Bainhira bebé ida foin moris, minutu 60 primeiru mak importante tebes ba bebé neʼe. Tanbasá? Tanba inan neʼebé besik ba sira-nia bebé durante tempu neʼe ajuda sira-nia bebé atu sai boot ho diʼak no iha saúde diʼak. *

Saida mak book inan ida atu tau matan ho domin ba ninia bebé neʼebé foin moris? Livru The Journal of Perinatal Education esplika katak bainhira inan ida foin partu, ormona ida iha ninia isin naran oxytocin aumenta no neʼe hamosu sentimentu domin bainhira nia koʼus, haree no fó-susu ba ninia bebé. Iha mós ormona ida seluk neʼebé book inan atu fó buat neʼebé bebé presiza no hametin ninia hakarak atu tau matan ba ninia bebé. Tanbasá neʼe importante?

Ita-nia Kriadór Maromak Jeová * kria inan sira ho kbiit atu sente besik ho sira-nia bebé. Liurai David fó hahiʼi ba Maromak tanba lori nia sai husi ninia “inan nia knotak” no halo nia sente seguru iha ninia inan nia hakoʼak. Nia halo orasaun: “Ita mak tau matan ba haʼu husi loron neʼebé haʼu moris mai; Ita sai ona haʼu-nia Maromak husi tempu neʼebé haʼu iha haʼu-nia inan nia knotak.”—Salmo 22:9, 10.

HANOIN TOʼOK: Se Maromak kria inan sira ho abilidade atu tau matan ba sira-nia bebé ho domin, neʼe katak Maromak mós tau matan no hanoin ita nuʼudar ninia oan, loos ka lae?—Apóstolu 17:29.

Jesus Kristu neʼebé hatene Kriadór diʼak liu fali ema seluk hatete: “Ema faʼan manu-liin rua ho osan-besi ida neʼebé folin kiʼik, loos ka lae? Maibé imi-nia Aman hatene kuandu sira ida monu ba rai. Kona-ba imi, fuuk-lahan iha imi-nia ulun mós nia sura hotu. Tan neʼe, keta taʼuk. Imi folin-boot liu fali manu-liin barak.”—Mateus 10:29-31.

Baibain ita la nota bainhira manu-liin sira semo bá-mai no mós la haree “kuandu sira ida monu ba rai”. Maibé ita-nia Aman iha lalehan haree manu ida-idak! Ba Maromak, ema mak folin-boot liu fali manu sira. Tan neʼe “keta taʼuk” hodi hanoin katak Maromak la haree Ita. Tuir loloos, nia hanoin tebes Ita.

 Eskritura neʼebé fó kmaan mai ita

• “Jeová nia matan haree ba fatin hotu, nia kontinua hateke ba ema aat no ema diʼak.”—PROVÉRBIOS 15:3.

• “Jeová nia matan hateke ba ema laran-loos sira, no nia see tilun ba sira-nia halerik atu husu ajuda.”—SALMO 34:15.

• “Haʼu sei haksolok tebes tanba Ita-nia domin neʼebé laran-metin, tanba Ita haree ona haʼu-nia terus; Ita hatene didiʼak haʼu-nia susar boot sira.”—SALMO 31:7.

Hodi hatene katak Maromak hatudu interese ba ita-nia moris no tau matan ba ita ho domin, neʼe bele troka ita-nia moris ka lae? Bele duni. Hannah * husi Inglaterra esplika:

“Uluk haʼu sente Jeová la hadomi haʼu no nia la hatán ba haʼu-nia orasaun. Haʼu hanoin, neʼe tanba haʼu-nia fiar mak fraku. Haʼu sente hanesan Maromak fó kastigu no lakohi rona ba haʼu tanba haʼu la iha folin. Haʼu sente katak Maromak la hanoin haʼu.”

Maibé agora, Hannah la iha dúvida ona kona-ba Maromak nia domin. Saida mak troka ninia hanoin? Nia esplika: “Neineik-neineik haʼu troka haʼu-nia hanoin. Haʼu hanoin-hetan diskursu ida husi Bíblia neʼebé hatoʼo tinan barak liubá kona-ba Jesus nia sakrifísiu. Neʼe kona loos haʼu-nia laran no ajuda haʼu atu fiar katak Jeová hadomi haʼu. No kuandu Jeová hatán haʼu-nia orasaun, neʼe halo haʼu tanis tanba hatene katak Jeová hadomi haʼu. Liuhusi estuda Bíblia no tuir reuniaun sira, haʼu aprende liután kona-ba Jeová, ninia hahalok sira, no saida mak nia sente kona-ba ema. Agora, haʼu bele haree ho klaru katak Jeová apoia no hadomi ita hotu no nia hakarak atu tau matan ba ita ida-idak.”

Hannah nia liafuan anima tebes ita. Maibé oinsá mak Ita bele fiar katak Maromak komprende Ita no Ita-nia sentimentu mak importante ba nia? Informasaun tuirmai sei hatán ba pergunta neʼe.