Bensaun husi liurai neʼebé Maromak nia espíritu dirije
Bensaun husi liurai neʼebé Maromak nia espíritu dirije
“Maromak Jeová nia espíritu sei hela ho nia.”—ISA 11:2.
1. Ema balu dehan saida kona-ba problema sira iha mundu?
“MUNDU neʼe nia polítiku, ambiente no ema nia moris mak runguranga loos, entaun oinsá mak ema bele moris iha mundu neʼe ba tinan 100 tan?” Iha tinan 2006 matenek-naʼin ida naran Stephen Hawking husu pergunta neʼe. Jornál New Statesman hatete: “Ita ema la konsege halakon kiak ka harii mundu neʼebé nakonu ho dame. Ita halo fali buat neʼebé oin seluk. Neʼe la katak ita seidauk koko buat ruma. Loloos ita koko ona governu oioin hanesan komunizmu ka kapitalista; ita mós koko ona atu hapara funu hodi harii organizasaun Liga Nasaun sira-nian no ita mós hanoin katak hodi halo bomba barak ita bele hapara funu. Tuir loloos, dala barak ita hanoin katak funu neʼebé ita halo mak ‘funu ba dala ikus’, maibé istória hatudu katak ita ema la iha kbiit atu halakon funu.”
2. Lakleur tan, oinsá mak Maromak Jeová sei hatudu sai katak nia mak iha direitu atu ukun rai tomak?
2 Maromak Jeová nia atan sira la hakfodak ho situasaun neʼe. Bíblia fó-hatene mai ita katak Maromak kria ema laʼós atu ukun an rasik. (Jer 10:23) Maromak Jeová deʼit mak merese atu sai Ukun-Naʼin Boot Liu Hotu. Nia iha direitu atu halo matadalan ba ema, atu foti desizaun kona-ba oinsá ema tenke halaʼo sira-nia moris, no ajuda sira atu kumpre ninia desizaun neʼe. Liután neʼe, lakleur tan nia sei hatudu sai ninia kbiit hodi halakon ema nia governu neʼebé la bele rezolve buat aat hotu. Iha tempu neʼebé hanesan, Maromak sei halakon sira hotu neʼebé halo ema sai atan ba sala no ba “maromak mundu neʼe nian”, Diabu Satanás. Sin, Maromak sei halakon sira hotu neʼebé la simu ninia direitu atu ukun.—2 Kor 4:4.
3. Saida mak Isaías fó-hatene nanis kona-ba Mesias?
3 Iha mundu foun neʼebé hanesan jardín furak, Maromak Jeová sei ukun ema liuhusi Mesias nia governu. (Dan 7:13, 14) Kona-ba Liurai Mesias, Isaías hatete: “Sanak ida sei mosu husi Jessé, no husi nia abut, dikin ida sei mosu no sei fó fuan. No Maromak Jeová nia espíritu sei hela ho nia, espíritu matenek nian no espíritu atu hatene, espíritu atu fó konsellu no espíritu kbiit nian, espíritu koñesimentu nian no espíritu atu taʼuk ba Jeová.” (Isa 11:1, 2) Iha dalan saida deʼit mak Maromak nia espíritu santu fó kbiit no matenek ba ‘sanak ida husi Jessé’, katak Jesus Kristu, hodi nuneʼe nia bele ukun ema hotu? Bensaun saida deʼit mak ema sei hetan husi ninia ukun? No saida mak ita tenke halo atu bele hetan bensaun sira-neʼe?
Maromak fó Jesus kbiit no matenek atu ukun
4-6. Jesus hatene didiʼak kona-ba saida deʼit neʼebé halo nia sai Liurai, Amlulik Boot, no Tesi-Lia Naʼin neʼebé matenek no laran-diʼak?
4 Maromak Jeová hakarak ninia povu atu halo tuir matadalan husi Liurai, Amlulik Boot, no Tesi-Lia Naʼin neʼebé matenek no laran-diʼak, hodi nuneʼe sira bele sai ema perfeitu. Tan neʼe mak Maromak hili Jesus Kristu, no liuhusi espíritu santu Maromak fó kbiit no matenek ba nia atu bele halaʼo knaar importante sira-neʼe. Hanoin toʼok kona-ba razaun balu tansá mak Jesus bele halaʼo ho perfeitu knaar neʼebé Maromak fó ba nia.
