1-2. (a) Jeová sente oinsá kona-ba ema neʼebé halo sala sériu no lakohi arrepende an? (b) Saida mak Jeová hakarak ba ema neʼebé halo sala?

 JEOVÁ laʼós Maromak neʼebé tolera deʼit hahalok hotu. Nia odi hahalok sala. (Sal 5:​4-6) Nia hakarak ita atu halo tuir ninia matadalan neʼebé hakerek iha Bíblia. Klaru, Jeová hatene katak ita mak sala-naʼin, tan neʼe nia la espera ita atu sai perfeitu. (Sal 130:​3, 4) Iha tempu hanesan, nia mós la simu ‘ema aat neʼebé uza sala Ninia laran-diʼak neʼebé boot hodi halo hahalok aat toʼo la sente moe’. (Jud 4) Bíblia hatete katak Maromak sei “halakon ema aat” iha funu Armagedon.—2 Ped 3:7; Apok 16:16.

² Maski nuneʼe, Jeová lakohi ema ida lakon. Hanesan ita aprende ona iha lisaun sira antes neʼe, Bíblia fó sai ho klaru katak Maromak “hakarak ema hotu atu arrepende sala”. (2 Ped 3:9) Hanesan Jeová, katuas Kristaun sira mós hatudu pasiénsia bainhira koko atu ajuda ema neʼebé halo sala troka ninia hahalok no fila fali ba Jeová. Maibé realidade mak ema balu lakohi arrepende an. (Isa 6:9) Balu kontinua halo hahalok sala maski katuas sira hakaʼas an beibeik atu ajuda sira. Iha situasaun hanesan neʼe, katuas sira presiza halo saida?

“HASAI TIHA EMA NEʼEBÉ HALO HAHALOK AAT”

 3. (a) Katuas sira presiza halo saida se ema ida lakohi arrepende an? (b) Kuandu kongregasaun hasai ema ida, tanbasá ita bele dehan katak nia rasik mak hili konsekuénsia neʼe?

³ Bainhira ema ida halo sala sériu no lakohi arrepende  an, katuas sira tenke halo tuir matadalan iha 1 Korinto 5:13 neʼebé dehan: “Hasai tiha ema neʼebé halo hahalok aat husi imi-nia leet.” Neʼe katak nia rasik mak hili konsekuénsia neʼe. Nia koʼa buat neʼebé nia rasik mak kari. (Gal 6:7) Tanbasá ita bele dehan hanesan neʼe? Tanba nia lakohi troka ninia hahalok maski katuas sira koko ona dala barak atu ajuda. (2 Reis 17:​12-15) Ninia hahalok hatudu katak nia deside atu la halo tuir Jeová nia matadalan.—Deut 30:​19, 20.

 4. Tanbasá kongregasaun hetan anúnsiu kona-ba ema neʼebé kongregasaun hasai?

⁴ Kuandu ema ida lakohi arrepende an no kongregasaun hasai nia, sei iha anúnsiu katak agora ema neʼe laʼós Testemuña ba Jeová. Objetivu ba avizu neʼe laʼós atu hamoe ema neʼebé halo sala, maibé atu irmaun-irmán sira bele halo tuir Bíblia nia matadalan hodi “la ransu tan” ho ema neʼe no ‘la han’ hamutuk ho nia. (1 Kor 5:​9-11) Matadalan neʼe lori benefísiu mai ita. Apóstolu Paulo dehan: “Fermentu uitoan bele halo masa tomak saʼe.” (1 Kor 5:6) Se ema neʼebé lakohi arrepende an mak kontinua iha kongregasaun laran, neʼe bele halo ema seluk hanoin katak sira mós la presiza halo tuir Jeová nia matadalan.—Prov 13:20; 1 Kor 15:33.

