Sai ema diʼak deʼit bele fó garantia ba futuru neʼebé diʼak ka lae?
Ba tempu kleur, ema barak hanoin katak hatudu hahalok diʼak no moris tuir morál neʼebé loos mak dalan atu hetan futuru neʼebé diʼak. Porezemplu, ema iha parte Ázia respeitu buat neʼebé mestre filózofu Confúcio (551-479 AEC) hatete: “Buat neʼebé Ita lakohi ema halo ba Ita, labele halo neʼe mós ba ema seluk.” *
BUAT NEʼEBÉ EMA BARAK HALO
Ema barak nafatin fiar katak hatudu hahalok diʼak mak xave atu hetan futuru neʼebé diʼak. Sira koko atu hatudu respeitu, haburas hahalok diʼak, rekoñese sira-nia pozisaun iha komunidade, no nafatin iha konxiénsia neʼebé moos. Linh, feto ida husi Vietname hatete: “Haʼu sempre fiar katak se haʼu onestu no hatudu respeitu, haʼu sei hetan moris neʼebé diʼak.”
Ema balu koko atu halo diʼak tanba sira-nia relijiaun hanorin hanesan neʼe. Mane ida naran Hsu-Yun, neʼebé hela iha Taiwán hatete: “Haʼu aprende katak kuandu ema ida hatudu hahalok diʼak, nia sei kontente maski nia mate ona, maibé se nia halo hahalok aat, nia sei hetan terus.”
REZULTADU MAK SAIDA?
Kuandu ita halo diʼak ba ema seluk, ita sei hetan benefísiu barak. Maibé ema barak rekoñese katak maski sira hakaʼas an halo diʼak ba ema seluk, neʼe la fó garantia ba sira-nia futuru. Shiu Ping neʼebé hela iha Honkóng hatete: “Liuhusi haʼu-nia esperiénsia, haʼu aprende katak laʼós ema hotu neʼebé hatudu hahalok diʼak sempre hetan rezultadu diʼak. Haʼu hakaʼas an atu tau matan família no hatudu hahalok diʼak. Maibé haʼu-nia moris kaben la susesu, haʼu-nia laʼen husik hela haʼu no haʼu-nia oan-mane.”
Ema barak mós haree katak laʼós ema relijiozu hotu mak diʼak. Etsuko neʼebé hela iha Japaun hatete: “Haʼu envolve an iha organizasaun relijiaun nian, no sai xefe ba atividade juventude nian. Maibé haʼu hakfodak bainhira haree ulun-naʼin sira iha haʼu-nia relijiaun la iha morál, buka pozisaun, no naʼok osan.”
“Haʼu hakaʼas an atu tau matan família no hatudu hahalok diʼak. Maibé haʼu-nia moris kaben la susesu, haʼu-nia laʼen husik hela haʼu no haʼu-nia oan-mane.”—SHIU PING, HONKÓNG
Ema balu neʼebé relijiozu tebes no koko atu halo buat diʼak sente triste tanba la hetan rezultadu diʼak. Neʼe mak buat neʼebé Van, feto ida husi Vietname sente. Nia hatete: “Loroloron haʼu sosa ai-fuan, ai-funan, no hahán atu hatuur ba beiʼala sira tanba haʼu hakarak hetan bensaun iha futuru. Maski haʼu halo ona hahalok diʼak no rituál relijiaun ba tinan barak ona, maibé haʼu-nia laʼen kona moras todan. Depois, haʼu-nia oan feto neʼebé eskola iha rai liʼur, mate ho idade neʼebé joven hela.”
Se sai ema neʼebé diʼak deʼit la fó garantia ba futuru, entaun saida mak bele ajuda ita? Atu hetan resposta, ita presiza matadalan neʼebé ita bele tau fiar, bele hatán ba ita-nia pergunta sira, no hatudu dalan atu hetan futuru neʼebé diʼak. Iha neʼebé mak ita bele hetan matadalan hanesan neʼe?
^ par. 2 Atu hetan informasaun liután kona-ba buat neʼebé Confúcio hanorin, haree kapítulu 7, parágrafu 31-35 husi livru Pencarian Manusia akan Allah. Livru neʼe husi Testemuña ba Jeová no bele mós download husi website www.isa4310.com/id.
Karik Ita sei gosta
MATAN-MORIS BÁ!
Iha morál neʼebé diʼak
Hodi hanorin Ita-nia oan morál neʼebé diʼak, ajuda sira iha futuru neʼebé diʼak.
PERGUNTA KONA-BA BÍBLIA
Saida mak Ukun-Fuan Osan-Mean?
Bainhira Jesus fó Ukun-Fuan Osan-Mean, nia koʼalia kona-ba hahalok neʼebé ita hatudu ba ema seluk no mós ba ita-nia inimigu.