5 Jesus mak ida neʼebé hatene didiʼak kona-ba Maromak. Maromak nia Oan-Mane mesak koñese nia Aman durante tinan rihun ba rihun ona, neʼe kleur liu fali ema no anju seluk. Durante tempu neʼe, Jesus aprende ho didiʼak Maromak Jeová nia matenek toʼo nia sai hanesan “ilas Maromak nian neʼebé matan la haree”. (Kol 1:15) Jesus rasik hatete: “Ema neʼebé haree ona haʼu, haree ona mós haʼu Aman.”—Joao 14:9.
6 Depois Maromak Jeová, Jesus mak ida neʼebé hatene didiʼak kona-ba kriasaun hotu, inklui ema. Koloso 1:16, 17 hatete: “Basá iha nia [Kristu] mak Maromak hakiak buat hotu-hotu; buat neʼebé matan haree no buat neʼebé matan la haree . . . buat hotu neʼe mosu husi nia no tanba nia.” Hanoin toʼok kona-ba neʼe! Jesus, nuʼudar Maromak nia “badain”, hola parte atu kria buat oioin. Tan neʼe, nia hatene ho didiʼak buat hotu iha lalehan no rai, husi buat neʼebé kiʼik liu toʼo buat neʼebé komplikadu hanesan ema nia kakutak. Sin, Kristu iha matenek duni!—Prov 8:12, 22, 30, 31.
7, 8. Oinsá mak Maromak nia espíritu ajuda Jesus iha serbisu haklaken?
7 Jesus simu Maromak nia espíritu santu. Jesus hatete: “Naʼi nia espíritu iha haʼu, basá nia foti tiha haʼu atu haklaken lia-foun diʼak ba kiak sira; Nia haruka haʼu atu haklaken maksoin ba dadur sira no halo matan-delek sira haree; atu soi sira neʼebé ema hanehan, hodi haklaken Naʼi nia tinan rahun-kmanek nian.” (Lc 4:18, 19) Bainhira Jesus hetan batizmu, ita la duvida katak espíritu santu mak ajuda nia atu hanoin-hetan fali buat neʼebé nia aprende ona iha lalehan, ida-neʼe inklui buat neʼebé Maromak hakarak atu nia halo durante nia haklaken iha rai nuʼudar Mesias.—Lee Isaías 42:1; * Lucas 3:21, 22; Joao 12:50.
8 Tanba Jesus hetan kbiit husi espíritu santu no mós tanba nia iha neon no isin neʼebé perfeitu, nia laʼós deʼit ema neʼebé diʼak liu ema hotu neʼebé moris iha rai, maibé nia mós Mestre neʼebé diʼak liu hotu. Tuir loloos, ema neʼebé rona nia koʼalia, “hakfodak ho nia doutrina”. (Mt 7:28) Porezemplu, Jesus bele esplika kona-ba hun ba susar sira neʼebé ema hasoru. Hun neʼe mak ema ladún hatene kona-ba Maromak no ema mak sala-naʼin. No mós, nia bele haree ema nia laran no nia bele ajuda ema tuir sira-nia presiza.—Mt 9:4; Joao 1:47.
9. Hodi hanoin kona-ba Jesus nia moris iha rai, oinsá mak ida-neʼe sei aumenta ita-nia fiar ba nia nuʼudar Liurai neʼebé diʼak?
9 Jesus moris ona nuʼudar ema. Tanba esperiénsia neʼebé Jesus hetan hodi moris nuʼudar ema no tanba nia sai belun ho ema neʼebé la perfeitu, buat sira-neʼe ajuda nia atu sai Liurai neʼebé diʼak. Apóstolu Paulo hakerek: “[Jesus] tenke sai hanesan nia alin sira iha buat hotu, atu nuneʼe nia bele sai ema laran-luak ida no amlulik boot neʼebé laran-metin iha Maromak futar oin atu selu povu sira-nia sala. Tan nia rasik koko babeur husi buat neʼebé halo nia terus mak nia bele fó tulun ba sira neʼebé hetan babeur.” (Ebr 2:17, 18) Tanba Jesus mós hetan ona “babeur”, nia bele komprende susar neʼebé ema hasoru. Jesus hatudu duni laran-diʼak kuandu nia halaʼo serbisu haklaken iha rai. Ema moras, ema aleijadu, ema neʼebé moris susar, no mós labarik sira, gosta atu hakbesik nia. (Mc 5:22-24, 38-42; 10:14-16) Ema laran-maus no ema neʼebé hakarak aprende kona-ba Maromak mós gosta atu hakbesik ba nia. Iha parte seluk, ema foti-an no sira neʼebé “la iha domin ba Maromak” odi nia, la simu nia, no kontra nia.—Joao 5:40-42; 11:47-53.
