai-tonka liurai nian, raga no buat seluk tan. Dala ruma ami mós halimar ai-sasiʼik hanesan ‘sé mak haʼu?’ No iha tempu seluk, ami mós husu pergunta oioin kona-ba Bíblia, pergunta sira-neʼe dala ruma fasil no dala ruma susar. Liután neʼe ami mós halo buat seluk tan, porezemplu ami halo Noé nia arka neʼebé hanesan kaixote boot, no ami mós halo diagrama ka liña naruk hodi hakerek tinan sira neʼebé Bíblia nia istória balu akontese. Dala ruma ami pinta dezeñu kona-ba istória husi Bíblia. Agora daudauk, ami planu atu pinta dezeñu kona-ba hatais funu nian neʼebé temi iha Efeso 6:11-17, no ema ida-idak sei esplika kona-ba parte ida-idak husi hatais funu nian neʼe. Hodi halo buat sira-neʼe, ida-neʼe halo ami hotu gosta atu halaʼo estudu família nian.”

Inan ida naran Debi, husi rai-Michigan, iha Estadus Unidus, dehan: “Kuandu ami-nia oan-feto tinan tolu, nia la iha interese atu rona ba haʼu no haʼu-nia laʼen. Maibé, loron ida kuandu haʼu lee ba nia istória kona-ba Isaac no Rebeca husi Livru Istória husi Bíblia, haʼu foti boneka rua hodi finje katak sira mak Isaac no Rebeca neʼebé koʼalia ba malu. Ida-neʼe book duni nia atu rona didiʼak ba haʼu-nia liafuan ida-idak! Iha fulan sira tuirmai, ami uza boneka rua neʼe atu reprezenta ema oioin iha Bíblia laran. Depois ami lee tiha istória ida, ami-nia oan-feto hakaʼas an atu buka brinkedu ka sasán seluk no uza neʼe atu halo drama. Nia buka buat sira-neʼe hanesan buka rikusoin! Porezemplu, ami uza kaixa sapatu nian atu reprezenta Rahab nia uma no fita mean nuʼudar tali mean neʼebé tara iha Rahab nia janela. No iha tempu seluk, ami uza samea neʼebé halo husi hena neʼebé naruk metru 1,5 no ami bobar ida-neʼe iha ai-saar atu reprezenta samea riti neʼebé temi iha Números 21:4-9. Ami rai brinkedu sira-neʼe iha saku boot ida. Ami haksolok atu haree ami-nia oan-feto dala ruma tuur hodi haree didiʼak ba sasán sira iha ninia ‘saku istória Bíblia nian’. Ami mós kontente tebes atu haree nia halo drama rasik tuir buat neʼebé nia hatene!”

Tuir loloos, la fasil atu treinu ka haboot oan sira. Inan-aman sira presiza atu haburas oan nia hakarak atu serbí Maromak Jeová. Sira bele halo ida-neʼe loron-loron, iha dalan oioin. No klaru katak estuda Bíblia hamutuk nuʼudar família mak dalan importante ida atu hanorin sira kona-ba Maromak Jeová. Ita bele fiar duni katak ita-nia hakaʼas-an sei lori rezultadu diʼak!