Haʼu moris iha tinan 1960 bainhira haʼu-nia amá tinan 17. Haʼu-nia apá husik hela amá bainhira amá isin-rua. Amá no haʼu hela hamutuk ho avó sira iha knua kiʼik ida naran Burg iha rai-Alemaña Leste. Ema barak liu mak la fiar ba Maromak, nuneʼe mós ho haʼu-nia família. Ba ami, Maromak la iha.

Haʼu-nia avó-mane hadomi tebes haʼu. Nia gosta bolu haʼu atu hamaluk nia halo serbisu oioin, hanesan saʼe ai no tesi ai-sanak sira. Nuʼudar labarik, haʼu gosta tebes buat foun hanesan neʼe. Haʼu-nia moris kontente tebetebes.

Loron ida, bainhira haʼu tinan hitu no foin saʼe ba klase rua iha eskola primária, buat aat ida akontese. Bainhira haʼu fila husi eskola, haʼu saʼe eletrisidade riin toʼo metru ualu no derrepente deʼit listrik xoke haʼu. Ikusmai, kuandu haʼu hadeer fali iha ospitál, haʼu-nia liman rua la sente buat ida tanba sai motuk ona. Kanek neʼe todan tebes toʼo doutór tenke tesi tiha haʼu-nia liman rua, tanba se lae, haʼu sei mate. Neʼe halo haʼu-nia amá no avó sira sente laran-triste tebetebes. Maibé tanba haʼu sei labarik, haʼu ladún komprende oinsá mak ida-neʼe sei troka haʼu-nia moris.

Depois haʼu alta tiha, haʼu komesa eskola fali. Labarik sira hamnasa, goza, dudu haʼu, no tuda sasán oioin mai haʼu tanba haʼu la bele defende an. Sira mós uza liafuan oioin hodi hatún haʼu, neʼe halo haʼu laran-kanek no triste tebes. Ikusmai, haʼu muda ba Eskola Birkenwerder, neʼe mak eskola ho asrama ba labarik aleijadu sira. Tanba eskola neʼe dook husi uma, haʼu-nia família la iha osan atu vizita haʼu. Haʼu hasoru fali sira iha tempu feriadu deʼit. Ba tinan sanulu nia laran, haʼu dook husi família.

Haʼu aprende atu halo buat oioin ho haʼu-nia ain deʼit. Imajina toʼok se imi han uza ain-fuan hodi kaer garfu no kanuru! Haʼu sai matenek atu han hanesan neʼe. Haʼu mós aprende oinsá atu kose nehan no sui fuuk hodi uza haʼu-nia ain. Haʼu mós uza haʼu-nia ain atu hatudu sinál oioin bainhira haʼu koʼalia ho ema. Sin, haʼu-nia ain mak sai fali haʼu-nia liman.

 Iha tempu foin-saʼe nian, haʼu gosta tebes lee livru kona-ba robot sira. No dala ruma haʼu mehi atu iha liman robot nian neʼebé bele halo buat hotu. Bainhira haʼu tinan 14, haʼu komesa fuma. Neʼe halo haʼu fiar an no sente katak haʼu mós hanesan deʼit ho ema seluk. Haʼu hanoin katak: ‘Maski haʼu la iha liman, haʼu mós bele fuma tanba haʼu boot ona.’

Haʼu halo haʼu-nia moris okupadu ho atividade oioin. Haʼu sai membru husi organizasaun juventude sosialista (Free German Youth), no haʼu hetan knaar nuʼudar sekretáriu. Haʼu mós hola parte iha grupu koru, halo poezia, no desportu oioin ba ema aleijadu sira. Ikusmai, haʼu serbisu iha kompañia ida iha haʼu-nia knua. Durante tempu neʼebá, haʼu uza liman falsu beibeik tanba haʼu hakarak tebes atu iha isin neʼebé kompletu.

Loron ida bainhira haʼu hein hela komboiu atu bá serbisu, mane ida hakbesik haʼu. Nia husu haʼu atu koko imajina toʼok katak Maromak sei halo haʼu iha fali liman rua. Pergunta neʼe halo haʼu bilán. Klaru katak haʼu hakarak iha liman, maibé neʼe sei nunka akontese! Haʼu fiar katak Maromak la iha. Husi tempu neʼebá, haʼu buka dalan atu la koʼalia tan ho mane neʼe.

Tempu balu liutiha, haʼu-nia kolega serbisu ida konvida haʼu atu vizita ninia família. Bainhira hemu kafé hamutuk, ninia inan-aman komesa koʼalia kona-ba Maromak, neʼebé naran Jeová. Neʼe mak primeiravés ba haʼu atu rona katak Maromak iha naran. (Salmo [Mazmur] 83:18) Maibé iha haʼu-nia laran, haʼu la konkorda ho buat neʼebé haʼu rona. Haʼu hanoin: ‘Tuir loloos, Maromak la iha. Haʼu sei hatudu katak sira mak sala.’ Tan neʼe, bainhira sira konvida haʼu atu koʼalia beibeik kona-ba Bíblia, haʼu simu deʼit. Maibé haʼu la konsege defende haʼu-nia fiar katak Maromak la iha.

