MAROMAK JEOVÁ hakarak ema kristaun atu hafolin dame no buka atu halo dame ho ema hotu. Tanba ita hakaʼas an atu halo nuneʼe, iha dame barak entre Jeová nia atan sira neʼebé loos. Neʼe mós kontribui atu kongregasaun kristaun sai fatin furak no bele book ema seluk atu buka-hatene liután kona-ba ita.

Porezemplu, matan-dook ida iha Madagaskar haree unidade neʼebé Testemuña ba Jeová iha. Nia dehan ba ninia an, ‘Se loron ida haʼu hakarak tuir relijiaun ida karik, haʼu sei tuir Testemuña sira.’ Neineik-neineik, nia para husi ninia atividade matan-dook nian, no hadiʼa ninia situasaun kaben nian neʼebé la tuir Bíblia. Ikusmai nia sai atan ida ba Maromak dame nian, Jeová.

Ema rihun ba rihun mós buka dame, no sira hetan dame neʼe iha kongregasaun kristaun. Maibé Bíblia hatete katak ‘laran-moras no buka atu istori malu’ bele halo ema halakon sira-nia relasaun diʼak nuʼudar belun, no hamosu problema. (Tiago 3:14-16) Maibé Bíblia mós fó konsellu ba ita oinsá atu sees husi problema sira-neʼe no hametin ita-nia dame. Agora, mai ita haree toʼok situasaun balu neʼebé uluk akontese duni.

“Haʼu ho irmaun ida neʼebé haʼu serbisu hamutuk, dala ruma ami haree malu ladiʼak. Loron ida ami hakilar malu, no ema naʼin-rua tama no haree ami.”​—CHRIS.

“Haʼu ho irmán ida sempre haklaken hamutuk, maibé derrepente nia kansela ami-nia planu haklaken. Depois neʼe nia la koʼalia tan ho haʼu. Haʼu la hatene tanbasá.”​—JANET.

“Haʼu koʼalia ba kolega naʼin-rua liuhusi telefone. Tuirmai, sira ida dehan nia atu taka ona, no haʼu hanoin nia taka duni telefone. Depois, haʼu koʼalia ba kolega ida fali no haʼu hatete buat neʼebé ladiʼak kona-ba haʼu-nia kolega primeiru. Maibé tuir loloos, ida primeiru neʼe seidauk taka telefone. Nia rona hela.”​—MICHAEL.

“Iha ami-nia kongregasaun, irmán pioneiru naʼin-rua komesa iha problema. Ida sempre hirus ida seluk, no sira-nia hahalok halo ema seluk sente ladiʼak.”​—GARY.

Karik ita hanoin, situasaun sira-neʼe laʼós problema boot. Maski nuneʼe, karik irmaun-irmán neʼebé hasoru situasaun sira-neʼe bele sai laran-kanek no estraga kongregasaun nia dame. Diʼak tanba ikusmai irmaun-irmán sira-neʼe uza Bíblia nia matadalan hodi buka dame ho sira-nia maluk. Tuir Ita-nia hanoin, Bíblia nia matadalan saida mak sira halo tuir?

“Keta hirus malu iha dalan.” (Gênesis [Kejadian] 45:24) José fó konsellu neʼe ba ninia maun-alin sira bainhira sira fila fali ba sira-nia aman. Ninia liafuan sira-neʼe mak  matenek tebes tanba se ema ida la bele kontrola ninia sentimentu no lalais atu hirus, neʼe bele book ema seluk atu sai hirus. Chris ikusmai rekoñese katak ninia fraku sira mak hahalok foti-an no lakohi atu halo tuir. Maibé nia hakarak troka ninia hahalok sira-neʼe, tan neʼe nia husu deskulpa ba irmaun neʼebé nia hakilar, no hakaʼas an atu kontrola ninia hirus. Irmaun ida fali haree katak Chris hakaʼas an atu hadiʼa ninia hahalok, no neʼe mós book nia atu halo hanesan. Agora sira kontente serbí Jeová hamutuk.

“Planu sira sei la sai loos kuandu ema la koʼalia ba malu.” (Provérbios [Amsal] 15:22) Janet hakarak halo tuir Bíblia nia konsellu neʼe, tan neʼe, nia deside atu koʼalia ho irmán neʼebé la koʼalia ona ho nia. Durante sira koʼalia, Janet husu kona-ba saida mak nia halo ona neʼebé hakanek irmán neʼe. Foufoun, sira rua sente susar uitoan atu koʼalia ba malu iha tempu neʼe, maibé koʼalia tiha lakleur, sira sente kalma no fasil atu koʼalia ba malu. Ikusmai irmán neʼe bele haree katak nia mak komprende sala kona-ba buat ruma neʼebé la envolve Janet. Nia husu deskulpa ba Janet no agora sira serbí Jeová nuʼudar belun.