 5. Kuandu kongregasaun hasai irmaun ka irmán ida, ita presiza iha hanoin saida kona-ba ema neʼe? Tanbasá?

⁵ Entaun, kuandu kongregasaun hasai irmaun ka irmán ida, ita presiza iha hanoin saida kona-ba ema neʼe? Maski ita la ransu tan ho nia, ita presiza hanoin-hetan katak sei iha esperansa ba ema neʼe atu fila fali. Nia mak hanesan bibi neʼebé lakon. Bibi neʼebé hadook an husi bibi-lubun bele fila fali. Hanoin-hetan, ema neʼe dedika an ona ba Jeová. Triste mak agora daudaun, nia la kumpre ninia promesa atu laran-metin ba Jeová, no tau ninia an iha perigu laran. (Eze 18:31) Maski nuneʼe, Jeová nia tempu atu hatudu laran-sadiʼa seidauk remata, tan neʼe sei iha esperansa ba ema neʼe atu fila fali. Oinsá mak katuas kongregasaun sira bele ajuda ema neʼe?

OINSÁ KATUAS SIRA AJUDA EMA NEʼEBÉ KONGREGASAUN HASAI

 6. Katuas sira sei halo saida atu ajuda ema neʼebé kongregasaun hasai?

⁶ Kuandu kongregasaun hasai ona ema ida, katuas sira sei la halo tan buat ida atu ajuda nia hodi bele fila fali ba Jeová ka lae? Lae duni! Kuandu katuas sira fó-hatene ba ema neʼebé la arrepende an katak kongregasaun sei hasai nia, sira mós sei esplika ba nia kona-ba saida mak nia presiza halo atu bele fila fali ba kongregasaun. Maibé laʼós neʼe deʼit. Baibain katuas sira sei fó-hatene ba ema neʼe katak liutiha fulan balu, sira hakarak atu hasoru fali nia hodi haree se nia troka ona ninia atitude ka lae. Se liutiha fulan balu ema neʼe prontu atu hasoru malu fali, katuas sira sei anima nia atu arrepende an no fila fali ba kongregasaun. Maski ema neʼe seidauk troka ninia atitude, katuas sira sei hakaʼas an atu hasoru fali nia iha futuru no anima nia atu arrepende an.

 7. Oinsá mak katuas sira haleno Jeová nia laran-sadiʼa ba ema neʼebé kongregasaun hasai? (Jeremias 3:12)

⁷ Katuas sira sei hakaʼas an atu haleno Jeová nia laran-sadiʼa ba ema neʼebé kongregasaun hasai. Porezemplu, Jeová la hein deʼit ba povu Izraél neʼebé halo  sala atu fila fali ba nia, maibé nia foti inisiativu hodi haruka ninia profeta ba sira maski sira seidauk arrepende an. Iha lisaun segundu iha revista neʼe, ita mós aprende katak Jeová haruka Oseias atu fó perdua no simu fali ninia feen maski ninia feen sei halo hela sala sériu. Liuhusi ida-neʼe, Jeová hakarak hanorin ninia povu katak nia mak Maromak neʼebé nakonu ho laran-sadiʼa. (Os 3:1; Mal 3:7) Hodi banati-tuir Jeová, katuas Kristaun sira mós hakarak tebes ema neʼebé halo sala atu fila fali, no sira sei halo fasil ba ema neʼe atu fila fali.—Lee Jeremias 3:12.

 8. Oinsá mak Jesus nia ai-knanoik kona-ba oan neʼebé lakon ajuda ita komprende Jeová nia laran-sadiʼa? (Lucas 15:7)

⁸ Hanoin-hetan mós Jesus nia ai-knanoik kona-ba oan neʼebé lakon, hanesan ita aprende ona iha lisaun segundu iha revista neʼe. Bainhira oan neʼe sei dook hela, ninia aman haree nia no “halai hasoru nia hodi hakoʼak no reʼi nia”. (Lc 15:20) Aman neʼe la hein ba ninia oan atu mai husu deskulpa, maibé nia mak halai hakbesik ba ninia oan hodi hatudu sai ninia domin. Katuas sira mós hakaʼas an atu hatudu hahalok hanesan neʼe ba ema neʼebé laʼo sala dalan. Sira hakarak bibi neʼebé lakon atu fila fali ba Jeová. (Lc 15:​22-24, 32) No kuandu ema neʼe fila fali, Jeová, Jesus, anju sira, no kongregasaun hotu sei sente haksolok tebes!—Lee Lucas 15:7.

