Haʼu moris iha 19 Maiu 1940, iha sidade kiʼik naran Amioûn, iha rai-Líbanu. Tinan balu liutiha, ami-nia família muda ba sidade Tripoli. Haʼu boot iha família neʼebé hadomi malu no hadomi Jeová. Haʼu mak oan-mane ikun husi oan naʼin-lima. Haʼu iha biin tolu no maun ida. Buka moris laʼós buat neʼebé importante liu ba haʼu-nia inan-aman. Iha ami-nia família, buat neʼebé importante liu mak estuda Bíblia, tuir reuniaun sira, no ajuda ema seluk hatene kona-ba Jeová.

Iha ami-nia kongregasaun, iha irmaun-irmán balu neʼebé iha esperansa atu bá lalehan. Irmaun ida mak Michel Aboud neʼebé dirije ami-nia grupu atu estuda livru. Nia aprende lia-loos iha Novaiorke, no nia lori lia-loos ba rai-Líbanu iha tinan 1921. Haʼu hanoin-hetan oinsá nia hatudu respeitu no ajuda irmán Anne no Gwen Beavor neʼebé gradua husi Eskola Gilead. Ami sai belun diʼak. Tinan barak liutiha, haʼu kontente tebes atu hasoru fali Anne iha Estadus Unidus. No liutiha tempu balu, haʼu mós hasoru Gwen neʼebé kaben ho Wilfred Gooch no serbí iha Betel Londres, iha rai-Inglaterra.

Bainhira haʼu labarik, iha Testemuña uitoan deʼit iha rai-Líbanu. Maibé ami haklaken ho laran-manas kona-ba buat neʼebé ami aprende ona husi Bíblia. Ami haklaken maski ulun-naʼin relijiaun balu kontra ami. Haʼu hanoin-hetan esperiénsia balu.

Loron ida, haʼu no haʼu-nia biin Sana haklaken iha apartamentu ida. Amlulik ida toʼo iha andár neʼebé ami haklaken bá. Karik ema ruma mak bolu nia. Amlulik neʼe komesa insulta haʼu-nia biin. Nia sai hirus tebes no dudu haʼu-nia biin Sana toʼo haʼu-nia biin monu tun husi eskada no hetan kanek. Ema ruma telefone polísia no polísia sira mai no ajuda Sana. Sira lori amlulik neʼe ba sede-polísia. Iha neʼebá, sira deskobre katak amlulik neʼe lori kilat. Xefe polísia husu nia: “Señór, Ita-Boot neʼe amlulik ida ka xefe ba geng?”

Esperiénsia seluk neʼebé haʼu hanoin-hetan ho didiʼak mak kuandu ami-nia kongregasaun aluga bís ida atu bá haklaken iha knua ida neʼebé izoladu. Ami haklaken ho kontente toʼo amlulik ida rona kona-ba neʼe no halibur ema-lubun atu ataka ami. Sira trata ami no tuda fatuk ba ami toʼo apá hetan kanek. Apá nia oin nakonu ho raan. Apá no amá fila fali ba bís no ami laʼo tuir sira ho laran-taridu. Amá hamoos apá nia kanek no amá hatete buat neʼebé haʼu sei nunka haluha: “Jeová, favór perdua sira tanba sira la hatene buat neʼebé sira halo.”

Iha tempu seluk, ami vizita ami-nia família iha sidade seluk. Iha neʼebá, ami hasoru bispu ida iha haʼu-nia avó nia uma. Nia hatene katak haʼu-nia inan-aman mak Testemuña. Maski haʼu tinan neen deʼit, maibé nia koko hamoe haʼu hodi husu: “Tanbasá ó seidauk sarani?” Haʼu hatán ba nia katak haʼu sei kiʼik no atu bele hetan batizmu, haʼu presiza aprende liután kona-ba Bíblia no iha fiar neʼebé metin. Nia la gosta haʼu-nia resposta, tan neʼe nia hatete ba avó katak haʼu la respeitu nia.

Maibé esperiénsia aat hanesan neʼe mak uitoan deʼit. Baibain ema Libanés mak ema neʼebé laran-diʼak no laran-luak. Tan neʼe, ami bele koʼalia kona-ba Bíblia no estuda ho ema barak.

Bainhira haʼu eskola hela, irmaun joven ida husi rai-Venezuela mai vizita rai-Líbanu. Nia tuir ami-nia reuniaun no tuirmai nia komesa namora ho haʼu-nia biin Wafa. Tuirmai sira kaben no hela iha rai-Venezuela. Wafa hakerek beibeik karta ba apá no anima ami hotu atu muda ba rai-Venezuela. Nia halo nuneʼe tanba nia hakarak tebes atu hasoru ami. Ikusmai ami muda ba rai-Venezuela.

