EMA HANOIN SAIDA?

Baibain ema hanoin katak osan no sasán barak mak bele halo sira moris kontente. Tuir sira-nia hanoin, ema kiak la bele moris kontente, tanba la bele bá eskola boot, la bele hetan tratamentu diʼak ba saúde no buat diʼak seluk tan.

SAIDA MAK BÍBLIA HANORIN?

Tuir Bíblia, laʼós osan no sasán barak mak bele halo ema moris haksolok, maibé ema neʼebé tau fiar ba Maromak Kriadór nuʼudar sira-nia belun mak bele halaʼo moris ho laran-hakmatek no kontente. Bíblia dehan: “Kontente ba sira neʼebé hatene katak sira presiza Maromak nia matadalan.” (Mateus 5:3) Maski ema riku ka ema kiak, se sira hakbesik ba Maromak no buka-hatene Maromak nia hakarak hodi aprende lia-loos husi Bíblia, neʼe sei halo sira sente kmaan no dame iha laran. Neʼe mak haksolok neʼebé loos iha moris.

Hodi halo tuir matadalan husi Bíblia, neʼe fó matenek ba ita atu hatene uza osan ho didiʼak. Porezemplu, Bíblia ajuda ema atu husik toman aat oioin hanesan fuma ka hemu-lanu. Toman aat hirak-neʼe halo ema hasai osan barak no bele estraga sira-nia saúde toʼo ikusmai atu hetan tratamentu diʼak, sira mós presiza selu karun.—Provérbios (Amsal) 20:1; 2 Korinto 7:1.

Bíblia mós fó-hanoin ita atu labele sai ema neʼebé kaan-teen no buka riku demais. (Marcos 4:19; Éfeso 5:3) Matadalan neʼe bele ajuda ita atu la taru osan arbiru no labele haburas “domin ba osan” tanba neʼe mak “hun ba buat aat oioin”. (1 Timóteo 6:10) Bíblia mós dehan: “Maski ema ida hetan rikusoin barak, ninia moris la mai husi buat neʼebé nia iha.” (Lucas 12:15) Loos, rikusoin la bele sosa ita-nia moris. Maibé hodi halo tuir matadalan husi Bíblia, ita bele sente moris neʼe mak iha folin boot, no ida-neʼe lori haksolok neʼebé loos mai ita.

Maski ema sira neʼebé moris iha kiak nia laran tenke hakaʼas an loroloron atu buka ai-han, hatais no atu hetan hela-fatin neʼebé diʼak, maibé sira bele halaʼo moris ho kontente hodi halo tuir Maromak nia hakarak tanba sira hanoin liu atu fó ksolok ba Kriadór, Maromak Jeová. Sira fiar ba lia-loos neʼebé Bíblia promete katak “bensaun husi Jeová mak halo ema sai riku, no Nia la fó susar hamutuk ho ida-neʼe”.—Provérbios (Amsal) 10:22.

ESKRITURA: “Kontente ba sira neʼebé hatene katak sira presiza Maromak nia matadalan.”—Mateus 5:3.

SAIDA MAK BÍBLIA HANORIN?

Iha mundu tomak sei iha nafatin ema kiak sira maski ema barak luta makaʼas atu halakon kiak no mukit. Tan neʼe, Maromak promete katak, iha aban-bainrua, Nia sei halakon kiak husi nia abut kedas. Neʼe mak hodi halakon ema no governu sira neʼebé hanoin an deʼit no buka sira-nia diʼak deʼit. (Eclesiastes [Pengkhotbah] 8:9) Ita-nia Kriadór sei troka ema nia governu sira ho Ninia governu rasik, no Nia sei fó ba ema hotu buat neʼebé sira presiza. Liurai ba Maromak nia Ukun neʼe sei tau matan didiʼak ba ema kiak sira. Bíblia dehan: “Nia sei salva ema kiak neʼebé halerik husu ajuda . . . Nia sei sente kasian ba ema kiʼik no ema kiak, no nia sei salva ema kiak sira-nia moris.”—Salmo (Mazmur) 72:12-14.

Lakleur tan, mundu tomak sei sai fatin furak neʼebé nakonu ho ai-han, no ema hotu sei hela iha uma neʼebé diʼak. Maromak promete katak ninia povu hotu sei “harii uma no hela, sira sei kuda toʼos-uvas no han nia fuan. . . . Sira sei haksolok ho serbisu neʼebé sira halo ho sira-nia liman rasik.” (Isaías [Yesaya] 65:21, 22) Loos, iha tempu neʼebá, sei la iha tan ema ida mak moris iha kiak laran no hakaʼas an loroloron atu buka moris, maibé ema hotu sei haksolok ho “hahán gostu” no buat furak hotu neʼebé Maromak Jeová fó.—Isaías 25:6.

TANSÁ DIʼAK ATU HATENE IDA-NEʼE?

Tanba ema kiak sira neʼebé hanoin didiʼak kona-ba promesa sira-neʼe bele fiar metin katak Maromak hanoin tebes sira, no lakleur tan Nia sei hasai sira husi kiak no mukit. Esperansa neʼe hametin ita hotu atubele tahan moris susar neʼebé ita hasoru daudauk ohin loron.

ESKRITURA: “Nia sei salva ema kiak neʼebé halerik husu ajuda . . . Nia sei sente kasian ba ema kiʼik no ema kiak, no nia sei salva ema kiak sira-nia moris.”—Salmo (Mazmur) 72:12, 13.