 9. Jeová anima ema neʼebé halo sala atu halo saida?

⁹ Ita aprende ona katak Jeová lakohi ema neʼebé la arrepende an atu nafatin iha kongregasaun. Maibé, nia kontinua koko atu ajuda ema hanesan neʼe. Nia hakarak ema neʼe atu fila fali. No bainhira ema neʼe arrepende an, Jeová sente hanesan ho liafuan neʼebé hakerek iha Oseias 14:4: “Haʼu sei kura sira husi sira-nia hahalok la laran-metin, haʼu sei hadomi sira ho haʼu-nia hakarak rasik, tanba haʼu hadook tiha ona haʼu-nia hirus husi sira.” Liafuan neʼe book katuas sira atu matan-moris kona-ba sinál sira neʼebé hatudu katak ema neʼe komesa arrepende an. Liafuan neʼe mós bele book ema neʼebé husik ona Jeová hodi la demora atu fila fali ba nia.

10-11. Oinsá mak katuas sira koko ajuda ema neʼebé kongregasaun hasai iha tempu kleur liubá?

¹⁰ Oinsá ho ema neʼebé kongregasaun hasai ona iha tinan barak liubá? Karik sira la halo tan sala sériu neʼebé sai nuʼudar razaun atu kongregasaun hasai. Iha situasaun balu, karik sira la hanoin-hetan tanbasá mak kongregasaun hasai sira. Maski kongregasaun hasai sira ba tempu kleur liubá, katuas sira sei hakaʼas an atu buka no vizita ema hanesan neʼe. Durante vizita, katuas sira sei halo orasaun hamutuk ho ema neʼe no anima nia atu fila fali ba kongregasaun. Klaru, se ema ida dook husi kongregasaun ba tinan barak, karik ninia relasaun ho Jeová sai fraku tebes. Tan neʼe, se nia fó sai katak nia hakarak fila fali ba kongregasaun, katuas sira bele halo arranju atu irmaun ka irmán ida halaʼo estudu Bíblia ho nia maski kongregasaun seidauk simu fali. Klaru katak katuas sira mak sei halo arranju kona-ba estudu Bíblia.

¹¹ Hodi banati-tuir Jeová nia laran-sadiʼa, katuas sira hakaʼas an atu buka tuir ema neʼebé husik Jeová, no fó-hatene ba ema neʼe katak odamatan sei  nakloke ba nia atu fila fali. No kuandu ema neʼe hatudu katak nia arrepende an no troka ninia hahalok, la presiza demora atu simu fali nia.—2 Kor 2:​6-8.

12. (a) Iha situasaun saida deʼit mak katuas sira presiza kuidadu tebes? (b) Tanbasá ita labele hanoin katak Jeová sei la hatudu laran-sadiʼa ba ema neʼebé halo sala espesífiku balu? (Haree mós nota-rodapé.)

¹² Maibé iha situasaun balu, katuas sira presiza kuidadu tebes antes halo desizaun atu kongregasaun simu fali ema ida. Porezemplu, se ema ida halo ona abuzu ba labarik, kontra lia-loos no habelar hanorin falsu, ka ho neon halo sala seksuál atu bele soe ninia kaben, katuas sira presiza buka-hatene ho loloos se ema neʼe arrepende an duni ka lae. (Mal 2:14; 2 Tim 3:6) Katuas sira iha responsabilidade atu proteje  kongregasaun. Iha tempu hanesan, ita presiza rekoñese katak Jeová sei simu fali ema naran deʼit neʼebé arrepende an ho laran no husik ona hahalok sala. Tan neʼe, maski katuas sira presiza kuidadu ho ema neʼebé uluk halo sala hodi lohi ema seluk, sira labele hanoin katak Jeová sei la hatudu laran-sadiʼa ba ema hanesan neʼe. a—1 Ped 2:10.

