Hanesan ita lee ona, Jesus fó sai sinál neʼebé hatudu katak Maromak nia Reinu, ka Ukun, harii ona iha lalehan, ho Jesus nuʼudar Liurai.

Bíblia hatete katak bainhira Jesus foin sai Liurai, nia soe tun tiha Satanás no ninia anju aat sira husi lalehan. Agora, buat neʼebé sira halo kona deʼit rai, laʼós lalehan, tan neʼe mak situasaun iha mundu sai aat liu husi tinan 1914.—Apokalipse 12:7, 9.

Maski situasaun iha mundu sai aat ba beibeik, Jesus nuʼudar Liurai ba Maromak nia Reinu, halo ona buat barak atu ajuda ema iha mundu tomak. Tanba serbisu edukasaun kona-ba Bíblia neʼebé Jesus fó-hatene nanis halaʼo daudaun iha mundu tomak, ema barak aprende no aplika Bíblia nia matadalan iha sira-nia moris. (Isaias 2:2-4) Ema rihun ba rihun aprende ona oinsá atu iha moris família neʼebé diʼak liután hodi la haree serbisu no sasán nuʼudar buat neʼebé importante liu iha sira-nia moris. Sira aprende oinsá atu halaʼo moris neʼebé diʼak liután agora, no sai ema neʼebé Maromak hakarak nuʼudar povu iha ninia Ukun okos.

Maski Jesus ukun ona iha lalehan, ohin loron ema nia governu sira mak sei ukun hela iha rai. Maibé Maromak haruka Jesus: “Bá domina iha ó-nia inimigu sira-nia leet.” (Salmo 110:2) Lakleur tan, Jesus sei halakon kontradór sira hotu, no neʼe sei lori kmaan ba ema neʼebé halo tuir Maromak.

Durante tempu neʼe, Maromak nia Reinu sei halo buat sira tuirmai:

• Halakon relijiaun falsu. Relijiaun sira neʼebé hanorin lia-bosok kona-ba Maromak no hanehan ema, sei lakon. Bíblia kompara relijiaun falsu hanesan feto-aat ida. Bainhira relijiaun falsu lakon, neʼe sei halo ema barak hakfodak tebes.—Apokalipse 17:15, 16.

• Halakon ema nia governu sira. Maromak nia Reinu sei halakon ema nia ukun hotu.—Apokalipse 19:15, 17, 18.

• Halakon ema aat sira. Oinsá ho ema neʼebé hakarak halo aat no lakohi halo tuir Maromak? “Kona-ba ema aat, sira sei lakon husi rai.”—Provérbios 2:22.

• Halakon Satanás no anju aat sira. Satanás no anju aat sira sei “labele lohi tan nasaun sira”.—Apokalipse 20:3, 10.

Buat hotu neʼe katak sá ba ema neʼebé simu Maromak nia Reinu?

Husi lalehan, Jesus sei halo buat diʼak barak neʼebé ukun-naʼin seluk labele. Ema naʼin-144.000 neʼebé Maromak hili husi rai, sei ukun hamutuk ho Jesus. (Apokalipse 5:9, 10; 14:1, 3) Ikusmai Maromak nia hakarak sei sai loos iha rai. Saida deʼit mak Maromak nia Reinu sei halo ba ema iha rai?

• Moras no mate sei la iha tan. “La iha ema ida iha rai mak sei dehan: ‘Haʼu moras,’” no “mate sei la iha tan”. —Isaias 33:24; Apokalipse 21:4.

• Mundu sei iha dame no hakmatek. “Ó-nia oan sira-nia dame sei sai barak”, no “sira ida-idak sei tuur iha sira-nia uvas-hun okos no iha sira-nia ai-figeira hun okos. No sei la iha ema ida mak halo sira taʼuk”. —Isaias 54:13; Miqueias 4:4.

• Ema hotu sei iha serbisu neʼebé lori kontente. “Sira neʼebé haʼu hili ona sei haksolok duni ho serbisu neʼebé sira halo ho sira-nia liman. Sira-nia serbisu makaʼas sei la sai saugati deʼit.”—Isaias 65:22, 23.

• Ambiente sei sai diʼak fali. “Rai-fuik no rai neʼebé maran-dekor sei haksolok, no rai-tetuk maran sei haksolok no sai nakonu ho ai-funan asafraun.”—Isaias 35:1.

• Ema sei aprende oinsá atu bele moris ba nafatin. “Neʼe mak moris rohan-laek: Katak sira hatene didiʼak kona-ba Ita, Maromak loos mesak deʼit, no mós Jesus Kristu neʼebé Ita haruka mai.”—João 17:3.

Maromak hakarak tebes Ita atu hetan bensaun sira-neʼe. (Isaias 48:18) Informasaun tuirmai esplika saida mak ita bele halo agora atu hetan futuru kapás neʼe.