1, 2. Tanbasá mak karreta nia apitu importante tebes? Oinsá mak ita bele kompara ida-neʼe ho ita-nia laran, ka kbiit neon nian atu hatene hahalok neʼebé diʼak no aat?

EMA ida kaer karreta iha dalan neʼebé iha karreta barak no ema barak laʼo ba laʼo mai. Derrepente deʼit ema laʼo ain atu hakat ba dalan sorin no nia la haree karreta neʼebé mai. Ema neʼebé kaer karreta neʼe, haree nia no apita kedas. Ida-neʼe halo ema neʼebé laʼo hakiduk ba kotuk. Nia sente kmaan tanba la iha buat ida neʼebé akontese ba nia. Ema neʼebé kaer karreta mós sente kmaan, sira foti liman ba malu no liu. Hanoin toʼok saida mak sei akontese se nia la apita? Ema laʼo ain neʼe bele hetan kanek ka mate.

² Karreta nia apitu mak parte ida deʼit husi karreta. Karreta nia apitu neʼebé diʼak no uza iha tempu neʼebé loos, bele salva ema nia moris. Ita bele kompara ida-neʼe ho prezente furak ida neʼebé Aman Jeová haraik mai ita. Neʼe mak kbiit neon nian neʼebé halo ita hatene hahalok neʼebé mak diʼak no neʼebé mak aat. Bíblia iha lia-tetun bolu kbiit neʼe nuʼudar “laran” no “konxiénsia”. (Roma 13:​5; Tiago 1:​17; 1 Pedro 3:​16) Se la iha kbiit neon nian neʼe, ita la iha matadalan ba ita-nia moris. Kuandu ita uza didiʼak kbiit neʼe, ida-neʼe bele ajuda ita hetan dalan moris nian neʼebé loos no tuir nafatin dalan ida-neʼe. Nuneʼe, mai ita haree oinsá mak ita bele uza kbiit neon neʼe atu halo desizaun. No depois ita sei koʼalia kona-ba pergunta tuirmai neʼe: (1) Oinsá mak ita treinu ita-nia kbiit neon nian hodi ita-nia laran sai moos nafatin? (2) Tanbasá mak ita tenke hanoin kona-ba oinsá ema seluk sente kona-ba hahalok neʼebé diʼak no aat? (3) Oinsá mak uza didiʼak kbiit neʼe bele lori bensaun mai ita?

3. Liafuan iha lia-gregu neʼebé tradús nuʼudar “laran”, ka “konxiénsia”, katak sá? Ema iha kbiit úniku atu halo saida?

³ Liafuan iha lia-gregu neʼebé tradús nuʼudar “laran” ka “konxiénsia” iha Bíblia iha lia-tetun, katak “hamutuk ho koñesimentu, ka koñesimentu ho an rasik”. Ita la hanesan ho animál tanba Maromak fó mai ita kbiit atu hatene ita-nia an rasik. Ida-neʼe katak ita bele para no hanoin kona-ba ita rasik nia an hodi hanoin didiʼak se ita-nia hahalok mak loos iha dalan morál nian. Ita-nia laran, ka kbiit neʼe, mak hanesan tesi-lia naʼin neʼebé buka-hatene kona-ba ita-nia hahalok, hanoin, no desizaun sira. Ita-nia laran bele sai matadalan neʼebé lori ita ba desizaun neʼebé diʼak ka fó avizu mai ita kona-ba desizaun neʼebé ladiʼak. Depois neʼe, ita-nia laran mak halo ita sente kmaan kuandu ita foti desizaun neʼebé loos, ka fó kastigu hodi halo ita sente laran-susar tanba foti desizaun neʼebé ladiʼak.

4, 5. (a) Oinsá mak ita hatene katak Adão no Eva iha kbiit atu hatene buat neʼebé diʼak no aat? Saida mak mosu ba sira tanba lakohi halo tuir Maromak nia ukun-fuan? (b) Iha tempu molok Kristu, fiar-naʼin sira-nia ezemplu saida mak hatudu katak sira uza kbiit atu hatene buat neʼebé diʼak no aat?