KONGREGASAUN BELE HALO SAIDA

13. Saida mak la hanesan entre dalan neʼebé ita trata ema neʼebé hetan dixiplina no ema neʼebé kongregasaun hasai?

¹³ Hanesan ita koʼalia ona iha lisaun antes neʼe, dala ruma ita rona anúnsiu katak ema ida hetan dixiplina. Iha situasaun hanesan neʼe, ita bele kontinua ransu ho nia tanba nia arrepende an ona no troka ninia hahalok. (1 Tim 5:20) Ema neʼe nafatin parte ba kongregasaun no presiza hetan anima husi irmaun-irmán sira. (Ebr 10:​24, 25) Maibé neʼe la hanesan ho ema neʼebé kongregasaun hasai. Ita “labele ransu tan” no ‘la han’ hamutuk ho ema hanesan neʼe.—1 Kor 5:11.

14. Oinsá mak ita ida-idak uza ita-nia konxiénsia neʼebé hetan ona treinu husi Bíblia kona-ba ema neʼebé kongregasaun hasai? (Haree mós foto.)

¹⁴ Neʼe katak ita labele duni koʼalia ho ema neʼebé kongregasaun hasai ka lae? Lae. Klaru katak ita sei la ransu ho nia. Maibé ita bele uza ita-nia konxiénsia neʼebé hetan ona treinu husi Bíblia hodi deside atu konvida ema neʼebé kongregasaun hasai ona atu tuir reuniaun, karik neʼe mak ita-nia família ka uluk nia mak ita-nia belun ida. Oinsá se nia tuir reuniaun? Uluk, ita la koʼalia ho ema hanesan neʼe. Maibé agora, ema Kristaun ida-idak presiza uza ninia konxiénsia iha situasaun neʼe. Karik irmaun-irmán balu hakarak kumprimenta ka fó benvindu iha Reuniaun-Fatin. Maski nuneʼe, ita sei la koʼalia naruk ka gasta tempu atu ransu ho ema neʼe.

15. Iha 2 João 9-11 refere ba ema hanesan saida? (Haree mós kaixa “ João no Paulo koʼalia kona-ba sala neʼebé hanesan ka lae?”)

¹⁵ Karik ema balu hanoin: “Bíblia hatete  katak se ema Kristaun ida hasé ema neʼebé kongregasaun hasai, neʼe katak nia mós hola parte iha ema neʼe nia hahalok aat sira.” (Lee 2 João 9-11.) Maibé, kontestu husi versíkulu neʼe hatudu katak liafuan neʼe refere ba apóstata sira no sira neʼebé fó influénsia makaʼas ba ema seluk atu halo buat neʼebé kontra Bíblia. (Apok 2:20) Ba ema hanesan neʼe, katuas sira la presiza halo arranju atu vizita. Klaru katak iha posibilidade ba ema hanesan neʼe atu arrepende an. Maibé antes neʼe akontese, ita sei la hasé ka konvida ema neʼe atu tuir reuniaun.

BANATI-TUIR JEOVÁ NIA LARAN-SADIʼA

16-17. (a) Jeová hakarak ema sala-naʼin atu halo saida? (Ezequiel 18:32) (b) Oinsá mak katuas sira hatudu katak sira serbisu hamutuk ho Jeová bainhira ajuda ema neʼebé halo sala sériu?

¹⁶ Saida mak ita aprende ona husi lisaun sira iha revista neʼe? Jeová lakohi ema ida lakon! (Lee Ezequiel 18:32.) Nia hakarak sala-naʼin sira atu hadame malu ho nia. (2 Kor 5:20) Tan neʼe mak Jeová anima beibeik ninia atan neʼebé husik ona nia atu arrepende an no fila fali. Katuas kongregasaun sira iha priviléjiu atu serbisu hamutuk ho Jeová nuʼudar sira hakaʼas an atu ajuda ema neʼebé halo sala sériu arrepende an.—Rom 2:4; 1 Kor 3:9.

¹⁷ Imajina toʼok kona-ba ksolok iha lalehan bainhira ema neʼebé halo sala sériu arrepende an! Ita-nia Aman Jeová sente kontente tebes kuandu ninia bibi ida neʼebé lakon fila fali ba kongregasaun. Bainhira ita medita kona-ba ninia laran-sadiʼa no laran-diʼak neʼebé nakonu ho domin, neʼe halo ita-nia domin ba Jeová sai boot liután.—Lc 1:78.