IHA buat barak neʼebé la hanesan iha rai-Itália. Porezemplu, iha parte ida mak tasi-ibun neʼebé furak, maibé iha parte seluk mak foho kapás sira. Manas iha parte súl, maibé parte norte malirin tebes. Rai neʼe mós iha foho vulkániku barak, maibé balu deʼit hanesan foho ho naran Stromboli no Etna mak ativu, ka bele nakfera.

Husi rai hotu iha Europa, rai-Itália mak iha ema barak tebes neʼebé hela rabat malu. Iha tempu uluk, ema husi rai oioin inklui mós ema arabi, bizantinu, gregu, norman, no fenísiu, ema sira-neʼe liu beibeik fatin neʼe.

Rai neʼe mak riku kona-ba istória no dezeñu oioin neʼebé furak. Parte balu husi uma antigu sira neʼebé ema romanu no gregu sira halo iha tempu uluk, sei bele haree iha sidade kiʼik no sidade boot sira. Ema ho naran-boot hanesan Bernini, Michelangelo, no Raphael halo dezeñu sira, estátua sira husi mármore, no bee-suli sira neʼebé kapás iha rai neʼe.

Ai-han mak buat ida neʼebé importante tebes ba ema italianu sira-nia moris loroloron nian no sira-nia tradisaun. Baibain, sira han uluk pasta, tuirmai sira han naʼan ka ikan ho modo. Rai neʼe iha azeiti barak, tan  neʼe sira uza beibeik. Pizza no risotto mak ai-han ema italianu nian neʼebé ema barak hatene.

Ema barak hatene ema italianu sira nuʼudar ema neʼebé sempre oin-midar, laran-luak, no gosta ransu ho ema seluk. Baibain, sira gosta atu koʼalia ho ema, tan neʼe iha fatin públiku ka iha jardín ita haree sira barak koʼalia halimar ho ema seluk.

Populasaun barak liu iha rai-Itália dehan katak sira katóliku, maibé ema uitoan deʼit mak badinas bá igreja. Ema barak dehan katak husi tinan balu liubá, igreja nia kbiit sai menus. Ida-neʼe tanba ema barak lakohi halo tuir ona buat neʼebé igreja haruka, no mós sira la halo tuir tan igreja nia lei kona-ba halo abortu no soe-malu.

Maibé Testemuña ba Jeová sai barak ba beibeik iha rai-Itália. Ema barak hatene sira tanba sira-nia serbisu haklaken no hanorin kona-ba Bíblia, no mós sira moris tuir Bíblia nia matadalan. Iha rai-Itália, Testemuña ba Jeová iha kongregasaun 3.000 liu, no kongregasaun barak la haklaken deʼit ba ema italianu, maibé haklaken mós ba ema sira neʼebé koʼalia língua seluk. Serbisu atu hanorin Bíblia ba ema neʼebé koʼalia língua seluk aumenta liután, tanba ema estranjeiru iha rai-Itália sai barak ba dala tolu husi tinan 10 liubá.