⁴ Horiuluk kedas Maromak tau iha mane no feto nia laran kbiit atu hatene buat neʼebé diʼak no aat. Adão no Eva hatudu katak sira iha duni kbiit neʼe. Ita bele hatene ida-neʼe tanba depois sira halo sala, sira sente moe. (Gênesis 3:7, 8) Hodi halo sala neʼe sira tuir sira rasik nia hakarak maski hatene katak sira kontra Maromak nia ukun-fuan. Nuneʼe, sira hatene duni katak sira hili atu kontra hasoru Maromak Jeová no sai ninia inimigu. Triste tebes, maski ikusmai sira-nia laran halo sira sente susar tebes, ida-neʼe saugati deʼit tanba sira halo sala tiha ona. Nuʼudar ema neʼebé perfeitu, sira hatene saida mak sira halo, no tarde ona ba sira atu fila fali ba Maromak.

⁵ La hanesan Adão no Eva, ema barak neʼebé la perfeitu husik sira-nia laran book sira antes sira halo sala. Porezemplu, mane ida neʼebé laran-metin, naran Job, dehan: “Ba lia-loos mak haʼu sei kaer metin, no haʼu sei la husik neʼe; haʼu-nia laran sei la dehan aat mai haʼu durante loron hotu iha haʼu-nia  moris.” * (Jó 27:6) Nia rona didiʼak ba ninia laran, neʼe katak nia uza kbiit neon nian nuʼudar matadalan ba nia hahalok sira no ninia desizaun sira. Nuneʼe, ho laran-ksolok tebes nia dehan katak ninia laran la dehan aat ba nia, ka la haterus nia hodi halo nia sente moe ka fó-sala ba nia an. Hanoin toʼok buat neʼebé la hanesan entre Job no David. David halo sala hodi la hatudu respeitu ba Saul, neʼebé Maromak Jeová hili hodi kose ho mina nuʼudar liurai, no “liutiha neʼe David nia laran nafatin fó-sala ba nia”. (1 Samuel 24:5) Tanba David nia laran fó-sala ba nia, ida-neʼe fó rezultadu neʼebé diʼak, hodi ajuda nia atu sees husi hahalok neʼebé la hatudu respeitu.

6. Oinsá mak ita hatene katak Maromak haraik kbiit neon nian atu hatene hahalok neʼebé diʼak no aat nuʼudar prezente ba ema hotu?

⁶ Maromak Jeová haraik kbiit neon nian atu hatene hahalok neʼebé diʼak no aat, ida-neʼe prezente ba ninia atan sira deʼit ka lae? Haree toʼok ba liafuan neʼebé Maromak haruka apóstolu Paulo hakerek neʼebé dehan: ‘Bainhira jentiu sira neʼebé la hatene ukun-fuan, moris tuir buat neʼebé ukun-fuan haruka tanba buat neʼebé iha ona sira-nia laran, buat hirak-neʼe mak ukun-fuan ona ba sira maski sira la iha ukun-fuan. Sira-neʼe hatudu katak ukun-fuan hakerek nanis ona iha sira-nia fuan, sira-nia laran fó sasin ba sira; no hanoin oioin dehan ba sira katak sira sala ka sira loos.’ (Roma 2:​14, 15) Maski ema la hatene Maromak Jeová nia ukun-fuan sira, dala ruma sira-nia laran bele book sira atu hatudu hahalok diʼak tuir Maromak nia matadalan sira.

7. Dala ruma, tanbasá mak ita-nia laran book ita atu halo buat neʼebé sala?

⁷ Maibé, dala ruma ita-nia laran bele book ita atu tuir dalan neʼebé sala. Tanbasá? Se karreta nia apitu aat, ita la bele uza, ka se  ema neʼebé kaer karreta la uza karreta nia apitu, asidente bele akontese. Nuneʼe mós, se ita hanoin demais atu buka deʼit ita-nia hakarak, ita-nia laran sei book ita atu halo buat neʼebé sala. No mós, se ita tuir ita-nia laran deʼit no la uza Maromak nia Liafuan nuʼudar matadalan, ita la bele hatene saida mak loos ka sala kuandu ita hakarak halo desizaun ruma neʼebé importante iha ita-nia moris. Tuir loloos, se ita hakarak ita-nia laran book ita atu halo buat neʼebé diʼak, ita presiza Maromak Jeová nia espíritu santu atu ajuda ita. Paulo hakerek: “Haʼu-nia laran fó sasin mai haʼu iha espíritu santu.” (Roma 9:1) Maibé, oinsá mak ita-nia laran bele tuir Maromak Jeová nia espíritu santu? Hodi treinu beibeik ita-nia laran.