“Neʼe duni, se ó lori daudaun ó-nia prezente ba altár no ó hanoin-hetan katak ó-nia maun-alin iha buat ruma hasoru ó, husik lai ó-nia prezente iha altár oin, no bá hodi halo dame uluklai ho ó-nia maun-alin.” (Mateus 5:23, 24) Jesus fó konsellu neʼe bainhira nia hatoʼo diskursu husi foho ida. Michael sente sala bainhira nia hanoin oinsá ninia hahalok neʼe mak la hatudu respeitu no la hanoin ema seluk. Nia hakarak tebes atu buka dame fali ho ninia irmaun. Nia bá hasoru irmaun neʼe no husu deskulpa. Rezultadu mak saida? Michael hatete: “Haʼu-nia irmaun fó perdua haʼu husi laran.” Sira halo dame no sai belun diʼak fali.

“Kontinua hatudu pasiénsia ba malu no fó perdua ba malu ho laran tomak maski ema halo buat ruma hasoru imi.” (Koloso 3:12-14) Oinsá ho situasaun kona-ba irmán pioneiru naʼin-rua neʼebé sempre istori malu bainhira bá haklaken? Ho laran-diʼak, katuas kongregasaun ida ajuda sira atu haree katak sira-nia hahalok neʼe halo ema seluk sente ladiʼak. Nia fó-hanoin sira katak sira presiza hatudu pasiénsia ba malu hodi haburas nafatin dame iha kongregasaun. Irmán rua neʼe simu no halo tuir ninia konsellu neʼe, no agora sira haklaken hamutuk ho dame.

Konsellu neʼebé temi iha Koloso 3:12-14 bele ajuda ita atu hatudu haraik-an, fó perdua ba ema neʼebé halo ita laran-kanek no la hanoin tan kona-ba buat neʼebé akontese. Maibé oinsá se ita koko atu fó perdua maibé sente susar nafatin? Se nuneʼe, Mateus 18:15 bele ajuda ita. Iha eskritura neʼe, Jesus koʼalia liuliu kona-ba sala neʼebé boot, maibé prinsípiu husi eskritura neʼe bele aplika mós iha tempu neʼebé problema mosu entre ita ho  ita-nia irmaun-irmán sira. Ita bele hakbesik ba sira, no hodi hatudu haraik-an no laran-diʼak, koko atu rezolve problema neʼe.

Iha sujestaun barak husi Bíblia neʼebé ita bele halo tuir. Maibé nuʼudar ita hakaʼas an atu aplika sujestaun sira-neʼe, la haluha atu sadere ba Maromak nia espíritu santu hodi ita bele hatudu hahalok sira hanesan “domin, kontente, dame, pasiénsia, laran-diʼak, hahalok diʼak, fiar, laran-maus, no kontrola an”. (Galásia 5:22, 23) Hanoin toʼok kona-ba ezemplu neʼe: mákina ida bele laʼo ho didiʼak se ita tau mina ba ninia parte ida-idak neʼebé toos. Hanesan neʼe mós, se ita hatudu hahalok sira neʼebé mai husi Jeová nia espíritu santu, neʼe bele ajuda ita atu buat hotu laʼo ho didiʼak ho ita-nia irmaun-irmán sira, no atu hadiʼa problema sira neʼebé mosu.

Ita ida-idak iha hahalok no hanoin neʼebé la hanesan, no neʼe halo ita gosta atu habelun ho ema oioin. Maibé ida-neʼe mós bele hamosu problema entre ita no ita-nia maluk sira. Katuas kongregasaun ida fó ezemplu kona-ba oinsá mak ida-neʼe bele akontese. Nia dehan: “Ema neʼebé moedór bele sente susar atu hamutuk ho ema neʼebé la moe no gosta koʼalia. Karik ita hanoin, neʼe buat kiʼik deʼit, maibé tuir loloos neʼe bele hamosu problema.” Ita sente katak ema rua neʼebé iha hahalok la hanesan la bele sai belun diʼak ka lae? Hanoin toʼok kona-ba apóstolu Pedro no apóstolu João. Baibain ita hatene Pedro nuʼudar ema neʼebé koʼalia sai kedas no la hanoin uluk antes nia halo buat ruma. No ita hatene apóstolu João nuʼudar irmaun laran-diʼak ida neʼebé hanoin didiʼak mak foin koʼalia. Loos duni, Pedro no João iha hahalok neʼebé la hanesan. Maski nuneʼe, sira serbisu hamutuk ho didiʼak nuʼudar sira serbí Jeová. (Apóstolu 8:14; Galásia 2:9) Hanesan neʼe mós ohin loron, maski ema kristaun iha hahalok neʼebé la hanesan ema seluk, maibé ita bele serbisu hamutuk ho dame.