Nuʼudar haʼu estuda kona-ba profesia sira husi Bíblia, neineik-neineik haʼu troka haʼu-nia hanoin no komesa fiar katak Maromak iha. Profesia barak neʼebé fó-hatene nanis tinan atus ba atus liubá sai loos ona. Loron ida, ami kompara mundu nia situasaun ohin loron nian ho profesia sira iha Mateus kapítulu 24, Lucas 21 no 2 Timóteo 3. Hanesan ho doutór neʼebé bele hatene moras ida liuhusi sintoma oioin, sinál sira neʼebé fó sai nanis iha eskritura sira-neʼe mós bele ajuda haʼu atu hatene katak ita moris daudauk iha tempu neʼebé Bíblia bolu nuʼudar “loron ikus sira”. * Haʼu haree rasik profesia sira-neʼe sai loos daudauk.

Haʼu komesa fiar katak buat neʼebé haʼu aprende daudauk mak lia-loos duni. Haʼu hahú halo orasaun ba Maromak Jeová, no maski haʼu fuma ba tinan sanulu liu ona, maibé haʼu husik fuma. Haʼu estuda Bíblia maizumenus ba tinan ida, no iha loron 27 Abríl 1986, haʼu hetan batizmu subasubar,  tanba iha tempu neʼebá governu Alemaña Leste bandu hela Testemuña ba Jeová.

Tanba governu bandu, ami presiza halibur hamutuk nuʼudar grupu kiʼik iha uma baibain deʼit. Maibé loron ida, haʼu hetan lisensa husi governu atu halo viajen ba Alemaña Oeste. Iha neʼebá governu la bandu Testemuña sira, no neʼe mak primeiravés ba haʼu atu asiste reuniaun boot kona-ba Bíblia no hasoru maluk Testemuña rihun ba rihun. Haʼu hetan esperiénsia neʼebé espesiál tebes.

Depois Moru Berlín rahun, governu la bandu tan Testemuña ba Jeová. Ikusmai, ami bele adora Maromak Jeová ho livre. Haʼu hakarak aumenta serbisu haklaken, maibé haʼu la gosta atu hasoru ema foun. Tanba haʼu aleijadu, haʼu sente katak haʼu la iha folin, no husi tempu labarik toʼo joven, haʼu mós hela deʼit iha uma ba ema aleijadu sira. Maibé iha tinan 1992, haʼu koko haklaken ba oras 60 durante fulan ida. Neʼe halo haʼu kontente tebes, nuneʼe haʼu kontinua halo ida-neʼe maizumenus ba tinan tolu.

Haʼu sempre hanoin-hetan liafuan husi Bíblia neʼebé dehan: “Sé mak kbiit-laek, no haʼu la kbiit-laek?” (2 Korinto 11:29, Liafuan diak ba imi, segunda edisaun) Maski haʼu aleijadu, haʼu sei bele hanoin no bele mós koʼalia. Tan neʼe, haʼu hakaʼas an tebes atu ajuda ema seluk. Tanba haʼu la iha liman, haʼu bele komprende ema seluk nia susar no sentimentu bainhira sira hakarak tebes halo buat ruma maibé la bele. Haʼu koko atu anima ema sira-neʼe, no ida-neʼe lori haksolok mai haʼu.

Haʼu mós dala ruma sente laran-tun. Haʼu hakarak atu iha isin neʼebé kompletu. Haʼu bele halo buat oioin mesak, maibé atu halo ida-neʼe, presiza tempu no forsa barak. Prinsípiu neʼebé ajuda haʼu mak: “Iha buat hotu haʼu hetan forsa liuhusi nia neʼebé fó kbiit mai haʼu.” (Filipe 4:13) Loroloron, Jeová fó forsa mai haʼu atu bele halo atividade baibain. Jeová sempre ajuda haʼu, tan neʼe haʼu mós sei nunka husik nia.

Durante haʼu-nia tempu eskola iha asrama, haʼu dook husi haʼu-nia família. Maibé agora, Jeová haraik bensaun mai haʼu hodi bele iha feen no oan sira. Haʼu-nia feen, Elke, mak ema neʼebé nakonu ho domin no laran-sadiʼa. Liután neʼe, haʼu mós iha maluk Testemuña ba Jeová millaun ba millaun iha mundu tomak.

Maromak mós fó kmaan mai haʼu liuhusi ninia promesa kona-ba mundu foun, katak nia sei “halo buat hotu sai foun”, inklui mós haʼu-nia liman. (Apokalipse 21:5) Bainhira haʼu hanoin kleʼan kona-ba buat neʼebé uluk Jesus halo iha rai, neʼe hametin haʼu-nia fiar. Jesus kura kedas ema aleijadu sira, no mós ema neʼebé ninia tilun tesi sai tiha. (Mateus 12:13; Lucas 22:50, 51) Jeová nia promesa no Jesus nia milagre sira halo haʼu fiar katak lakleur tan haʼu mós sei hetan fali isin neʼebé kompletu.

Maibé bensaun neʼebé diʼak liu hotu mak haʼu bele koñese Maromak Jeová. Nia sai haʼu-nia aman no belun, neʼebé fó kmaan no forsa mai haʼu. Haʼu sente hanesan ho Liurai David neʼebé dehan: “Jeová mak haʼu-nia kbiit . . . Haʼu simu ona ninia ajuda, no haʼu-nia laran haksolok.” (Salmo [Mazmur] 28:7) Haʼu hakarak kaer metin lia-loos furak neʼe ba nafatin, sin, haʼu kaer metin ida-neʼe maski haʼu la iha liman.