IHA mundu tomak, moras diabete kona ema nabanaban toʼo agora sai problema boot ba saúde públiku. Moras diabete iha oin rua. Tipu 1 baibain kona ema husi kiʼik kedas no toʼo agora doutór sira seidauk hatene oinsá bele prevene moras neʼe. Informasaun tuirmai mak kona-ba tipu 2 (diabete mellitus). Husi ema hotu neʼebé kona moras diabete, porsentu 90 mak kona tipu 2.

Uluk diabete tipu 2 kona deʼit ema boot maibé foin lalais labarik barak mós kona ona moras neʼe. Doutór sira dehan, ema bele hamenus moras neʼe se ema ida-idak kuidadu sira-nia saúde. Mai ita haree informasaun uitoan neʼebé bele ajuda ita atu labele kona moras neʼe. *

Diabete mak moras ida neʼebé halo ema nia raan sai midar liu. Baibain, ita-nia isin uza midar neʼe hanesan vitamina. Maibé moras neʼe halo susar ba sélula sira iha isin laran atu xupa midar neʼebé halai husi raan no la bele fó fali forsa ba isin-lolon tomak. Rezultadu mak bele estraga parte sira iha isin laran no raan la bele halai bá isin-lolon tomak toʼo dala ruma presiza tesi tiha ain ka ain-fuan, sai matan-delek ka kona moras rins. Ema barak neʼebé kona moras diabete mate tanba hetan atakasaun fuan ka stroke.

Tuir doutór sira dehan, ema neʼebé bokur, liuliu sira neʼebé iha bokur iha kabun ka kidan, mak fasil tebes atu kona moras diabete tipu 2. Liuliu se bokur barak liu iha pánkreas ka aten, neʼe bele hasusar ba isin-lolon atu kontrola midar iha raan laran. Saida deʼit mak ita bele halo atu moras diabete la bele kona ita?

1. Koko raan. Baibain antes atu kona moras diabete tipu 2, ema nia raan neineik-neineik sai midar liu no la normál. Tan neʼe, se ita koko raan no hatene ita-nia raan midar, ita tenke kontrola beibeik hodi hamenus fali raan midar neʼe. Se lae, raan midar neʼe sei aumenta liu toʼo ikusmai bele kona moras diabete neʼebé la iha ai-moruk atu kura. Maibé ema balu konsege duni hamenus raan midar no raan sai normál fali. Ema sira neʼebé komesa iha raan midar foufoun la hatene tanba ladún iha sinál. Tuir relatóriu ida, iha mundu tomak ema naʼin-316.000.000 mak iha raan midar no besik atu kona ona diabete, maibé barak liu mak la hatene. Porezemplu iha rai-Estadus Unidus, ema neʼebé iha kondisaun hanesan neʼe, porsentu 90 mak la hatene.

Ema neʼebé iha raan midar ikusmai bele kona moras diabete no fasil mós atu kona moras sira seluk hanesan moras deménsia (moras neon nian). Se Ita-Boot mak bokur liu, ladún book an ka halo ezersísiu ka iha família neʼebé kona ona moras diabete, karik Ita-Boot mós bele iha raan midar. Ita-Boot bele hatene ida-neʼe se bá koko raan.

2. Han hahán neʼebé diʼak ba saúde. Bele koko toʼok atu halo tuir sujestaun balu tuirmai neʼe: Hamenus hahán neʼebé ita han. Duké hemu buat neʼebé midar liu, diʼak liu hemu bee, xá ka kafé neʼebé la kahur ho masin-midar barak. Duké han foos mutin ka trigu mutin, diʼak liu han foos rai ka fore sira neʼebé natoon deʼit. Han ikan no naʼan neʼebé la iha mina barak.

3. Book an ka halo ezersísiu beibeik. Ezersísiu bele hamenus raan midar no bele kontrola isin nia todan normál, la bokur liu ka krekas liu. Doutór ida fó sujestaun, duké uza tempu barak atu nonton deʼit televizaun diʼak liu halo ezersísiu.

Maski ita la bele halakon ita-nia kondisaun saúde nian neʼebé hetan husi inan-aman, maibé ita bele kontrola ita-nia saúde liuhusi ita-nia han-hemu loroloron no atividade sira atubele prevene moras oioin la bele kona ita. Hodi nuneʼe ita bele iha saúde neʼebé diʼak nafatin.