10. Iha dalan saida mak Jesus hatudu katak nia hadomi ita?
10 Jesus saran nia moris ba ita. Buat importante ida neʼebé hatudu katak Jesus mak Ukun-Naʼin neʼebé diʼak liu mak nia ho hakarak rasik mate ba ita. (Sal 40:6-10) Kristu hatete: “Ema ida la bele hadomi liu fali ema neʼebé saran nia moris tan nia belun sira.” (Joao 15:13 ) Sin, Jesus la hanesan ho ukun-naʼin sira iha mundu neʼe neʼebé aproveita osan ka sasán husi sira-nia povu atu sira bele iha moris diʼak. Jesus fó nia moris rasik atu salva ema.—Mt 20:28.
Jesus simu knaar atu uza folin husi ninia sakrifísiu
11. Tanbasá mak ita bele tau fiar tomak ba Jesus nuʼudar ita-nia Amlulik Boot?
11 Nuʼudar Amlulik Boot, Jesus iha knaar atu uza folin husi ninia sakrifísiu atu haraik bensaun ba ita. Tuir loloos, kuandu Jesus halaʼo nia serbisu iha rai, nia halo buat furak oioin. Nia halo milagre barak hanesan kura ema moras no aleijadu sira, fó moris-hiʼas ba ema mate, fó-han ba ema-lubun boot, no mós halo anin no tasi hakmatek. (Mt 8:26; 14:14-21; Lc 7:14, 15) Buat sira-neʼe nia sei halo iha dalan neʼebé boot liu durante ninia Ukun ba Tinan Rihun Ida. Ita bele simu bensaun sira-neʼe se ita hatudu laran-metin ba Maromak agora. Milagre neʼebé Jesus halo kuandu nia iha rai laʼós atu hatudu an, maibé atu hatudu ninia laran-diʼak no domin ba ema. Kuandu ema ida neʼebé moras-lepra husu nia atu fó isin-diʼak, Jesus dehan: “Haʼu hakarak.” (Mc 1:40, 41) Jesus sei hatudu domin hanesan neʼe iha mundu tomak durante ninia Ukun ba Tinan Rihun Ida.
12. Oinsá mak liafuan neʼebé hakerek iha Isaías 11:9 sei sai loos?
12 Maizumenus tinan 2.000 liubá, Kristu hahú serbisu atu hanorin ema kona-ba Maromak. No durante Kristu nia Ukun ba Tinan Rihun Ida, nia hamutuk ho ninia alin sira neʼebé sei ukun ho nia iha lalehan, sei kontinua atu hanorin ema kona-ba Maromak. Hodi nuneʼe liafuan neʼebé hakerek iha Isaías 11:9 sei sai loos: “Rai sei nakonu ho matenek husi Naʼi Jeová hanesan bee neʼebé taka tasi.” Hanorin husi Naʼi Jeová karik sei inklui mós matadalan kona-ba oinsá ita atu tau matan ba mundu no kriatura sira hotu neʼebé hela iha rai, ida-neʼe hanesan ho knaar neʼebé Adão simu iha tempu uluk. Iha tinan 1.000 nia rohan, Maromak nia hakarak uluk nian, neʼebé temi iha Gênesis 1:28, sei sai loos, no ema sei moris haksolok tanba Kristu sei uza hotu folin husi ninia sakrifísiu atu fó bensaun ba ema.
Jesus simu kbiit atu tesi lia
13. Oinsá mak Jesus hatudu katak nia hadomi buat neʼebé loos?
13 Kristu mak ida-neʼebé ‘Maromak foti atu tesi lia ba ema moris no ema mate’. (Apos 10:42) Ita sente kmaan duni hodi hatene katak Jesus nunka uza sala ninia ukun, tanba hahalok laran-metin no hahalok loos mak hanesan sintu neʼebé kesi metin ba ninia knotak. (Isa 11:5) Jesus hatudu ona katak nia odi hahalok kaan-teen, laran-makerek no hahalok seluk neʼebé aat, no nia kritika makaʼas sira neʼebé la hanoin ema seluk nia terus. Liután neʼe, Jesus hatudu ona katak nia bele tesi lia ho loos, no la tuir deʼit buat neʼebé ema haree husi liʼur, tanba “nia hatene buat sá loos mak iha ema nia laran”.—Joao 2:25.
