LISAUN 05
Bíblia mak Maromak nia mensajen mai ita
Jeová fó prezente furak ida mai ita. Neʼe mak livru 66 neʼebé tau hamutuk hodi sai Bíblia. Karik Ita hanoin: “Oinsá mak Bíblia bele iha? Bíblia mai husi sé?” Mai ita buka-hatene resposta ba pergunta sira-neʼe.
1. Se ema mak hakerek Bíblia, tanbasá dehan neʼe mai husi Maromak?
Maizumenus mane naʼin-40 mak hakerek Bíblia durante maizumenus tinan 1.600 nia laran. Livru primeiru hakerek maizumenus tinan 3.500 liubá no livru ikus maizumenus tinan 1.900 liubá. No ema sira neʼebé hakerek Bíblia mai husi situasaun moris neʼebé la hanesan. Maibé Bíblia nia liafuan husi primeiru toʼo ikus la kontra malu. Oinsá mak bele hanesan neʼe? Tanba Bíblia mai husi Maromak. (Lee 1 Tesalónika 2:13.) Hakerek-naʼin sira la hakerek sira rasik nia hanoin. Sira “koʼalia liafuan husi Maromak tanba espíritu santu book sira atu fó sai liafuan sira-neʼe”. a (2 Pedro 1:21) Maromak uza ninia espíritu santu atu book ka motiva sira atu hakerek ninia hanoin.—2 Timóteo 3:16.
2. Bíblia bele ajuda sé deʼit?
Liafuan diʼak husi Bíblia bele ajuda ema husi “nasaun, suku, língua no povu hotu”. (Lee Apokalipse 14:6.) Ohin loron, Bíblia tradús iha língua barak liu fali livru sira seluk hotu. Kuaze ema hotu bele hetan Bíblia, maski sira hela iha neʼebé deʼit ka koʼalia língua saida deʼit.
3. Saida mak Jeová halo atu proteje Bíblia?
Ema hakerek Bíblia iha materiál neʼebé la dura kleur. Maibé ema neʼebé gosta tebes Bíblia, halo kopia ho didiʼak, depois ema seluk kopia tutan fali. Maski ukun-naʼin no ulun-naʼin relijiaun balu koko atu halakon Bíblia, maibé iha ema neʼebé tau sira-nia moris iha perigu laran atu proteje Bíblia. Sin, Jeová la husik buat naran deʼit atu hapara nia hodi bele komunika ho ita. Bíblia hatete: “Ita-nia Maromak nia liafuan sei hela ba nafatin.”—Isaias 40:8.
KEʼE KLEʼAN
Aprende liután kona-ba oinsá Maromak book ema atu hakerek Bíblia, oinsá nia proteje Bíblia, no oinsá ema barak bele hetan Bíblia.
4. Bíblia mai husi sé?
Loke VÍDEO. Depois lee 2 Timóteo 3:16, no koʼalia hamutuk kona-ba pergunta tuirmai.
-
Se ema mak hakerek Bíblia, tanbasá dehan neʼe Maromak nia Liafuan?
-
Ita hanoin Maromak bele deʼit tau ninia hanoin iha ema nia neon atu hakerek Bíblia ka lae? Tanbasá?
Sekretáriu mak hakerek karta, maibé mensajen sira iha laran mai husi patraun. Nuneʼe mós, ema mak hakerek Bíblia, maibé mensajen iha laran mak mai husi Maromak
5. Ema labele halakon Bíblia
Se Bíblia mak mai husi Maromak, ita bele fiar katak nia sei proteje ida-neʼe. Ba tinan barak, ema neʼebé iha pozisaun boot koko atu halakon Bíblia, no ulun-naʼin relijiaun sira mós lakohi ema atu lee Bíblia. Maski nuneʼe, ema barak tau sira-nia moris iha perigu laran atu proteje Bíblia. Atu hatene kona-ba mane ida neʼebé halo nuneʼe, loke VÍDEO, depois koʼalia hamutuk kona-ba pergunta tuirmai.
-
Tanba hatene katak iha ema barak mak sakrifika sira-nia an atu proteje Bíblia, neʼe halo Ita hakarak atu lee Bíblia ka lae? Tanbasá?
Lee Salmo 119:97, depois koʼalia hamutuk kona-ba pergunta tuirmai:
-
Saida mak book ema barak atu tau sira-nia an iha perigu laran hodi tradús no fahe Bíblia?
6. Livru ba ema hotu
Iha ema nia istória, Bíblia mak livru neʼebé tradús no fahe barak liu. Lee Apóstolu 10:34, 35, depois koʼalia hamutuk kona-ba pergunta tuirmai:
-
Tanbasá Maromak hakarak ninia Liafuan tradús ba língua barak no fahe ba ema hotu?
-
Husi lisaun neʼe, saida mak Ita gosta kona-ba Bíblia?
Besik
100%
husi ema iha mundu neʼe
iha Bíblia ho sira-nia língua rasik
Bele hetan Bíblia iha língua
3.000
liu neʼebé kompletu ka la kompletu
Prodús ona Bíblia hamutuk maizumenus
5.000.000.000
Neʼe barak liu fali kompara ho livru seluk
EMA BALU DEHAN: “Bíblia mak livru tuan deʼit neʼebé ema mak hakerek.”
-
Ita hanoin oinsá?
-
Evidénsia saida mak hatudu katak Bíblia mak Maromak nia Liafuan?
PONTU IMPORTANTE
Bíblia mak Maromak nia Liafuan, no nia hakarak atu ema hotu bele hetan ida-neʼe.
Rezumu
-
Maromak mak book ema atu hakerek Bíblia, neʼe katak sá?
-
Saida mak Ita gosta kona-ba dalan neʼebé Maromak proteje Bíblia?
-
Tanba hatene katak Maromak halo buat barak atu bele komunika ho Ita, neʼe halo Ita sente oinsá?
BUKA-HATENE LIUTÁN
Lee istória kona-ba oinsá mak Bíblia toʼo mai ita.
“Oinsá mak Bíblia toʼo mai ita” (Matan-moris bá!, Novembru 2007)
Aprende oinsá Bíblia iha toʼo agora maski hasoru susar oioin.
“Bíblia—Livru antigu neʼebé nunka lakon” (Livru Haklaken No. 4 2016)
Haree liután oinsá ema tau sira-nia moris iha perigu laran atu tradús Bíblia.
Ema tradús no kopia Bíblia dala barak ona. Oinsá mak Ita bele fiar katak ninia mensajen la troka?
“Ema troka Bíblia nia mensajen ka lae?” (Informasaun iha jw.org/tdt)
Karik Ita sei gosta
PERGUNTA SIRA NEʼEBÉ BAIBAIN EMA HUSU
Kursu Bíblia hanesan saida mak Testemuña ba Jeová oferese?
Ita bele uza tradusaun Bíblia naran deʼit atu halaʼo kursu Bíblia interativu ho Testemuña ba Jeová ho gratuitu. Bele mós konvida Ita-nia kolega no família tomak atu estuda hamutuk.
