EMA BALU HATETE

katak ema Roma fó kastigu-mate ba Jesus hodi hedi nia iha krús neʼebé halo ho ai-lolon rua.

SAIDA MAK BÍBLIA HANORIN?

Ema fó kastigu-mate ba Jesus “hodi tara nia husi ai-hun ida”. (Apóstolu 5:30, Liafuan diak ba imi, segunda edisaun) Iha lia orijinál, Bíblia uza liafuan rua atu koʼalia kona-ba buat neʼebé ema uza atu tara Jesus, no liafuan rua neʼe iha arti katak “ai-lolon ida”. Tuir livru ida (Crucifixion in Antiquity), liafuan gregu staurós nia arti mak ai-riin ida, la hanesan duni ho “krús”. Liafuan seluk mak ksilon, neʼebé Apóstolu 5:30 mós temi, no liafuan neʼe refere deʼit ba “ai-riin ka ai-lolon ida neʼebé ema Roma uza atu fó kastigu-mate ba ema”. *

Bíblia ajuda ita atu hatene iha dalan saida mak Jesus hetan kastigu-mate. Lei ida neʼebé Maromak fó ba nasaun Izraél antigu dehan: “Se ema ida halo sala no merese atu hetan kastigu-mate no imi oho nia no tara ona nia iha ai-riin ida, . . . ema neʼebé tara iha ai-riin mak ema neʼebé hetan malisan husi Maromak.” (Deuteronômio [Ulangan] 21:22, 23) Hodi refere ba lei neʼe, apóstolu Paulo hatete: “Nia [Jesus] simu ita-nia malisan, basá hakerek nanis ona: ‘Malisan ba ema sira neʼebé tara iha ai-riin [ksilon].’” (Galásia 3:13) Paulo nia liafuan neʼe hatudu ho klaru katak Jesus mate iha ai-riin ka ai-lolon ida.

“Sira oho nia hodi tara nia iha ai-hun ida.”—Apóstolu 10:39, Liafuan diak ba imi, segunda edisaun.

SAIDA MAK BÍBLIA HANORIN?

La iha eskritura ida husi Bíblia mak fó sai katak ema kristaun sira iha apóstolu sira-nia tempu uza krús nuʼudar símbolu kristaun. Tuir loloos iha tempu neʼebá, ema Roma mak uza krús nuʼudar símbolu ba sira-nia maromak. Tuirmai, maizumenus tinan 300 depois Jesus mate, Liurai Roma Constantino mak uza fali sinál krús neʼe nuʼudar símbolu ba ninia tropa, no ikusmai ema komesa haree krús nuʼudar buat neʼebé reprezenta igreja.

Entaun, Jesus nia dixípulu iha tempu uluk uza krús atu adora Maromak ka lae? Lae. Sira hatene katak ema jentiu mak uza krús atu adora maromak falsu sira. Maromak neʼebé loos la simu adorasaun neʼebé uza estátua ho “modelu naran deʼit” no ema kristaun tenke “halai husi adora estátua”. (Deuteronômio [Ulangan] 4:15-19; 1 Korinto 10:14) “Maromak mak espíritu”, neʼebé ema nia matan la bele haree. Tan neʼe, ema kristaun iha tempu antigu la uza sasán ka símbolu ruma atu sente besik ho Maromak. Sira adora Maromak “ho espíritu” hodi halo tuir matadalan neʼebé Nia fó liuhusi espíritu santu. Sira mós adora Maromak ho “lia-loos” hodi halo tuir Ninia hakarak neʼebé fó sai ona iha Eskritura sira.—João 4:24.

“Ema neʼebé adora Maromak iha dalan loos sei adora Aman ho espíritu no lia-loos.”—João 4:23.

EMA BALU HANOIN

katak “normál ba ema atu hatudu respeitu ba ekipamentu salvasaun nian. . . . Fiar-naʼin neʼebé hadomi imajen sira, hadomi mós ema neʼebé imajen sira-neʼe reprezenta.”—Livru New Catholic Encyclopedia.

SAIDA MAK BÍBLIA HANORIN?

Ema kristaun tenke hatudu agradese ba Jesus, tanba ninia mate loke dalan ba sira atu hetan perdua, hakbesik ba Maromak no moris ba nafatin. (João 3:16; Ebreu 10:19-22) Maibé Bíblia la haruka ema kristaun atu uza símbolu ka sinál ruma atu hatudu respeitu ba Jesus. Tuir Bíblia, “se fiar la hamutuk ho hahalok, fiar neʼe mate”. (Tiago 2:17) Neʼe katak ema kristaun tenke hatudu sai sira-nia fiar liuhusi sira-nia hahalok. Maibé oinsá?

Bíblia hatete: “Kristu nia domin book ami makaʼas, . . . no nia mate ba ema hotu atu nuneʼe sira neʼebé moris sei la moris tan ba sira-nia an rasik, maibé moris ba ida neʼebé mate ba sira no neʼebé moris hiʼas ona.” (2 Korinto 5:14, 15) Kristu nia domin book ema kristaun atu halo tuir ninia ezemplu iha sira-nia moris tomak. Hodi halo nuneʼe mak sira hatudu respeitu ba Jesus iha dalan neʼebé diʼak liu duké uza símbolu relijiaun nian.

“Aman hakarak katak ema hotu neʼebé haree Oan-Mane no hatudu fiar ba nia tenke hetan moris rohan-laek.”—João 6:40.