14. Saida mak Jesus halo ohin loron atu hatudu katak nia hadomi justisa? Diʼak ba ita atu husu ita-nia an pergunta saida deʼit?
14 Ohin loron, Jesus tau matan ba serbisu haklaken no hanorin neʼebé halaʼo iha mundu tomak, ida-neʼe hatudu katak nia kontinua hadomi justisa ka buat neʼebé loos. La iha ema ida, la iha governu ida, no mós la iha anju aat ida neʼebé bele hapara serbisu neʼe. Serbisu neʼe sei halaʼo duni tuir Maromak nia hakarak. Tan neʼe, kuandu funu Armajedón ramata tiha, ita bele fiar duni katak Maromak kumpre ninia justisa. (Lee Isaías 11:4; * Mateus 16:27.) Entaun, diʼak atu husu ita-nia an: ‘Kuandu haʼu halaʼo serbisu haklaken, haʼu mós haleno Jesus nia hahalok diʼak ba ema seluk ka lae? Haʼu mós hakaʼas an atu serbí Maromak Jeová ho laran tomak, maski haʼu-nia saúde ka situasaun ladún diʼak?’
15. Saida mak ita bele hanoin-hetan hodi bele ajuda ita atu serbí Maromak ho laran tomak?
15 Buat neʼebé ajuda ita atu serbí ho laran tomak mak hanoin nafatin katak serbisu haklaken mai husi Maromak. Nia mak haruka ita atu haklaken; nia dirije serbisu haklaken liuhusi ninia Oan-Mane; no liuhusi espíritu santu nia fó kbiit ba sira neʼebé hola parte iha serbisu neʼe. Ita hafolin knaar espesiál neʼebé ita iha hodi sai nuʼudar Maromak nia maluk serbisu-naʼin ka lae? Ita mós hafolin oportunidade furak atu serbisu hamutuk ho Maromak nia Oan-Mane, neʼebé Maromak rasik apoia liuhusi ninia espíritu santu ka lae? Klaru katak Maromak Jeová deʼit mak iha kbiit atu book ema naʼin-7.000.000 liu atu fahe mensajen kona-ba Maromak nia Ukun ba ema iha rai 236, maski sira barak mak “ema baibain” deʼit no “la matenek”!—Apos 4:13.
Hakaʼas an atu hetan bensaun liuhusi Kristu
16. Gênesis 22:18 fó esperansa saida ba ita?
16 Maromak Jeová hatete ba Abraão: “Liuhusi ó-nia bei-oan nasaun hotu iha rai sei hetan duni bensaun, tanba ó rona tiha mai haʼu-nia lian.” (Gên 22:18) Ida-neʼe hatudu katak ema neʼebé hafolin sira-nia serbisu ba Maromak no nia Oan-Mane, bele fiar katak sira sei simu bensaun husi “bei-oan” neʼebé promete ona. No hodi hanoin kona-ba bensaun sira-neʼe, sira kontinua badinas nafatin atu serbí Maromak ohin loron.
17, 18. Iha Deuteronômio 28:2 Maromak Jeová promete saida? Ida-neʼe katak sá ba ita?
17 Maromak koʼalia ba Abraão nia bei-oan, nasaun Izraél, hodi dehan: “Bensaun sira-neʼe [neʼebé temi iha Ukun-Fuan aliansa nian] sei mai toʼo imi no sei kaer toman imi, tanba imi rona ba Jeová imi-nia Maromak nia lian.” (Deut 28:2) Liafuan sira-neʼe mós bele aplika ba Maromak nia povu ohin loron. Se ita hakarak simu bensaun, importante atu kontinua “rona” ba Maromak nia lian. Hodi halo nuneʼe, Maromak nia bensaun ‘sei mai toʼo ita no sei kaer toman ita’. Entaun, “rona” ba Maromak envolve saida deʼit?
