Saida mak ita bele halo atu haburas dame iha uma-laran?
Saida mak ita bele halo atu haburas dame iha uma-laran?
TUIR Ita-Boot nia hanoin, Bíblia bele ajuda ita haburas dame iha uma-laran ka lae? Haree toʼok matadalan balu husi Bíblia no ema balu nia esperiénsia tuirmai neʼe. Hanoin toʼok ba matadalan no ezemplu ida-neʼebé mak Ita-Boot bele uza atu hapara problema iha uma-laran no atubele haburas dame no hametin domin ba malu iha família laran.
BÍBLIA NIA MATADALAN NEʼEBÉ BELE AJUDA ITA HABURAS DAME
HANOIN KONA-BA BUAT DIʼAK BA EMA IDA-IDAK.
“Keta halo buat ida hodi buka atu manán deʼit ka foti-an, maibé ho haraik-an hodi haree ema seluk boot liu imi. Keta buka deʼit imi rasik nia diʼak, maibé buka mós ema seluk nia diʼak.”—Filipe 2:3, 4.
“Ami hafolin malu tebes nuʼudar feen-laʼen, liu fali ami-nia an rasik no ema seluk.”—Hatoʼo husi C. P., kaben ba tinan 19 ona.
RONA MALU NO TENKE IHA HANOIN NEʼEBÉ LUAN.
‘Kontinua fó-hanoin sira atu la buka istori malu, la sai ulun-toos, hatudu laran-maus ba ema hotu.’—Tito 3:1, 2.
“Se feen-laʼen koʼalia ba malu ho lian mamar, neʼe bele hamenus problema. Maski feen-laʼen nia hanoin la hanesan, maibé tenke hatudu respeitu no rona malu no tenke iha hanoin neʼebé luan.”—Hatoʼo husi P. P., kaben ba tinan 20 ona.
HATUDU PASIÉNSIA NO LARAN-MAUS.
“Ho pasiénsia mak ema bele manán komandante nia laran, no liafuan neʼebé mamar bele hatohar ruin.”—Provérbios (Amsal) 25:15.
“Se problema mosu, neʼe mak buat baibain, maibé atubele hadiʼa problema ida, neʼe depende ba ita ida-idak nia hahalok mak oinsá. Ita tenke hatudu pasiénsia tanba ho pasiénsia mak bele rezolve problema.”—Hatoʼo husi G. A., kaben ba tinan 27 ona.
LABELE BAKU MALU KA KOʼALIA LIAFUAN KROʼAT.
“Imi tenke soe tiha buat sira-neʼe hotu, katak laran-nakali, hirus, hahalok aat, koʼalia aat, no keta husik liafuan aat ida sai husi imi-nia ibun.”—Koloso 3:8.
“Haʼu hadomi haʼu-nia laʼen tanba nia hatene kontrola ninia hirus. Nia mak ema neʼebé kalma. Nia nunka hakilar haʼu ka koʼalia liafuan neʼebé hatún haʼu.”—Hatoʼo husi B. D., kaben ba tinan 20 ona.
REZOLVE KEDAS PROBLEMA NO FÓ PERDUA MALU.
“Kontinua hatudu pasiénsia ba malu no fó perdua ba malu ho laran tomak maski ema halo buat ruma hasoru imi.”—Koloso 3:13.
“Se ita-nia laran-nakali, susar tebes atu kontrola an no kalma nafatin, toʼo ita bele koʼalia liafuan ka halo buat ruma neʼebé hakanek ita-nia kaben. Tan neʼe, ita tenke fó perdua ba malu atu nuneʼe ita-nia moris kaben nian bele kontente nafatin.”—Hatoʼo husi A. B., kaben ba tinan 34 ona.
LARAN-LUAK NO LABELE HANOIN AN DEʼIT.
“Fó ba ema seluk, no sira mós sei fó ba imi. . . . Basá buat neʼebé imi sukat ba ema, nuneʼe mós ema sei sukat ba imi.”—Lucas 6:38.
“Haʼu-nia laʼen hatene saida mak bele halo haʼu kontente no nia sempre halo haʼu haksolok. Neʼe halo haʼu mós hanoin: ‘Saida mak haʼu bele halo atubele halo nia haksolok?’ Neʼe halo ami-nia moris kaben nian sempre laʼo ho diʼak.”—Hatoʼo husi H. K., kaben ba tinan 44 ona.
KETA RENDE AN, HABURAS NAFATIN DAME IHA UMA-LARAN
Iha neʼe livru Matan-moris bá! fó sai liafuan husi kaben-naʼin sira neʼebé aprende ona hanorin husi Bíblia kona-ba oinsá bele haburas dame iha uma-laran.* Tuir loloos, iha ema barak husi nasaun hotu neʼebé halo ona nuneʼe. Maski karik ema seluk iha sira-nia uma-laran la halo tuir matadalan husi Bíblia, maibé sira rasik hakaʼas an nafatin atu buka dame, tanba Bíblia promete: “Ema sira neʼebé buka dame mak iha ksolok.”—Provérbios (Amsal) 12:20.