8. (a) Oinsá mak ita-nia hakarak bele book ita-nia laran? Saida mak importante liu atu ita hanoin kuandu halo desizaun? (b) Tanbasá mak latoʼo ba ema kristaun atu iha laran neʼebé moos? (Haree nota-rodapé.)

⁸ Oinsá mak Ita halo desizaun tuir Ita-nia laran? Dala barak, ema balun halo desizaun hodi tuir deʼit sira-nia hanoin no sentimentu ka sira-nia hakarak kona-ba buat ruma. Depois neʼe, karik sira hatete: “Tuir haʼu-nia laran, ida-neʼe la sala.” Ita-nia hakarak bele sai makaʼas liu, toʼo bele book Ita-nia laran atu halo tuir deʼit Ita-nia hakarak. Bíblia hatete: “Laran mak makerek liu buat hotu-hotu no la bele kontrola. Sé mak bele hatene kona-ba nia?” (Jeremias 17:9) Nuneʼe, buat importante neʼebé ita tenke hanoin didiʼak laʼós kona-ba saida mak ita-nia laran hakarak. Maibé, ita hakarak hanoin uluk buat neʼebé halo kontente Maromak Jeová. *

9. Taʼuk ba Maromak katak sá? Oinsá mak taʼuk ba Maromak bele book ita-nia laran?

 ⁹ Kuandu ita treinu ita-nia laran no halo desizaun neʼebé tuir duni ida-neʼe, sei hatudu katak ita taʼuk ba Maromak, no la tuir deʼit ita rasik nia hakarak. Hanoin toʼok ezemplu kona-ba ida-neʼe. Neemias mak ema neʼebé laran-metin ba Maromak. Nuʼudar governadór ida, nia iha direitu atu haruka ema iha Jeruzalein atu selu impostu ba nia. Maibé, nia lakohi halo ida-neʼe. Tanbasá? Tanba karik Maromak sei sente laran-triste se nia fó-terus ba Maromak Jeová nia povu, no nia lakohi tebes atu halo ida-neʼe. Nia hatete: “Haʼu la halo hanesan neʼe tanba taʼuk ba Maromak.” (Neemias 5:​15) Importante tebes atu iha taʼuk neʼebé loos ba Maromak, katak ita ho laran tomak taʼuk atu halo ita-nia Aman iha lalehan sente triste. Se ita hatudu katak ita taʼuk ba Maromak iha dalan hanesan neʼe, sei book ita atu buka matadalan husi Maromak nia Liafuan kuandu ita halo desizaun ruma.

10, 11. Bíblia hatudu matadalan saida kona-ba hemu tua ka hemu alkol seluk? Oinsá mak ita simu Maromak nia ajuda atu halo tuir nia matadalan?

¹⁰ Porezemplu, hanoin toʼok kona-ba hemu tua, serveja ka hemu alkol seluk. Kuandu ita halibur hamutuk ho ema seluk, ita hotu tenke halo desizaun: Haʼu sei hemu ka lae? Ulukliu, ita tenke hanorin ita-nia an. Saida mak matadalan neʼebé Bíblia fó kona-ba ida-neʼe? Tuir loloos, Bíblia la bandu ita atu hemu alkol uitoan. Porezemplu, ema neʼebé hakerek livru Salmos mós fó glória ba Aman Jeová tanba tua mak prezente husi nia. (Salmo 104:14, 15) Maibé, Bíblia bandu hemu tua demais no hemu-lanu toʼo halo naranaran deʼit. (Lucas 21:34; Roma 13:13) Liután neʼe, Bíblia temi katak hemu-lanu hanesan ho sala boot sira seluk, hanesan sala-foʼer. *​—1 Korinto 6:9, 10.

