“Dala ruma, feto-oan sira husu haʼu-nia númeru no hakarak ‘toba ho haʼu’. Haʼu lakohi no laʼo sees kedas. Maibé buat ida iha haʼu-nia laran halo haʼu hanoin fali: ‘Se ohin haʼu fó duni haʼu-nia númeru telefone karik, neʼe oinsá eh?’ Haʼu koʼalia loos deʼit, feto-oan sira mós bonita-bonita, dada loos haʼu-nia matan. Haʼu hanoin: ‘Nuʼusá mak labele?’”—Carlos, * ho tinan 16.

Ó mós hanesan ho Carlos neʼebé luta hasoru hela ba tentasaun ka lae? Tentasaun bele mosu ba ema hotu, atu mane ka feto. Ó mós bele duni manán hasoru tentasaun oioin.

Ema hotu, atu kiʼik ka boot, bele monu ba tentasaun oioin. Maski apóstolu Paulo mak laʼós joven ida, maibé nia dehan: “Haʼu haksolok duni ho Maromak nia ukun-fuan, maibé haʼu haree ukun-fuan seluk iha haʼu-nia isin neʼebé halo funu kontra ukun-fuan iha haʼu-nia neon, no ida-neʼe lori haʼu hodi sai atan ba sala nia ukun-fuan.” (Roma 7:22, 23) Apóstolu Paulo luta makaʼas hodi la monu ba tentasaun, tan neʼe, ó mós bele! Loos, ó lalika monu ba tentasaun hodi sai atan ba ó-nia hakarak sala nian neʼebé aat! (1 Korinto 9:27) Hahú agora kedas bainhira ó sei joven hela, diʼak atu aprende oinsá ó bele luta hasoru tentasaun hodi la monu. Tanba ho nuneʼe mak ó bele hasees an husi susar oioin no sei sai ema boot ida neʼebé hatene halaʼo moris ho morál diʼak.

Media modernu nian halo hakarak sala nian sai makaʼas liu. Bíblia dehan “hakarak joven nian” mak makaʼas loos, no susar atu kontrola. (2 Timóteo 2:22) Aat liután mak filme, televizaun, múzika no livru sira neʼebé joven sira gosta, hanorin katak se mane ho feto ida gosta malu, sira sei toba hamutuk kedas, neʼe halo joven sira-nia hakarak sala nian sai makaʼas liután no halo sira hanoin neʼe mak baibain deʼit. Maibé Bíblia hanorin katak mane no feto neʼebé moris ho morál diʼak bele kontrola sira-nia an hodi “kontinua hasees an husi hakarak isin nian” toʼo sira kaben. (1 Pedro 2:11) Tan neʼe, ó mós bele luta hasoru tentasaun neʼe. Oinsá?

Hatene didiʼak ó-nia fraku sira. Hanesan korrente ida, ninia fraku mak iha ninia tutan. Se ninia tutan ida mak la metin karik, fasil deʼit ba korrente neʼe atu kotu. Nuneʼe mós se ó la kuidadu ó-nia fraku sira, fasil deʼit ba ó atu monu ba tentasaun. Buka hatene didiʼak ó-nia an, ó-nia fraku saida deʼit mak ó presiza kuidadu?—Bíblia nia matadalan: Tiago 1:14.

Prepara nanis oinsá bele luta hasoru tentasaun. Hanoin nanis kona-ba tempu sira neʼebé tentasaun bele mosu ba ó. Prepara nanis iha ó-nia laran, se tentasaun neʼe mosu, saida mak ó sei halo.—Bíblia nia matadalan: Provérbios (Amsal) 22:3.

Hametin ó-nia laran, kaer metin ba morál neʼebé diʼak. Iha Bíblia laran, konta kona-ba mane ida naran José neʼebé hasoru tentasaun boot tanba feto ida hakarak toba ho nia. Nia dehan: “Oinsá mak haʼu bele halo hahalok aat tebes neʼe no loloos halo sala hasoru Maromak?” (Gênesis [Kejadian] 39:9) José nia liafuan “oinsá mak haʼu bele?” hatudu katak nia lakohi halo sala no nia hakarak kaer metin ba morál neʼebé diʼak. Ó mós hanesan ho nia ka lae?

Buka belun neʼebé la lasu ó. Se ó hili atu ransu ho kolega sira neʼebé iha morál no fiar hanesan ho ó, sira sei la lasu ó atu halo sala. Tanba Bíblia dehan: “Nia neʼebé laʼo hamutuk ho ema matenek sei sai matenek.”—Provérbios (Amsal) 13:20.

Sees an husi situasaun sira neʼebé bele halo ó monu ba tentasaun. Porezemplu:

• Labele mesamesak deʼit ho mane ida ka feto ida.

• Labele loke internét iha tempu no fatin neʼebé bele intenta ó atu haree pornografia.

• Labele ransu ho ema neʼebé ninia lalaʼok no liafuan mak aat no gosta halo sala.

Matadalan saida deʼit mak ó sei halo tuir hodi bele ajuda ó atu luta hasoru tentasaun?—Bíblia nia matadalan: 2 Timóteo 2:22.

Halo orasaun hodi husu ajuda. Jesus dehan ba ninia dixípulu sira: “Harohan beibeik, atu imi la monu ba tentasaun.” (Mateus 26:41) Tuir loloos, Maromak Jeová hakarak tebes ajuda ó atu ó la monu ba tentasaun. Bíblia dehan: “Nia sei nunka husik imi atu hetan tentasaun liu fali buat neʼebé imi bele tahan, maibé kuandu imi hasoru tentasaun neʼe nia mós sei hatudu dalan ba imi atu sai, atu nuneʼe imi bele tahan nia.”—1 Korinto 10:13.