Maibé oinsá se irmaun ka irmán ida sempre halo buat ruma neʼebé halo ita baruk no  la gosta? Diʼak atu hanoin-hetan katak Kristu mós mate ba ema neʼe no ita tenke hatudu domin ba nia. (João 13:34, 35; Roma 5:6-8) Ladiʼak atu hanoin katak ita nunka bele sai belun ho ema neʼe no hasees an husi nia. Husu ba Ita-nia an: ‘Haʼu-nia irmaun ka irmán nia hahalok kontra Jeová nia ukun-fuan ka lae? Nia, ho neon, koko atu hakanek haʼu ka lae? Ka razaun tanba ami-nia hahalok mak la hanesan deʼit?’ No pergunta neʼebé importante liu mak: ‘Nia iha hahalok diʼak ruma neʼebé haʼu rasik presiza atu haburas liután ka lae?’

Porezemplu, se ema ida gosta koʼalia, maibé Ita ladún, koko bá haklaken ho ema neʼe no haree toʼok saida mak Ita bele aprende husi nia. Ka se ema neʼe hatudu laran-luak liu fali Ita, koko banati-tuir nia hodi ajuda ferik-katuas sira, ema moras, ka ema neʼebé presiza ajuda. Ita bele sente haksolok tanba Ita fó Ita-nia an hanesan neʼe. Buat neʼebé ita aprende husi neʼe mak, maski Ita no Ita-nia irmaun ka irmán iha hahalok neʼebé la hanesan, maibé Ita bele fokus liu ba buat ruma neʼebé diʼak husi nia. Karik ema neʼe sei nunka sai Ita-nia belun neʼebé diʼak liu hotu, maibé Ita bele duni haburas relasaun neʼebé besik liu ho nia. No neʼe sei kontribui ba dame entre Ita ho nia, no mós dame iha kongregasaun.

Iha apóstolu sira-nia tempu, iha irmán naʼin-rua naran Evódia no Síntike. Karik sira iha hahalok neʼebé la hanesan duni, maibé apóstolu Paulo anima sira atu “iha hanoin neʼebé hanesan iha Naʼi”. (Filipe 4:2) Ita mós hakarak adora Jeová hamutuk ita-nia irmaun-irmán sira no haburas dame iha kongregasaun.

Tanbasá mak importante atu halakon kedas hanoin ladiʼak neʼebé ita sente ba ema seluk? Ita bele kompara sentimentu sira-neʼe hanesan duʼut aat neʼebé moris hamutuk ho ai-funan iha jardín neʼebé furak. Se ita la fokit sai duʼut aat sira, lakleur jardín neʼe nakonu deʼit ho duʼut aat. Neʼe hanesan, se ita-nia hanoin neʼebé negativu sai makaʼas, neʼe bele kona kongregasaun tomak. Maibé se ita  hadomi Jeová no ita-nia irmaun-irmán sira, ita sei hakaʼas an atu proteje dame neʼebé ita iha nuʼudar Maromak nia povu.

Se ita mak hakaʼas an atu buka dame ho ema seluk, karik ita sei hakfodak tanba rezultadu diʼak neʼebé mosu. Irmán ida sente hanesan neʼe duni. Nia hatete: “Iha irmán ida neʼebé ninia hahalok haʼu la gosta. Nia trata haʼu hanesan labarik ida. Tan neʼe haʼu komesa koʼalia la ho respeitu ba nia. Haʼu hanoin, ‘Tanba nia la hatudu respeitu ba haʼu, entaun haʼu mós sei la hatudu respeitu ba nia.’”

Maibé irmán neʼe komesa hanoin kona-ba nia rasik nia hahalok. Nia dehan: “Bainhira haʼu haree haʼu-nia hahalok rasik, haʼu sente ladiʼak kona-ba haʼu-nia an. No haʼu hatene katak haʼu presiza hadiʼa haʼu-nia hanoin. Haʼu halo orasaun ba Jeová, depois hola prezente kiʼik ba irmán neʼe, no hakerek karta ba nia hodi husu deskulpa kona-ba haʼu-nia hahalok. Ami hakoʼak malu no la hanoin tan kona-ba problema neʼe. Husi tempu neʼebá, problema seluk mós la mosu tan.”

Ema hotu hakarak atu iha dame. Maibé se ema mak foti-an, neʼe bele book ema halo hahalok neʼebé la haburas dame. Neʼe akontese beibeik iha mundu neʼe, maibé Jeová hakarak dame no unidade atu domina iha ninia atan sira-nia leet. Jeová haleno apóstolu Paulo atu hakerek: “Haʼu . . . husu ba imi atu moris ho loloos nuʼudar ema neʼebé Maromak hili ona, hodi sempre hatudu haraik-an no laran-maus, hodi hatudu pasiénsia, no tahan malu iha domin, no hakaʼas an atu nafatin iha unidade liuhusi espíritu santu, atu imi iha dame iha imi-nia leet.” (Éfeso 4:1-3) Dame no unidade neʼebé Jeová nia povu iha mak folin-boot tebes. Tan neʼe, mai ita hakaʼas an atu hametin liután dame neʼe no rezolve problema naran deʼit neʼebé mosu ho ita-nia maluk kristaun sira.