¹¹ Atu iha laran neʼebé moos, ema kristaun ida simu hanorin husi Bíblia no husik Maromak nia matadalan book  ninia hanoin. Nuneʼe, kuandu halibur hamutuk ho ema seluk ita presiza halo desizaun se ita sei hemu tua ka lae. Ita bele husu pergunta hanesan neʼe: ‘Sé deʼit mak sei halibur an? Karik ema neʼebé tuir sei hemu toʼo halo naranaran deʼit ka lae? Kona-ba haʼu-nia an rasik, saida mak haʼu-nia haree kona-ba hemu? Haʼu sempre hakarak atu hemu ka lae? Haʼu depende ba hemu tua ka lae? Haʼu hemu tua atu haluha haʼu-nia problema ka troka haʼu-nia sentimentu ka lae? Haʼu bele ka lae, atu kontrola haʼu-nia an atu la hemu demais?’ Nuʼudar ita hanoin kona-ba Bíblia nia matadalan no pergunta sira hanesan neʼe, ita tenke husu Aman Jeová nia ajuda liuhusi orasaun. (Salmo 139:23, 24) Hodi halo buat hirak-neʼe, ita hakarak Maromak Jeová fó matadalan mai ita liuhusi ninia espíritu santu. No mós, ita treinu ita-nia laran hodi tuir Maromak nia matadalan. Maibé, iha buat ida tan neʼebé ita tenke hanoin didiʼak kuandu halo desizaun.

12, 13. Ema kristaun uza sira-nia kbiit neon nian atu hatene hahalok neʼebé diʼak no aat iha dalan neʼebé la hanesan. Tanbasá? Ita sei halo saida se ema seluk nia laran sente la hanesan ho Ita-nian?

¹² Karik dala ruma Ita hakfodak atu haree katak ema kristaun ida-idak uza sira-nia kbiit neon nian atu hatene hahalok diʼak no aat iha dalan neʼebé la hanesan. Ema ida hanoin no sente ladiʼak kona-ba toman ka hahalok ruma; maibé ema ida seluk gosta no hanoin katak toman ka hahalok sira-neʼe la sala. Porezemplu kona-ba hemu tua, ema kristaun ida gosta hemu hamutuk ho nia maluk balun kuandu sira tuur halimar iha lokraik; ema kristaun ida seluk sente ladiʼak kona-ba toman ida-neʼe. Tanbasá mak sira naʼin-rua nia laran sente la hanesan? Oinsá mak ida-neʼe kona ita-nia desizaun sira?

¹³ Ema ida la hanesan ho ema seluk tanba situasaun ka toman iha ema nia moris no hela-fatin la hanesan. Porezemplu, ema balun rekoñese katak uluk sira tenke luta hasoru problema ruma iha sira-nia moris​—karik sira sei luta hasoru problema neʼe toʼo agora. (1 Reis 8:38, 39) Baibain ema hanesan neʼe  sente katak nia presiza kuidadu kona-ba hemu tua. Se nia mai iha Ita-nia uma, karik ninia laran book nia atu lakohi simu tua neʼebé Ita fó ba nia. Se nuneʼe, Ita sente oinsá? Ita sente laran-kanek ka lae? Ita sei obriga nia atu hemu ka lae? Lae. Karik Ita hatene ka la hatene tansá nia la hemu tua, no karik nia deside atu la fó-hatene ninia razaun ba Ita​—Ita-nia domin ba Ita-nia maluk kristaun sei book Ita atu la obriga nia.

14, 15. Fó ezemplu kona-ba oinsá mak ema nia laran book sira atu halo desizaun neʼebé la hanesan ho ema kristaun seluk iha apóstolu sira-nia tempu? Apóstolu Paulo fó-hatene sira atu halo saida kona-ba ida-neʼe?

¹⁴ Iha apóstolu Paulo nia tempu, nia haree katak dala barak ema kristaun nia laran book sira atu halo desizaun neʼebé la hanesan ho ema kristaun seluk. Iha tempu neʼebá, ema kristaun balun neon-susar kona-ba ai-han neʼebé hasaʼe tiha ona ba buat lulik sira nuʼudar sakrifísiu. (1 Korinto 10:25) Kona-ba ai-han neʼe neʼebé faʼan iha merkadu, Paulo nia laran la bandu nia atu han. Ba nia, buat lulik la iha folin. Maski ema hanoin katak ai-han mak lulik nian, maibé ba Paulo tuir loloos ai-han mak Aman Jeová nian no mai husi nia. Maibé, Paulo komprende katak maluk sira seluk la hanoin hanesan nia kona-ba ida-neʼe. Karik antes sai ema kristaun, sira balun halo parte iha adorasaun ba buat lulik nian. Ba sira, sira odi buat saida deʼit neʼebé iha relasaun ho adorasaun ba buat lulik. Oinsá mak Paulo rezolve problema ida-neʼe?

