Kontrola an inklui abilidade atu

• hatudu pasiénsia hodi hetan buat ruma

• la halo tuir kedas ita-nia hakarak

• halo hotu ita-nia knaar maski la gosta

• haree ema seluk diʼak liu fali ita

Labarik neʼebé hatene kontrola an bele kontra hasoru tentasaun, maski neʼe mak buat neʼebé sira gosta atu halo. Maibé, labarik neʼebé labele kontrola an bele

• nervozu lalais

• depresaun

• fumadór, lanu-teen no uza droga

• hili hahán neʼebé la diʼak ba saúde

Relatóriu ida hatete, labarik neʼebé bele kontrola an, bainhira sira sai boot, baibain ladún iha problema barak kona-ba saúde, la hanoin barak kona-ba osan, no iha toman diʼak atu halo tuir governu nia lei sira. Profesora ida naran Angela Duckworth husi Universidade Pennsylvania hatete: “Kontrola an nunka lori rezultadu aat mai ita.”

Dehan lae no kaer metin Ita-nia liafuan.

BÍBLIA NIA PRINSÍPIU: “Se imi dehan ‘sin’, tenkesér sin, no ‘lae’, tenkesér lae.”​—Mateus 5:37.

Labarik balu toman atu tanis makaʼas no hirus kuandu la hetan buat neʼebé sira hakarak, maski iha ema barak nia oin. Se inan-aman toman fó ba oan buat naran deʼit neʼebé sira hakarak, sira sei kontinua halo nuneʼe bainhira hakarak hetan buat ruma.

Maibé se inan-aman dehan lae no la fó buat neʼebé oan sira hakarak, neʼe bele hanorin sira katak ita labele hetan beibeik buat neʼebé ita hakarak. Doutór ida naran David Walsh hakerek: “Tuir loloos, ema neʼebé aprende husi lisaun neʼe sente kontente tebes iha sira-nia moris. Maibé se ita husik ita-nia oan sira hanoin katak sira bele hetan buat naran deʼit neʼebé sira hakarak, neʼe hanesan ita la hadomi sira.” *

 Se Ita la husik oan sira hetan buat hotu neʼebé sira hakarak, neʼe halo fasil ba sira atu kontrola an iha futuru. Porezemplu, tentasaun atu uza droga, halo sala seksuál, ka buat neʼebé lori perigu ba sira no ema seluk.

Ajuda Ita-nia oan komprende kona-ba rezultadu husi ninia hahalok diʼak no aat.

BÍBLIA NIA PRINSÍPIU: “Buat naran deʼit neʼebé ema kari, nia mós sei koʼa ida-neʼe.”​—Galásia 6:7.

Ita-nia oan presiza komprende katak buat hotu iha konsekuénsia, no tan neʼe hahalok la kontrola an sei lori rezultadu neʼebé la diʼak. Ezemplu, se Ita-nia oan mak hirus lalais, karik ema seluk sei lakohi ransu ho nia. Maibé se nia treinu atu kontrola an bainhira hasoru situasaun neʼebé koko nia, ka hatudu pasiénsia duké korta ema nia liafuan, ema sei kontente atu hakbesik ba nia. Ajuda Ita-nia oan atu komprende katak ninia moris sei sai diʼak liu se nia koko atu kontrola an.

Hanorin oan atu hatene saida mak importante liu.

BÍBLIA NIA PRINSÍPIU: “Buka-hatene loloos buat sira neʼebé importante liu.”​—Filipe 1:10.

Kontrola an laʼós deʼit ajuda ita atu la halo buat neʼebé aat, neʼe mós ajuda ita atu halo buat neʼebé karik ita ladún gosta maibé tenke halo duni. Ita-nia oan presiza hatene kona-ba saida mak importante liu ba nia atu halo uluk. Porezemplu, nia tenke halo uluk ninia TPC antes bá halimar.

Sai ezemplu neʼebé diʼak.

BÍBLIA NIA PRINSÍPIU: “Haʼu fó ezemplu ba imi, hodi nuneʼe imi mós tenke halo tuir buat neʼebé haʼu halo.”​—João 13:15.

Ita-nia oan sei haree saida mak Ita halo bainhira buat ruma provoka Ita. Hatudu ba Ita-nia oan katak rezultadu sei sai diʼak liu se Ita kontrola an. Porezemplu, bainhira Ita-nia oan halo buat neʼebé la diʼak, Ita sei sai nervozu lalais ka nafatin kontrola an?