Halo uluk buat neʼebé importante. Bíblia hatete: “Buka-hatene loloos buat sira neʼebé importante liu.” (Filipe 1:10) Halo lista kona-ba serbisu importante ka buat urjente neʼebé ita tenke halo. Kuandu ita halo lista, hanoin-hetan katak dala ruma buat neʼebé mak importante hanesan sosa hahán, karik neʼe la urjente. No buat neʼebé ita hanoin mak urjente, hanesan tenke fila uma lalais atu haree programa iha televizaun neʼebé ita gosta tebes, karik neʼe la importante. *

Halo planu nanis. Eskritura iha Eclesiastes (Pengkhotbah) 10:10 hatete: “Se sasán besi ida la kroʼat no ema ida la kadi, ema neʼebé uza neʼe tenke hakaʼas an. Maibé hodi uza matenek, neʼe ajuda atu hetan susesu.” Saida mak ita bele aprende husi eskritura neʼe? Kuandu ita halo planu nanis, neʼe hanesan ita kadi ita-nia baliu. Hodi halo planu nanis ita bele uza ita-nia tempu ho matenek. Se serbisu ruma ladún importante, karik ita bele halo ikus, ka la presiza halo serbisu neʼe tanba soe deʼit ita-nia tempu no forsa. Se ita halo ona serbisu ida no ita haree katak ita iha tempu tan, diʼak atu komesa serbisu tuirmai neʼebé ita hakerek ona iha lista. Hodi halo planu nanis ita bele halo buat barak liu, neʼe hanesan badain ida neʼebé kadi beibeik ninia baliu.

Halo Ita-nia moris simples. Aprende atu dehan ‘lae’ kona-ba buat ruma neʼebé ladún importante neʼebé gasta deʼit Ita-nia tempu. Halo atividade barak liu bele aumenta Ita-nia estrese no halo Ita la kontente.

Demora atu halo serbisu ka foti desizaun. Bíblia hatete: “Ema neʼebé hateke ba anin sei la kari fini, no ema neʼebé hateke ba kalohan sei la koʼa.” (Eclesiastes [Pengkhotbah] 11:4) Saida mak ita bele aprende husi eskritura neʼe? Kuandu ita demora atu halo ita-nia serbisu, ita bele lakon tempu no mós rezultadu diʼak husi serbisu neʼe. Porezemplu, toʼos-naʼin ida neʼebé hein toʼo tempu diʼak, karik sei nunka kuda ka koʼa iha ninia toʼos. Nuneʼe mós, tanba ita la hatene saida mak sei akontese iha ita-nia moris, ida-neʼe halo ita dada an atu foti desizaun neʼebé metin. Ka karik ita sente katak ita presiza hein toʼo ita hatene informasaun hotu-hotu mak foin halo desizaun. Klaru katak atu foti desizaun neʼebé importante, ita presiza hanoin didiʼak no buka informasaun. Eskritura iha Provérbios (Amsal) 14:15 hatete: “Ema neʼebé matenek hanoin uluk kona-ba nia hakat sira.” Maibé tuir loloos, ita la bele hatene buat hotu antes halo desizaun ruma.—Eclesiastes (Pengkhotbah) 11:6.

Lakohi atu halo sala. Eskritura iha Tiago 3:17 hatete: “Matenek husi lalehan [ka husi Maromak] . . . la ulun-toos.” Klaru katak ita hotu hakarak halo buat hotu ho didiʼak. Maibé dala ruma, ita-nia hakarak mak atu halo buat hotu ho perfeitu no kuandu ita la kumpre, ida-neʼe halo ita sente laran-tun. Porezemplu, ema ida neʼebé aprende atu koʼalia língua foun tenke prontu atu koʼalia sala, no rekoñese katak nia sei aprende husi ninia sala. Maibé ema neʼebé lakohi atu halo sala, karik sei taʼuk tebes atu koʼalia sala, no ida-neʼe sei hanetik nia atu aprende koʼalia língua foun neʼe. Tan neʼe, diʼak liu atu haraik-an no rekoñese katak ita la bele halo buat hotu ho perfeitu. Eskritura iha Provérbios (Amsal) 11:2 hatete: “Matenek hela ho ema haraik-an.” Liután neʼe, ema neʼebé haraik-an la hanoin demais kona-ba sala neʼebé sira halo.

Serbisu no halimar. Bíblia hatete: “Diʼak liu atu deskansa duké liman rua neʼebé nakonu ho serbisu makaʼas no hakaʼas an atu duni tuir anin.” (Eclesiastes [Pengkhotbah] 4:6) Ema neʼebé serbisu hela deʼit baibain la fó tempu ba sira-nia an atu haksolok ho rezultadu husi sira-nia “serbisu makaʼas”. Dala barak sira la iha ona forsa atu halo ida-neʼe. Maibé, ema neʼebé baruk-teen deskansa hela deʼit no lakon tempu neʼebé folin-boot. Bíblia anima ita atu tetu didiʼak. Halo serbisu makaʼas no haksolok husi rezultadu diʼak. Ida-neʼe mak “prezente husi Maromak”.—Eclesiastes (Pengkhotbah) 5:19.