Ami toʼo iha rai-Venezuela iha tinan 1953 no ami hela iha sidade Karakas besik palásiu prezidensiál. Tanba haʼu sei kiʼik, haʼu kontente tebes atu haree beibeik prezidente liu  ho ninia karreta. Maibé la fasil ba haʼu-nia inan-aman atu adapta ho nasaun foun, língua foun, kultura foun, hahán foun no klima neʼebé la hanesan. Tuir loloos, bainhira sira foin komesa adapta ho situasaun foun buat aat ida akontese.

Apá komesa sente moras. Neʼe la hanesan baibain tanba apá mak ema neʼebé forte no iha saúde diʼak. Nia nunka moras. Tuirmai doutór hatete katak apá iha kankru pánkreas, no nia hetan operasaun. Maibé triste mak semana ida liutiha, nia mate.

Neʼe mak situasaun neʼebé susar ba ami no ami sente triste tebetebes. Iha tempu neʼebá, haʼu foin tinan 13. Ami sente hakfodak tebes no hanoin katak ami sei nunka bele kontente fali. Ba tempu balu, amá sente susar atu simu realidade katak apá mate ona. Maibé ami rekoñese katak ami presiza kontinua halaʼo ami-nia moris no Jeová ajuda ami atu tahan. Kuandu haʼu tinan 16, haʼu gradua husi eskola sekundária iha sidade Karakas, no haʼu hakarak tebes atu buka serbisu hodi sustenta haʼu-nia família.

Iha tempu neʼebá, haʼu-nia biin Sana kaben ho irmaun Rubén Araujo neʼebé gradua husi Eskola Gilead no fila fali ba rai-Venezuela. Sira deside atu muda ba Novaiorke. Haʼu-nia família deside katak haʼu presiza estuda iha universidade, tan neʼe haʼu bá Novaiorke no hela hamutuk ho Sana no Rubén. Sira ajuda haʼu atu hakbesik liután ba Jeová. Liután neʼe, iha irmaun barak neʼebé maduru iha ami-nia kongregasaun lian Españól iha Brooklyn, hanesan irmaun Milton Henschel no Frederick Franz. Haʼu hafolin tebes sira-nia ajuda. Uluk sira naʼin-rua serbí iha Betel Brooklyn.

Depois estuda tiha ba tinan ida iha universidade, haʼu komesa hanoin kona-ba saida mak haʼu sei halo ho haʼu-nia moris. Haʼu lee ona no hanoin kleʼan kona-ba informasaun husi Livru Haklaken neʼebé esplika katak ema Kristaun presiza iha planu espirituál. Haʼu nota katak pioneiru sira no ema Betel iha ami-nia kongregasaun mak kontente tebes, no haʼu hakarak atu sente kontente hanesan sira. Maibé, haʼu seidauk hetan batizmu. Lakleur haʼu rekoñese katak importante tebes atu dedika an ba Jeová. Haʼu dedika an no tuirmai hetan batizmu iha 30 Marsu 1957.

Depois hetan batizmu, haʼu komesa hanoin kona-ba foti pioneiru. Haʼu hakarak tebes atu sai pioneiru. Maibé haʼu rekoñese katak neʼe la fasil. Haʼu duvida se haʼu bele estuda iha universidade no iha tempu hanesan foti pioneiru. Haʼu no haʼu-nia família hakerek karta barak ba malu kona-ba haʼu-nia desizaun atu para eskola, fila fali ba rai-Venezuela, no sai pioneiru.

Haʼu fila fali ba sidade Karakas iha fulan-Juñu tinan 1957. Haʼu haree haʼu-nia família  nia situasaun moris la diʼak. Sira presiza ema ida tan atu serbisu hodi sustenta família nia presiza. Haʼu hakarak ajuda sira. Haʼu hetan serbisu iha banku ida, maski nuneʼe haʼu hakarak tebes atu foti pioneiru. Neʼe mak haʼu-nia razaun atu fila fali mai rai-Venezuela. Haʼu deside atu serbisu no mós foti pioneiru. Durante tinan barak haʼu serbisu full-time iha banku no mós serbí nuʼudar pioneiru. Durante tempu neʼe haʼu okupadu loos no kontente.

Haʼu mós sente kontente tebes bainhira hasoru Sylvia. Nia muda mai rai-Venezuela hamutuk ho ninia inan-aman. Nia mak feto Alemaun ida neʼebé laran-diʼak no hadomi tebes Jeová. Ikusmai ami kaben no iha oan naʼin-rua. Ami-nia oan-mane naran Michel (Mike) no ami-nia oan-feto naran Samira. Haʼu mós komesa tau matan ba amá. Nia hela hamutuk ho ami. Maski haʼu presiza para serbí nuʼudar pioneiru atu tau matan haʼu-nia família, maibé haʼu nafatin haklaken ho laran-manas. Haʼu no haʼu-nia feen Sylvia uza ami-nia tempu feriadu atu serbí nuʼudar pioneiru estra.