¹⁵ Paulo hatete: “Ita neʼebé makaʼas sei iha pasiénsia ba ema kbiit-laek nia sala, hodi la buka ita rasik nia ksolok. Basá Kristu la buka fó ksolok ba nia an.” (Roma 15:1, 3) Paulo hatudu katak ita tenke tau ulukliu ita-nia irmaun sira-nia presiza duké ita-nian, hanesan Kristu halo. Paulo hatete iha eskritura seluk katak diʼak liu atu la han naʼan duké halo sidi bibi-malae ida neʼebé folin-boot, tanba Kristu fó tiha ona nia moris ba ema hotu.​—1 Korinto 8:13; 10:23, 24, 31-33.

16. Tanbasá mak ema nia laran neʼebé bandu sira atu la halo buat ruma, la bele tesi lia ba ema neʼebé laran la sente hanesan ho sira-nian?

¹⁶ Ema balun sira-nia laran bandu sira atu la halo buat ruma. Maibé, sira labele hatún maluk seluk, ka obriga maluk  seluk atu tuir sira rasik nia laran. (Roma 14:10) Tuir loloos, ita-nia laran sei tesi lia ba ita rasik nia an, laʼós atu tesi lia ba ema seluk. Hanoin fali ba Jesus nia liafuan: “Keta hanoin aat ema, atu ema la bele hanoin aat imi.” (Mateus 7:1) Iha kongregasaun laran, ita hotu-hotu hakarak sees husi haksesuk-malu kona-ba desizaun neʼebé ita halo hodi tuir ita ida-idak nia laran. Maibé, ita hakarak haburas domin no unidade, hametin malu laʼós hatún maluk sira.​—Roma 14:19.

17. Saida mak akontese ba ema barak nia laran ohin loron?

¹⁷ Apóstolu Pedro hakerek: “Halo imi-nia laran sai moos nafatin.” (1 Pedro 3:​16, MF) Se ita iha laran neʼebé moos iha Maromak Jeová nia oin, neʼe mak bensaun neʼebé furak tebes.  Maibé, ema barak ohin loron la iha laran neʼebé moos iha Maromak nia oin. Kona-ba ema hanesan neʼe, Paulo hatete katak “sira-nia laran iha kanek hanesan hanas ho besi manas”. (1 Timoteo 4:2, MF) Kulit neʼebé hanas tiha ho besi manas, ikusmai iha fitar no la sente tan buat ruma. Ema barak iha laran neʼebé toos duni​—hanesan fitar neʼebé sai toos no la sente buat ruma ona. Sira-nia laran la fó avizu tan ba sira, la kontra tan sira, ka la fó-sala ba sira-nia hahalok neʼebé laloos. Ohin loron ema barak gosta liu atu la rona tan ba sira-nia laran neʼebé fó-sala ba sira, sira dehan deʼit: “La buat ida.”

18, 19. (a) Se ita-nia laran fó-sala ita, neʼe bele book ita atu halo saida? (b) Ita bele halo saida, se ita-nia laran kastigu nafatin maski ita hakribi tiha ona ita-nia sala neʼebé uluk ita halo?

¹⁸ Tuir loloos, se ita-nia laran fó-sala ita, neʼe mak ita-nia kbiit neon nian neʼebé fó-hatene katak ita halo sala tiha ona.  Sentimentu hanesan neʼe bele book ema neʼebé halo sala atu hakribi nia sala, no maski sala neʼe aat tebes nia bele hetan perdua. Porezemplu, Liurai David halo sala neʼebé boot, maibé nia hetan perdua tanba nia ho laran tomak hakribi ninia sala. Nia odi ninia hahalok sala no tanba nia laran-metin atu halo tuir Maromak Jeová nia ukun-fuan, nia haree ho nia matan rasik katak Maromak Jeová “diʼak no prontu atu fó perdua”. (Salmo 51:​1-​19; 86:5) Maibé, oinsá se ita sente sala ka moe no ida-neʼe hatodan ita nafatin maski ita hakribi tiha ona ita-nia sala no hetan perdua?