Toba tuir oras. Hakerek-naʼin ida iha Bíblia hatete: “Haʼu sei latan no toba-dukur ho hakmatek.” (Salmo [Mazmur] 4:8) Baibain, ema boot sira presiza toba maizumenus oras ualu kalan-kalan atu hetan fali sira-nia forsa no atu iha saúde neʼebé diʼak. Tuir loloos, importante tebes atu toba tuir oras tanba ida-neʼe ajuda ita atu tau atensaun no hanoin-hetan informasaun, no ajuda ita atu aprende buat foun lalais. Maibé, kuandu ita toba la tuir oras, ida-neʼe halo ita neineik atu aprende buat ruma no bele hamosu asidente, fasil ba ita atu halo sala, no halo ita sai hirus lalais.

Halo planu neʼebé ita bele kumpre. Bíblia hatete: “Diʼak liu haksolok ho buat neʼebé matan haree duké duni buat neʼebé isin hakarak.” (Eclesiastes [Pengkhotbah] 6:9) Eskritura neʼe katak sá? Ema neʼebé matenek la husik ninia isin nia hakarak ukun ninia moris, liuliu se ninia hakarak neʼe la bele hetan. Tan neʼe, maski iklan sira halo ho didiʼak, maibé nia la husik ninia laran monu ba buat sira-neʼe. Nia aprende atu sai kontente ho “buat neʼebé matan haree”, ka buat neʼebé nia bele hetan.

Hanoin kona-ba matadalan neʼebé Ita tuir. Matadalan neʼebé Ita tuir bele hatudu sai saida mak diʼak, iha folin, no importante. Nuneʼe, se Ita husik buat neʼebé diʼak atu dirije Ita, ida-neʼe ajuda Ita atu tau ulukliu buat neʼebé importante no ajuda Ita atu uza Ita-nia tempu ho matenek. Maibé, iha neʼebé mak ita bele hetan matadalan neʼebé diʼak? Ema barak estuda Bíblia tanba sira rekoñese katak Bíblia mak matenek hotu nia hun.—Provérbios (Amsal) 2:6, 7.

Hatudu domin nuʼudar Ita-nia hahalok importante liu. Eskritura iha Koloso 3:14 hatete: “Domin mak kesi ita hamutuk iha dalan neʼebé kompletu.” Se la iha domin, ita la bele hetan kontente neʼebé loos no la bele sente seguru, liuliu iha família laran. Ema neʼebé la rekoñese ida-neʼe, karik sira tau ulukliu atu buka rikusoin ka hetan naran-boot iha sira-nia moris. Maibé tuir loloos, halo ida-neʼe la lori kontente ba sira. Sin, Bíblia koʼalia loos kuandu dehan katak domin mak hahalok neʼebé importante tebes. Tanba ida-neʼe mak Bíblia temi kona-ba domin dala atus ba atus.—1 Korinto 13:1-3; 1 João 4:8.

Uza tempu atu haburas relasaun diʼak ho Maromak. Mane ida naran Geoff iha feen neʼebé hadomi nia, iha oan naʼin-rua, kolega sira neʼebé diʼak, no iha serbisu diʼak nuʼudar enfermeiru. Maski nuneʼe, iha ninia serbisu nia sempre haree ema neʼebé terus no mate. Nia husu ba nia an: “Moris mak hanesan neʼe deʼit ka lae?” Loron ida nia lee livru kona-ba Bíblia husi Testemuña ba Jeová, no nia hetan resposta ba ninia pergunta neʼe.

Geoff fó-hatene buat neʼebé nia foin lee ba ninia feen no oan sira, no sira mós hakarak hatene liután. Família neʼe hahú haburas relasaun diʼak ho Maromak no ida-neʼe ajuda sira atu sai kontente liu no ajuda sira atu uza sira-nia tempu ho matenek. Buat neʼebé sira estuda husi Bíblia mós fó sira esperansa kapás kona-ba moris rohan-laek iha mundu neʼebé la iha tan buat aat no terus.—Apokalipse 21:3, 4.

Geoff nia esperiénsia neʼe halo ita hanoin-hetan kona-ba Jesus Kristu nia liafuan neʼebé dehan: “Kontente ba sira neʼebé hatene katak sira presiza Maromak nia matadalan.” (Mateus 5:3) Ita mós prontu atu fó tempu uitoan atu haburas relasaun diʼak ho Maromak ka lae? Se Ita halo nuneʼe, neʼe sei ajuda Ita atu uza Ita-nia tempu ho matenek iha Ita-nia moris tomak.