18 Rona didiʼak envolve hanoin kleʼan kona-ba buat neʼebé ita lee iha Maromak nia Liafuan no mós iha livru sira neʼebé Maromak nia organizasaun fó mai ita. (Mt 24:45) Rona didiʼak mós envolve halo tuir Maromak no ninia Oan-Mane. Jesus hatete: “Laʼós ema hotu neʼebé dehan mai haʼu: ‘Naʼi, Naʼi!’ sei tama iha reinu lalehan, maibé nia deʼit neʼebé halo tuir haʼu Aman iha lalehan nia hakarak.” (Mt 7:21) Liután neʼe, rona ba Maromak mós envolve ho hakarak rasik hakruʼuk an ba kongregasaun kristaun neʼebé Maromak harii, no hakruʼuk an ba katuas sira neʼebé Maromak fó nuʼudar “kmanek oioin”.—Ef 4:8.
19. Oinsá mak ita bele hetan bensaun?
19 “Kmanek oioin” inklui Grupu Administradór, neʼebé reprezenta kongregasaun kristaun hotu. (Apos 15:2, 6) Tuir loloos, ita-nia hahalok neʼebé ita hatudu ba Kristu nia alin sira mak sei sai nuʼudar buat ida neʼebé nia sei uza atu tesi lia ba ita durante terus boot. (Mt 25:34-40) Tan neʼe, dalan ida atu bele hetan bensaun mak hodi apoia ho laran-metin Maromak nia ema kose-mina sira.
20. (a) Saida mak knaar importante liu ba mane sira neʼebé hanesan “kmanek oioin”? (b) Oinsá mak ita bele hatudu katak ita hafolin irmaun sira-neʼe?
20 “Kmanek oioin” mós inklui ema sira neʼebé serbí iha Grupu Koordenadór ba Sukursál, serbí nuʼudar katuas neʼebé vizita kongregasaun, no katuas sira iha kongregasaun. Espíritu santu mak hili ema sira-neʼe. (Apos 20:28) Knaar importante liu neʼebé irmaun sira-neʼe halo mak atu hametin Maromak nia povu ‘toʼo tempu neʼebé sira hotu hetan laran ida deʼit iha fiar no iha matenek kona-ba Maromak nia Oan-Mane, nuʼudar ema boot loloos ona’. (Ef 4:13) Hanesan ita hotu, mane sira-neʼe mós ema sala-naʼin. Maski nuneʼe, ita bele hetan bensaun kuandu ita rona no halo tuir konsellu neʼebé sira hatoʼo ho domin.—Ebr 13:7, 17.
21. Tanbasá mak urjente ba ita atu halo tuir Maromak nia Oan?
21 Lakleur tan, Kristu sei halo funu hasoru Satanás nia mundu aat neʼe. Kuandu ida-neʼe akontese, ita-nia moris ka mate iha ona Jesus nia liman, tanba nia simu kbiit husi Maromak atu tau matan ba “ema-lubun boot” no lori sira ba “bee-matan bee moris nian”. (Apok 7:9, 16, 17) Tan neʼe, mai ita hakaʼas an agora atu ho hakarak rasik hakruʼuk an no hafolin Liurai neʼebé Maromak Jeová dirije liuhusi ninia espíritu santu.
[Nota–rodapé]
^ par. 7 Isaías 42:1: “Haree! Haʼu-nia atan neʼebé haʼu apoia! Haʼu-nia atan neʼebé haʼu hili ona, neʼebé lori ksolok mai haʼu! Haʼu tau ona haʼu-nia espíritu iha nia laran. Buat neʼebé loos mak nia sei fó sai ba nasaun sira.”
^ par. 14 Isaías 11:4: “Nia sei tesi lia ba ema kiʼik iha dalan neʼebé loos, no nia sei fó dixiplina ho laran-loos ba ema neʼebé laran-maus neʼebé iha rai. No nia sei baku rai ho ai-tonka husi ninia ibun; no ho espíritu husi nia ibun nia sei halo ema aat mate.”
Saida mak ita aprende husi . . .
[Pergunta estudu nian]
[Dezeñu iha pájina 17]
Jesus hatudu domin kuandu nia fó moris-hiʼas ba Jairo nia oan-feto
[Dezeñu iha pájina 18]
Kristu tau matan ba serbisu haklaken neʼebé halaʼo iha mundu tomak