¹⁹ Maski ita hakribi no hetan perdua ona, dala ruma ita-nia laran bele fó kastigu, no sente sala kona-ba hahalok uluk nian sei iha nafatin. Iha situasaun hanesan neʼe, diʼak atu fiar katak Maromak Jeová mak boot liu fali ita-nia sentimentu. Ita presiza fiar no simu Maromak nia domin no mós ninia perdua, nuʼudar ita mós fó laran-manas ba ema seluk atu simu ida-neʼe. (1 Joao 3:19, 20) Liután neʼe, laran neʼebé moos halo ita sente dame, hakmatek no haksolok tebes, neʼebé ema barak la hetan iha mundu neʼe. Ema barak neʼebé uluk halo sala boot, iha sentimentu hanesan neʼe no kaer nafatin laran neʼebé moos ohin loron nuʼudar sira serbí Maromak Jeová.​—1 Korinto 6:11.

20, 21. (a) Livru ida-neʼe sei ajuda Ita atu halo saida? (b) Nuʼudar ema kristaun, ita iha liberdade saida? Maibé oinsá mak ita tenke uza ida-neʼe?

²⁰ Livru ida-neʼe sei ajuda Ita atu hetan laran-ksolok neʼe, no atu nafatin iha laran neʼebé moos nuʼudar Ita moris iha loron ikus iha Satanás nia mundu aat neʼe. Livru kiʼik neʼe la fó lista kona-ba Bíblia nia ukun-fuan no matadalan sira hotu, neʼebé Ita presiza hanoin no halo tuir iha situasaun neʼebé mosu iha ita-nia moris loron-loron. No mós, Ita ida-idak iha responsabilidade atu halo desizaun barak tuir Ita-nia laran neʼebé treinu ona. Nuneʼe, livru neʼe sei ajuda Ita atu treinu Ita-nia laran hodi simu Bíblia nia hanorin no aprende oinsá mak halo tuir Maromak nia matadalan iha Ita-nia moris loron-loron. Moisés nia Ukun-Fuan iha ukun-fuan barak kona-ba buat neʼebé ema bele ka labele halo. Maibé, “Kristu nia ukun-fuan” hakarak  ema kristaun atu halo desizaun barak hodi uza sira-nia kbiit neon nian atu hatene hahalok diʼak no aat, no Maromak nia matadalan sira. (Galasia 6:2) Ida-neʼe mak liberdade furak neʼebé Maromak Jeová fó ba ema kristaun. Maibé, ninia Liafuan fó-hanoin fali mai ita atu nunka uza liberdade neʼe “atu halo aat”. (1 Pedro 2:16) Tan neʼe, liuhusi liberdade neʼe Aman Jeová fó ita oportunidade neʼebé furak tebes atu hatudu ita-nia domin ba nia.

²¹ Buat importante neʼebé ita presiza halo mak hanoin kona-ba Bíblia nia matadalan, halo orasaun no hakaʼas an atu moris tuir Maromak nia hakarak. Tuir loloos, Ita halo buat sira-neʼe ona husi tempu neʼebé Ita komesa aprende kona-ba Maromak Jeová. Diʼak atu nafatin halaʼo hakat importante sira-neʼe. Nuneʼe, Ita treinu no uza Ita-nia kbiit neon nian “atu hatene buat neʼebé diʼak husi buat neʼebé aat”. (Ebreu 5:14) Se Ita treinu Ita-nia laran tuir Bíblia, ida-neʼe sei fó bensaun ba Ita-nia moris loron-loron. Hanesan ho karreta nia apitu neʼebé uza atu fó avizu ba ema, Ita-nia laran sei ajuda Ita atu halo desizaun sira neʼebé halo kontente Ita-nia Aman iha lalehan. Hodi halo nuneʼe Ita sei hela nafatin iha Maromak nia domin.