Ami-nia oan sira sei eskola hela bainhira haʼu hanoin atu para serbisu husi banku. Haʼu rekoñese katak haʼu iha moris neʼebé diʼak no ema seluk neʼebé serbisu iha banku respeitu haʼu. Maibé haʼu hakarak ema haree haʼu nuʼudar Jeová nia atan. Haʼu sempre hanoin kona-ba neʼe. Tan neʼe, haʼu no Sylvia tuur hamutuk no koʼalia kona-ba ami-nia situasaun ekonomia. Se haʼu para serbisu iha banku, haʼu sei simu osan barak. Tanba ami la iha debe, ami bele halaʼo moris neʼebé simples, no ami-nia osan bele toʼo tempu kleur.

La fasil atu halo desizaun neʼe, maibé Sylvia no amá apoia haʼu. Tan neʼe, haʼu deside atu foti fali pioneiru. Haʼu kontente tebes. Haʼu prontu ona atu komesa foti pioneiru. Maibé tuirmai ami rona informasaun neʼebé halo ami hakfodak tebes.

Loron ida doutór konfirma katak Sylvia isin-rua. Neʼe halo ami naʼin-rua hakfodak tebes. Ami kontente tebes, maibé haʼu mós hanoin barak kona-ba haʼu-nia planu atu foti pioneiru. Haʼu bele nafatin foti pioneiru ka lae? Ami hein namanas ba ami-nia oan atu moris. Maibé haʼu nafatin hanoin kona-ba haʼu-nia planu atu foti pioneiru.

 Depois ami koʼalia hamutuk tiha, ami deside katak haʼu nafatin foti pioneiru. Ami-nia oan-mane Gabriel moris iha fulan-Abríl tinan 1985. Haʼu para serbisu iha banku no komesa foti pioneiru iha fulan-Juñu tinan 1985. Liutiha tempu balu, haʼu komesa serbisu hamutuk ho Komisaun ba Sukursál. Maibé sukursál laʼós iha sidade Karakas, entaun haʼu presiza halo viajen kilómetru 80 dala rua ka dala tolu semana-semana.

Sukursál mak iha sidade kiʼik ida naran La Victoria. Tan neʼe, ami-nia família deside atu muda ba La Victoria atu bele besik Betel. Neʼe mak mudansa neʼebé boot. Haʼu admira no hafolin tebes haʼu-nia família. Sira-nia hahalok ajuda tebes haʼu. Haʼu-nia biin Baha prontu atu tau matan ba amá. Ami-nia oan-mane primeiru Mike kaben ona, maibé Samira no Gabriel sei hela hamutuk ho ami. Tan neʼe, sira presiza husik sira-nia belun atu muda ba La Victoria. No Sylvia tenke sai toman ho sidade kiʼik. Ami hotu tenke sai toman atu hela iha uma neʼebé kiʼik liu fali uluk nian. Ami presiza halo sakrifísiu oioin atu bele muda husi Karakas ba La Victoria.

Lakleur, iha tan mudansa seluk. Gabriel kaben no Samira hela ketak. Tuirmai, haʼu no Sylvia simu konvite atu serbí iha Betel iha tinan 2007 no ami serbí iha Betel toʼo ohin loron. Mike mak katuas kongregasaun no serbí nuʼudar pioneiru hamutuk ho ninia feen Monica. Gabriel mós katuas kongregasaun. Nia no ninia feen Ambra hela iha rai-Itália. Samira serbí nuʼudar pioneiru no dala ruma serbí iha Betel nuʼudar voluntáriu online.

Durante haʼu-nia moris, haʼu tenke halo desizaun boot oioin. Haʼu kontente ho haʼu-nia desizaun sira. Haʼu nunka arrepende ida-neʼe. Haʼu hafolin tebes haʼu-nia knaar no priviléjiu atu serbí Jeová. Durante tinan barak, haʼu aprende katak importante atu mantein relasaun diʼak ho Jeová. Desizaun naran deʼit neʼebé ita foti, maski kiʼik ka boot, Jeová sempre ajuda hodi fó dame neʼebé “aas liu ema nia hanoin hotu”. (Flp 4:6, 7) Haʼu no Sylvia gosta serbí iha Betel, no ami sente katak Jeová haraik bensaun ba ami tanba sempre tau uluk Jeová iha ami-nia moris.