HAREE korrente kesi metin Paulo nia liman, no mós soldadu Roma neʼebé hein nia. Paulo sai dadur iha Roma. Nia hein toʼo Sezar deside atu halo saida ba nia. Durante tempu neʼebé nia iha komarka, ema bele vizita nia.

Liutiha loron tolu depois Paulo toʼo tiha Roma, nia haruka mensajen ba ema-boot judeu sira iha Roma atu mai hasoru nia. Tan neʼe, ema judeu iha Roma barak mak mai. Paulo haklaken ba sira kona-ba Jesus no mós kona-ba Maromak nia reinu. Balu fiar no sai ema kristaun, maibé balu la fiar.

Paulo mós haklaken ba soldadu seluseluk neʼebé hein nia. Durante tinan rua nuʼudar dadur, Paulo haklaken ba ema hotu neʼebé hasoru nia. Tan neʼe mak ema sira neʼebé iha Sezar nia uma mós rona lia-foun diʼak kona-ba Reinu, no sira balu sai ema kristaun.

Maibé, sé mak vizita Paulo no hakerek daudauk iha meza iha neʼe? Ó bele siʼik ka lae? Loos, Timóteo. Uluk ema hatama Timóteo ba komarka tanba nia mós haklaken kona-ba Reinu, maibé agora nia livre ona. Nia mai iha neʼe atu ajuda Paulo. Hatene Timóteo hakerek saida? Mai ita haree hamutuk.

Ó hanoin-hetan sidade Filipe no Éfezu iha Istória 110? Paulo ajuda ema iha neʼebá atu harii kongregasaun kristaun iha sidade hirak-neʼe. Agora, husi komarka, nia hakerek surat ba maluk kristaun sira iha neʼebá. Surat neʼe iha Bíblia nia laran, naran livru Efeso no Filipe. Agora, Paulo hatete daudauk ba Timóteo liafuan neʼebé atu hakerek hodi hatoʼo ba ninia maluk kristaun iha Filipe.

Ema Filipe sira laran-diʼak tebes ba Paulo. Sira haruka prezente ba nia iha komarka iha neʼe, no Paulo hatoʼo obrigadu ba sira. Epafrodito mak lori prezente mai iha neʼe. Maibé nia sai moras tebes toʼo besik atu mate. Agora, nia sai diʼak ona no prontu atu fila fali. Nia sei lori surat husi Paulo no Timóteo kuandu nia fila fali ba Filipe.

Durante tempu neʼebé sei iha komarka, Paulo hakerek surat rua tan neʼebé iha ita-nia Bíblia nia laran. Ida mak surat ba ema kristaun sira iha sidade Kolosos. Ó hatene livru neʼe naran saida? Koloso. Ida seluk mak surat ketak ida ba ninia belun ida naran Filémon neʼebé mós hela iha Kolosos. Surat neʼe kona-ba Filémon nia atan naran Onésimo.

Onésimo halai tiha husi Filémon no mai toʼo Roma. Onésimo rona katak Paulo iha komarka laran iha neʼe. Nia vizita Paulo, no Paulo haklaken ba Onésimo. Lakleur, Onésimo mós sai ema kristaun ida. Entaun, Onésimo agora triste tanba nia halai tiha husi Filémon. Agora, hatene saida mak Paulo hakerek ba Filémon iha surat neʼe?

Paulo husu ba Filémon atu fó perdua ba Onésimo. Paulo hakerek: ‘Haʼu haruka nia fila fali ba ó. Maibé, agora nia laʼós deʼit ó-nia atan. Nia mós irmaun kristaun diʼak ida.’ Kuandu Onésimo fila ba Kolosos, nia lori surat rua, ida ba maluk sira iha Kolosos no ida seluk ba Filémon. Ita bele hanoin katak Filémon sai kontente loos kuandu hatene katak ninia atan sai fali ema kristaun ida.

Bainhira Paulo hakerek ba maluk iha Filipe no Filémon, nia iha lia-foun ruma neʼebé diʼak tebes. ‘Haʼu sei haruka Timóteo ba imi,’ Paulo hatete ba maluk iha Filipe. ‘Maibé lakleur, haʼu rasik mós sei vizita imi.’ Ba Filémon, nia hakerek: ‘Prepara fatin ida mai haʼu atu bele hela iha neʼebá.’

Kuandu sai livre, Paulo vizita ninia maluk kristaun sira iha rai barak. Maibé, Paulo sai fali dadur iha Roma. Agora, nia hatene katak ema sei oho nia. Nuneʼe, nia hakerek ba Timóteo no husu nia atu mai lalais. Paulo hakerek: ‘Haʼu laran-metin ba Maromak toʼo agora, no Maromak sei fó kolen mai haʼu.’ Ikusmai, ema oho tiha Paulo. Liutiha tinan balu, Jeruzalein naksobu dala ida tan, agora ema Roma mak ataka.

Maibé, sei iha buat barak liután iha Bíblia laran. Maromak Jeová haruka apóstolu João atu hakerek livru ikus balu, ida mak naran Apokalipse. Livru ida-neʼe fó-hatene mai ita kona-ba futuru. Mai ita aprende saida mak sei akontese ba aban-bainrua.