Neʼe mak konkluzaun husi grupu internasionál ida neʼebé estuda kona-ba klima nia mudansa. Se ita fiar ba Kriadór neʼebé hadomi ema, liafuan hanesan neʼe fó-hanoin ita kona-ba prosesu oioin neʼebé Maromak kria nanis atu mundu neʼe bele rekupera an rasik.

Maibé, tanba ema halo ona mundu nia kondisaun sai aat tebes, prosesu naturál deʼit la toʼo atu mundu neʼe bele dura ba nafatin. Entaun, oinsá ita bele fiar katak Maromak sei hadiʼa situasaun neʼe?

Haree toʼok eskritura sira tuirmai neʼebé ajuda ita atu fiar metin katak ita-nia planeta sei dura no buras ba nafatin.

• Maromak mak kria ita-nia planeta. “Horiuluk kedas Maromak kria lalehan no rai.”—Génesis 1:1

• Maromak mak naʼin ba ita-nia planeta. “Mundu no buat hotu neʼebé iha mundu mak Jeová a nian, rai no sira hotu neʼebé hela iha rai mak ninian.”—Salmo 24:1

• Maromak kria mundu hodi dura ba nafatin. “Nia harii metin ona mundu iha ninia hun sira-nia leten; mundu neʼe sei la muda husi ninia fatin tinan ba tinan ba nafatin.”—Salmo 104:5

• Maromak promete katak ita-nia planeta sei iha nafatin kriatura neʼebé moris. “Maromak neʼebé loos, ida neʼebé kria rai, . . . Nia kria rai laʼós saugati deʼit, maibé nia kria rai atu ema bele hela bá.”—Isaias 45:18

• Maromak promete katak ema sei moris iha mundu ba nafatin. “Ema laran-loos sira sei simu rai nuʼudar sira-nian, no sira sei moris ba nafatin iha rai.”—Salmo 37:29

Maromak kria mundu ho kapasidade atu rekupera an hodi ema bele kontinua halaʼo sira-nia moris. Bíblia fó sai katak Maromak Jeová deside ona tempu atu hapara ema nia atividade neʼebé estraga mundu. —Apokalipse 11:18

Liuhusi Bíblia, Maromak promete atu hadiʼa fali mundu sai paraízu neʼebé furak hodi ‘loke ninia liman no halo kontente kriatura hotu neʼebé moris hodi fó buat neʼebé sira hakarak’.—Salmo 145:16